113.0735.130711
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«13» 07 2011 Թ.
ՊԵՏԱԿԱՆ ԳՐԱՆՑՄԱՆ ԹԻՎ 11311326
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԱՇՏՊԱՆՈՒԹՅԱՆ ՆԱԽԱՐԱՐ ՀՐԱՄԱՆ
23 հունիսի 2011 թվականի N 735-Ն
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԱՇՏՊԱՆՈՒԹՅԱՆ ՆԱԽԱՐԱՐՈՒԹՅԱՆ ՊԱՏՎԵՐՈՎ ԲԺՇԿԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ՕՐԴԻՆԱՏՈՒՐԱ ԸՆԴՈՒՆՎԵԼՈՒ ԿԱՐԳԸ ԵՎ ՊԱՅՄԱՆՆԵՐԸ ՀԱՍՏԱՏԵԼՈՒ ՄԱՍԻՆ
Ղեկավարվելով «Իրավական ակտերի մասին» Հայաստանի Հանրապետության օրենքի 19-րդ հոդվածի պահանջներով և հիմք ընդունելով Հայաստանի Հանրապետության կառավարության 2008 թվականի դեկտեմբերի 25-ի N 1554-Ն որոշմամբ հաստատված հավելված 1-ի 13-րդ կետի 7-րդ ենթակետը`
ՀՐԱՄԱՅՈՒՄ ԵՄ`
1. Հաստատել Հայաստանի Հանրապետության պաշտպանության նախարարության պատվերով բժշկական ուսումնական հաստատությունների օրդինատուրա ընդունվելու կարգը և պայմանները` համաձայն հավելվածի:
2. Սույն հրամանն ուժի մեջ է մտնում պաշտոնական հրապարակմանը հաջորդող տասներորդ օրը:
Հավելված
ՀՀ պաշտպանության նախարարի
2011 թ. հունիսի 23-ի
N 735-Ն հրամանի
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԱՇՏՊԱՆՈՒԹՅԱՆ ՆԱԽԱՐԱՐՈՒԹՅԱՆ ՊԱՏՎԵՐՈՎ ԲԺՇԿԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ՕՐԴԻՆԱՏՈՒՐԱ ԸՆԴՈՒՆՎԵԼՈՒ ԿԱՐԳԸ ԵՎ ՊԱՅՄԱՆՆԵՐԸ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով սահմանվում են Հայաստանի Հանրապետության պաշտպանության նախարարության (այսուհետ` Նախարարություն) պատվերով համապատասխան բժշկական ուսումնական հաստատությունների օրդինատուրա (այսուհետ` Օրդինատուրա) ընդունվելու կարգն ու պայմանները:
2. Սույն կարգի համաձայն` համապատասխան բժշկական ուսումնական հաստատություններ են Երևանի Մ. Հերացու անվան պետական բժշկական համալսարանը, Հայաստանի Հանրապետության առողջապահության նախարարության ակադեմիկոս Ս. Ավդալբեկյանի անվան առողջապահության ազգային ինստիտուտը և օտարերկրյա պետությունների բժշկական ուսումնական հաստատությունները:
3. Օրդինատուրայում զինծառայողների ուսուցման կազմակերպման հիմնական խնդիրը Հայաստանի Հանրապետության զինված ուժերի (այսուհետ` Զինված ուժեր) համար նեղ մասնագիտական որակավորում ունեցող բժիշկ-մասնագետների պատրաստումն է:
4. Նախարարության պատվերով Օրդինատուրա ընդունվելու համար մրցույթն (այսուհետ` Մրցույթ) անցկացվում է Օրդինատուրայի ընդունելության կազմակերպման վերաբերյալ ՀՀ պաշտպանության նախարարի (այսուհետ` Նախարար) հրամանով ստեղծվող հանձնաժողովի կողմից հաստատված մասնագիտական գիտելիքների ստուգման հարցաշարերի հիման վրա` հարցազրույցի միջոցով:
5. Դիմորդը Մրցույթ հայտարարվելուց հետո մեկամսյա ժամկետում իր ծառայության վայրի զորամասի հրամանատարին ներկայացնում է զեկուցագիր` նշելով մասնագիտության անվանումը:
6. Սույն կարգի 5-րդ կետում նշված զեկուցագրի վերաբերյալ Դիմորդի ծառայության վայրի զորամասի հրամանատարի դրական կարծիքի դեպքում այն զեկուցվում է ըստ վերադասության և ուղարկվում է Զինված ուժերի ռազմաբժշկական վարչություն, որտեղ կազմվում են դիմորդների անձնական գործերը: Զեկուցագրին կցվում է`
1) ինքնակենսագրությունը,
2) ծառայողական բնութագիրը,
3) բարձրագույն բժշկական հաստատության դիպլոմի (վկայականի) և առաջադիմության միջուկի պատճենը,
4) ինտերնատուրան (մագիստրատուրան) ավարտելու վկայականի պատճենը,
5) անձնագրի պատճենը,
6) սպայի անձնական վկայականի պատճենը,
7) 3/4 չափի 1 լուսանկար,
8) տույժերի և խրախուսանքների ցանկը` հաստատված զորամասի հրամանատարի կողմից:
II. ՄՐՑՈՒՅԹԻ ԿԱԶՄԱԿԵՐՊՈՒՄԸ
7. Զինված ուժերի ռազմաբժշկական վարչությունը մինչև ընդունելության տարվա հուլիսի 10-ը նախապատրաստում է Նախարարի «ՀՀ պաշտպանության նախարարության պատվերով համապատասխան բժշկական ուսումնական հաստատությունների Օրդինատուրայի ընդունելություն հայտարարելու և մրցույթ անցկացնելու, ինչպես նաև մրցութային հանձնաժողով ստեղծելու, դրա անհատական կազմը և ընդունելության համապատասխան մասնագիտությունների ցանկը հաստատելու մասին» հրամանի նախագիծ և ստորագրման է ներկայացնում Նախարարին:
8. Մրցույթի նախապատրաստական և անցկացման աշխատանքների պատասխանատու ստորաբաժանումը Զինված ուժերի ռազմաբժշկական վարչությունն է:
9. Գումարված առաջին նիստում հանձնաժողովը քննության է առնում Դիմորդների փաստաթղթերը և կայացնում համապատասխան որոշում` Մրցույթին մասնակցելու թույլտվություն տալու մասին:
10. Դիմորդին չի թույլատրվում մասնակցել Մրցույթին, եթե չի ներկայացրել սույն կարգի 6-րդ կետով նախատեսված փաստաթղթերից որևէ մեկը, կամ փաստաթղթերը թերի են: Փաստաթղթերում թերության առկայության դեպքում Դիմորդին հնարավորություն է տրվում մեկօրյա ժամկետում դրանք շտկել: Անհրաժեշտության դեպքում Հանձնաժողովը կարող է հրավիրել և լսել Դիմորդին: Մրցույթին մասնակցել չթույլատրելու մասին մրցույթի նախապատրաստական աշխատանքներ իրականացնող ստորաբաժանումը գրավոր տեղեկացնում է Դիմորդին:
11. Եթե Հանձնաժողովը Դիմորդներից ոչ մեկին չի թույլատրում մասնակցել Մրցույթին, ինչպես նաև` եթե Դիմորդներից ոչ ոք չի ներկայացել, ապա Հանձնաժողովը Մրցույթը չկայացած համարելու մասին ընդունում է որոշում: Այդ որոշումը Հանձնաժողովն անմիջապես ուղարկում է Նախարարին:
12. Մրցույթն անցկացվում է սույն կարգի 7-րդ կետում նշված հրամանով սահմանված ժամկետում:
III. ՀԱՐՑԱԶՐՈՒՅՑԻ ԱՆՑԿԱՑՈՒՄԸ
13. Դիմորդների հետ հարցազրույցն անցկացվում է նրանց մասնագիտական գիտելիքները և գործնական կարողությունները ստուգելու նպատակով:
14. Հանձնաժողովը յուրաքանչյուր Դիմորդի հետ հարցազրույցն անցկացնում է առանձին:
15. Հարցազրույցի ընթացքում Դիմորդի պատասխանները գնահատվում են (ճիշտ կամ սխալ) Հանձնաժողովի` հարց տվող անդամի կողմից:
16. Եթե Դիմորդի տված պատասխանը գնահատվում է սխալ, ապա Հանձնաժողովի գնահատող անդամի կողմից ասվում է ճիշտ պատասխանը:
17. Մրցութային հանձնաժողովը բաց քվեարկությամբ որոշում է Մրցույթի արդյունքում հաղթող ճանաչված Դիմորդներին:
18. Մրցույթի հաղթող է ճանաչվում այն Դիմորդը, ով հարցազրույցից հետո, Հանձնաժողովի դռնփակ նիստում հարցազրույցի արդյունքների հիման վրա գնահատվել է առավել բարձր:
19. Հանձնաժողովի կողմից Դիմորդների հավասար գնահատվելու դեպքում նախատեսվող առավելության պայմաններն են`
1) պետական բժշկական բարձրագույն ուսումնական հաստատությունը գերազանց ավարտելը,
2) սահմանամերձ զորամասերում ծառայությունը,
3) մարտական գործողությունների բժշկական ապահովման փորձ ունենալը,
4) զինվորական ծառայության ստաժը,
5) տեսչական (եզրափակիչ) ստուգումների ժամանակ երկու և ավելի անգամ լավ կամ գերազանց արդյունքներ ցուցաբերելը,
6) Հայաստանի Հանրապետության կառավարական կամ Նախարարի կողմից տրված պարգևներ ունենալը:
20. Հանձնաժողովի նիստը գումարվում է Հանձնաժողովի անդամների առնվազն կեսից ավելիի մասնակցությամբ:
21. Հանձնաժողովի կողմից ընդունված որոշումները կարող են բողոքարկվել Հայաստանի Հանրապետության օրենքներով սահմանված կարգով:
IV. ՄՐՑՈՒՅԹԻ ԱՐԴՅՈՒՆՔՆԵՐԻ ԱՄՓՈՓՈՒՄԸ ԵՎ ՀԱՂԹՈՂ ՃԱՆԱՉՎԱԾ ԶԻՆԾԱՌԱՅՈՂՆԵՐԻ ՈՒՍՈՒՄՆԱՌՈՒԹՅԱՆ ՆԱԽԱՊԱՏՐԱՍՏՈՒՄԸ
22. Հանձնաժողովը Մրցույթի արդյունքում հաղթող ճանաչված Դիմորդների համապատասխան փաստաթղթերը մեկ աշխատանքային օրվա ընթացքում ուղարկում է Նախարարության կադրերի և ռազմական կրթության վարչություն` Օրդինատուրա ընդունվելու վերաբերյալ Նախարարի հրամանի նախագիծ նախապատրաստելու և ստորագրման ներկայացնելու համար:
23. Մրցույթից հետո չհամալրված տեղեր մնալու դեպքում, նույն օրը, չհաղթած, բայց դրական գնահատված Դիմորդների հետ կազմակերպվում է լրացուցիչ մրցույթ` սույն կարգով նախատեսված ընթացակարգով:
24. Նախարարի հրամանով Օրդինատուրա ընդունված բժիշկ-սպաները (այսուհետ` Օրդինատոր) 10 օրվա ընթացքում իրենց նախկին զինվորական ծառայության վայրից իրային և դրամական վկայականներով ներկայանում են մրցույթի նախապատրաստական աշխատանքներն իրականացնող ստորաբաժանում` նշանակված վայր մեկնելու համար:
25. Մինչև ուսումնառության մեկնելը ՀՀ ՊՆ կադրերի և ռազմական կրթության վարչության պետը, նախապես համաձայնեցված օրը, Օրդինատորների հետ (որպես ունկնդիր) կնքում է ուսումնական և հետուսումնական 5 տարի զինվորական ծառայության անցնելու մասին պայմանագրեր, եթե այդ ունկնդիրները չունեն 20 տարվա զինվորական ծառայություն անցնելու պայմանագիր կամ Օրդինատուրան ավարտելու պահին վերջիններիս հետագա պայմանագրային զինվորական ծառայության ժամկետը 5 տարուց պակաս է:
26. ՈՒսումնական և հետուսումնական 5 տարի զինվորական ծառայության անցնելու պայմանագիր կնքելուց հրաժարվելու դեպքում Օրդինատորի ընդունելության արդյունքները համարվում են չեղյալ և նա վերադառնում է իր ծառայության վայր:
27. Օրդինատորների համար պահպանվում են Նախարարի հրամանով սահմանված դրամական բավարարման չափերը:
28. Օրդինատուրայում սովորած տարիներին զինվորական կոչման ժամկետը լրանալու դեպքում Օրդինատորը ներկայացվում է հերթական զինվորական կոչման, եթե նախկին զբաղեցրած պաշտոնի կոչումը համապատասխանում է (կամ գերազանցում է) առաջարկված կոչմանը:
29. Օրդինատորների հանդերձանքի բավարարումը կատարվում է համաձայն մատակարարման նորմերի` Զինված ուժերի ռազմաբժշկական վարչության կողմից:
30. ՀՀ համապատասխան բժշկական ուսումնական հաստատությունից սահմանված հեռավորության վրա բնակվող Օրդինատորներն ապահովվում են հանրակացարանով կամ Նախարարի համապատասխան հրամաններով սահմանված կարգով և չափով ստանում բնակվարձի փոխհատուցում:
31. Օրդինատուրայում ուսումնառության ընթացքում զինծառայողները ենթարկվում են տվյալ բժշկական ուսումնական հաստատության կլինիկական օրդինատուրայի կանոնակարգին: Բժշկական ուսումնական հաստատության կողմից տրված բացասական եզրակացության հիման վրա տվյալ կլինիկական Օրդինատորը Նախարարի հրամանով հեռացվում է կլինիկական Օրդինատուրայից և ուղարկվում ՀՀ ՊՆ կադրերի և ռազմական կրթության վարչություն` հետագա ծառայությունը շարունակելու հարցը կարգավորելու համար: