040.0018.240111
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
20 հունվարի 2011 թվականի N 18-Ն
ԵՐԵԽԱՅԻ ՏԱՐԻՔԸ ՈՐՈՇՈՂ ՀԱՆՁՆԱԺՈՂՈՎԻ ԿԱԶՄՆ ՈՒ ԼԻԱԶՈՐՈՒԹՅՈՒՆՆԵՐԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2005 ԹՎԱԿԱՆԻ ՀՈՒՆԻՍԻ 23-Ի N 995-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
Հայաստանի Հանրապետության կառավարությունը որոշում է.
1. Սահմանել`
1) երեխայի տարիքը որոշող հանձնաժողովի կազմը և լիազորությունները` համաձայն N 1 հավելվածի.
2) երեխայի տարիքը որոշելու մասին դիմումի ձևը` համաձայն N 2 հավելվածի.
3) երեխայի տարիքը որոշելու մասին եզրակացության ձևը` համաձայն N 3 հավելվածի:
i
2. Հայաստանի Հանրապետության կառավարության 2005 թվականի հունիսի 23-ի «Քաղաքացիական կացության ակտերի գրառումների վերականգնման կարգը սահմանելու մասին» N 995-Ն որոշմամբ հաստատված կարգի 11-րդ կետը շարադրել հետևյալ խմբագրությամբ.
«11. Եթե բժշկական հաստատությունում չկան մինչև 18 տարեկան երեխայի ծննդյան ժամանակի (տարիքի) մասին տեղեկություններ, ապա երեխայի ծննդյան ակտի գրանցման, վերականգնման համար կարող է հիմք հանդիսանալ երեխայի տարիքը որոշող հանձնաժողովի եզրակացությունը` սույն կարգին համապատասխան գրանցում կատարելու համար:»:
3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2011 ԹՎԱԿԱՆԻ ՀՈՒՆՎԱՐԻ 24-ԻՆ
Հավելված N 1
ՀՀ կառավարության
2011 թվականի հունվարի 20-ի
N 18-Ն որոշման
ԵՐԵԽԱՅԻ ՏԱՐԻՔԸ ՈՐՈՇՈՂ ՀԱՆՁՆԱԺՈՂՈՎԻ ԿԱԶՄԸ ԵՎ ԼԻԱԶՈՐՈՒԹՅՈՒՆՆԵՐԸ
1. Բժշկական կազմակերպություններում ծննդյան ժամանակի մասին տեղեկությունների բացակայության, տեղեկությունները կորսված լինելու, բժշկական կազմակերպություններից դուրս ծնված, գտնված երեխաների ծննդյան գրանցման և այն դեպքերում, երբ անհնար է այլ եղանակով պարզել երեխայի ծննդյան ժամանակը, երեխայի տարիքը որոշելու նպատակով ձևավորվում է մարզային, Երևան քաղաքում` վարչական շրջանի հանձնաժողով (այսուհետ` հանձնաժողով):
2. Բժշկական կազմակերպություններում ծննդյան ժամանակի մասին տեղեկությունների բացակայության, տեղեկությունները կորսված լինելու, բժշկական կազմակերպություններից դուրս ծնված, գտնված երեխաների ծննդյան գրանցման և այն դեպքերում, երբ անհնար է այլ եղանակով պարզել երեխայի ծննդյան ժամանակը, երեխայի տարիքը որոշվում և հրապարակվում է հանձնաժողովի կողմից:
3. Հանձնաժողովը կազմված է 7 անդամից:
4. Հանձնաժողովի կազմում, ի պաշտոնե, ընդգրկվում են մարզպետը, Երևան քաղաքում` վարչական շրջանի ղեկավարը (հանձնաժողովի նախագահ), մարզպետարանի, Երևան քաղաքում` վարչական շրջանի սոցիալական կամ առողջապահական հարցերով զբաղվող ստորաբաժանման ղեկավարը (հանձնաժողովի քարտուղար), մեկական անդամներ մարզպետարանից, Հայաստանի Հանրապետության կառավարությանն առընթեր Հայաստանի Հանրապետության ոստիկանությունից, սոցիալական պաշտպանության, կրթական և առողջապահական կազմակերպություններից:
5. Հանձնաժողովի նախագահը, քարտուղարը և անդամները հանձնաժողովի աշխատանքներին մասնակցում են հասարակական կարգով:
6. Հանձնաժողովի նիստերն իրավազոր են, եթե դրանց ներկա է հանձնաժողովի անդամների կեսից ավելին:
7. Հանձնաժողովի անդամները նիստերի հրավիրման օրվա, տեղի, ժամանակի և օրակարգի մասին իրազեկվում են հանձնաժողովի քարտուղարի կողմից` նիստի հրավիրման օրվանից առնվազն հինգ օր առաջ:
8. Հանձնաժողովի նախագահի հրավերով հանձնաժողովի նիստերին խորհրդակցական ձայնի իրավունքով կարող են մասնակցել այլ անձինք և կազմակերպության ներկայացուցիչներ:
9. Հանձնաժողովի գործունեությունը ղեկավարում է հանձնաժողովի նախագահը:
10. Հանձնաժողովի քարտուղարն ապահովում է հանձնաժողովի աշխատանքների, նիստերի, օրակարգերի, արձանագրությունների, եզրակացությունների նախագծերի նախապատրաստումը, ինչպես նաև եզրակացությունները և դրանք տրամադրում հանձնաժողովի նախագահին ու հանձնաժողովի անդամներին:
11. Հանձնաժողովի նախագահն ապահովում է հանձնաժողովի գործունեության հետ կապված փաստաթղթերի պահպանությունը` Հայաստանի Հանրապետության օրենսդրությամբ սահմանված կարգով:
12. Հայաստանի Հանրապետության կառավարության 2011 թվականի հունվարի 20-ի N 18-Ն որոշմամբ սահմանված դիմումը` համաձայն N 2 հավելվածի, հանձնաժողով կարող են ներկայացնել երեխայի ծնողը (ծնողները), խնամակալության ու հոգաբարձության մարմինները, Հայաստանի Հանրապետության կառավարությանն առընթեր Հայաստանի Հանրապետության ոստիկանությունը, կրթական և առողջապահական, սոցիալական պաշտպանության կամ նմանատիպ այլ կազմակերպություններ:
13. Դիմումի հետ միասին հանձնաժողով է ներկայացվում անձը հաստատող փաստաթուղթ, երեխայի գտնվելու մասին տեղեկություններ, երեխայի քույրերի և եղբայրների ծննդյան վկայականներ, վկայություններ (եթե դրանք հնարավոր է) այն անձանցից, որոնք ունեն երեխայի մոտավոր տարիքի մասին տեղեկություններ:
14. Հանձնաժողովը դիմումը քննության է առնում այն ստանալուց 15 աշխատանքային օրվա ընթացքում:
15. Հանձնաժողովը կարող է լրացուցիչ հարցումներ կատարել բժշկական, կրթական և այլ մարմիններից:
16. Հարցումների դեպքում դիմումի քննարկման ժամկետը կասեցվում է մինչև պատասխանների ստացումը:
17. Դիմումի քննարկման արդյունքում հանձնաժողովի կողմից տրվում է եզրակացություն Հայաստանի Հանրապետության կառավարության 2011 թվականի հունվարի 20-ի N 18-Ն որոշման N 3 հավելվածով սահմանված ձևին համապատասխան երեխայի տարիքը (ծննդյան ժամանակը) որոշելու մասին, որը հաստատվում է հանձնաժողովի նախագահի ու քարտուղարի ստորագրություններով և մարզպետարանի, Երևան քաղաքում` վարչական շրջանի կնիքով:
18. Եզրակացությունների համարակալումն սկսվում է 1-ից և հաջորդաբար շարունակվում տարվա ընթացքում:
19. Հանձնաժողովի եզրակացությունը հիմք է բժշկական կազմակերպությունների կողմից երեխայի ծննդյան ժամանակը գրառելու և Հայաստանի Հանրապետության օրենսդրությամբ սահմանված ձևի փաստաթուղթ տրամադրելու համար:
20. Եթե հանձնաժողովի եզրակացության մեջ երեխայի ծննդյան ժամանակահատվածը նշված է տարվա առաջին կեսը` առանց նշելու ամիսը և ամսաթիվը, ապա ծննդյան ակտի գրանցման մեջ ծննդյան ժամանակ է նշվում տվյալ տարվա ապրիլի 1-ը, եթե նշված է տարվա երկրորդ կեսը` համապատասխանաբար նույն տարվա հոկտեմբերի 1-ը:
21. Եթե հանձնաժողովի եզրակացության մեջ նշված է միայն երեխայի ծննդյան տարեթիվը` առանց նշելու ամիսը, ամսաթիվը, ապա ծննդյան ակտի գրանցման մեջ ծննդյան ամիս և ամսաթիվ է նշվում տվյալ տարվա հուլիսի 1-ը:
22. Եթե հանձնաժողովի եզրակացության մեջ նշված են տարեթիվը և ամիսը` առանց ամսաթվի, ապա ծննդյան ակտի գրանցման մեջ ծննդյան ամսաթիվ է նշվում համապատասխան ամսվա 15-ը:
Հավելված N 2
ՀՀ կառավարության
2011 թվականի հունվարի 20-ի
N 18-Ն որոշման
Ձև
__________________________________________
(հանձնաժողովի անվանումը)
__________________________________________
__________________________________________
(դիմող կազմակերպության անվանումը)
__________________________________________
Քաղ. _____________________________________
(անունը, հայրանունը, ազգանունը)
________________________________________-ից
բնակվող __________________________________
__________________________________________
Անձը հաստատող փաստաթուղթ ________________
(անվանումը,
__________________________________________
սերիան, համարը, երբ և ում կողմից է տրվել
ԴԻՄՈՒՄ
Խնդրում եմ քննության առնել _____________________ սեռի երեխայի, որի ծնողներն են`
մայրը` ______________________________________________________________
(անունը, հայրանունը, ազգանունը, ծննդյան ժամանակը, բնակության
վայրը)
հայրը` ______________________________________________________________
(անունը, հայրանունը, ազգանունը, ծննդյան ժամանակը, բնակության
վայրը)
______________________________________________________________________
տարիքը որոշելու մասին դիմումը:
Երեխան գտնվում է _____________________________________________________
(բնակության վայրը կամ կազմակերպության անվանումը, որտեղ
գտնվում է երեխան)
Կից ներկայացվում են`
_________________________
_________________________
_________________________
_________________________
Դիմող __________________ _____________________
(ստորագրությունը) (անունը, ազգանունը)
_____ _______________ 20 թ.
Հավելված N 3
ՀՀ կառավարության
2011 թվականի հունվարի 20-ի
N 18-Ն որոշման
Ձև
ԵԶՐԱԿԱՑՈՒԹՅՈՒՆ
______ ___________ 20___թ. N_____
_____________________________________________________________________,
(հանձնաժողովի անվանումը)
քննության առնելով ____________________________________________________
(դիմումը ներկայացրած մարմնի անվանումը կամ
______________________________________________________________________
անձի անունը, հայրանունը, ազգանունը)
_______________ սեռի երեխայի տարիքը որոշելու մասին դիմումը, որի
(երեխայի սեռը) ծնողներն են`
մայրը` ______________________________________________________________
(անունը, հայրանունը, ազգանունը)
հայրը` ______________________________________________________________
(անունը, հայրանունը, ազգանունը)
որոշեց
Երեխայի տարիքն է` ____________
ծննդյան ժամանակն է` ________ _________________
ՀԱՆՁՆԱԺՈՂՈՎԻ ՆԱԽԱԳԱՀ __________________ ______________________
(ստորագրությունը) (անունը, ազգանունը)
ՀԱՆՁՆԱԺՈՂՈՎԻ ՔԱՐՏՈՒՂԱՐ ___________________ ____________________
(ստորագրությունը) (անունը, ազգանունը)
Կ.Տ.