i
ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԲԵԼԱՌՈՒՍԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ՍՏԱՆԴԱՐՏԱՑՄԱՆ, ՉԱՓԱԳԻՏՈՒԹՅԱՆ, ՍԵՐՏԻՖԻԿԱՑՄԱՆ ԵՎ ՀԱՎԱՏԱՐՄԱԳՐՄԱՆ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
Հայաստանի Հանրապետության կառավարությունը և Բելառուսի Հանրապետության կառավարությունը, այսուհետ` Կողմեր,
իրենց երկրների միջև տնտեսական և առևտրական հարաբերություններում տեխնիկական խոչընդոտների վերացման նպատակով,
ցուցաբերելով համագործակցությունը զարգացնելու ձգտում ստանդարտացման, չափագիտության, լաբորատորիաների և սերտիֆիկացման մարմինների հավատարմագրման, ինչպես նաև արտադրանքի, անձնակազմի և որակի համակարգերի սերտիֆիկացման ոլորտում, ելնելով տվյալ ոլորտներում միջազգային կազմակերպությունների կողմից ընդունված սկզբունքներից և նորմերից,
ղեկավարվելով երկու Կողմերի պետությունների տնտեսական շահերով,
երկու պետություններում գործող օրենսդրության շրջանակներում,
համաձայնեցին ներքոհիշյալի մասին.
ՀՈԴՎԱԾ 1
Կողմերը փոխադարձաբար ճանաչում են իրենց երկրներում գործող ստանդարտացման, չափումների միասնականության ապահովման, սերտիֆիկացման և հավատարմագրման պետական (ազգային) համակարգերը:
Կողմերը`
միմյանց միջև համաձայնեցված կարգով փոխադարձաբար ճանաչում են չափման միջոցների պետական փորձարկումների, տեսակի հաստատման, ստուգաչափման, ստուգաճշտման և չափագիտական վկայագրման արդյունքները և այն կազմակերպությունները, որոնք կատարում են ստուգաչափման և փորձարկման լաբորատորիաների և կենտրոնների հավատարմագրում, ինչպես նաև նրանց կողմից հավատարմագրված լաբորատորիաները և կենտրոնները, որոնք իրականացնում են չափման միջոցների ստուգաչափում, փորձարկումներ և ստուգաճշտում,
ճանաչում են մյուս Կողմի հավատարմագրված սերտիֆիկացման մարմինները, ստուգաչափական և փորձարկման լաբորատորիաները (կենտրոնները), փոխադարձաբար առաքվող արտադրանքի համապատասխանության սերտիֆիկատները և նշանները` սույն Համաձայնագրի 6-րդ հոդվածում մարմինների կողմից որոշվող` համաձայնեցված կարգով,
ճանաչում են Կողմերի ճանաչմանն արժանացած` սերտիֆիկացման միջազգային և ազգային համակարգերում տրված փորձագետ-աուդիտորների սերտիֆիկատները,
կիրառում են մյուս Կողմի ստանդարտացման, չափագիտության, սերտիֆիկացման և հավատարմագրման նորմատիվ փաստաթղթերը, եթե նրանց պահանջները չեն հակասում տվյալ պետության գործող օրենսդրության համաձայն` ստանդարտացման, չափագիտության և սերտիֆիկացման ազգային մարմնի կողմից գործողության մեջ դրված սահմանված կարգին:
ՀՈԴՎԱԾ 2
Կողմերն իրականացնելու են միմյանց միջև համագործակցությունը համաձայնագրերի, արձանագրությունների և ծրագրերի հիման վրա, որոնք նախատեսում են.
համագործակցություն ստանդարտացման, չափագիտության, սերտիֆիկացման և հավատարմագրման նորմատիվ և մեթոդական փաստաթղթերի մշակման ընթացքում,
կադրերի պատրաստում և որակավորման բարձրացում,
ֆիզիկական մեծությունների միավորների ազգային չափանմուշների և ելակետային նմուշային չափման միջոցների ստեղծում, կատարելագործում և համեմատում,
նյութի և նյութերի բաղադրությունների և հատկությունների, ստանդարտ նմուշների, ինչպես նաև նյութի և նյութերի ֆիզիկական հաստատունների և հատկությունների մասին ստանդարտ տեղեկատվության ստեղծում և օգտագործում,
ստանդարտացման, չափումների միասնականության ապահովման, սերտիֆիկացման և հավատարմագրման պետական (ազգային) համակարգերի հետագա զարգացում, կատարելագործում և ներդաշնակեցում,
ստանդարտացման, չափագիտության, սերտիֆիկացման և հավատարմագրման բնագավառում տեղեկատվական գործունեության զարգացում:
ՀՈԴՎԱԾ 3
Կողմերը կաջակցեն միմյանց ստանդարտացման, չափագիտության, սերտիֆիկացման և հավատարմագրման բնագավառում այն միջազգային կազմակերպություններին անդամագրվելուն, որոնց անդամ է Կողմերից մեկը, և այդ կազմակերպություններում աշխատանքներ կատարելուն:
ՀՈԴՎԱԾ 4
Կողմերն ապահովում են ստացվող փաստաթղթերի և սույն Համաձայնագրի շրջանակներում կատարվող աշխատանքների և նվաճված գիտատեխնիկական արդյունքների մասին տեղեկության գաղտնիությունը, եթե փոխանցող Կողմը նշում է դրանց գաղտնիության մասին:
ՀՈԴՎԱԾ 5
Համագործակցության ընթացքում ստացած գիտատեխնիկական տեղեկությունը Կողմերից յուրաքանչյուրը կարող է ազատ օգտագործել, եթե մյուս Կողմը չի նշել դրա գաղտնիության մասին, այդ տեղեկությունը կարող է փոխանցվել երրորդ կողմի միայն այն տրամադրող Կողմի համաձայնությամբ:
ՀՈԴՎԱԾ 6
Սույն Համաձայնագրով նախատեսված աշխատանքների համակարգումը և իրագործումը հանձնարարվում է.
Հայաստանի Հանրապետությունում` Հայաստանի Հանրապետության կառավարությանն առընթեր ստանդարտացման, չափագիտության և սերտիֆիկացման վարչությանը,
Բելառուսի Հանրապետությունում` Բելառուսի Հանրապետության ստանդարտացման, չափագիտության և սերտիֆիկացման պետական կոմիտեին:
ՀՈԴՎԱԾ 7
Սույն Համաձայնագրի դրույթներն անհրաժեշտության դեպքում կոնկրետացվում են սույն Համաձայնագրի 6-րդ հոդվածում նշված մարմինների միջև լրացուցիչ համաձայնագրերով և արձանագրություններով` Կողմերի պետությունների օրենսդրությամբ սահմանված կարգով:
ՀՈԴՎԱԾ 8
Սույն Համաձայնագիրը չի շոշափում այն իրավունքներն ու պարտականությունները, որոնք բխում են Կողմերի` նախկինում կնքած պայմանագրերից:
ՀՈԴՎԱԾ 9
Սույն Համաձայնագրի մեկնաբանման և կատարման հետ կապված բոլոր վիճելի հարցերը լուծվելու են Կողմերի փոխադարձ խորհրդակցությունների և բանակցությունների ճանապարհով` տարբեր մակարդակներով:
ՀՈԴՎԱԾ 10
Սույն Համաձայնագիրը կնքվում է անորոշ ժամանակով և ուժի մեջ է մտնում Համաձայնագիրն ուժի մեջ մտնելու համար Կողմերի պետությունների օրենսդրությամբ նախատեսվող բոլոր ներպետական ընթացակարգերի կատարման մասին Կողմերի վերջին գրավոր ծանուցման ստացման օրվանից:
Կողմերից յուրաքանչյուրը կարող է դադարեցնել սույն Համաձայնագրի գործողությունը` մյուս Կողմին գրավոր տեղեկացնելով իր մտադրության մասին:
Համաձայնագրի գործողությունը դադարում է այդ ծանուցումը մյուս Կողմի ստանալուց 6 ամիս հետո:
Սույն Համաձայնագրի մեկնաբանման ընթացքում առաջացած տարաձայնությունների դեպքում նախապատվությունը կտրվի ռուսերեն տեքստին:
Կատարված է Մինսկ քաղաքում 2000 թվականի հունվարի 18-ին, երկու բնագիր օրինակով, յուրաքանչյուրը` հայերեն և ռուսերեն, ընդ որում բոլոր տեքստերը հավասարազոր են:
Համաձայնագիրն ուժի մեջ է մտել 2000 թվականի հունիսի 29-ից: