(ուժը կորցրել է 07.06.12 թիվ 814-Ն որոշում)
i
040.1136.150805
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«15» օգոստոսի 2005 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
14 հուլիսի 2005 թվականի N 1136-Ն
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲՆԱԿԱՎԱՅՐԵՐՈՒՄ ՊԵՏԱԿԱՆ ԱՋԱԿՑՈՒԹՅԱՄԲ ԻՐԱԿԱՆԱՑՎՈՂ ԲՆԱԿԱՐԱՆԱՅԻՆ ԾՐԱԳՐԵՐԻ ԲՆԱԿԵԼԻ ՏՆԵՐԻ ՆԱԽԱԳԾԵՐԻ ԵՎ ԿԱՏԱԼՈԳԻ ԿԻՐԱՌՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Համաձայն «Քաղաքաշինության մասին» Հայաստանի Հանրապետության օրենքի 10-րդ հոդվածի 1-ին մասի «գ» կետի և Հայաստանի Հանրապետության կառավարության 2003 թվականի դեկտեմբերի 24-ի N 1930-Ն որոշմամբ հաստատված միջոցառումների ծրագրի 168-րդ կետի` Հայաստանի Հանրապետության կառավարությունը որոշում է.
1. Հաստատել Հայաստանի Հանրապետության բնակավայրերում պետական աջակցությամբ իրականացվող բնակարանային ծրագրերի բնակելի տների նախագծերի և կատալոգի կիրառման կարգը` համաձայն հավելվածի:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2005 ԹՎԱԿԱՆԻ ՕԳՈՍՏՈՍԻ 9-ԻՆ
Հավելված
ՀՀ կառավարության
2005 թվականի հուլիսի 14-ի
N 1136-Ն որոշման
ԿԱՐԳ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲՆԱԿԱՎԱՅՐԵՐՈՒՄ ՊԵՏԱԿԱՆ ԱՋԱԿՑՈՒԹՅԱՄԲ ԻՐԱԿԱՆԱՑՎՈՂ ԲՆԱԿԱՐԱՆԱՅԻՆ ԾՐԱԳՐԵՐԻ ԲՆԱԿԵԼԻ ՏՆԵՐԻ ՆԱԽԱԳԾԵՐԻ ԵՎ ԿԱՏԱԼՈԳԻ ԿԻՐԱՌՄԱՆ
1. Սույն կարգով սահմանվում է Հայաստանի Հանրապետության բնակավայրերում պետական աջակցությամբ իրականացվող բնակարանային ծրագրերի բնակելի տների նախագծային փաստաթղթերի, ինչպես նաև այդ նախագծերի գովազդային տեղեկագրերից կազմված հավաք կատալոգի (այսուհետ` բնակելի տների կատալոգ) կիրառման կարգը:
2. Հայաստանի Հանրապետության բնակավայրերում պետական աջակցությամբ իրականացվող սոցիալական և սանիտարական նվազագույն ստանդարտներն ապահովող, բազմակի օգտագործման համար նախատեսված բնակելի տների նախագծային փաստաթղթերի փաթեթի (այսուհետ` նախագծային փաստաթղթեր) ներդրումը նպատակաուղղված է պետական միջոցների (այդ թվում` վարկային ու դրամաշնորհային) նպատակային օգտագործմանը, ինչպես նաև համապատասխան պետական ծրագրերի իրականացման շրջանակներում բարվոք կենցաղային և գեղագիտական պահանջներին համապատասխանող բնակելի կառուցապատման ճարտարապետական միջավայրի ստեղծմանը:
3. Նախագծային փաստաթղթերը մշակվում են Հայաստանի Հանրապետության քաղաքաշինության նախարարության (այսուհետ` պատվիրատու) պատվերով` նրա կողմից տրված նախագծային առաջադրանքի հիման վրա:
4. Պատվիրատուն նախագծային փաստաթղթերը մշակողին ընտրում է «Գնումների մասին» Հայաստանի Հանրապետության օրենքով սահմանված կարգով:
5. Նախագծային փաստաթղթերը մշակվում են «Էսքիզային նախագիծ» և «Աշխատանքային նախագիծ» փուլերի համար սահմանված լրիվ կազմով:
6. Նախագծային փաստաթղթերի հետ միասին մշակվում և կազմվում է բնակելի տների կատալոգ` սխեմատիկ հատակագծերով, ճակատային լուծումներով, հիմնական տեխնիկատնտեսական ցուցանիշներով և կատալոգի կիրառման և ներդրման հնարավորությունների վերաբերյալ տեղեկատվությամբ:
7. Հայաստանի Հանրապետության օրենսդրությամբ սահմանված կարգով փորձագիտական դրական եզրակացություն ստացած նախագծային փաստաթղթերը Հայաստանի Հանրապետության քաղաքաշինության նախարարի հրամանով հաստատվում և ընդունվում են կիրառման:
8. Նախագծային փաստաթղթերի բնագրերը (մագնիսական և թղթային կրիչներով) պահվում են պատվիրատուի մոտ:
9. Պատվիրատուն նախնական ծանոթացման և հետագա հնարավոր ներդրման նպատակով բնակելի տների կատալոգը տրամադրում է Հայաստանի Հանրապետության մարզպետներին, Երևանի քաղաքապետին, Հայաստանի Հանրապետության քաղաքային համայնքների ղեկավարներին, միջազգային դոնոր կազմակերպություններին, Հայաստանի Հանրապետության աշխատանքի և սոցիալական հարցերի նախարարությանը, Հայաստանի Հանրապետության տարածքային կառավարման նախարարությանը:
10. Մարզպետները բնակելի տների կատալոգն ստանալու օրվանից 10-օրյա ժամկետում տեղական զանգվածային լրատվության միջոցներով իրազեկում են կատալոգի առկայության, դրա կիրառման ու ներդրման հնարավորությունների մասին:
Գյուղական համայնքների ղեկավարները կարող են համապատասխան մարզպետից ստանալ բնակելի տների կատալոգը` հետագա բազմացման համար:
11. Սույն կարգին համապատասխան` նախագծային փաստաթղթերի հիման վրա քաղաքաշինական գործունեություն իրականացնող կառուցապատողները (այսուհետ` կառուցապատող) կարող են դիմել համապատասխան մարզպետին կամ քաղաքային համայնքի ղեկավարին` բնակելի տների կատալոգին ծանոթանալու համար: Կատալոգի ուսումնասիրությունից ստացված տեղեկատվության հիման վրա կառուցապատողը դիմում է համապատասխան մարզպետին (Երևանում` Երևանի քաղաքապետին) կամ քաղաքային համայնքի ղեկավարին նախագծային փաստաթղթերի փաթեթն ստանալու համար` նշելով բնակելի տների կատալոգից ընտրված տան (տների) տիպը (տիպերը) և տվյալ կառուցապատման ծրագրով նախատեսված բնակելի տների քանակը:
Իրավաբանական և ֆիզիկական անձինք սույն կատալոգում ներառված նախագծային փաստաթղթերով կառուցապատում կարող են իրականացնել մարզպետի կամ քաղաքային համայնքի ղեկավարի հայտի հիման վրա` սույն կարգի 11, 12,15,16 և 17-րդ կետերով սահմանված ընթացակարգին համապատասխան:
12. Համաձայն ներկայացված դիմումի` պատվիրատուն տրամադրում է նախագծային փաստաթղթերի բնագիրը համապատասխան մարզպետին (Երևանում` Երևանի քաղաքապետին) կամ քաղաքային համայնքի ղեկավարին բազմացման համար (10 օրից ոչ ավելի ժամկետով)` այն վերադարձնելու պայմանով: Նախագծային փաստաթղթերի պատճենահանման ծախսերը կատարվում են կառուցապատողի հաշվին:
13. Կառուցապատողը նախագծային փաստաթղթերի փաթեթն ստանալուց հետո Հայաստանի Հանրապետության օրենսդրությամբ սահմանված կարգով իր միջոցների հաշվին ապահովում է կառուցապատման համար նախատեսված հողամասի վրա օբյեկտի տեղակապման նախագծի մշակումը:
14. Եթե կառուցապատման աշխատանքներն իրականացվում են պետական կամ համայնքների կարիքների համար, ինչպես նաև պետության կամ համայնքների կողմից` հօգուտ երրորդ անձանց, ապա դրանք կատարվում են «Գնումների մասին» Հայաստանի Հանրապետության օրենքով և այլ իրավական ակտերով սահմանված պահանջներին համապատասխան:
15. Նախագծային փաստաթղթերի հիման վրա իրականացվող բազմակի օգտագործման բնակելի տների շինարարության թույլտվությունը տրվում է Հայաստանի Հանրապետության օրենսդրությամբ սահմանված կարգով` հաստատված տեղակապման նախագծի հիման վրա:
16. Կառուցապատողը պարտավոր է շինարարությունն իրականացնել հաստատված նախագծին և Հայաստանի Հանրապետության իրավական ակտերի պահանջներին համապատասխան, իսկ նախագծային լուծումների փոփոխման դեպքում (բացառությամբ շինարարության թույլտվություն չպահանջող դեպքերի)` համաձայնեցնել պատվիրատուի հետ: