320.0189.061207
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«06» 12 2007 Թ.
ՊԵՏԱԿԱՆ ԳՐԱՆՑՄԱՆ ԹԻՎ 32007441
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ՔԱՂԱՔԱՑԻԱԿԱՆ ԱՎԻԱՑԻԱՅԻ ԳԼԽԱՎՈՐ ՎԱՐՉՈՒԹՅՈՒՆ ՀՐԱՄԱՆ
14 նոյեմբերի 2007 թվականի N 189-Ն
i
ՕԴԱՆԱՎԱԿԱՅԱՆՆԵՐԻ ԿՈՂՄԻՑ ԹՌԻՉՔ-ՎԱՅՐԷՋՔՆԵՐԻ ՀԱՄԱՐ ԺԱՄԱՆԱԿԱՀԱՏՎԱԾ (ՍԼՕՏ) ՏՐԱՄԱԴՐԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ
Ղեկավարվելով Հայաստանի Հանրապետության «Ավիացիայի մասին» օրենքի 12-րդ հոդվածի 6-րդ մասով
ՀՐԱՄԱՅՈՒՄ ԵՄ`
1. Հաստատել «Օդանավակայանների կողմից թռիչք-վայրէջքների համար ժամանակահատված (ՍԼՕՏ) տրամադրելու կարգը»` համաձայն հավելվածի:
2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:
Հավելված
ՀՀ կառավարությանն առընթեր
քաղաքացիական ավիացիայի
գլխավոր վարչության պետի
2007 թ. նոյեմբերի 14-ի
թիվ 189-Ն հրամանի
ԿԱՐԳ
ՕԴԱՆԱՎԱԿԱՅԱՆՆԵՐԻ ԿՈՂՄԻՑ ԹՌԻՉՔ-ՎԱՅՐԷՋՔՆԵՐԻ ՀԱՄԱՐ ԺԱՄԱՆԱԿԱՀԱՏՎԱԾ (ՍԼՕՏ) ՏՐԱՄԱԴՐԵԼՈՒ
Գլուխ I
ԸՆԴՀԱՆՈՒՐ ԴՐՈՒՅԹՆԵՐ
1. Օդանավակայանների կողմից թռիչք-վայրէջքների համար ժամանակահատված (ՍԼՕՏ) տրամադրելու կարգը (այսուհետ` Կարգ) սահմանում է օդանավակայանի կողմից ուղևորային և բեռնային փոխադրումներ իրականացնող օդանավ շահագործողներին թռիչք-վայրէջքների համար ժամանակահատվածներ տրամադրելու գործընթացը:
2. Կարգի իմաստով ՍԼՕՏ է համարվում օդանավակայանում թռիչքների և վայրէջքների համար հատկացվող ժամանակահատվածը:
3. Կարգի նպատակն է կանոնակարգել օդանավակայանում իրականացվող օդանավերի անվտանգ ու կանոնավոր փոխադրահոսքերը, ելնելով օդանավակայանի շահագործողական ցուցանիշներից, ինչպես նաև իրականացնել ԻԿԱՕ-ի թիվ 283-AT/119 շրջաբերականով առաջարկվող ուղեցույցները` կապված օդանավակայաններում ընդհանուր ուղևորահոսքի և օդանավերի շարժի ավելացման հետ:
4. Սույն կարգի իմաստով օդանավակայանի շահագործողական ցուցանիշներ են համարվում`
ա. օդանավակայանի աերոդրոմի տարրերի շահագործողական բնութագրերը.
բ. օդանավակայանի ուղևորային և բեռնային համալիրների թողունակությունը.
գ. օդանավերի վերգետնյա սպասարկման համար նախատեսված անհրաժեշտ տեխնիկական, ինչպես նաև մարդկային ռեսուրսները:
5. Օդանավակայաններում ՍԼՕՏ-ի տրամադրումը հիմնվում է չեզոք, հստակ և ոչ խտրական հիմքերի վրա:
Գլուխ II
ՕԴԱՆԱՎԱԿԱՅԱՆՆԵՐՈՒՄ ՍԼՕՏ-Ի ՏՐԱՄԱԴՐՈՒՄԸ
6. ՍԼՕՏ-ի տրամադրման նպատակով օդանավակայանների գործադիր մարմինների կողմից ստեղծվում է աշխատանքային խումբ (այսուհետ` Խումբ), որը կազմվում է օդանավակայանի, օդային երթևեկության սպասարկման և օդանավակայանում վերգետնյա սպասարկում իրականացնող ծառայությունների, ինչպես նաև մաքսային, սահմանապահ և միգրացիոն մարմինների ներկայացուցիչներից, իրենց համաձայնությամբ:
Խմբի որոշմամբ նրա նիստերին կարող են հրավիրվել և մասնակցել օդանավ շահագործողների ներկայացուցիչները:
7. Կանոնավոր չվերթերի համար ՍԼՕՏ-երի տրամադրումն իրականացվում է տարին երկու անգամ օդանավ շահագործողների հայտերի հիման վրա` ամառային և ձմեռային չվացուցակները հաստատելու ժամանակ:
Ամառային կամ ձմեռային չվացուցակը հաստատվում է Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչության (այսուհետ` Գլխավոր վարչություն) կողմից օդանավ շահագործողի հայտի և Խմբի եզրակացության հիման վրա:
8. Ելնելով օդանավակայանի շահագործողական ցուցանիշներից Խումբը կարող է մերժել ներկայացված հայտը, օդանավ շահագործողին ներկայացնելով մերժման հիմնավորումը և իր առաջարկությունը. հնարավոր ՍԼՕՏ-ի հատկացման վերաբերյալ:
Հայտի մերժումը, դրա հիմնավորումը և իր առաջարկությունները Խումբն օդանավ շահագործողին է ներկայացնում գրավոր ձևով ոչ ուշ, քան 10-օրյա ընթացքում, հակառակ դեպքում հայտը համարվում է ընդունված:
9. Փոխադարձ պայմանավորվածությամբ և Գլխավոր վարչության ու Խմբի համաձայնությամբ ՍԼՕՏ-երը կարող են փոխանակվել օդանավ շահագործողների միջև:
10. Օդանավակայանում առաջացած արտակարգ իրավիճակների դեպքում (ռազմական դրություն, օդանավակայանի աշխատանքային ռեժիմի սահմանափակում` կապված աերոդրոմի վերանորոգման, եղանակային պայմանների հետ, հատուկ չվերթերի իրականացման ժամանակ և այլն), եթե դա բխում է թռիչքների անվտանգության ապահովման պահանջներից Խումբը կարող է դիմել Գլխավոր վարչությանը ՍԼՕՏ-երի կասեցման կամ տեղափոխման առաջարկով:
11. Խումբը կարող է դիմել Գլխավոր վարչությանը օդանավ շահագործողին հատկացված ՍԼՕՏ-ի կասեցման առաջարկով, եթե նրա կողմից չի ապահովվում հատկացված ՍԼՕՏ-ի կանոնավոր իրականացումը (չվերթի պարբերաբար չեղյալ հայտարարում, հետաձգում, ուշացում և այլն):
12. Ոչ կանոնավոր (լրացուցիչ և չարտերային (պատվիրված)) չվերթերի ՍԼՕՏ-երը տրվում են օդանավակայանի համապատասխան ծառայության կողմից, Հայաստանի Հանրապետության «Ավիացիայի մասին» օրենքի 49-րդ հոդվածով սահմանված թույլտվությունների առկայության դեպքում: