(ուժը կորցրել է 21.06.99 թիվ 990 հրաման)
i
102.0283.010796
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ
ՀՐԱՄԱՆ
20.06.1996 Թ. ԹԻՎ 283
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԱՆՑԱԳՐԱՅԻՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
i
Հայաստանի Հանրապետության աշխատանքային օրենսգրքի 141 հոդվածի համաձայն և Հայաստանի Հանրապետության արդարադատության նախարարությունում աշխատանքային կարգապահության բարելավման նպատակով`
1/ հաստատել Հայաստանի Հանրապետության արդարադատության նախարարության անցագրային կարգը /կցվում է/:
2/ Նշված կարգի հետ ծանոթացնել արդարադատության նախարարության կենտրոնական ապարատի բոլոր աշխատողներին:
3/ Նշված կարգը կիրարկել ս/թ հուլիսի 1-ից:
ՀԱՍՏԱՏՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ
ՆԱԽԱՐԱՐԻ 20.06.1996 Թ. ԹԻՎ 283 ՀՐԱՄԱՆՈՎ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԱՆՑԱԳՐԱՅԻՆ ԿԱՐԳԸ
1/ Արդարադատության նախարարության շենք քաղաքացիների, արդարադատության համակարգի և ժողովրդական դատարանների աշխատողների, նախարարությունների, այլ գերատեսչությունների, հիմնարկների, ձեռնարկությունների և կազմակերպությունների ներկայացուցիչների մուտքը թույլատրվում է միայն համապատասխան անցաթուղթ /ձևը կցվում է/ ստանալուց հետո, բացառությամբ սույն կարգի 2-րդ կետով նախատեսված դեպքի:
2/ Առանց անցաթղթի ծառայողական վկայականներով արդարադատության նախարարության շենք մուտք գործելու իրավունք ունեն`
ա/ Ազգային Ժողովի պատգամավորները, նախարարները, սահմանադրական դատարանի անդամները.
բ/ գերագույն դատարանի նախագահը և նրա տեղակալները, գերագույն դատարանի անդամները, գլխավոր պետական արբիտրը, պետական արբիտրները.
գ/ գլխավոր դատախազը և նրա տեղակալները, դատախազության կառուցվածքային ստորաբաժանումները գլխավորող դատախազները, դատախազները.
դ/ Հանրապետության Նախագահի, Ազգային Ժողովի, կառավարության և սահմանադրական դատարանի աշխատակազմերի աշխատողները.
ե/ նախարարների տեղակալները, հանրապետական այլ գերատեսչությունների ղեկավարների տեղակալները, նախարարությունների և հանրապետական այլ գերատեսչությունների կառուցվածքային ստորաբաժանումների ղեկավարները.
զ/ կենտրոնական բանկի նախագահը և նրա տեղակալները.
է/ մարզպետները /Երևանի քաղաքապետը/, փոխմարզպետները /Երևանի փոխքաղաքապետը/, մարզպետարանների քարտուղարները /Երևանի քաղաքապետարանի քարտուղարը/.
ը/ շրջանային, քաղաքային ժողովրդական դատարանների նախագահները, ժողովրդական դատարանների դատավորները, ավագ դատական կատարածուները, դատական կատարածուները, գրասենյակների պետերը /քարտուղարները/.
թ/ շրջանային, քաղաքային պետական նոտարական գրասենյակների ավագ պետական նոտարները, պետական նոտարները.
ժ/ դատախազության, ազգային անվտանգության և ներքին գործերի մարմինների քննիչները /միայն դատական փորձաքննությունների գիտահետազոտական լաբորատորիա/.
ի/ քաղաքացիական կացության ակտերի գրանցման տարածքային բաժինների պետերը.
լ/ արդարադատության նախարարության համակարգի այլ աշխատողներ.
խ/ կապի նախարարության սուրհանդակային ծառայության աշխատակիցները:
3/ Արդարադատության նախարարության շենք մուտք գործելու մեկ մուտքի անցաթուղթը կարող են պատվիրել նախարարը, նախարարի առաջին տեղակալը և տեղակալը, նախարարի օգնականը, նախարարության վարչությունների և բաժինների պետերը, գլխավոր, առաջատար և առաջին կարգի խորհրդատուները, դատական փորձաքննությունների գիտահետազոտական լաբորատորիայի տնօրենը և բաժինների պետերը:
4/ Մեկ մուտքի անցաթուղթ պատվիրողը տվյալ անձին ճանապարհելիս անցաթղթի վրա նշում է կատարում դրա ժամկետը լրանալու մասին: Շենքից դուրս եկող քաղաքացին պարտավոր է անցաթուղթը հանձնել միլիցիայի հերթապահող աշխատակցին:
5/ Արդարադատության նախարարության շենք մուտք գործելու անցաթղթի տրամադրման մասին գրառումներ կատարելու համար ընդունարանում պահվում է գրանցամատյան, որտեղ նշվում են անցաթղթի տրամադրման ամիս-ամսաթիվը, տրամադրողի անուն-ազգանունը, մուտք գործողի անուն-ազգանունը և ներկայացրած փաստաթղթերի /անձնագիր կամ դրան փոխարինող այլ փաստաթուղթ/ տվյալները:
6/ Արդարադատության նախարարության շենքից նախարարության հաշվեկշռում գտնվող նյութական արժեքները դուրս են բերվում հատուկ անցագրի հիման վրա, որը վավերացնում է ֆինանսա-տնտեսական բաժնի պետը:
7/ Սույն կարգի ապահովման պարտականությունները դնել ֆինանսա-տնտեսական բաժնի վրա:
8/ Սույն կարգի ապահովման նկատմամբ վերահսկողությունը դնել նախարարի առաջին տեղակալի և տեղակալի վրա:
9/ Սույն կարգը մշակվել է համաձայն Հայաստանի Հանրապետության աշխատանքային օրենսգրքի 141 հոդվածի:
ԳՐԱՆՑՎԱԾ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ «01» 07 1996 Թ. ՊԵՏԱԿԱՆ ԳՐԱՆՑՄԱՆ ԹԻՎ 01960036