(ուժը կորցրել է 11.01.00 թիվ 4 որոշում)
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱՐԱՐՆԵՐԻ ԽՈՐՀՈՒՐԴ
ՈՐՈՇՈՒՄ
31 դեկտեմբերի 1991 թ. թիվ 697
i
ՄԻՋՊԵՏԱԿԱՆ ՏՆՏԵՍԱԿԱՆ ԱՍՈՑԻԱՑԻԱՆԵՐԻՆ ԵՎ ՁԵՌՆԱՐԿՈՒԹՅՈՒՆՆԵՐԻՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՁԵՌՆԱՐԿՈՒԹՅՈՒՆՆԵՐԻ ԱՆԴԱՄԱԿՑՈՒԹՅԱՆ ՄԱՍԻՆ
Նկատի ունենալով ԽՍՀՄ ճյուղային նախարարությունների և գերատեսչությունների տարբեր տեսակի տնտեսական ասոցիացիաների (միավորումներ, կոնցեռններ, կոնսորցիումներ, կորպորացիաներ և այլն), բաժնետիրական ընկերությունների և այլ ձեռնարկությունների վերակազմավորման գործընթացը, ու այդ կազմակերպություններին Հայաստանի Հանրապետության առանձին պետական ձեռնարկությունների անդամակցության նպատակահարմարությունը, Հայաստանի Հանրապետության կառավարությունը որոշում է.
1. Թույլատրել Հայաստանի Հանրապետության պետական իշխանության տեղական մարմինների ձեռնարկություններին անդամակցել այլ պետությունների տարածքում գործող տնտեսական ասոցիացիաներին (միավորումներին, կոնցեռններին, կոնսորցիումներին, կորպորացիաներին և այլն) և այլ տեսակի միջպետական ձեռնարկություններին միայն Հայաստանի Հանրապետության էկոնոմիկայի նախարարության և այն նախարարության կամ գերատեսչության համաձայնությամբ, որի ենթակայության տակ է գտնվում տվյալ ձեռնարկությունը:
2. Միջպետական ձեռնարկություններին Հայաստանի Հանրապետության պետական ձեռնարկությունների անդամակցումը չի կարող իրականացվել նրան իրավական կարգավիճակի, գույքային իրավունքների, կազմակերպական և արտադրատնտեսական ինքնուրույնության սահմանափակմամբ:
3. Հայաստանի Հանրապետության պետական ձեռնարկությունները իրավունք ունեն անդամակցելու միջպետական ձեռնարկություններին ինչպես ուղղակի, այնպես էլ Հայաստանի Հանրապետության տարածքում նրանց կողմից ստեղծված ասոցիացիաների և այլ տեսակի ձեռնարկությունների միջոցով:
4. Միջպետական ձեռնարկությանը անդամակցելու մասին պայմանագրում Հայաստանի Հանրապետության պետական ձեռնարկության համար պետք է նախատեսված լինի միջպետական ձեռնարկությունից վերջինիս դուրս գալու իրավունքը, կարգն ու պայմանները:
5. Առանց Հայաստանի Հանրապետության էկոնոմիկայի նախարարության և այն նախարարության կամ գերատեսչության թույլտվության, որի ենթակայության տակ է գտնվում Հանրապետության պետական ձեռնարկությունը, վերջինս չի կարող ընդունել պետական պատվերներ, ստանալ ֆինանսական միջոցներ հանրապետությունից դուրս գտնվող պետական ֆինանսավորման աղբյուրներից և այդ ձեռնարկություններում չի կարող ներդրվել այլ պետությունների կապիտալ (կենտրոնացված կապիտալ ներդրումներ):
6. Միջպետական ձեռնարկություններին անդամակից Հայաստանի Հանրապետության պետական ձեռնարկությունների արտադրանքի մատակարարման, աշխատանքների կատարման, ծառայությունների մատուցման արտահանման մասին պայմանագրերի կնքման և կատարման ժամանակ պահպանվում են արտահանման լիցենզավորման, արտահանման և ներմուծման մասին Հայաստանի Հանրապետության օրենսդրության պահանջները:
7. Հարկային քաղաքականության, ներառյալ ֆինանսական կարգավորման այլ միջոցների կիրառումը, ինչպես նաև միջպետական ձեռնարկություններին անդամակից Հայաստանի Հանրապետության պետական ձեռնարկությունների բյուջեների հետ հարաբերությունները կարգավորվում են Հայաստանի Հանրապետության օրենսդրությամբ:
8. Միջպետական ձեռնարկություններին անդամակից Հայաստանի Հանրապետության պետական ձեռնարկությունների լուծարումը կատարվում է համաձայն Հայաստանի Հանրապետության գործող օրենսդրության` լիազորված մարմինների կողմից:
9. Միջպետական ձեռնարկություններին անդամակից պետական ձեռնարկությունների նկատմամբ հակամենաշնորհային միջոցները իրականացվում են Հայաստանի Հանրապետության օրենսդրությանը համապատասխան:
10. Միջպետական ձեռնարկություններին անդամակից Հայաստանի Հանրապետության պետական ձեռնարկությունների սեփականաշնորհումը և ապապետականացումը կատարվում է միայն Հայաստանի Հանրապետության իրավասու մարմինների որոշմամբ և Հայաստանի Հանրապետության օրենսդրությանը համապատասխան:
11. Միջպետական ձեռնարկություններին անդամակցելու մասին հիմնադիր պայմանագրերի կնքման և անդամակցող պետական ձեռնարկությունների մասին կանոնադրությունների հաստատման ժամանակ սույն որոշման կատարման նկատմամբ վերահսկողությունը դրվում է Հայաստանի Հանրապետության արդարադատության նախարարության, ինչպես նաև այն նախարարության կամ գերատեսչության վրա, որի ենթակայության տակ է գտնվում միջպետական ձեռնարկությանն անդամակցող Հայաստանի Հանրապետության պետական ձեռնարկությունը: