ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒԹՅԱՆ ԵՎ ՌՈՒՄԻՆԻԱՅԻ ԿԱՌԱՎԱ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՌՈՒՄԻՆԻԱՅԻ ԿԱՌԱՎԱՐՈՒԹՅԱՆ ՄԻՋԵՎ ԷՆԵՐԳԵՏԻԿԱՅԻ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ԶԱՐԳԱՑՄԱՆ ՄԱՍԻՆ

Հայաստանի Հանրապետության կառավարությունը և Ռումինիայի կառավարությունը, այսուհետ` Կողմեր,

նկատի ունենալով միջազգային համագործակցության աճող դերը էներգետիկայի համակարգում,

ճանաչելով երկու երկրների միջև տեխնիկական համագործակցության առանձնակի կարևորությունը,

ձգտելով ընդլայնել համատեղ գործողությունները էներգետիկայի բնագավառում,

հետևելով տնտեսական հարաբերություններում իրավունքների հավասարության և փոխշահավետության և միջազգային իրավունքի այլ սկզբունքներին,

որոշեցին կնքել սույն Համաձայնագիրը և

պայմանավորվեցին ներքոհիշյալի մասին.

ՀՈԴՎԱԾ 1

Կողմերը կաջակցեն միմյանց էներգետիկայի բնագավառում գիտական ու տեխնիկական համագործակցությանը, իրենցից յուրաքանչյուրի ներքին օրենսդրության համաձայն, ինչպես միջկառավարական, այնպես էլ համապատասխան գերատեսչությունների մակարդակով:

Հատուկ ջանքերը կուղղվեն նման համագործակցության խրախուսմանը հետևյալ ուղղություններում.

1. հիդրոէներգետիկական և հիդրոտեխնիկական կառույցների դիագնոստիկա և վերականգնում,

2. փոքր հզորության հիդրոէլեկտրակայանների համատեղ կառուցում և շահագործում, նախագծում,

3. փոքր հիդրոէլեկտրակայանների հիմնական սարքավորումների արտադրության կազմակերպում,

4. փոքր հիդրոէլեկտրակայանների կարգավորման և ավտոմատ կառավարման սարքավորումների արտադրության կազմակերպում, այդ թվում` համատեղ ձեռնարկության կարգավիճակով,

5. նավթավերամշակման գործարանի կառուցման կամ քիմիական արդյունաբերության` «Պոլիվինիլացետատ» գործարանի վերապրոֆիլավորման նախագծերի հիմնավորման մշակում և հետագա իրացում,

6. մասնագետների փոխանակում և որակավորման բարձրացում նավթի հանույթի, վերամշակման, տեղափոխման բնագավառներում,

7. համագործակցության հետագա ծավալում էներգետիկայի բնագավառում` ըստ Սևծովյան տարածաշրջանային էներգետիկական կենտրոնի ծրագրի,

8. համագործակցության հետագա ծավալում միջուկային էներգետիկայի անվտանգության բնագավառում:

ՀՈԴՎԱԾ 2

Նշված գիտական և տեխնիկական համագործակցությունը կիրականացվի հետևյալ միջոցներով.

1. գիտական և տեխնիկական տեղեկության ու փաստաթղթերի փոխանակում,

2. փոխադարձ հետաքրքրություն ներկայացնող համատեղ էներգետիկ հետազոտական ծրագրերի մշակում,

3. փոխադարձ համագործակցություն էներգաշինարարության բնագավառում:

Համագործակցության կոնկրետ ծրագրերը, որպես կանոն, կիրագործվեն պայմանագրային հիմունքներով:

ՀՈԴՎԱԾ 3

Սույն Համաձայնագրին համապատասխան` համագործակցության յուրաքանչյուր կոնկրետ ոլորտին առնչվող հարցերով աշխատանքային ծրագրեր կկազմվեն և կիրականացվեն երկու երկրների իրավասու պետական մարմինների միջև կնքված համաձայնագրերի հիման վրա:

Պայմանավորվող կողմերի իրավասու ներկայացուցիչները պարբերաբար` տարին մեկ անգամ, կարող են փոխադարձաբար հանդիպել Հայաստանում և Ռումինիայում` սույն Համաձայնագրի դրույթների կատարման ապահովման և աշխատանքային ծրագրերի խթանման ու վերահսկման ուղղությամբ համապատասխան միջոցառումներ մշակելու և իրականացնելու նպատակով:

ՀՈԴՎԱԾ 4

Սույն համագործակցության Համաձայնագրի բոլոր ծախսերը` կապված պատվիրակությունների միջազգային ճամփորդությունների հետ, կկատարվեն ուղարկվող երկրի կողմից: Ընդունող Կողմը կկատարի ժամանող պատվիրակության հյուրընկալության ծախսերը:

ՀՈԴՎԱԾ 5

Համագործակցության սույն Համաձայնագիրը ուժի մեջ է մտնում երկու երկրների գործող օրենսդրության համաձայն, իրավասու մարմինների կողմից վավերացման վերաբերյալ ծանուցումը ստանալու պահից և կգործի 5 տարի ժամկետով` սկսած ստորագրման պահից:

Համաձայնագիրը ինքնաբերաբար կերկարաձգվի հաջորդ հնգամյա ժամանակահատվածով, եթե Կողմերից ոչ մեկը համապատասխան ժամկետի ավարտից 6 ամիս առաջ չտեղեկացնի մյուս Կողմին դրա գործողությունը դադարեցնելու իր մտադրության մասին:

Կատարված է 1996 թվականի մարտի 25-ին, երկու բնօրինակով, հայերեն, ռումիներեն և անգլերեն, բոլոր տեքստերն էլ հավասարազոր են:

Տեքստի մեկնաբանման ժամանակ տարաձայնություններ առաջանալու դեպքում կգերակայի անգլերեն տեքստը:

Համաձայնագիրն ուժի մեջ է մտել 1997 թվականի հունվարի 24-ից: