(ուժը կորցրել է 25.07.13 թիվ 857-Ն որոշում)
i
040.1893.191105
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«19» նոյեմբերի 2005 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
6 հոկտեմբերի 2005 թվականի N 1893-Ն
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՇԽԱՏԱՆՔԻ ՊԵՏԱԿԱՆ ՏԵՍՉՈՒԹՅԱՆԸ ՏԵՂԵԿԱՏՎՈՒԹՅՈՒՆ ՏՐԱՄԱԴՐԵԼՈՒ ՄԱՍԻՆ
«Աշխատանքի պետական տեսչության մասին» Հայաստանի Հանրապետության օրենքի 6-րդ հոդվածին համապատասխան Հայաստանի Հանրապետության աշխատանքի պետական տեսչությանն աշխատանքային օրենսդրության և աշխատանքի իրավունքի նորմեր պարունակող այլ իրավական ակտերի կիրարկման նկատմամբ իրականացվող պետական հսկողության և վերահսկողության համար անհրաժեշտ տեղեկատվության տրամադրումն ապահովելու նպատակով Հայաստանի Հանրապետության կառավարությունը որոշում է.
Սահմանել, որ`
ա) Հայաստանի Հանրապետության արդարադատության նախարարության իրավաբանական անձանց պետական ռեգիստրի գործակալությունը յուրաքանչյուր ամսվա արդյունքներով, մինչև հաջորդ ամսվա 20-ը, Հայաստանի Հանրապետության աշխատանքի պետական տեսչությանն է տրամադրում տեղեկատվություն «Իրավաբանական անձանց պետական գրանցման մասին» Հայաստանի Հանրապետության օրենքով սահմանված կարգով իրականացվող գրանցումների և հաշվառումների մասին` նշելով իրավաբանական անձի կամ հիմնարկի անվանումը, գտնվելու վայրը, կազմակերպական-իրավական ձևը, անհատ ձեռնարկատիրոջ համար` անունը, բնակության վայրը կամ գրանցման հասցեն (եթե այն չի համընկնում բնակության վայրի հետ).
բ) Հայաստանի Հանրապետության կառավարությանն առընթեր հարկային պետական ծառայությունն իր իրականացվող ստուգումների արդյունքում անօրինական աշխատանք կատարողներ (չձևակերպված աշխատողներ) և (կամ) վարձու աշխատողներին աշխատանքի ընդունելու, նույն գործատուի մոտ այլ աշխատանքի փոխադրելու, աշխատանքից ազատելու վերաբերյալ հրամանագրքի և աշխատանքային պայմանագրերի գրանցամատյանի վարման ու պահպանման կարգի խախտումներ հայտնաբերվելու դեպքում ոչ ուշ, քան մինչև տվյալ ամսվան հաջորդող ամսվա 15-ը դրա մասին տեղեկացնում է Հայաստանի Հանրապետության աշխատանքի պետական տեսչությանը` նշելով գործատուի անվանումը, գտնվելու վայրը, ՀՎՀՀ-ն, խախտման տեսակը և խախտումն արձանագրելու ամսաթիվը:
Հայաստանի Հանրապետության կառավարությանն առընթեր հարկային պետական ծառայությունը Հայաստանի Հանրապետության աշխատանքի պետական տեսչության հարցումների հիման վրա նրան է տրամադրում չձևակերպված աշխատողների ու վարձու աշխատողներին աշխատանքի ընդունելու, նույն գործատուի մոտ այլ աշխատանքի փոխադրելու, աշխատանքից ազատելու վերաբերյալ հրամանագրքի և աշխատանքային պայմանագրերի ու գրանցամատյանի վարման և պահպանման կարգի խախտումների մասին օպերատիվ տեղեկատվություն.
գ) Հայաստանի Հանրապետության քաղաքաշինության նախարարությունը յուրաքանչյուր ամսվա արդյունքներով, մինչև հաջորդ ամսվա 20-ը, Հայաստանի Հանրապետության աշխատանքի պետական տեսչությանն է տրամադրում տեղեկատվություն շինարարական նորմատիվների չկատարմամբ պայմանավորված արտադրական վթարների և դժբախտ դեպքերի քանակի մասին` նշելով գործատուի անվանումը, ստորաբաժանման անվանումն ու գտնվելու վայրը:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2005 ԹՎԱԿԱՆԻ ՆՈՅԵՄԲԵՐԻ 15-ԻՆ