ՀԱՄԱՁԱՅՆԱԳԻՐ
ԱՆԿԱԽ ՊԵՏՈՒԹՅՈՒՆՆԵՐԻ ՀԱՄԱԳՈՐԾԱԿՑՈՒԹՅԱՆ ՄԻՋՊԵՏԱԿԱՆ ՀԻԴՐՈՕԴԵՐԵՎՈՒԹԱԲԱՆԱԿԱՆ ՑԱՆՑԻ ՄԱՍԻՆ
Սույն Համաձայնագրի մասնակից պետությունների Կառավարությունները, այսուհետ` Կողմեր,
գիտակցելով հիդրոօդերևութաբանական տեղեկության պարբերական ստացման և օգտագործման կարևորությունը պետությունների անվտանգության ապահովման և տնտեսական ու բնապահպանական բնույթի որոշումների ընդունման հարցում,
ընդունելով հիդրոօդերևութաբանական պայմանների և շրջակա բնական միջավայրի այլ բնութագրիչների գնահատման համար դիտարկումների ազգային, տարածաշրջանային և գլոբալ համակարգերի գործունեության միջպետական համաձայնեցման մեծ նշանակությունը,
արտահայտելով հիդրոօդերևութաբանական ցանցերի կազմակերպման և զարգացման բնագավառում համագործակցելու պատրաստակամություն,
ղեկավարվելով «Հիդրոօդերևութաբանության բնագավառում համագործակցության մասին» 1992 թվականի փետրվարի 8-ի` Համաձայնագրի դրույթներով,
համաձայնեցին ներքոհիշյալի մասին.
ՀՈԴՎԱԾ 1
Սույն Համաձայնագրի նպատակների համար ստորև բերված հասկացություններն ունեն հետևյալ նշանակությունը.
ԱՊՀ միջպետական հիդրոօդերևութաբանական ցանց (ԱՊՀ ՄՀՕՑ)` ազգային դիտարկող կազմակերպությունների ընտրովի դիտակետերի ինտեգրացված համակարգ, որը տեղեկության առումով ապահովում է Կողմերի պահանջարկը հիդրոօդերևութաբանական պայմանների և շրջակա բնական միջավայրի այլ բնութագրիչների մասին,
ազգային հիդրոօդերևութաբանական ցանց` Կողմերից մեկի պետական ցանցային դիտարկող այնպիսի կազմակերպությունների ամբողջություն, որոնք իրականացնում են հիդրոօդերևութաբանական պայմանների և շրջակա բնական միջավայրի այլ բնութագրիչների նկատմամբ դիտարկումներ:
ՀՈԴՎԱԾ 2
ԱՊՀ միջպետական հիդրոօդերևութաբանական ցանցի գործունեության ապահովման բնագավառում Կողմերի համագործակցությունն իրականացվում է հետևյալ ուղղություններով.
ազգային հիդրոօդերևութաբանական ցանցերի, ինչպես նաև գոյություն ունեցող հաղորդակցական ենթակառույցների հիման վրա հիդրոօդերևութաբանական պայմանների և շրջակա բնական միջավայրի այլ բնութագրիչների դիտարկման միջպետական համակարգի ձևավորում և գործունեության ապահովում,
աջակցություն ԱՊՀ ՄՀՕՑ-ի բաղադրամասերի զարգացման ստրատեգիայի և համապատասխան համատեղ գիտատեխնիկական ծրագրերի մշակմանը և իրագործմանը,
աջակցություն ԱՊՀ ՄՀՕՑ-ի գործունեության իրավական, նորմատիվ-մեթոդական, չափաբանական, տեխնոլոգիական և ծրագրաապարատային ապահովմանը:
ՀՈԴՎԱԾ 3
ԱՊՀ միջպետական հիդրոօդերևութաբանական ցանցի հիմնական խնդիրներն են.
հիդրոօդերևութաբանական պայմանների և շրջակա բնական միջավայրի այլ բնութագրիչների մասին ժամանակին, հավաստի և լիարժեք տեղեկություն ստանալը, այդ թվում` վտանգավոր հիդրոօդերևութաբանական պայմանների առաջացման և աղտոտվածության բարձր մակարդակի մասին` բնական և տեխնածին բնույթի արտակարգ իրավիճակներից տնտեսության և բնակչության պաշտպանության միջոցների ձեռնարկման նպատակով,
մակերևութային ջրերի աղտոտվածության մակարդակների մասին և անդրսահմանային ջրային օբյեկտներում ջրի ծախսերի մասին տեղեկություն ստանալը, մթնոլորտային օդով աղտոտող նյութերի անդրսահմանային տեղափոխման դիտարկումների ապահովումը,
դիտարկման մեթոդների միասնականության, չափումների պահանջվող ճշգրտության և համադրման, տեղեկատվական արտադրանքի հավաստիության ապահովումը:
ՀՈԴՎԱԾ 4
ԱՊՀ միջպետական հիդրոօդերևութաբանական ցանցը ձևավորվում է հիդրոօդերևութաբանական պայմանների և շրջակա բնական միջավայրի այլ բնութագրիչների դիտարկումների` գոյություն ունեցող ազգային ցանցերի և տվյալների հավաքման, մշակման ու տարածման տեխնոլոգիաներին տիրապետող գործող կառույցների հիմքի վրա:
ՀՈԴՎԱԾ 5
Անկախ Պետությունների Համագործակցության հիդրոօդերևութաբանության միջպետական խորհուրդը, որպես Անկախ Պետությունների Համագործակցության համակարգող ինստիտուտ, ըստ ազգային հիդրոօդերևութաբանական ծառայությունների գործունեության հիմնական ուղղությունների`
որոշում է ԱՊՀ միջպետական հիդրոօդերևութաբանական ցանցի կազմը (դիտարկման կայանների կետերի ցանկը) և տարբեր տեսակի դիտարկումների մեթոդական ապահովման իրականացման մեխանիզմները,
ԱՊՀ ՄՀՕՑ-ի գործունեության հետ կապված հարցերը լուծելիս ապահովում է ազգային հիդրոօդերևութաբանական մարմինների փոխգործակցությունը:
ՀՈԴՎԱԾ 6
Կողմերն աջակցում են ԱՊՀ միջպետական հիդրոօդերևութաբանական ցանցի` ժամանակակից չափիչ գործիքներով և սարքավորումներով, չափումների կատարման սահմանված կարգով հավաստագրված մեթոդիկաներով, աշխատանքային չափանմուշներով, տվյալների փոխանցման համար հաղորդակցական ուղիներով, ինչպես նաև դրանց մշակման համար ավտոմատացման և հաշվողական տեխնիկայի միջոցներով ապահովմանը:
ԱՊՀ ՄՀՕՑ-ի գործունեության արդյունքում ստացված տեղեկությունը Կողմերի օգտագործման համար մատչելի է և ազատ:
ՀՈԴՎԱԾ 7
ԱՊՀ միջպետական հիդրոօդերևութաբանական ցանցի ֆինանսավորումն իրականացվում է ազգային հիդրոօդերևութաբանական ծառայությունների, ինչպես նաև շահագրգիռ կազմակերպությունների` ներառյալ Համաշխարհային օդերևութաբանական կազմակերպության և այլ միջազգային հիմնադրամների միջոցների հաշվին:
Կողմերը ինքնուրույն են ներգրավում ֆինանսական միջոցներ սույն Համաձայնագրով ստանձնած իրենց պարտականությունները կատարելու համար:
ՀՈԴՎԱԾ 8
Սույն Համաձայնագրի կատարման համար պատասխանատու ազգային հիդրոօդերևութաբանական մարմինների միջև փոխգործակցությունը կարող է իրականացվել առանձին պայմանավորվածությունների հիման վրա, որոնք չեն հակասում սույն Համաձայնագրի դրույթներին:
Կողմերը իրականացնում են իրենց գործունեությունը սույն Համաձայնագրի շրջանակներում` իրենց օրենսդրությանը համապատասխան:
ՀՈԴՎԱԾ 9
Սույն Համաձայնագիրը չի շոշափում Կողմերի` սույն Համաձայնագրում ընդգրկված հարցերի վերաբերյալ միջազգային պայմանագրերով կամ այն միջազգային պայմանագրերով ստանձնած իրավունքներն ու պարտավորությունները, որոնք կարող են կնքվել սույն Համաձայնագրի առարկային և նպատակներին համապատասխան:
ՀՈԴՎԱԾ 10
Սույն Համաձայնագրի կիրառման և մեկնաբանման հետ կապված վիճելի հարցերը շահագրգիռ Կողմերի միջև լուծվում են խորհրդակցությունների և բանակցությունների միջոցով:
ՀՈԴՎԱԾ 11
Սույն Համաձայնագրում կարող են կատարվել փոփոխություններ և լրացումներ: Փոփոխությունները և լրացումները ձևակերպվում են առանձին արձանագրություններով, որոնք սույն Համաձայնագրի անբաժանելի մասն են և ուժի մեջ են մտնում սույն Համաձայնագրի 12-րդ հոդվածով նախատեսված կարգով:
ՀՈԴՎԱԾ 12
Սույն Համաձայնագիրն ուժի մեջ է մտնում այն ստորագրած Կողմերի կողմից Համաձայնագրի ուժի մեջ մտնելու համար անհրաժեշտ ներպետական ընթացակարգի կատարման մասին երրորդ ծանուցագիրը ավանդապահին ի պահ հանձնելու օրվանից:
Անհրաժեշտ ընթացակարգերն ավելի ուշ կատարած Կողմերի համար սույն Համաձայնագիրն ուժի մեջ կմտնի համապատասխան փաստաթղթերը ավանդապահին ի պահ հանձնելու օրվանից:
ՀՈԴՎԱԾ 13
Սույն Համաձայնագիրը կնքվում է հինգ տարի ժամկետով և այդ ժամկետը լրանալուց հետո ինքնաբերաբար կերկարաձգվի հաջորդ հնգամյա ժամանակաշրջաններով, եթե Կողմերն այլ որոշում չընդունեն:
ՀՈԴՎԱԾ 14
Յուրաքանչյուր Կողմ կարող է դուրս գալ սույն Համաձայնագրից` այդ մասին դուրս գալուց ոչ ուշ, քան վեց ամիս առաջ գրավոր ծանուցում ուղարկելով ավանդապահին, կարգավորելով սույն Համաձայնագրի գործողության ժամանակ առաջացած ֆինանսական և այլ պարտավորությունները:
ՀՈԴՎԱԾ 15
Սույն Համաձայնագիրը բաց է դրա սկզբունքները և նպատակներն ընդունող այլ պետությունների կողմից միանալու համար` միանալու մասին փաստաթղթերը ավանդապահին հանձնելու միջոցով:
Կատարված է Մոսկվա քաղաքում 2001 թվականի մարտի 16-ին` մեկ բնօրինակով, ռուսերեն: Բնօրինակը պահվում է Անկախ Պետությունների Համագործակցության Գործադիր կոմիտեում, որը սույն Համաձայնագիրը ստորագրած յուրաքանչյուր պետության կուղարկի դրա հաստատված պատճենը:
* Համաձայնագիրը Հայաստանի Հանրապետության համար ուժի մեջ է մտել 2002 թվականի ապրիլի 25-ից: