/ուժը կորցրել է 09.08.96 թիվ 136 որոշում/
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ՎԱՐՉՈՒԹՅԱՆ
ՈՐՈՇՈՒՄ
10 օգոստոսի 1994 թվականի թիվ 67
Հայաստանի Հանրապետության տարածքում գործող բանկերում պահուստային
ֆոնդի ձևավորման կարգի մասին
Ի կատարումն «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 33-րդ հոդվածի և, ելնելով հանրապետության բանկային համակարգի գործունեության տնտեսական կայունացման, բանկերի նկատմամբ վստահության բարձրացման, նրանց ժամանակավոր ֆինանսական դժվարությունների հաղթահարման, ավանդատուների և վարկատուների շահերի պաշտպանության անհրաժեշտությունից, Հայաստանի Հանրապետության կենտրոնական բանկի վարչությունը որոշում է.
1. Հաստատել Հայաստանի Հանրապետության տարածքում գործող բանկերում պահուստային ֆոնդի ձևավորման կարգը:
2. Հայաստանի Հանրապետության տարածքում գործող բոլոր բանկերին` մինչև 1996 թվականի հունվարի 1-ը պահուստային ֆոնդի գումարը հասցնել առնվազն այդ պահին բանկի փաստացի համալրված կանոնադրական կապիտալի մեծությանը:
3. Սահմանել, որ նոր ստեղծվող բանկի պահուստային ֆոնդի նվազագույն գումարը սահմանվում է բանկի փաստացի համալրված կանոնադրական կապիտալի չափով և հիմնադիրների (փայատերերի) որոշմամբ երեք տարվա ընթացքում հավասար չափերով պետք է հասցվի այդ մեծությանը:
ՀԱՍՏԱՏՎԱԾ Է
Հայաստանի Հանրապետության կենտրոնական բանկի
վարչության 1994 թվականի օգոստոսի 10-ի
թիվ 67 որոշմամբ
Կ Ա Ր Գ
ՀՀ տարածքում գործող բանկերում պահուստային
ֆոնդի ձևավորման
1. ՀՀ տարածքում գործող բանկերի գործունեությունից առաջացած վնասները ծածկելու և անհուսալի պարտքերը մարելու նպատակով բանկերում ստեղծվում է պահուստային ֆոնդ:
2. Հատկացումները պահուստային ֆոնդին կատարվում են յուրաքանչյուր եռամսյակ` բանկի շահույթից, օրենսդրությամբ նախատեսված կարգով:
3. Բանկի 180 օրից ավել ժամկետանց վարկերի գումարը դուրս է գրվում նրա հաշվեկշռից պահուստային ֆոնդի հաշվին, և հաշվառումը փոխադրվում է արտահաշվեկշռային հաշվին: Այդ դեպքում պահպանվում են այդ վարկերի գծով պարտավորությունները, և դադարեցվում է տոկոսների հաշվարկը: Պարտավորությունները հաշվառումից հանվել կարող են միայն օրենսդրությամբ սահմանված դեպքերում և կարգով:
Վարկը մարվելու դեպքում գումարը մուտք է արվում պահուստային ֆոնդ:
4. Եթե բանկի վնասների և անհուսալի պարտքերի գումարները պահուստային ֆոնդի հաշվից դուրս գրելուց հետո պահուստային ֆոնդի մնացորդը ավելի քիչ է, քան բանկի փաստացի համալրված կանոնադրական կապիտալը, ապա ֆոնդը ենթակա է լրացման բանկի շահույթից` հետևյալ ժամկետներում`
պահուստային ֆոնդի մնացորդը բանկի փաստացի համալրված կապիտալի նկատմամբ`
մինչև 15 տոկոս կազմելու դեպքում - 3 ամսվա ընթացքում
16-30 - «- » - «- - 6 -» - «-
31-45 - «- » - «- - 9 -» - «-
45-60 - «- » - «- - 12 -» - «-
61-75 - «- » - «- - 15 -» - «-
76 և ավելի - «- » - «- - 18 -» - «-
Սահմանված ժամկետում բանկի պահուստային ֆոնդը փաստացի համալրված կանոնադրական կապիտալի մեծությանը չհասցնելու դեպքում բանկն այն լրացնում է իր տրամադրության տակ մնացող շահույթից` դրա առնվազն 70 տոկոսն ուղղելով այդ նպատակին, մինչև նախատեսված չափին հասնելը:
5. Բանկերում պահուստային ֆոնդի միջոցների հաշվառումը տարվում է հաշվեկշռի 011 պասսիվային հաշվեկշռային հաշվով:
6. Պահուստային ֆոնդի միջոցները չեն կարող օգտագործվել հիմնական միջոցների ձեռքբերման, բնակարանային շինարարության, տնտեսավարող սուբյեկտների գործունեության փայամասնակցության, աշխատողների վարձատրման, նյութական խրախուսման ֆոնդին հատկացումներ կատարելու և բանկի աշխատողներին ֆինանսական օգնություն ցույց տալու նպատակներով: