110.0324.201198
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅՈՒՆ
ՀՐԱՄԱՆ
12 նոյեմբերի 1998 թ. թիվ 324-Մ
ՆԱԽԱՊԱՏՐԱՍՏԱԿԱՆ ԲԱԺԻՆՆԵՐԻ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ
i
Ի կատարումն ՀՀ կառավարության 6 նոյեմբերի 1998 թ. թիվ 690 որոշման
հրամայում եմ`
Հաստատել «ՀՀ պետական բարձրագույն ուսումնական հաստատություններում նախապատրաստական բաժինների գործունեության» Կանոնակարգը:
«ՀԱՍՏԱՏՈՒՄ ԵՄ»
ՀՀ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐ
Լ. ՄԿՐՏՉՅԱՆ
«25» հոկտեմբերի 1998 թ.
ՀՀ ՊԵՏԱԿԱՆ ԲԱՐՁՐԱԳՈՒՅՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐՈՒՄ ՆԱԽԱՊԱՏՐԱՍՏԱԿԱՆ ԲԱԺԻՆՆԵՐԻ ԳՈՐԾՈՒՆԵՈՒԹՅԱՆ ԿԱՆՈՆԱԿԱՐԳ
1. 1998/99 ուսումնական տարվա ՀՀ պետական բարձրագույն ուսումնական հաստատություններում նախապատրաստական բաժինների դասընթացը սկսվում է 1998 թ. նոյեմբերի 20-ից: Ավարտական քննությունները կազմակերպվում են 1999 թ. հունիսի 5-ից մինչև 15-ը ներառյալ:
2. Նախապատրաստական բաժինների ընդունելության կազմակերպման նպատակով բուհերում ստեղծվում են հանձնաժողովներ հետևյալ կազմով`
նախագահ` բուհի ռեկտոր, պատասխանատու քարտուղար և անդամներ:
3. Դիմորդները ներկայացնում են հետևյալ փաստաթղթերը` դիմում ռեկտորի անունով, ատեստատ միջնակարգ կրթության վերաբերյալ, բժշկական տեղեկանք, 4 լուսանկար և տեղեկանք ընդունելության քննությունների Հաշվիչ կենտրոնից գնահատականների վերաբերյալ:
4. Նախապատրաստական բաժիններ կարող են դիմել 1998 թ. ՀՀ պետական բուհերի կենտրոնացված ընդունելության քննությունների մրցույթից դրական միավորներով դուրս մնացած այն դիմորդները, ովքեր հանձնել են բուհերի կողմից հայտարարված համապատասխան մասնագիտության քննությունները: Դիմորդները կարող են մասնակցել միայն մեկ մասնագիտության մրցույթին: Նախապատրաստական բաժինների մասնագիտությունները և համապատասխանաբար հատկացվող տեղերը ընտրում են բուհերը:
5. Բուհի նախապատրաստական բաժին ընդունվող դիմորդները մինչև նրանց որպես ունկնդիրների հրամանագրումը կնքում են պայմանագիր տվյալ բուհի հետ: Նախապատրաստական բաժինների մրցույթը անց է կացվում համաձայն ՀՀ պետական բուհերի 1998 թ. ընդունելության քննությունների կանոնների: Մինչև բուհի կողմից սահմանված ժամկետը նախապատրաստական բաժիններում ուսանելու վարձը չվճարող դիմորդները զրկվում են մրցույթին մասնակցելու հնարավորությունից:
6. Նախապատրաստական բաժնի ունկնդիրները առաջին կիսամյակի վերջում հանձնում են քննություններ մասնագիտական առարկաներից և ստուգարքներ բուհի կողմից որոշված հանրակրթական առարկաներից` բուհերի ուսանողների համար սահմանված կարգով: Երկրորդ կիսամյակի վերջում կազմակերպվում են միայն ավարտական քննություններ:
7. Նախապատրաստական բաժինների արական սեռի ունկնդիրները օրենքով սահմանված կարգով ենթակա են զորակոչի:
8. Ավարտական քննությունների անցկացման համար բուհի ռեկտորի հրամանով ստեղծվում է հանձնաժողով, որի կազմում կարող են ընդգրկվել ինչպես տվյալ բուհի, այնպես էլ այլ բուհերի համապատասխան մասնագետներ: Հանձնաժողովի նախագահ է հանդիսանում բուհի ռեկտորը:
9. Ավարտական քննական աշխատանքները գնահատվում են համաձայն բուհերի ընդունելության քննությունների գնահատման սանդղակի և չափանիշների: Քննական արդյունքները գրանցվում են քննական տեղեկագրերում:
Ըստ առարկաների քննությունների հարցատոմսերը, ծածկագրված տետրերը, բանավոր հարցման թերթիկները և անհրաժեշտ փաստաթղթերը տրամադրում է ՀՀ կրթության և գիտության նախարարությունը:
10. Ավարտական քննությունները դրական հանձնած ունկնդիրները ընդունվում են բուհի համապատասխան մասնագիտության առաջին կուրս, վճարովի հիմունքներով:
11. Նախապատրաստական բաժիններում ուսանելու վճարը չի գերազանցում տվյալ մասնագիտության առաջին կուրսի վճարի 50 տոկոսը:
12. Նախապատրաստական բաժնի ավարտական քննությունները դրական հանձնած ունկնդիրները տվյալ տարվա կենտրոնացված բուհերի ընդունելության քննություններին մասնակցելու դեպքում կորցնում են նախապատրաստական բաժնից բուհ տեղափոխման իրենց իրավունքը:
13. Նախապատրաստական բաժնի ունկնդիրների քննական և ստուգարքային ամփոփաթերթերը, ինչպես նաև ավարտական քննություններին վերաբերող փաստաթղթերը համարվում են խիստ հաշվառման փաստաթղթեր և պահվում են բուհում:
14. Նախապատրաստական բաժնի ավարտական քննությունների արդյունքով բուհ ընդունված ունկնդիրներին հրամանագրում է բուհի ռեկտորը:
ԳՐԱՆՑՎԱԾ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«20» 11 1998 թ.
ՊԵՏԱԿԱՆ ԳՐԱՆՑՄԱՆ ԹԻՎ 12980214