020.0699.270407
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ՈՐՈՇՈՒՄԸ
i
1979 ԹՎԱԿԱՆԻ ՍԵՊՏԵՄԲԵՐԻ 19-ԻՆ ԲԵՌՆՈՒՄ ՍՏՈՐԱԳՐՎԱԾ` ԵՎՐՈՊԱՅԻ ՎԱՅՐԻ ԲՆՈՒԹՅԱՆ ԵՎ ԲՆԱԿԱՆ ՄԻՋԱՎԱՅՐԻ ՊԱՀՊԱՆՈՒԹՅԱՆ ՄԱՍԻՆ ԿՈՆՎԵՆՑԻԱՅՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
27 ապրիլի 2007թ. |
Հայաստանի Հանրապետության սահմանադրական դատարանը` կազմով. Վ. Հովհաննիսյանի (նախագահող), Կ. Բալայանի, Ֆ. Թոխյանի, Զ. Ղուկասյանի, Հ. Նազարյանի, Ռ. Պապայանի, Վ. Պողոսյանի (զեկուցող),
համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 25, 38 և 72 հոդվածների,
դռնբաց դատական նիստում գրավոր ընթացակարգով քննեց «1979 թվականի սեպտեմբերի 19-ին Բեռնում ստորագրված` Եվրոպայի վայրի բնության և բնական միջավայրի պահպանության մասին կոնվենցիայում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթը Հանրապետության Նախագահի դիմումն է ՀՀ սահմանադրական դատարան:
ՈՒսումնասիրելով սույն գործով զեկուցողի գրավոր հաղորդումը, Հանրապետության Նախագահի ներկայացուցիչ` Հայաստանի Հանրապետության բնապահպանության նախարար Վ. Այվազյանի գրավոր բացատրությունները, հետազոտելով կոնվենցիան և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Հանրապետության Նախագահի դիմումում կոնվենցիան վերնագրված է «Եվրոպայի կենդանական աշխարհի և բնական միջավայրի պահպանության մասին» միջազգային կոնվենցիա: Սակայն գործը քննության նախապատրաստելիս Նախագահի պաշտոնական ներկայացուցչի և ՀՀ արտաքին գործերի նախարարության պաշտոնական թարգմանությամբ քննության առարկա Կոնվենցիայի անվանումը ճշգրտվել է` 1979 թվականի սեպտեմբերի 19-ին Բեռնում ստորագրված` «Եվրոպայի վայրի բնության և բնական միջավայրի պահպանության մասին» կոնվենցիա:
2. Կոնվենցիան ընդունվել է 1979 թվականի սեպտեմբերի 19-ին` Բեռնում, և ուժի մեջ մտել 1982 թվականի հունիսի 1-ին: Հայաստանի Հանրապետությունը կոնվենցիան ստորագրել է 2006 թվականի մարտի 13-ին:
Կոնվենցիայի նպատակն է պահպանել կենդանական ու բուսական աշխարհը և տեսակների բնական ապրելավայրերը:
3. Կոնվենցիայի անդամ պետություններն անհրաժեշտ օրենսդրական ու վարչական միջոցներ պետք է ձեռնարկեն` 1-ին և 2-րդ հավելվածներում նշված տեսակների և վտանգված բնական միջավայրի պահպանությունն ապահովելու համար:
Կոնվենցիայի 3-րդ հավելվածում սահմանված են կենդանական աշխարհի պահպանվող տեսակները, իսկ 4-րդ հավելվածում` կենդանիների սպանության, որսի և շահագործման այլ ձևերի արգելված միջոցները և մեթոդները:
4. Կոնվենցիայի կողմերը պետք է երաշխավորեն նաև, որ արգելման սեզոնները և վայրի բնության օգտագործումը կարգավորող ընթացակարգերը լինեն համարժեք և բաշխվեն համապատասխանաբար:
5. Կոնվենցիայի նպատակների իրականացման համար հիմնվել է Մշտական կոմիտե:
6. Կոնվենցիայով Հայաստանի Հանրապետությունն ստանձնել է մի շարք պարտավորություններ, մասնավորապես.
- ձեռնարկել անհրաժեշտ միջոցներ` կենդանական և բուսական աշխարհի պոպուլյացիաները, հատկապես` բնապահպանական, գիտական և մշակութային պահանջներին համապատասխան մակարդակով պահպանելու համար,
- անհրաժեշտ քայլեր ձեռնարկել կենդանական, բուսական աշխարհի և բնական միջավայրի պահպանությանն ուղղված ազգային քաղաքականությունը խթանելու համար,
- Հայաստանի բնապահպանական ոլորտի քաղաքականությունը ծրագրելիս ու մշակելիս, ինչպես նաև աղտոտման դեմ ուղղված միջոցառումներ իրականացնելիս` հաշվի առնել կենդանական, բուսական աշխարհի և բնական միջավայրի պահպանությունը,
- հատուկ ուշադրություն դարձնել չվող տեսակների համար կարևոր ուղիների պահպանությանը,
- բուսական աշխարհի տեսակների հատուկ պահպանության համար արգելել հավելված 1-ում նշված բույսերը դիտավորությամբ պոկելը, հավաքելը, կտրելը կամ արմատախիլ անելը, ինչպես նաև արգելել այդպիսի տեսակների ձեռքբերումը կամ վաճառքը,
- խրախուսել կենդանական, բուսական աշխարհի և բնական միջավայրի տեղական տեսակների վերարտադրությունը,
- սահմանված ժամկետներում Մշտական կոմիտեին ներկայացնել հաշվետվություններ,
- Մշտական կոմիտեին տեղեկացնել Կոնվենցիայի 1-ին և 2-րդ հավելվածներում չընդգրկված տեսակների մասին,
- նշանակել արբիտրաժային դատարանի մեկ միջնորդ դատավոր:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և չորրորդ մասերով, «Սահմանադրական դատարանի մասին» Հայաստանի Հանրապետության օրենքի 63 և 64 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
i
1. 1979 թվականի սեպտեմբերի 19-ին Բեռնում ստորագրված` Եվրոպայի վայրի բնության և բնական միջավայրի պահպանության մասին կոնվենցիայում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է և ուժի մեջ է մտնում հրապարակման պահից:
27 ապրիլի 2007 թվականի
ՍԴՈ-699