i
ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅԱՆ ԵՎ ՌՈՒՍԱՍՏԱՆԻ ԴԱՇՆՈՒԹՅԱՆ ԳՅՈՒՂԱՏՆՏԵՍՈՒԹՅԱՆ ԵՎ ՊԱՐԵՆԻ ՆԱԽԱՐԱՐՈՒԹՅԱՆ ՄԻՋԵՎ ԱԳՐՈԱՐԴՅՈՒՆԱԲԵՐԱԿԱՆ ՀԱՄԱԼԻՐԻ ԲՆԱԳԱՎԱՌՈՒՄ ՏՆՏԵՍԱԿԱՆ ԵՎ ԳԻՏԱՏԵԽՆԻԿԱԿԱՆ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Հայաստանի Հանրապետության գյուղատնտեսության նախարարությունը և Ռուսաստանի Դաշնության գյուղատնտեսության և պարենի նախարարությունը, այսուհետ` Կողմեր,
նկատի ունենալով երկու երկրներում շուկայական հարաբերությունների հիմքի վրա ընթացող տնտեսական բարեփոխումների պայմաններում ագրոարդյունաբերական համալիրում փոխշահավետ համագործակցություն զարգացնելու և խորացնելու ձգտումը,
հաշվի առնելով Հայաստանի Հանրապետության և Ռուսաստանի Դաշնության միջև պատմականորեն ձևավորված տնտեսական և գիտատեխնիկական կապերը,
ղեկավարվելով Հայաստանի Հանրապետության և Ռուսաստանի Դաշնության միջև բարեկամության, համագործակցության և փոխադարձ օգնության մասին 1997 թվականի օգոստոսի 28-ի Պայմանագրով, ինչպես նաև ԱՊՀ երկրների կառավարությունների կողմից ագրոարդյունաբերական համալիրին վերաբերող հարցերի միջպետական փոխհարաբերությունների մասին 1993 թվականի մարտի 29-ի Համաձայնագրով,
համաձայնեցին ներքոհիշյալի մասին.
ՀՈԴՎԱԾ 1
Կողմերը կիրականացնեն համագործակցություն վստահության, հավասարության և փոխշահավետության հիման վրա` համաձայն Կողմերի պետությունների ներքին օրենսդրության:
Կողմերը կխրախուսեն պետական և սեփականության այլ ձևերի ու ենթակայության կազմակերպությունների միջև ուղղակի կապերի զարգացումը, բոլոր մակարդակներով անհրաժեշտ աջակցություն և օգնություն կցուցաբերեն փոխադարձ համագործակցության կոնկրետ մասնակիցներին:
ՀՈԴՎԱԾ 2
Փոխադարձ համագործակցությունը կիրականացվի հետևյալ հիմնական ուղղություններով.
1) բուսաբուծություն, այդ թվում` գյուղատնտեսական մշակաբույսերի սերմնաբուծություն,
2) անասնապահություն, այդ թվում` տոհմային գործ,
3) գյուղատնտեսական արտադրության մեքենայացում և ավտոմատացում, այդ թվում` երկու երկրների ագրոարդյունաբերական համալիրի բնագավառում գյուղատնտեսական մեքենաների առանձին տեսակների յուրացում և ներդրում, տեխնիկական սպասարկումների կատարելագործում և գյուղատնտեսական տեխնիկայի վերանորոգման բազայի զարգացում,
4) սննդի և վերամշակման ճյուղեր, այդ թվում` սննդամթերքի արտադրության և վերամշակման ձեռնարկությունների արդիականացում,
5) տնտեսվարման նոր ձևերի զարգացում, ֆերմերային տնտեսությունների, ասոցիացիաների և բաժնետիրական ընկերությունների կազմակերպում և կայացում,
6) ագրոարդյունաբերական համալիրի բնագավառում բարեփոխումների իրականացմանը և սեփականաշնորհմանը վերաբերող խորհրդակցություններ և աջակցություն,
7) գիտական հետազոտություններ:
Համագործակցությունը կիրականացվի նաև այլ փոխհամաձայնեցված ուղղություններով, որոնք կապահովեն սույն Համաձայնագրի իրականացումը:
ՀՈԴՎԱԾ 3
Կողմերը կաջակցեն ագրոարդյունաբերական համալիրի համար գյուղատնտեսական մթերքների և նյութատեխնիկական պաշարների փոխադարձ ներկրումների ուղղությամբ երկու պետությունների ձեռնարկատիրական կառույցների միջև անմիջական կապերի իրականացմանը:
ՀՈԴՎԱԾ 4
Համագործակցությունը սույն Համաձայնագրի շրջանակներում կարող են իրականացվել հետևյալ ձևերով.
1) գիտատեխնիկական և տնտեսական տեղեկատվության և գիտական հետազոտությունների արդյունքների փոխանակում, գիտաժողովների, սեմինարների և ցուցահանդեսների անցկացում,
2) բուսաբուծության, անասնաբուծության և վերամշակման արդյունաբերությունում ժամանակակից տեխնոլոգիաների ներդրում,
3) սերմերի նմուշների, գյուղատնտեսական կենդանիների, տնկանյութի, մեքենաների և սարքավորումների փոխանակում` փորձարկումներ իրականացնելու համար,
4) գիտատեխնիկական և արտադրական կոոպերացիա, համատեղ ձեռնարկությունների, բաժնետիրական ընկերությունների ստեղծում, կոոպերացված արտադրությունների կազմակերպում, կոնկրետ գործընկերների միջև ուղղակի արտադրական կապեր,
5) մասնագետ-ստաժորների փոխանակում,
6) Կողմերի փոխադարձ պայմանավորվածությամբ համագործակցության այլ ձևեր:
ՀՈԴՎԱԾ 5
Սերմերի նմուշների, տեխնիկայի, կենդանիների և այլ արտադրանքի, ինչպես նաև հրապարակված տեղեկատվության փոխանակում կիրականացվի մտավոր սեփականության բնագավառում Կողմերից յուրաքանչյուրի ներքին օրենսդրությանը համապատասխան:
ՀՈԴՎԱԾ 6
Սույն Համաձայնագրի արդյունավետ իրականացման նպատակներով Կողմերը պարբերաբար կանցկացնեն հանդիպումներ, ղեկավարների և մասնագետների մակարդակով համագործակցության առաջնային ուղղությունները որոշելու, համատեղ նախագծերի և ծրագրերի իրականացումը, փոխադարձ հետաքրքրություն ներկայացնող հարցերի վերաբերյալ խորհրդակցությունները համակարգելու համար:
ՀՈԴՎԱԾ 7
Սույն Համաձայնագիրը ուժի մեջ է մտնում դրա ուժի մեջ մտնելու համար անհրաժեշտ Կողմերի ներպետական ընթացակարգերի կատարման մասին ծանուցագրերի փոխանակման օրվանից և կգործի անորոշ ժամկետով:
Կողմերից յուրաքանչյուրը կարող է դադարեցնել սույն Համաձայնագրի գործողությունը` այն դադարեցնելու իր մտադրության մասին մյուս Կողմին գրավոր ծանուցելուց վեց ամիս հետո:
ՀՈԴՎԱԾ 8
Կողմերի փոխադարձ համաձայնությամբ` Համաձայնագրում կարող են կատարվել փոփոխություններ և լրացումներ, որոնք կձևակերպվեն առանձին արձանագրություններով, կհանդիսանան սույն Համաձայնագրի անբաժանելի մասը և ուժի մեջ կմտնեն սույն Համաձայնագրի 7-րդ հոդվածով նախատեսված կարգով:
Կատարված է Երևան քաղաքում 1999 թվականի նոյեմբերի 26-ին, երկու բնօրինակով, յուրաքանչյուրը` հայերեն և ռուսերեն, ընդ որում երկու տեքստերն էլ հավասարազոր են:
Համաձայնագիրն ուժի մեջ է մտել 2000 թվականի սեպտեմբերի 11-ից: