(ուժը կորցրել է 05.04.18 ՆՀ-226-Ն հրամանագիր)
i
030.0189.281005
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ
ՀՐԱՄԱՆԱԳԻՐԸ
ՊԵՏՈՒԹՅԱՆ ԳՈՒՅՔԱՅԻՆ ՇԱՀԵՐԻ ՊԱՇՏՊԱՆՈՒԹՅԱՆ ՈԼՈՐՏՈՒՄ ԱՐԴՅՈՒՆԱՎԵՏՈՒԹՅԱՆ ԲԱՐՁՐԱՑՄԱՆՆ ՈՒՂՂՎԱԾ ՄԻՋՈՑԱՌՈՒՄՆԵՐԻ ՄԱՍԻՆ
Ղեկավարվելով Հայաստանի Հանրապետության Սահմանադրության 49-րդ և 103-րդ հոդվածներով` որոշում եմ.
1. Պետական մարմինները Հայաստանի Հանրապետության գլխավոր դատախազություն են ներկայացնում.
ա) դատարաններում պետության գույքային շահերի պաշտպանության` 10 մլն դրամ հայցագինը գերազանցող, բարդ գործերով, մի քանի պետական մարմինների կողմից կամ պետության կենսական շահերին առնչվող հայց ներկայացվելու, ինչպես նաև պետության գույքային շահերին առնչվող` ընդդեմ պետական մարմինների ներկայացված նույնաբնույթ հայցի (հակընդդեմ հայցի) և դրանց քննության արդյունքների մասին հաղորդում` եռօրյա ժամկետում,
բ) անհրաժեշտության դեպքում, հայց հարուցելու միջնորդություն` մինչև սույն կետի «ա» ենթակետում նշված բնույթի հայց ներկայացնելը,
գ) հաշտության համաձայնության պայմանները` նախքան պետության գույքային շահերին առնչվող քաղաքացիական գործերով հաշտության համաձայնություն կնքելը,
դ) պետության գույքային շահերին առնչվող, սակայն առանց պետական համապատասխան մարմնի մասնակցության քննված գործերով կայացված դատական ակտերի վերաբերյալ տեղեկություններ` եռօրյա ժամկետում`:
2. Պետական մարմնի մասնակցությամբ վարչական վարույթի կամ ոչ գույքային այլ բնույթի դատավարության ընթացքում պետության նկատմամբ սույն հրամանագրի 1-ին կետի պահանջները բավարարող գույքային պահանջ ներկայացվելու, ինչպես նաև սկսված գույքային բնույթի քաղաքացիական գործերով դատաքննության ընթացքում նույն կետի պահանջները երևան գալու դեպքերում պետական մարմինը պարտավոր է դատարանին միջնորդել հայտարարելու ընդմիջում և սույն հրամանագրի 1-ին կետին համապատասխան իրազեկել Հայաստանի Հանրապետության գլխավոր դատախազությանը:
3. Հայաստանի Հանրապետության գլխավոր դատախազությունը ստացված հաղորդումների քննարկման արդյունքների վերաբերյալ պետական իրավասու մարմիններին իրազեկում է տասնօրյա ժամկետում, իսկ դատական ակտերի բողոքարկման հարցը քննարկելու դեպքում` մեկամսյա ժամկետում:
4. Սույն հրամանագիրն ուժի մեջ է մտնում պաշտոնական հրապարակմանը հաջորդող տասներորդ օրվանից:
28 հոկտեմբերի 2005 թվականի
ՆՀ-189-Ն