i
ԱՌԵՎՏՐԻ ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԻՐԱՆԻ ԻՍԼԱՄԱԿԱՆ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ
Նախաբան
Հայաստանի Հանրապետության կառավարությունը և Իրանի Իսլամական Հանրապետության կառավարությունը, այսուհետ` Կողմեր,
հաշվի առնելով առևտրական հարաբերությունների զարգացման ու ամրապնդման գործում փոխադարձ շահարգրգռվածությունը և ընդլայնելով ու զարգացնելով հավասարության, անխտրականության և փոխշահավետության վրա հիմնված համագործակցությունը,
համաձայնեցին ներքոհիշյալի մասին.
ՀՈԴՎԱԾ 1. ՀԱՄԱՁԱՅՆԱԳՐԻ ՇՐՋԱՆԱԿՆԵՐԸ
Կողմերի միջև իրականացվող առևտրային փոխառաքումները, երկու երկրների ֆիզիկական և իրավաբանական անձանց միջև կնքված կոնտրակտները իրականացվում են սույն Համաձայնագրի շրջանակներում և Կողմերից յուրաքանչյուրի օրենսդրության համապատասխան:
ՀՈԴՎԱԾ 2. ՎԵՐԱԱՐՏԱՀԱՆՈՒՄ ԵՐՐՈՐԴ ԵՐԿԻՐ
Սույն Համաձայնագրի հիման վրա երկու Կողմերի միջև փոխառաքվող ապրանքները կարող են վերաարտահանվել երրորդ երկրներ արտահանող Կողմի թույլտվությամբ:
ՀՈԴՎԱԾ 3. ԱՊՐԱՆՔՆԵՐԻ ԾԱԳՄԱՆ ՍԵՐՏԻՖԻԿԱՏՆԵՐ ՏԱԼԸ
Կողմերից յուրաքանչյուրը, իր օրենսդրության համաձայն, պատշաճ միջոցներ է ձեռնարկում մյուս Պայմանավորվող կողմ արտահանվող ապրանքների ծագման սերտիֆիկատներ տալու համար: Այս նպատակով Իրանում ամբողջությամբ արտադրված ապրանքները համարվում են իրանական արտադրանքներ, Հայաստանում արտադրված ապրանքները` հայկական արտադրանքներ:
ՀՈԴՎԱԾ 4. ՄԱՔՍԱՏՈՒՐՔԵՐ ԵՎ ՄԱՔՍԱՎՃԱՐՆԵՐ
Կողմերը պայմանավորվում են, սույն Համաձայնագրի շրջանակներում և յուրաքանչյուր երկրի օրենսդրության համաձայն, բարենպաստ պայմաններ ստեղծել երկկողմ առևտրի զարգացման համար:
Պայմանավորվող կողմերից մեկի ապրանքների նկատմամբ սահմանված մաքսատուրքերը և մաքսավճարները չպետք է գերազանցեն այլ երկրների նմանօրինակ ապրանքների նկատմամբ սահմանված մաքսատուրքերին և մաքսավճարներին:
ՀՈԴՎԱԾ 5. ԱՐՏՈՆՈՒԹՅՈՒՆՆԵՐ
Սույն Համաձայնագրով տրամադրված արտոնությունները չեն ներառում հետևյալը.
ա) արտոնություններ, որոնք Պայմանավորվող կողմերից մեկը տրամադրել է կամ կտրամադրի հարևան երկրին` սահմանամերձ առևտուրը հեշտացնելու նպատակով,
բ) արտոնություններ, որոնք տրամադրվել կամ կարող են տրամադրվել որևէ պետության ազատ առևտրի գոտում, մաքսային միություններում կամ ռեգիոնալ պայմանագրերում:
ՀՈԴՎԱԾ 6. ՀԱՐԿԵՐ
Կողմերը համաձայնում են չկիրառել արտահանման և ներմուծման համար հարկերի, մաքսատուրքերի և այլ անհրաժեշտ գանձումների վերաբերյալ նոր և ավելի խիստ նորմատիվ ակտեր, բացառությամբ այն դեպքերի, երբ պահպանվում են հետևյալ պայմանները.
- այդ նորմատիվ ակտերը հրապարակվում և փոխանակվում են լիազորված մարմինների միջև,
- պաշտոնական տեղեկացումից հետո անցել է երեք ամիս,
- հարկերի և մաքսերի վերաբերյալ հայցերի նախնական պատրաստում:
ՀՈԴՎԱԾ 7. ՈՉ ՏԱՐԻՖԱՅԻՆ ԿԱՐԳԱՎՈՐՈՒՄ
Կողմերը, փոխադարձ առևտրային հարաբերություններ զարգացնելու նպատակով, համաձայնում են վերացնել ոչ տարիֆային արգելքները կամ փոխադարձաբար միմյանց տրամադրել ոչ տարիֆային արտոնություններ, համաձայն Հավելվածի, որը կհամաձայնեցվի Կողմերի միջև:
ՀՈԴՎԱԾ 8. ՏԱՐԱԴՐԱՄԱՅԻՆ ՎՃԱՐՈՒՄՆԵՐԻ ԵՎ ԳԱՆՁՈՒՄՆԵՐԻ ՀԱՄԱԿԱՐԳ
Սույն Համաձայնագրի իրականացումից բխող բոլոր գանձումները, վճարումները կկատարվեն Կողմերի միջև համաձայնեցված տարադրամով` Կողմերի կենտրոնական բանկերի միջև ստորագրված համաձայնագրերի հիման վրա:
ՀՈԴՎԱԾ 9. ՄԱՍՆԱԿՑՈՒԹՅՈՒՆ ՏՈՆԱՎԱՃԱՌՆԵՐԻՆ
Պայմանավորվող կողմերը կխրախուսեն իրենց առևտրային ընկերություններին և կազմակերպություններին մասնակցելու մյուս երկրում կազմակերպվող միջազգային կամ մասնագիտացված տոնավաճառներին և իրենց հնարավորությունների սահմաններում կօժանդակեն մյուս Կողմի առևտրային ընկերություններին և կազմակերպություններին:
Ցուցահանդեսի կամ տոնավաճառի նպատակով մի Պայմանավորվող կողմի տարածք մյուս Պայմանավորվող կողմի ներմուծած ապրանքներից մաքսատուրքերի, հարկերի և այլ վճարումների գանձումները կամ դրանցից ազատումը կատարվում են 1961 թվականի հունիսի 8-ին Բրյուսելում կնքված Ցուցահանդես-վաճառքների, հանդիպումների կամ նմանատիպ միջոցառումների համար ապրանքների ներմուծման համար արտոնությունների վերաբերյալ Կոնվենցիային համապատասխան:
ՀՈԴՎԱԾ 10. ԱՌԵՎՏՐԱԿԱՆ ՆԵՐԿԱՅԱՑՈՒՑՉՈՒԹՅՈՒՆՆԵՐԻ ՍՏԵՂԾՈՒՄԸ
Կողմերի միջև ապրանքների, ծառայությունների և առևտրական տեղեկության փոխանակումը հեշտացնելու և զարգացնելու նպատակով Կողմերից յուրաքանչյուրը կթույլատրի իր տարածքում հիմնել առևտրական ներկայացուցչություն: Վերը նշված ներկայացուցչության աշխատողների, սարքավորումների և մասնաճյուղերի քանակը Կողմերի միջև կորոշվի առանձին համաձայնագրով:
ՀՈԴՎԱԾ 11. ԱՌԵՎՏՐԱԿԱՆ ՀԱՐԱԲԵՐՈՒԹՅՈՒՆՆԵՐԻ ԸՆԴԼԱՅՆՈՒՄ
Առևտրական հարաբերությունները զարգացնելու նպատակով Կողմերը կխրախուսեն իրենց ֆիզիկական և իրավաբանական անձանց գործելու միջազգային առևտրի կանոնների համաձայն, կխրախուսեն իրենց առևտրային պալատներին ավելի սերտ և արդյունավետ համագործակցելու, կփոխանակեն առևտրային պատվիրակություններ, կհրավիրեն մասնագիտացված սեմինարներ և կոնֆերանսներ:
ՀՈԴՎԱԾ 12. ՀԱՄԱՏԵՂ ՀԱՆՁՆԱԺՈՂՈՎ
Կողմերը համաձայնում են ստեղծել իրենց ներկայացուցիչներից կազմված համատեղ հանձնաժողով, որը կգումարի նիստեր տարին մեկ անգամ` հաջորդաբար յուրաքանչյուր երկրի տարածքում: Հանձնաժողովի գործառույթ/պարտականություններն են`
ա) սույն Համաձայնագրի կատարման նկատմամբ վերահսկողություն,
բ) սույն Համաձայնագրի կատարման ընթացքում առաջացած դժվարությունների վերացման լուծումների մշակում,
գ) երկկողմանի առևտրի զարգացման և ընդլայնման ուղիների վերանայում և ուսումնասիրություն:
ՀՈԴՎԱԾ 13. ՎԵՃԵՐԻ ԿԱՐԳԱՎՈՐՈՒՄ
Սույն Համաձայնագրի շրջանակներում Կողմերի միջև ծագած վեճերը կլուծվեն բարեկամական բանակցությունների և խորհրդակցությունների միջոցով: Փոխհամաձայնության չհասնելու դեպքում վեճերը կլուծվեն արբիտրաժի միջոցով, որը կկազմվի երկու Կողմերի ներկայացուցիչներից` համաձայն Կողմերի օրենսդրության և միջազգային պրակտիկայում ընդունված կարգի:
ՀՈԴՎԱԾ 14. ՀԱՆՐԱՅԻՆ ԱՌՈՂՋՈՒԹՅԱՆ ԵՎ ԱԶԳԱՅԻՆ ՇԱՀԵՐԻ ՊԱՇՏՊԱՆՈՒԹՅՈՒՆ
Սույն Համաձայնագրի դրույթները չեն սահմանափակում Պայմանավորվող կողմերի իրավունքները` սահմանելու արգելքներ կամ սահմանափակումներ ազգային շահերի, հանրային առողջության պաշտպանության և/կամ բույսերի կամ կենդանիների հիվանդությունների կանխման կապակցությամբ:
ՀՈԴՎԱԾ 15. ՀԱՄԱՁԱՅՆԱԳՐԻ ԳՈՐԾՈՂՈՒԹՅԱՆ ԺԱՄԿԵՏԸ
Սույն Համաձայնագիրն ուժի մեջ է մտնում Պայմանավորվող կողմերի օրենսդրությամբ նախատեսված անհրաժեշտ ընթացակարգերի կատարման վերաբերյալ համապատասխան փաստաթղթերի փոխանակման օրվանից և կգործի հինգ տարվա ընթացքում: Այս ժամկետը լրանալուց հետո սույն Համաձայնագրի գործողությունը երկարացվում է 1 տարով, եթե Պայմանավորվող կողմերից մեկը նախօրոք, ոչ պակաս, քան 6 ամիս առաջ, մյուս Կողմին չի ծանուցում Համաձայնագրի գործողությունը դադարեցնելու իր մտադրության մասին:
Սույն Համաձայնագրի գործողության դադարեցման դեպքում նրա դրույթները կկիրառվեն Համաձայնագրի գործողության ժամանակահատվածում կնքված բոլոր պայմանագրերի նկատմամբ` մեկ տարի ժամկետով, եթե Կողմերը այլ բան չպայմանավորվեն:
Կատարված է Թեհրան քաղաքում` նախաբանով և 15 հոդվածով, 1995 թվականի մայիսի 6-ին, երեք լեզուներով` հայերեն, պարսկերեն և անգլերեն, երկուական բնօրինակով. բոլոր տեքստերն էլ հավասարազոր են: Տարաձայնությունների դեպքում նախապատվությունը տրվում է անգլերեն տեքստին:
Համաձայնագիրն ուժի մեջ է մտել 1997 թվականի հունվարի 18-ից: