(ուժը կորցրել է 27.02.14 թիվ 293-Ն որոշում)
i
040.0558.110511
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
21 ապրիլի 2011 թվականի N 558-Ն
i
ՊԵՏԱԿԱՆ ԵՎ ՀԱՄԱՅՆՔԱՅԻՆ ՍԵՓԱԿԱՆՈՒԹՅՈՒՆ ՀԱՆԴԻՍԱՑՈՂ ՀՈՂԱՄԱՍԵՐԻ ՆՊԱՏԱԿԱՅԻՆ ՆՇԱՆԱԿՈՒԹՅՈՒՆՆ ԱՐԴՅՈՒՆԱԲԵՐՈՒԹՅԱՆ, ԸՆԴԵՐՔՕԳՏԱԳՈՐԾՄԱՆ ԵՎ ԱՅԼ ԱՐՏԱԴՐԱԿԱՆ ՆՇԱՆԱԿՈՒԹՅԱՆ ՀՈՂԵՐԻ ՓՈՓՈԽԵԼՈՒ ՄԱՍԻՆ
Համաձայն Հայաստանի Հանրապետության հողային օրենսգրքի 9-րդ հոդվածի` Հայաստանի Հանրապետության կառավարությունը որոշում է.
1. Հանքավայրի շահագործման հանքային ծանրաբեռնված և փաստացի շահագործման փուլում գտնվող` պետական և համայնքային սեփականություն հանդիսացող հողամասի (բացառությամբ անտառային հողերի) նպատակային նշանակությունը սույն որոշումն ուժի մեջ մտնելու պահից համարվում է արդյունաբերության, ընդերքօգտագործման և այլ արտադրական նշանակության հողամասի` լեռնահատկացման ակտով սահմանված չափով ու սահմաններով, ինչն արտացոլվում է հողային ֆոնդի ընթացիկ հաշվառման տվյալներում և ամենամյա հողային հաշվեկշիռներում:
i
2. Անտառային հողերի նպատակային նշանակության փոփոխման համար հողամասի սեփականատիրոջ դիմումի հիման վրա, որին կցվում է լեռնահատկացման ակտի ընթեռնելի պատճենը, Հայաստանի Հանրապետության տարածքային կառավարման նախարարությունը եռօրյա ժամկետում կազմում է հողամասի նպատակային նշանակության փոփոխման վերաբերյալ որոշման նախագիծ` լեռնահատկացման ակտով սահմանված չափով ու սահմաններով և, որպես շահագրգիռ կողմ, ներկայացնում է համապատասխան համայնք ու Հայաստանի Հանրապետության բնապահպանության նախարարություն` «Իրավական ակտերի մասին» Հայաստանի Հանրապետության օրենքի և Հայաստանի Հանրապետության Նախագահի 2007 թվականի հուլիսի 18-ի ՆՀ-174-Ն հրամանագրով սահմանված կարգով` հնգօրյա ժամկետում` համաձայնեցման: Եթե համապատասխան համայնքը հնգօրյա ժամկետում կարծիք չի տալիս նախագծի վերաբերյալ, ապա հողամասի նպատակային նշանակության փոփոխումը համարվում է համաձայնեցված:
3. Հայաստանի Հանրապետության տարածքային կառավարման նախարարությունը կարծիքներն ստանալուց հետո եռօրյա ժամկետում ամփոփում է ստացված կարծիքներն ու առաջարկությունները, անհրաժեշտության դեպքում հողամասի նպատակային նշանակության փոփոխման վերաբերյալ որոշման նախագծում կատարում է համապատասխան փոփոխություններ և ներկայացնում Հայաստանի Հանրապետության կառավարության աշխատակազմ:
4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2011 ԹՎԱԿԱՆԻ ՄԱՅԻՍԻ 11-ԻՆ