i
ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԿԻՊՐՈՍԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ՏՆՏԵՍԱԿԱՆ, ԱՐԴՅՈՒՆԱԲԵՐԱԿԱՆ ԵՎ ՏԵԽՆՈԼՈԳԻԱԿԱՆ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Հայաստանի Հանրապետության կառավարությունը և Կիպրոսի Հանրապետության կառավարությունը, այսուհետ` Պայմանավորվող կողմեր,
ցանկանալով խրախուսել տնտեսական, արդյունաբերական և տեխնոլոգիական համագործակցության զարգացումը իրավահավասարության և փոխշահավետության հիման վրա,
ընդունելով այդ համագործակցության բարեհաջող զարգացման համար երկարաժամկետ միջոցառումների կարևորությունը,
նշելով, որ Հայաստանի Հանրապետության տնտեսական կառույցներում և մեխանիզմներում կատարվող կարևոր փոփոխությունները նոր հեռանկարներ են բացում և կարող են նպաստել երկու Կողմերի միջև տարբեր մակարդակներով կապերի և համագործակցության ամրապնդմանը, ներառյալ ձեռնարկատերերի միջև անմիջական կապերը,
համաձայնեցին ներքոհիշյալի մասին.
ՀՈԴՎԱԾ 1
1. Պայմանավորվող կողմերը, իրենց համապատասխան օրենսդրության և կանոնակարգերի շրջանակներում և պաշտոնական քաղաքականության համապատասխան, ինչպես նաև հաշվի առնելով իրենց ստանձնած միջազգային պարտավորությունները, ջանքեր կգործադրեն` ուղղված տնտեսական, արդյունաբերական և տեխնոլոգիական համագործակցության զարգացմանը և ամրապնդմանը հնարավորինս լայն շրջանակներում, որը կընդգրկի փոխշահավետ և փոխադարձ հետաքրքրություն ներկայացնող բոլոր ոլորտները:
2. Այդ համագործակցության նպատակները պետք է լինեն, մասնավորապես.
Պայմանավորվող կողմերի միջև տնտեսական կապերն ամրապնդելը և բազմազան դարձնելը,
նոր շուկաների բացումը,
ձեռնարկատերերի միջև համագործակցության զարգացման խրախուսում` կապիտալ ներդրումներին, համատեղ ձեռնարկություններին, լիցենզիոն համաձայնագրերին, ինչպես նաև նրանց միջև համագործակցության այլ ձևերին աջակցելու նպատակով:
ՀՈԴՎԱԾ 2
1. Առաջին հոդվածում նշված համագործակցությունը կընդլայնվի, մասնավորապես, հետևյալ ուղղություններով.
արդյունաբերություն,
գյուղատնտեսություն, ներառյալ` ագրոարդյունաբերություն,
դեղաբանություն,
բնակարանային և այլ շինարարություն,
տրանսպորտ, ներառյալ օդային, ցամաքային և ծովային,
կապ,
բանկային, ապահովագրական և այլ ֆինանսական ծառայություններ,
զբոսաշրջություն,
սոցիալական բնագավառում համագործակցություն,
փոքր և միջին ձեռնարկություններ,
խորհրդատվական ծառայություններ:
2. Պայմանավորվող կողմերը կխորհրդակցեն միմյանց հետ` միմյանց միջև համագործակցության առաջնահերթ, ինչպես նաև տնտեսական, արդյունաբերական և տեխնոլոգիական համագործակցության նոր ոլորտներ սահմանելու համար, և կգործեն` չխախտելով իրենց համապատասխան օրենսդրությունը ու կանոնակարգերը և չհակասելով վերջինիս շրջանակներում իրականացվող պաշտոնական քաղաքականությանը:
ՀՈԴՎԱԾ 3
1. Սույն Համաձայնագրով նախատեսված տնտեսական և արդյունաբերական համագործակցությունը հիմնականում կիրականացվի հայկական և կիպրական ձեռնարկությունների, կազմակերպությունների և ֆիրմաների միջև ստորագրված համաձայնագրերի և պայմանագրերի հիման վրա` յուրաքանչյուր Պայմանավորվող կողմի օրենսդրության համաձայն:
2. Պայմանավորվող կողմերը ջանքեր կգործադրեն վերոհիշյալ գործունեությունը դյուրացնելու համար` բարենպաստ պայմաններ ստեղծելով տնտեսական և արդյունաբերական համագործակցության համար, մասնավորապես.
նպաստավոր մթնոլորտ կստեղծեն կապիտալ ներդրումների համար,
առևտրական և տնտեսական բնույթի տեղեկության փոխանակման դյուրացում,
ձեռնարկատերերի միջև փոխանակումների և պայմանագրային գործունեության դյուրացում,
ցուցահանդեսների, գիտաժողովների կազմակերպման դյուրացում:
ՀՈԴՎԱԾ 4
Պայմանավորվող կողմերը բարենպաստ պայմաններ կստեղծեն միմյանց, ինչպես նաև իրենց համապատասխան կազմակերպությունների կամ ֆիրմաների միջև տեխնիկական համագործակցության զարգացման համար` իրենց ազգային շահերին և օրենսդրությանը համապատասխան:
Այդ համագործակցությունը, ի թիվս այլոց, կարող է ունենալ հետևյալ ձևերը.
ընդհանուր հետազոտական ծրագրերի մշակում,
մասնագիտացված պատվիրակությունների այցելությունների և ուսումնական շրջագայությունների կազմակերպում,
փոխադարձ հետաքրքրություն ներկայացնող բնագավառներում ուսումնական ծրագրերի կազմակերպում,
տեխնիկական և գիտական փորձաքննության անցկացում,
գիտաժողովների և հանդիպումների կազմակերպում,
փոխադարձ հետաքրքրություն ներկայացնող վերապատրաստման ծրագրերի կազմակերպում:
ՀՈԴՎԱԾ 5
1. Սույն Համաձայնագրի դրույթների կատարումն ապահովելու նպատակով կստեղծվի Համատեղ հանձնաժողով:
2. Համատեղ հանձնաժողովը կկազմվի Պայմանավորվող կողմերից յուրաքանչյուրի ներկայացուցիչներից, և դրա հանդիպումները տեղի կունենան Կողմերից որևէ մեկի խնդրանքով: Հանդիպման վայրը և ժամանակը կորոշվեն Կողմերի փոխադարձ համաձայնությամբ:
3. Համատեղ հանձնաժողովը կհսկի սույն Համաձայնագրի կատարումը և անհրաժեշտության դեպքում հանձնարարականներ կներկայացնի դրա դրույթների կատարման հետ կապված:
ՀՈԴՎԱԾ 6
1. Պայմանավորվող կողմերը միմյանց կծանուցեն սույն Համաձայնագրի ուժի մեջ մտնելու համար պահանջվող ներպետական ընթացակարգերի կատարման մասին: Սույն Համաձայնագիրն ուժի մեջ կմտնի վերջին ծանուցագրի ստացման օրվանից:
2. Սույն Համաձայնագիրը ստորագրվում է առաջիկա 5 տարվա ժամկետով: Եթե Պայմանավորվող կողմերից որևէ մեկը սույն Համաձայնագրի գործողության ժամկետի ավարտից 6 ամիս առաջ մյուս Կողմին չծանուցի սույն Համաձայնագրի գործողությունը դադարեցնելու մասին, սույն Համաձայնագրի գործողությունը կերկարաձգվի 10 տարի ժամկետով, և յուրաքանչյուր Պայմանավորվող կողմ կարող է համապատասխան ժամկետի լրանալուց 6 ամիս առաջ ծանուցել մյուս Կողմին սույն Համաձայնագրի դադարեցման մասին:
Կատարված է Երևան քաղաքում 1998 թվականի սեպտեմբերի 11-ին, երկու բնօրինակով, յուրաքանչյուրը` հայերեն, հունարեն և անգլերեն, ընդ որում բոլոր տեքստերն էլ հավասարազոր են: Մեկնաբանության ընթացքում որևէ տարաձայնություն առաջանալու դեպքում նախապատվությունը կտրվի անգլերեն տեքստին:
Համաձայնագիրն ուժի մեջ է մտել 1999 թվականի հուլիսի 7-ից: