Սեղմել Esc փակելու համար:
ԻՆՔՆԱԿԱՄ ԿԱՌՈՒՑՎԱԾ ՇԵՆՔԵՐԻ, ՇԻՆՈՒԹՅՈՒ...
Քարտային տվյալներ

Տեսակ
Չի գործում
Ընդունող մարմին
Ընդունման ամսաթիվ
Համար

Վավերացման ամսաթիվ
ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo

ԻՆՔՆԱԿԱՄ ԿԱՌՈՒՑՎԱԾ ՇԵՆՔԵՐԻ, ՇԻՆՈՒԹՅՈՒՆՆԵՐԻ ՀԱՇՎԱՌՄ ...

31.01.2004 -ին ուժը կորցրած ակտի տվյալ խմբագրությունը գործել է   27.08.1998  -ից մինչեւ   31.01.2004  -ը:
 

(ուժը կորցրել է 15.05.03 թիվ 1748-Ն որոշում)

i

040.0114.250298

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀԻ ՊԱՇՏՈՆԱԿԱՏԱՐ Ռ. ՔՈՉԱՐՅԱՆ

 

«25» փետրվարի 1998 թ.

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

 

25 փետրվարի 1998 թվականի թիվ 114

 

i

ԻՆՔՆԱԿԱՄ ԿԱՌՈՒՑՎԱԾ ՇԵՆՔԵՐԻ, ՇԻՆՈՒԹՅՈՒՆՆԵՐԻ ՀԱՇՎԱՌՄԱՆ ԵՎ ՊԵՏԱԿԱՆ ԳՐԱՆՑՄԱՆ ՄԱՍԻՆ

 

Հայաստանի Հանրապետությունում ինքնակամ կառուցված շենքերի, շինությունների հաշվառման և դրանց հետագա կարգավիճակի որոշման նպատակով Հայաստանի Հանրապետության կառավարությունը որոշում է.

1. Հաստատել ինքնակամ կառուցված շենքերի, շինությունների հաշվառման և պետական գրանցման կարգը (կցվում է):

2. Սահմանել, որ քաղաքացիներին սեփականության իրավունքով պատկանող տնամերձ, բնակելի տան կառուցման և սպասարկման համար հատկացված, այգեգործական հողամասերում, մինչև 1998 թվականի հունվարի 1-ը ինքնակամ կառուցված բնակելի (բնակելի, այգեգործական տներ), տնտեսական, կենցաղային, ինչպես նաև մինչև 50 տոկոսով կառուցված անավարտ (կիսակառույց) շենքերի և շինությունների նկատմամբ ճանաչվում է քաղաքացիների սեփականության իրավունքը:

3. Ինքնակամ կառուցված շենքերի, շինությունների հետագա կարգավիճակի որոշման նպատակով հայտերի ընդունման ժամկետ սահմանել մինչև 1998 թվականի օգոստոսի 1-ը:

4. Հայաստանի Հանրապետության արդարադատության նախարարությանը, Հայաստանի Հանրապետության քաղաքաշինության նախարարությանը, Հայաստանի Հանրապետության գյուղատնտեսության նախարարությանը` մեկամսյա ժամկետում Հայաստանի Հանրապետության կառավարություն սահմանված կարգով ներկայացնել առաջարկություններ Հայաստանի Հանրապետության վարչական իրավախախտումների վերաբերյալ և քրեական օրենսգրքերում համապատասխան փոփոխություններ կատարելու մասին:

i

5. Ուժը կորցրած ճանաչել Հայաստանի Հանրապետության կառավարության 1995 թվականի մայիսի 2-ի «Ինքնակամ կառուցված շինությունների հաշվառման, գույքագրման և գրանցման կարգը հաստատելու մասին» թիվ 248 որոշումը (Հայաստանի Հանրապետության կառավարության 1995 թվականի դեկտեմբերի 8-ի թիվ 102 և 1996 թվականի նոյեմբերի 18-ի թիվ 361 որոշումների խմբագրությամբ):

6. Սույն որոշումն ուժի մեջ է մտնում հրապարակման պահից:

 

ՀԱՍՏԱՏՎԱԾ Է

 

ՀՀ ԿԱՌԱՎԱՐՈՒԹՅԱՆ 1998 ԹՎԱԿԱՆԻ

ՓԵՏՐՎԱՐԻ 25-Ի թիվ 114 ՈՐՈՇՄԱՄԲ

 

Կ Ա Ր Գ

 

i

ԻՆՔՆԱԿԱՄ ԿԱՌՈՒՑՎԱԾ ՇԵՆՔԵՐԻ, ՇԻՆՈՒԹՅՈՒՆՆԵՐԻ ՀԱՇՎԱՌՄԱՆ ԵՎ ՊԵՏԱԿԱՆ ԳՐԱՆՑՄԱՆ

 

I. Ընդհանուր դրույթներ

 

1. Սույն կարգով սահմանվում է Հայաստանի Հանրապետությունում օրենքների և այլ իրավական ակտերի պահանջների խախտմամբ` առանց համապատասխան թույլտվության (կամ նախագծի), առանց սահմանված կարգով հողհատկացման, բնակավայրերի գլխավոր հատակագծերին, հողերի օգտագործման սխեմաներին, մանրամասն հատակագծման կամ կառուցապատման նախագծերին, շինարարական նորմերի պահանջներին չհամապատասխանող, ինչպես նաև հողօգտագործման և քաղաքաշինական նորմերի խախտումներով կառուցված շենքերի, շինությունների (բնակելի տներ, ամառանոցներ, ավտոտնակներ, դրանց կից տնտեսական, կենցաղային, հասարակական ու արտադրական կառույցներ), այդ թվում մինչև 50 տոկոսով կառուցված (կառուցված են պատերը և միջհարկային ծածկը) անավարտ (կիսակառույց) շենքերի ու շինությունների հաշվառման և պետական գրանցման կարգը:

2. Հաշվառման աշխատանքներն իրականացնում են Հայաստանի Հանրապետության անշարժ գույքի պետական միասնական կադաստրի վարչության տարածքային մարմինները համայնքների ղեկավարների, Երևան քաղաքում Երևանի քաղաքապետի, մարզպետների (համայնքի վարչական սահմաններից դուրս գտնվող հողերի վրա կառուցված շենքերի և շինությունների գծով) աջակցությամբ:

Հաշվառման ընթացքում ի հայտ եկած ինքնակամ կառույցների վերաբերյալ տեղեկատվությունը տրամադրվում է համայնքների ղեկավարներին, Երևան քաղաքում` Երևանի քաղաքապետին, մարզպետներին ինքնակամ կառույցների հետագա կարգավիճակի որոշման համար, և հաշվառման գրքերում դրանք գրանցվում են որպես ինքնակամ կառույցներ:

Հաշվառման ենթակա են մինչև 1998 թվականի հունվարի 1-ը ինքնակամ կառուցված, ինչպես նաև մինչև 50 տոկոսով կառուցված անավարտ (կիսակառույց) շենքերն ու շինությունները:

3. Ինքնակամ կառուցված շենքերի, շինությունների հետագա կարգավիճակի վերաբերյալ որոշումներն ընդունում են համայնքների ղեկավարները, Երևան քաղաքում` Երևանի քաղաքապետը, մարզպետները` համայնքի վարչական սահմաններից դուրս գտնվող հողերի վրա կառուցված շենքերի և շինությունների վերաբերյալ:

 

II. Ինքնակամ կառուցված շենքերի, շինությունների նկատմամբ

քաղաքացիների սեփականության իրավունքի ճանաչումը

 

4. Շենք, շինություն ինքնակամ կառուցած անձինք (բացառությամբ սույն որոշման 2-րդ կետում նշված դեպքերի) մինչև 1998 թվականի օգոստոսի 1-ը համայնքների ղեկավարներին, Երևան քաղաքում` Երևանի քաղաքապետին, մարզպետներին ինքնակամ կառուցված շենքի, շինության կարգավիճակի որոշման նպատակով ներկայացնում են հայտ կցելով անշարժ գույքի կադաստր վարող մարմինների կողմից տրված չափագրման տվյալները և սահմանված չափով վճարի մուծման անդորրագիրը:

i

5. Համայնքների ղեկավարները, Երևան քաղաքում` Երևանի քաղաքապետը, մարզպետները ելնելով համապատասխան քաղաքաշինական փաստաթղթերի պահանջներից, մինչև 1998 թվականի դեկտեմբերի 31-ը ընդունում են ինքնակամ կառուցված շենքի, շինության հետագա կարգավիճակի վերաբերյալ որոշում:

Ինքնակամ կառուցված շենքի, շինության նկատմամբ քաղաքացիների սեփականության իրավունքը ճանաչվում է, և դրանք սահմանված կարգով ներկայացվում են պետական գրանցման, եթե համապատասխանում են գործող քաղաքաշինական, սանիտարական և տեխնիկական նորմերի պահանջներին ու պայմաններին:

Ինքնակամ կառուցված շենքի, շինության նկատմամբ քաղաքացիների սեփականության իրավունքը չի ճանաչվում, եթե դրանք չեն համապատասխանում քաղաքաշինական, տեխնիկական, սանիտարական նորմերի պահանջներին ու պայմաններին: Հայտը մերժելու մասին որոշումը ներկայացվում է Հայաստանի Հանրապետության անշարժ գույքի պետական միասնական կադաստրի վարչության համապատասխան տարածքային մարմին` վերջինիս կողմից, որպես ինքնակամ շենք, շինություն, հաշվառման գրքերում գրանցման համար:

i

(5-րդ կետը փոփ. 27.08.98 թիվ 538 որոշում)

6. Եթե ինքնակամ կառուցված շենքը, շինությունը կառուցված են պետական սեփականություն հանդիսացող հողերի վրա և համապատասխանում են գործող քաղաքաշինական, սանիտարական և տեխնիկական նորմերի պահանջներին ու պայմաններին, ապա հայտատուի հայտի հիման վրա օրենքով սահմանված կարգով ինքնակամ զբաղեցված հողամասն օտարվում է նրան կամ տրվում վարձակալության` սահմանելով վարձավճար Հայաստանի Հանրապետության օրենսդրությամբ սահմանված կարգով:

(6-րդ կետը փոփ. 14.05.98 թիվ 290 որոշում)

7. Եթե շենքը, շինությունը կառուցված են այլ քաղաքացու` սեփականության իրավունքով պատկանող հողամասի վրա, ապա տվյալ հողամասի սեփականատիրոջ համաձայնության դեպքում շենքի, շինության նկատմամբ ճանաչվում է շենք, շինություն ինքնակամ կառուցած քաղաքացու սեփականության իրավունքը: Սեփականատիրոջ համաձայնության բացակայության դեպքում ինքնակամ կառուցված շենքի, շինության հետագա կարգավիճակի հարցը լուծվում է դատական կարգով:

i

8. Ինքնակամ կառուցված շենքերի, շինությունների հետագա կարգավիճակի վերաբերյալ որոշումների ընդունման համար շենք, շինություն ինքնակամ կառուցողները, մինչև համայնքների ղեկավարների, Երևան քաղաքում` Երևանի քաղաքապետի, մարզպետների կողմից համապատասխան որոշման ընդունումը, հաշվառման և չափագրման աշխատանքներն իրականացնելու նպատակով Հայաստանի Հանրապետության անշարժ գույքի պետական միասնական կադաստրի վարչության տարածքային մարմիններ են մուծում նշված աշխատանքների կատարման և ծառայությունների մատուցման համար սահմանված չափի վճար:

Ինքնակամ կառուցված շենքի, շինության նկատմամբ քաղաքացիների սեփականության իրավունքի ճանաչման վերաբերյալ որոշման ընդունման դեպքում քաղաքացիները Հայաստանի Հանրապետության օրենսդրությամբ սահմանված կարգով մուծում են վճար հետևյալ դրույքաչափով

ա) բնակելի (բնակելի, այգեգործական) տների, հասարակական և արտադրական շինությունների 1 քառ. մետր մակերեսի համար` 1000 դրամ.

բ) բնակելի (բնակելի, այգեգործական) տանը կից տնտեսական և օժանդակ շինությունների 1 քառ. մետր մակերեսի համար` 500 դրամ.

i

գ) քաղաքաշինական գործունեություն իրականացնելու համար սահմանված չափի վճար.

դ) կադաստրային գնահատման ու պետական գրանցման համար` Հայաստանի Հանրապետության օրենսդրությամբ սահմանված չափի վճար և պետական տուրք:

 

III. Ինքնակամ կառուցված շենքի, շինության

պետական գրանցումը

 

9. Սույն կարգին համապատասխան համայնքների ղեկավարների, Երևան քաղաքում Երևանի քաղաքապետի, մարզպետների կողմից` ինքնակամ կառուցված շենքերի, շինությունների նկատմամբ քաղաքացիների սեփականության իրավունքը ճանաչելու վերաբերյալ ընդունված որոշումների հիման վրա Հայաստանի Հանրապետության անշարժ գույքի պետական միասնական կադաստրի վարչության տարածքային մարմինները 15-օրյա ժամկետում կատարում են տվյալ շենքի, շինության պետական գրանցում սեփականատերերին հանձնելով անշարժ գույքի սեփականության (օգտագործման) իրավունքի գրանցման վկայականներ, որից հետո կատարում են տվյալ շենքի, շինության և հողամասի կադաստրային գնահատում հողի հարկի և գույքահարկի հարկման նպատակով:

 

IY. Պատասխանատվությունը սույն կարգի դրույթները խախտելու համար

 

10. Սույն կարգի խախտումներն առաջացնում են պատասխանատվություն Հայաստանի Հանրապետության օրենսդրությամբ սահմանված կարգով:

11. Սույն կարգի կիրառման ընթացքում ծագած վեճերը լուծվում, իսկ պաշտոնատար անձանց ապօրինի գործողությունները գանգատարկվում են դատական կարգով:

 

 

pin
ՀՀ կառավարություն
25.02.1998
N 114
Որոշում