040.0592.310505
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«31» մայիսի 2005 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
19 մայիսի 2005 թվականի N 592-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ԳՅՈՒՂԱՏՆՏԵՍՈՒԹՅԱՆ ԶԱՐԳԱՑՄԱՆ ՄԻՋԱԶԳԱՅԻՆ ՀԻՄՆԱԴՐԱՄԻ ՄԻՋԵՎ 2005 ԹՎԱԿԱՆԻ ՀՈՒՆՎԱՐԻ 28-ԻՆ ՍՏՈՐԱԳՐՎԱԾ «ԳՅՈՒՂԱԿԱՆ ՏԱՐԱԾՔՆԵՐԻ ՏՆՏԵՍԱԿԱՆ ԶԱՐԳԱՑՄԱՆ ԾՐԱԳԻՐ» ՓՈԽԱՌՈՒԹՅԱՆ ՀԱՄԱՁԱՅՆԱԳԻՐՆ ՈՒԺԻ ՄԵՋ ՄՏՆԵԼՈՒ ՄԻՋՈՑԱՌՈՒՄՆԵՐԻ ՄԱՍԻՆ
Հայաստանի Հանրապետության և Գյուղատնտեսության զարգացման միջազգային հիմնադրամի միջև 2005 թվականի հունվարի 28-ին ստորագրված ու 2005 թվականի մայիսի 2-ին Հայաստանի Հանրապետության Ազգային ժողովի կողմից վավերացված «Գյուղական տարածքների տնտեսական զարգացման ծրագիր» փոխառության համաձայնագիրը գործողության մեջ դնելու նպատակով, ինչպես նաև ղեկավարվելով նշված համաձայնագրի 7-րդ հոդվածի 7.1-ին բաժնով և N 3 հավելվածի 1-ին կետով սահմանված դրույթներով` Հայաստանի Հանրապետության կառավարությունը որոշում է.
1. Հայաստանի Հանրապետության գյուղատնտեսության նախարարությունը համարել գյուղական տարածքների տնտեսական զարգացման ծրագրի գլխավոր գործակալություն:
2. Գյուղական տարածքների տնտեսական զարգացման ծրագրի վարչական, ֆինանսական և գործառնական աշխատանքներն իրականացնելու նպատակով ստեղծել «Գյուղական տարածքների տնտեսական զարգացման ծրագրի վերլուծության և կառավարման գրասենյակ» պետական հիմնարկ:
3. (3-րդ կետն ուժը կորցրել է 28.04.11 թիվ 461-Ն որոշում)
i
4. Ստեղծել գյուղական տարածքների տնտեսական զարգացման ծրագրի համակարգող խորհուրդ:
i
5. Հայաստանի Հանրապետության գյուղատնտեսության նախարարին` մեկշաբաթյա ժամկետում Հայաստանի Հանրապետության վարչապետի հաստատմանը ներկայացնել գյուղական տարածքների տնտեսական զարգացման ծրագրի համակարգող խորհրդի կանոնադրությունը և անհատական կազմը:
6. Գյուղատնտեսության ծառայությունների ծրագրի ավարտման պատճառով դադարեցնել «Գյուղատնտեսական ծառայությունների ծրագրի կոորդինացման գրասենյակ» և «Ջրօգտագործողների միավորումներին աջակցության կենտրոն» պետական հիմնարկների գործունեությունը:
7. Հայաստանի Հանրապետության գյուղատնտեսության նախարարին` երկամսյա ժամկետում`
ա) ապահովել սույն որոշման 6-րդ կետում նշված պետական հիմնարկների լուծարման և գործունեության դադարեցման գործընթացը.
բ) ներկայացնել համապատասխան առաջարկություն «Հայաստանի Հանրապետության գյուղատնտեսության նախարարության աշխատակազմ» պետական կառավարչական հիմնարկին հանձնվող գույքի կազմում փոփոխություն կատարելու վերաբերյալ.
գ) հաստատել «Գյուղական տարածքների տնտեսական զարգացման ծրագրի վերլուծության և կառավարման գրասենյակ» պետական հիմնարկին անհատույց օգտագործման իրավունքով ամրացվող գույքի կազմը:
8. Գյուղական տարածքների տնտեսական զարգացման ծրագրին Հայաստանի Հանրապետության համաֆինանսավորման մասնաբաժինը վճարելու նպատակով Հայաստանի Հանրապետության գյուղատնտեսության նախարարությանը հատկացնել 67177500,0 դրամ` Հայաստանի Հանրապետության 2005 թվականի պետական բյուջեով նախատեսված Հայաստանի Հանրապետության կառավարության պահուստային ֆոնդի հաշվին (բյուջետային ծախսերի տնտեսագիտական դասակարգման «Այլ ծառայությունների ձեռքբերման ծախսեր» հոդվածով):
9. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2005 ԹՎԱԿԱՆԻ ՄԱՅԻՍԻ 26-ԻՆ
Հավելված
ՀՀ կառավարության
2005 թվականի մայիսի 19-ի
N 592-Ն որոշման
i
ԿԱՆՈՆԱԴՐՈՒԹՅՈՒՆ «ԳՅՈՒՂԱՏՆՏԵՍԱԿԱՆ ՏԱՐԱԾՔՆԵՐԻ ՏՆՏԵՍԱԿԱՆ ԶԱՐԳԱՑՄԱՆ ԾՐԱԳՐԻ ՎԵՐԼՈՒԾՈՒԹՅԱՆ ԵՎ ԿԱՌԱՎԱՐՄԱՆ ԳՐԱՍԵՆՅԱԿ» ՊԵՏԱԿԱՆ ՀԻՄՆԱՐԿԻ
(կանոնադրությունն ուժը կորցրել է 28.04.11 թիվ 461-Ն որոշում)
I. ԸՆԴՀԱՆՈՒՐ ԴՐՈՒՅԹՆԵՐ
1. «Գյուղական տարածքների տնտեսական զարգացման ծրագրի վերլուծության և կառավարման գրասենյակ» պետական հիմնարկը (այսուհետ` ԾՎԿԳ) իրավաբանական անձի կարգավիճակ չունեցող կազմակերպություն է: ԾՎԿԳ-ն ստեղծվել է Հայաստանի Հանրապետության և Գյուղատնտեսության զարգացման միջազգային հիմնադրամի միջև ստորագրված «Գյուղական տարածքների տնտեսական զարգացման ծրագիր» փոխառության համաձայնագրի և Հայաստանի Հանրապետության կառավարության (այսուհետ` հիմնադիր) 2005 թվականի մայիսի 19-ի «Հայաստանի Հանրապետության և Գյուղատնտեսության զարգացման միջազգային հիմնադրամի միջև 2005 թվականի հունվարի 28-ին ստորագրված «Գյուղական տարածքների տնտեսական զարգացման ծրագիր» փոխառության համաձայնագիրն ուժի մեջ մտնելու միջոցառումների մասին» N 592-Ն որոշման համաձայն:
2. ԾՎԿԳ-ն իր գործունեության ընթացքում ղեկավարվում է Հայաստանի Հանրապետության և Գյուղատնտեսության զարգացման միջազգային հիմնադրամի (այսուհետ` ԳԶՄՀ) միջև ստորագրված փոխառության համաձայնագրով (այսուհետ` փոխառության համաձայնագիր), Հայաստանի Հանրապետության օրենքներով, սույն կանոնադրությամբ և այլ իրավական ակտերով:
3. Հիմնադրի և ԾՎԿԳ-ի միջև հարաբերությունները կարգավորվում են փոխառության համաձայնագրով, Հայաստանի Հանրապետության օրենսդրությամբ և սույն կանոնադրությամբ:
4. ԾՎԿԳ-ն և դրա ամբողջ գույքը սեփականության իրավունքով պատկանում են հիմնադրին:
5. ԾՎԿԳ-ի անվանումն է`
հայերեն լրիվ` «Գյուղական տարածքների տնտեսական զարգացման ծրագրի
վերլուծության և կառավարման գրասենյակ» պետական հիմնարկ,
ռուսերեն լրիվ` Գօսուդառստվեննօյե ՈՒչռեժդենիյե «Բյուռօ պօ անալիզու ի
ուպռավլենիյու պռօգռամմի էկօնօմիչեսկօգօ ռազվիտիյա
սելսկիխ տեռռիտօռիյ»,
անգլերեն լրիվ` «Rural Areas Economic Development Programme Analaysis
and Administration Unit» State Institution,
հայերեն կրճատ` «Գյուղական տարածքների տնտեսական զարգացման ԾՎԿԳ» ՊՀ,
ռուսերեն կրճատ` ԳՈՒ «ԲԱՈՒ պռօգռամմի էկօնօմիչեսկօգօ ռազվիտիյա
սելսկիխ տեռռիտօռիյ»,
անգլերեն կրճատ` «Rural Areas Economic Development Programme AAU» SI:
6. ԾՎԿԳ-ի գտնվելու վայրն է` քաղ. Երևան, Վ. Վաղարշյան 12:
II. ԾՎԿԳ-Ի ԳՈՐԾՈՒՆԵՈՒԹՅԱՆ ՈԼՈՐՏՆԵՐՆ ՈՒ ՆՊԱՏԱԿՆԵՐԸ
7. ԾՎԿԳ-ի գործունեության հիմնական նպատակը ԳԶՄՀ-ի կողմից Հայաստանի Հանրապետությանը փոխառության համաձայնագրով նախատեսված գյուղական տարածքների տնտեսական զարգացման ծրագրի (այսուհետ` ծրագիր) աշխատանքների գործառնական խնդիրների իրականացման ընթացիկ վերահսկողությունը, կառավարումն ու ծրագրի համակարգումն է:
8. ԾՎԿԳ-ի խնդիրներն են`
ա) Հայաստանի Հանրապետության կառավարության անունից ծրագրով նախատեսված աշխատանքների պատվիրատուի գործառնությունների իրականացումը.
բ) ծրագրում ընդգրկված գործունեության շրջանակներում աշխատանքների կատարման տարեկան աշխատանքային պլանի և բյուջեի կազմումը.
գ) մրցույթների անցկացումը, առաջարկների գնահատումն ու վերլուծումը և փոխառության համաձայնագրով նախատեսված ձեռքբերումների խորհրդի հաստատմանը ներկայացնելը.
դ) ծրագրի իրականացման հետ կապված բոլոր տեսակի պայմանագրերի նախապատրաստումը և ստորագրումը` համաձայն փոխառության համաձայնագրով սահմանված կանոնակարգի.
ե) ծրագրի իրականացման մոնիտորինգը, հաշվետվությունները, միջանկյալ ուսումնասիրությունները, ավարտական զեկույցը, գնահատումները` ներառյալ ԳԶՄՀ-ի համար ընդունելի ձևով հաշվետվությունները պատրաստելն ու ներկայացնելը.
զ) ծրագրով նախատեսված աշխատանքների կատարման նկատմամբ վերահսկողությունը.
է) ծրագրով նախատեսված ապրանքների, աշխատանքների, ծառայությունների (այդ թվում` խորհրդատվական) ձեռքբերումը.
ը) ԾՎԿԳ-ի գործունեության համար անհրաժեշտ նախագծային աշխատանքների, փորձագիտական գնահատումների պատվիրումը.
թ) ծրագրով նախատեսված մասհանումների համար անհրաժեշտ դիմումները նախապատրաստելն ու ներկայացնելը.
ժ) ծրագրի իրականացման հետ կապված վճարումները:
III. ԾՎԿԳ-Ի ԻՐԱՎԱՍՈՒԹՅՈՒՆԸ
9. ԾՎԿԳ-ն օգտվում է միջազգային համաձայնագրերով սահմանված արտոնություններից:
10. ԾՎԿԳ-ի իրավունակությունը ծագում է սույն կանոնադրությունը հաստատվելու պահից:
11. ԾՎԿԳ-ի իրավունքները և պարտականությունները սահմանվում են փոխառության համաձայնագրով, սույն կանոնադրությամբ, պայմանագրերով և այլ համաձայնագրերով:
12. ԾՎԿԳ-ն իր հիմնադրի անունից, սույն կանոնադրությամբ նախատեսված գործունեության նպատակներին համապատասխան, կարող է ունենալ քաղաքացիական իրավունքներ և կրել այդ գործունեության հետ կապված քաղաքացիական պարտականություններ: ԾՎԿԳ-ին պատկանող քաղաքացիական իրավունքները, ներառյալ դրա պաշտպանության իրավունքը, ԾՎԿԳ-ն իրականացնում է հիմնադրի հայեցողությամբ` նրա անունից:
13. ԾՎԿԳ-ն ունի անվանում, օգտագործում է հիմնադրի անունից իրեն ամրագրված գույքը, Հայաստանի Հանրապետության զինանշանի պատկերով կլոր կնիք, դրոշմակնիք, հաշիվներ բանկերում` Հայաստանի Հանրապետության արժույթով և արտարժույթով:
14. ԾՎԿԳ-ն հիմնադրի անունից իրավունք ունի`
ա) ձեռք բերելու և իրականացնելու գույքային ու անձնական ոչ գույքային իրավունքներ, կրելու պարտականություններ.
բ) դատարանում հանդես գալու որպես հայցվոր կամ պատասխանող.
գ) Հայաստանի Հանրապետության օրենսդրությամբ սահմանված կարգով կնքելու պայմանագրեր և կրելու պարտավորություններ:
15. ԾՎԿԳ-ի իրավունքները կարող են սահմանափակվել օրենքով նախատեսված դեպքերում և սահմանված կարգով, ինչպես նաև հիմնադրի որոշմամբ, եթե դրանք չեն հակասում փոխառության համաձայնագրին:
16. ԾՎԿԳ-ի պարտավորությունների համար պատասխանատվություն է կրում հիմնադիրը` օրենքով սահմանված կարգով:
17. ԾՎԿԳ-ն պարտավոր է`
ա) փոխառության համաձայնագրի պահանջներին համապատասխան, օրենքով և այլ իրավական ակտերով սահմանված կարգով վարել հաշվապահական հաշվառում և ներկայացնել հաշվետվություններ.
բ) ապահովել ԾՎԿԳ-ի փաստաթղթերի (ԾՎԿԳ-ի կանոնադրություն, գույքի նկատմամբ գույքային իրավունքները հաստատող փաստաթղթեր, ԾՎԿԳ-ի ներքին փաստաթղթեր, տարեկան հաշվետվություններ, հաշվապահական հաշվառման փաստաթղթեր, կառավարման մարմինների նիստերի արձանագրություններ, օրենքով և այլ իրավական ակտերով նախատեսված այլ փաստաթղթեր) պահպանումը.
գ) պայմանագրեր կնքել ծրագրի բաղադրիչներն իրականացնող կառույցների հետ.
դ) իր իրավասությունների սահմաններում վերահսկել ծրագրի իրականացման ընթացքը և անհրաժեշտության դեպքում առաջարկել փոփոխություններ:
IV. ԾՎԿԳ-Ի ԿԱՌԱՎԱՐՈՒՄԸ
18. ԾՎԿԳ-ի հիմնադրին է պատկանում ԾՎԿԳ-ի կառավարման և գործունեության վերաբերյալ ցանկացած հարցի վերջնական լուծման իրավունքը, որը պետք է համաձայնեցված լինի ԳԶՄՀ-ի հետ:
19. ԾՎԿԳ-ի հիմնադրի իրավասության հարցերն են`
ա) ԾՎԿԳ-ի կանոնադրության հաստատումը, դրանում փոփոխությունների ու լրացումների կատարումը.
բ) ԾՎԿԳ-ի գործունեության դադարումը` ԳԶՄՀ-ի համաձայնությամբ:
20. ԾՎԿԳ-ի ղեկավար պաշտոնատար անձը տնօրենն է, որին պաշտոնի է նշանակում գլխավոր գործակալության ղեկավարը` ԳԶՄՀ-ի համաձայնությամբ:
21. ԾՎԿԳ-ի տնօրենը գործում է փոխառության համաձայնագրի, սույն կանոնադրության, գլխավոր գործակալության ղեկավարի և ԳԶՄՀ-ի հանձնարարականների համաձայն:
22. ԾՎԿԳ-ի տնօրենը`
ա) տիրապետում և օգտագործում է ԾՎԿԳ-ին ամրացված գույքը (այդ թվում` ֆինանսական միջոցները), գործարքներ կնքում հիմնադրի անունից.
բ) պատասխանատու է փոխառության համաձայնագրով սահմանված ԾՎԿԳ-ի գործառույթների իրականացման համար.
գ) ներկայացնում է ԾՎԿԳ-ն Հայաստանի Հանրապետությունում և օտարերկրյա պետություններում.
դ) փոխառության համաձայնագրով սահմանված կարգով ծրագրի համապատասխան բաղադրիչներն իրականացնող կառույցների հետ կնքում է համաձայնագրեր, որոնցում նախանշվում են ծրագրի բաղադրիչի իրականացման նպատակներն ու գործունեության ոլորտը` ներառյալ աշխատակարգի մշակումը և ֆինանսական փոխհարաբերությունները.
ե) գործում է առանց լիազորագրի.
զ) տալիս է լիազորագրեր.
է) կնքում է պայմանագրեր (այդ թվում` աշխատանքային).
ը) բանկերում բացում է ծրագրի հատուկ հաշիվը, ԾՎԿԳ-ի հաշվարկային և այլ հաշիվներ (այդ թվում` տարադրամային).
թ) լիազորված է տնօրինելու ծրագրի գործառնական ծախսերի ընթացիկ հաշիվը.
ժ) իր իրավասության սահմաններում արձակում է հրամաններ, հրահանգներ, տալիս է կատարման համար պարտադիր ցուցումներ և վերահսկում դրանց կատարումը.
ժա) մրցութային կարգով (բացառությամբ սպասարկող աշխատակազմի) աշխատանքի ընդունում և աշխատանքից ազատում է ԾՎԿԳ-ի աշխատողներին.
ժբ) ԾՎԿԳ-ի աշխատողների նկատմամբ կիրառում է խրախուսման և կարգապահական պատասխանատվության միջոցներ.
ժգ) իրականացնում է Հայաստանի Հանրապետության օրենսդրությամբ, փոխառության համաձայնագրով, սույն կանոնադրությամբ, գլխավոր գործակալության և ԳԶՄՀ-ի հանձնարարականներով նախատեսված այլ լիազորություններ:
23. ԾՎԿԳ-ի գործունեության նկատմամբ վերահսկողությունն իրականացվում է հիմնադրի և ԳԶՄՀ-ի կողմից սահմանված կարգով:
V. ԾՎԿԳ-Ի ԱՇԽԱՏԱԿԱԶՄԸ
24. ԾՎԿԳ-ի աշխատակազմի աշխատողներն աշխատանքի են նշանակվում տնօրենի կողմից` պայմանագրային հիմունքներով:
25. ԾՎԿԳ-ի աշխատակազմի աշխատողների ընտրությունը կատարվում է տնօրենի կողմից` ազատ հաստիքների համար հրապարակային հայտարարությունից հետո:
26. ԾՎԿԳ-ի աշխատակազմը (բացառությամբ սպասարկող աշխատակազմի) նշանակումից առաջ պետք է հաստատվի ԳԶՄՀ-ի կողմից:
VI. ԾՎԿԳ-Ի ՄԻՋՈՑՆԵՐԸ
27. ԾՎԿԳ-ն իր հիմնադրից առանձնացված գույք չունի: ԾՎԿԳ-ի գույքը սեփականության իրավունքով պատկանում է հիմնադրին:
28. ԾՎԿԳ-ի գույքային իրավունքների օբյեկտներն են`
ա) գույքը` ներառյալ դրամական միջոցները, արժեթղթերը և գույքային իրավունքները,
բ) աշխատանքները և ծառայությունները,
գ) տեղեկատվությունը,
դ) ոչ նյութական արժեքները:
29. ԾՎԿԳ-ի գույքի գտնվում է Հայաստանի Հանրապետության պաշտպանության ներքո:
VII. ԾՎԿԳ-Ի ԳՈՐԾՈՒՆԵՈՒԹՅԱՆ ԴԱԴԱՐՈՒՄԸ
30. ԾՎԿԳ-ի գործունեությունը կարող է դադարել ծրագրի ավարտից հետո` հիմնադրի որոշմամբ` ԳԶՄՀ-ի նախնական համաձայնության դեպքում:
31. ԾՎԿԳ-ի կազմակերպության գործունեության դադարման մասին հիմնադրի կողմից որոշման ընդունումից հետո ստեղծվում է լուծարման հանձնաժողով, սահմանվում լուծարման կարգն ու ժամկետները: ԾՎԿԳ-ի լուծարման ժամկետը չի կարող 2 ամսվանից պակաս լինել:
32. ԾՎԿԳ-ի գործունեությունը համարվում է դադարած` հիմնադրի սահմանած օրվանից: