/ուժը կորցրել է 03.04.95 թիվ 60 որոշում/
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ՎԱՐՉՈՒԹՅԱՆ
ՈՐՈՇՈՒՄ
25 հունվարի 1995 թվականի թիվ 16
Հայաստանի Հանրապետության ներքին արժութային շուկայում
ձեռնարկությունների արտարժութային հասույթի 30 տոկոսի
պարտադիր վաճառքի կարգի մասին
Ելնելով Հայաստանի Հանրապետության կառավարության և Հայաստանի Հանրապետության կենտրոնական բանկի 1994 թվականի դեկտեմբերի 31-ի թիվ 612 համատեղ որոշման, ինչպես նաև Հայաստանի Հանրապետության կենտրոնական բանկի վարչության 1994 թվականի դեկտեմբերի 16-ի թիվ 136 որոշման պահանջներից, Հայաստանի Հանրապետության կենտրոնական բանկի վարչությունը որոշում է.
1. Հաստատել «Հայաստանի Հանրապետության ներքին արժութային շուկայում ձեռնարկությունների արտարժութային հասույթի 30 տոկոսի պարտադիր վաճառքի մասին» կարգը և կիրարկել այն սույն թվականի փետրվարի 1-ից:
2. Համաձայնեցնելով Հայաստանի Հանրապետության ֆինանսների նախարարության հետ, 1995 թվականի փետրվարի 1-ից ուժը կորցրած համարել Հայաստանի Հանրապետության կենտրոնական բանկի և Հայաստանի Հանրապետության ֆինանսների նախարարության 1994 թվականի փետրվարի 2-ի համատեղ հրահանգի այն դրույթները, որոնք հակասում են սույն կարգին:
ՀԱՍՏԱՏՎԱԾ Է
Հայաստանի Հանրապետության կենտրոնական բանկի
վարչության 1995 թվականի հունվարի 25-ի թիվ 16
որոշմամբ
Կ Ա Ր Գ
Հայաստանի Հանրապետության ներքին արժութային
շուկայում ձեռնարկությունների արտարժութային
հասույթի 30 տոկոսի պարտադիր վաճառքի մասին
«ՀՀ ներքին արժութային շուկայում ձեռնարկությունների արտարժութային հասույթի 30 տոկոսի պարտադիր վաճառքի մասին» կարգը մշակվել է «Հայաստանի Հանրապետության կենտրոնական բանկի մասին» , «Արժութային կարգավորման և արժութային վերահսկողության մասին» ՀՀ օրենքների դրույթներին համապատասխան` հաշվի առնելով ՀՀ կառավարության և ՀՀ կենտրոնական բանկի 1993 թ. հուլիսի 30-ի թիվ 402, 1993 թ. դեկտեմբերի 27-ի թիվ 647 և 1994 թ. դեկտեմբերի 31-ի թիվ 612 համատեղ որոշումների, ինչպես նաև ՀՀ կենտրոնական բանկի վարչության 1994 թ. դեկտեմբերի 16-ի թիվ 136 որոշման պահանջները:
1. Ընդհանուր դրույթներ
1.1. Սույն կարգը սահմանում է ՀՀ տարածքում գործող ձեռնարկությունների, միավորումների և կազմակերպությունների (հետագայում` ձեռնարկություններ) ապրանքների (աշխատանքների, ծառայությունների) արտահանումից, ինչպես նաև ՀՀ կենտրոնական բանկի վարչության 1994 թ. մայիսի 16-ի թիվ 29 որոշման համաձայն ՀՀ տարածքում ֆիզիկական անձանց կանխիկ արտարժույթով ծառայությունների մատուցման արտոնագիր ունեցող ձեռնարկությունների կողմից ծառայությունների մատուցումից և ՀՀ կենտրոնական բանկի վարչության 1994թ. մայիսի 17-ի թիվ 33 որոշման 6-րդ կետի համաձայն ՀՀ տարածքում ոչ ռեզիդենտներին ապրանքների /աշխատանքների, ծառայությունների/ իրացումից ստացված արտարժութային հասույթից /այդ թվում` կանխավճարից/ ՀՀ ներքին արժութային շուկայում պարտադիր վաճառքի իրականացման սկզբունքները:
1.2 ՀՀ տարածքում գործող ձեռնարկությունները /անկախ սեփականության ձևից / 1.1 կետում թվարկված դեպքերում գոյացած արտարժութային հասույթի 30 տոկոսը պարտադիր վաճառում են ՀՀ ներքին արժութային շուկայում` միջբանկային արտարժութային սակարկությունների միջոցով:
1.3 Պարտադիր վաճառքի ժամանակ արտահանվող ապրանքների /աշխատանքների, ծառայությունների/ արտարժութային հասույթի մեջ չմտնող մուտքերը, ինչպես նաև այն մուտքերը, որոնք չեն հանդիսանում ապրանքների /աշխատանքների, ծառայությունների/ արտահանումից հասույթ, այլ ստացված են որպես այլ մուտքեր, սահմանված են ՀՀ կառավարության և ՀՀ կենտրոնական բանկի 1993 թ. հուլիսի 30-ի թիվ 402 համատեղ որոշմամբ հաստատված «Տարադրամի պարտադիր վաճառքի մասին» կարգի մեջ:
1.4 ՀՀ ներքին արժութային շուկայում գնված արտարժութային միջոցները ենթակա չեն պարտադիր վաճառքի:
1.5 ՀՀ կառավարության և ՀՀ կենտրոնական բանկի 1993 թ. դեկտեմբերի 27-ի թիվ 647 համատեղ որոշմամբ ստեղծված տարադրամի պարտադիր վաճառքի տոկոսադրույքի կարգավորման և պարտադիր վաճառքից գոյացած միջոցներից նախկին ԽՍՀՄ հանրապետությունների հետ վճարումների կատարման հանձնաժողովի կողմից ՀՀ ձեռնարկություններին տրված արտոնությունները գործում են ՀՀ կենտրոնական բանկի վարչության 1994թ. դեկտեմբերի 16-ի թիվ 136 որոշման 3-րդ կետում սահմանված կարգով:
1.6 Սույն կարգին համապատասխան արտարժութային հասույթը պարտադիր հաշվեգրվում է ձեռնարկությանը սպասարկող բանկի տրանզիտային հաշիվներին:
Բանկերը ձեռնարկության օգտին անկանխիկ և կանխիկ արտարժութային հասույթը ամբողջությամբ մուտքագրում են նրա 076 տրանզիտային հաշվին, որը բացվում է նրանց ընթացիկ արտարժութային հաշիվներին զուգահեռ` ըստ արտարժույթի տեսակների:
1.7 Արտարժութային հասույթի պարտադիր վաճառքի ենթակա գումարները ձեռնարկությունների հանձնարարությամբ սպասարկող բանկը ներկայացնում է վաճառքի միջբանկային արտարժութային սակարկություններում, իսկ մնացած մասը մուտքագրում է ձեռնարկությունների ընթացիկ արտարժութային հաշիվներին, որոնք կարող են տնօրինվել սահմանված կարգով:
2. Ձեռնարկությունների արտարժութային հասույթի
պարտադիր վաճառքի իրականացման կարգը
2.1 Հասույթի մուտքագրումից ոչ ուշ, քան հաջորդ բանկային օրը, սպասարկող բանկն այդ մասին տեղեկացնում է ձեռնարկությանը` կցելով 076 տրանզիտային հաշվի քաղվածքը, այնուհետև տրանզիտային հաշվից դուրս է գրում պարտադիր վաճառքի ոչ ենթակա արտարժութային գումարները և հաշվեգրում է ձեռնարկության ընթացիկ արտարժութային հաշվին:
2.2 Բանկը պարտավոր է տրանզիտային հաշվում դեպոնացված արտարժութային հասույթի պարտադիր վաճառքի ենթակա մասը` 30 տոկոսը, խմբավորել ըստ արտարժույթի տեսակների, յուրաքանչյուրի համար լրացնել միջբանկային արտարժութային սակարկություններում արտարժույթի վաճառքի հայտ, որի մեկ օրինակը ներկայացնել ՀՀ կենտրոնական բանկ: Վերոհիշյալ հայտի վրա պետք է նշված լինեն «պարտադիր վաճառք» բառերը:
2.3 Բանկին իրավունք է տրվում ՀՀ ԿԲ-ի համաձայնությամբ սեփական միջոցների հաշվին գնել պարտադիր վաճառքի ենթակա գումարները հետևյալ դեպքերում.
- երբ վաճառքի ներկայացված գումարը փոքր է սակարկությունում սահմանված լոտի նվազագույն չափից.
- երբ սակարկությանը ներկայացվող հայտերը կազմելուց հետո գոյանում է մնացորդ:
2.4 Առաջիկա սակարկության ժամանակ չվաճառվելու դեպքում բանկը դեպոնացված գումարը մուտքագրում է տվյալ ձեռնարկության ընթացիկ արտարժութային հաշվին, որն այլևս չի համարվում պարտադիր վաճառքի ենթակա գումար:
2.5 Սակարկության ժամանակ պարտադիր վաճառքի ներկայացված գումարների մի մասի չվաճառվելու դեպքում չվաճառված գումարները վերադարձվում են ձեռնարկություններին և այլևս չեն համարվում պարտադիր վաճառքի ենթակա:
2.6 Միջբանկային սակարկության ներկայացված պարտադիր վաճառքի ենթակա գումարը իրացվում է միջբանկային սակարկությունների իրականացման կարգով:
2.7 Բանկերի կողմից տրանզիտային արտարժութային հաշիվներում առկա մնացորդների դիմաց տոկոս չի վճարվում:
Բանկերի կողմից մատուցված բանկային ծառայությունների դիմաց սակարկություններում պարտադիր վաճառված գումարի մասով կոմիսիոն վճար չի գանձվում:
3. Արտարժույթի պարտադիր վաճառքի իրականացման վերահսկողությունը
և խախտումների համար պատասխանատվությունը
3.1 Ձեռնարկությունները պատասխանատվություն են կրում սույն կարգով նախատեսված կանխիկ հասույթը իրենց հաշիվներին սահմանված ժամկետներում չմուտքագրելու դեպքում: Սույն պահանջը խախտելու դեպքում ձեռնարկություններից գանձվում է տուգանք թաքցրած արտարժութային հասույթի գումարի չափով (ՀՀ դրամով` հաշվարկված խախտումը հայտնաբերելու օրվա ՀՀ կենտրոնական բանկի սահմանած հաշվարկային փոխարժեքով): Տուգանքի գումարը մուտքագրվում է ՀՀ պետական բյուջե: Տուգանքի վճարումը ձեռնարկությանը չի ազատում արտարժութային հասույթը բանկերի հաշիվներին մուտքագրելուց և նրա համապատասխան մասի պարտադիր վաճառքից:
3.2 Արտարժույթի պարտադիր վաճառքի ենթակա գումարների իրացման վերահսկողությունը իրականացնում են բանկերը:
Բանկի կողմից արտարժույթի պարտադիր վաճառքի սահմանված ժամկետների խախտման դեպքում բանկը յուրաքանչյուր ժամկետանց օրվա համար ձեռնարկությանը վճարում է տուգանք` փոխանցվող գումարի տվյալ պահին գործող վերաֆինանսավորման տոկոսադրույքի միջին օրական դրույքաչափի չափով (ՀՀ դրամով` հաշվարկված տվյալ օրվա ՀՀ կենտրոնական բանկի սահմանած հաշվարկային փոխարժեքով):
3.3 Սույն կարգով պայմանավորված հաշվապահական ձևակերպումները տրվում են «Տարադրամի պարտադիր վաճառքի մասին» ՀՀ ֆինանսների նախարարության և ՀՀ կենտրոնական բանկի 1994թ. փետրվարի 2-ի համատեղ հրահանգին համապատասխան` հաշվի առնելով ՀՀ բանկերի հաշվապահական հաշվառման հաշիվների գործող պլանը: