(ուժը կորցրել է 20.08.02 թիվ ՆԿ-1170-Ն կարգադրություն)
i
031.0209.181298
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ
ԿԱՐԳԱԴՐՈՒԹՅՈՒՆԸ
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ ԱՇԽԱՏԱԿԱԶՄԻ ՀԱՍԱՐԱԿԱՅՆՈՒԹՅԱՆ ԵՎ ՏԵՂԵԿԱՏՎՈՒԹՅԱՆ ՄԻՋՈՑՆԵՐԻ ՀԵՏ ԿԱՊԵՐԻ ՎԱՐՉՈՒԹՅԱՆ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ
Հիմք ընդունելով Հայաստանի Հանրապետության Նախագահի 1998 թվականի օգոստոսի 5-ի «Հայաստանի Հանրապետության Նախագահի աշխատակազմի կանոնադրության և կազմակերպական կառուցվածքի մասին» ՆՀ-97 հրամանագիրը` որոշում եմ.
1. Հաստատել Հայաստանի Հանրապետության Նախագահի աշխատակազմի հասարակայնության և տեղեկատվության միջոցների հետ կապերի վարչության կանոնադրությունը` համաձայն հավելվածի:
2. Սույն կարգադրությունն ուժի մեջ է մտնում պաշտոնական հրապարակման պահից:
18 դեկտեմբերի 1998թ.
ՆԿ-209
Հավելված
Հայաստանի Հանրապետության Նախագահի
1998 թվականի դեկտեմբերի 18-ի
ՆԿ-209 կարգադրության
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ ԱՇԽԱՏԱԿԱԶՄԻ ՀԱՍԱՐԱԿԱՅՆՈՒԹՅԱՆ ԵՎ ՏԵՂԵԿԱՏՎՈՒԹՅԱՆ ՄԻՋՈՑՆԵՐԻ ՀԵՏ ԿԱՊԵՐԻ ՎԱՐՉՈՒԹՅԱՆ
ԿԱՆՈՆԱԴՐՈՒԹՅՈՒՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Հայաստանի Հանրապետության Նախագահի աշխատակազմի (այսուհետ` Աշխատակազմ) հասարակայնության և տեղեկատվության միջոցների հետ կապերի վարչությունը (այսուհետ` Վարչություն) Աշխատակազմի կառուցվածքային ստորաբաժանում է:
2. Վարչությունն իր գործունեության ընթացքում ղեկավարվում է Հայաստանի Հանրապետության Սահմանադրությամբ, Հայաստանի Հանրապետության օրենքներով, Հայաստանի Հանրապետության Նախագահի հրամանագրերով և կարգադրություններով, Աշխատակազմի կանոնադրությամբ, սույն կանոնադրությամբ, ինչպես նաև Աշխատակազմի ղեկավարի հրամաններով:
3. Վարչության կանոնադրությունը հաստատում և փոփոխում է Հայաստանի Հանրապետության Նախագահը` Աշխատակազմի ղեկավարի ներկայացմամբ:
4. Վարչության ներքին կառուցվածքը և հաստիքացուցակը հաստատում և փոփոխում է Աշխատակազմի ղեկավարը` Վարչության պետի ներկայացմամբ:
5. Վարչությունն ունի իր անվանմամբ ձևաթուղթ:
II. ՎԱՐՉՈՒԹՅԱՆ ԽՆԴԻՐՆԵՐԸ ԵՎ ԳՈՐԾԱՌՈՒՅԹՆԵՐԸ
1. Վարչության խնդիրներն են`
- Հայաստանի Հանրապետության օրենսդրությամբ Հայաստանի Հանրապետության Նախագահին և Աշխատակազմին վերապահված լիազորությունների լիարժեք և արդյունավետ իրականացման ապահովումը` իր իրավասության շրջանակներում.
- Հայաստանի Հանրապետության Նախագահի գործունեության լուսաբանումը:
2. Վարչության գործառույթներն են`
- Հայաստանի Հանրապետության Նախագահի և Աշխատակազմի գործունեության մասին ամենօրյա մամուլի հաղորդագրություններ պատրաստելը.
- Հայաստանի Հանրապետության Նախագահի գործունեության, ինչպես նաև նրա հետ առնչվող միջոցառումների, օտարերկրյա բարձրաստիճան պատվիրակությունների այցերի վերաբերյալ ամենօրյա մամուլի հաղորդագրություններ պատրաստելը.
- Հայաստանի Հանրապետության Նախագահի հետ լրագրողների կապի ապահովումը, Հայաստանի Հանրապետության Նախագահի մամուլի ասուլիսներ, հարցազրույցներ, ինչպես նաև լրատվամիջոցների ղեկավարների հետ հանդիպումներ կազմակերպելը.
- Հայաստանի Հանրապետության Նախագահի մամուլի քարտուղարի ճեպազրույցների, ասուլիսների, խորհրդակցությունների և այլ գործառույթների իրականացման ապահովումը.
- Հայաստանի Հանրապետության Նախագահին առընթեր խորհրդակցական մարմինների գործունեության լուսաբանումը, ինչպես նաև Հայաստանի Հանրապետության Նախագահի հրամանագրերի և կարգադրությունների վերաբերյալ տեղեկատվության ապահովումը.
- ԻՆՏԵՐՆԵՏ-ում Հայաստանի Հանրապետության Նախագահի էջը կազմակերպելը և պահպանելը.
- մամուլի հետ աշխատանք իրականացնելը, այդ թվում` հայաստանյան մամուլի ամենօրյա տեսություն, ինչպես նաև ԻՆՏԵՐՆԵՏ-ի միջոցով օտարերկրյա թերթերի ու գործակալությունների նյութերն ուսումնասիրելը, դրանց հիման վրա ամենօրյա տեսություններ պատրաստելը և դրանք Աշխատակազմի ղեկավարին ու Հայաստանի Հանրապետության Նախագահի մամուլի քարտուղարին ներկայացնելը.
- Հայաստանի Հանրապետության Նախագահի հրամանագրերով, կարգադրություններով և Աշխատակազմի ղեկավարի հրամաններով իրեն վերապահված այլ գործառույթներ:
3. Վարչությունն իր գործառույթներն իրականացնելիս`
- նախաձեռնում է հասարակական կարծիքի ուսումնասիրություններ.
- համագործակցում է զանգվածային լրատվության միջոցների հետ.
- հաստատում է կապեր տարբեր երկրների զանգվածային լրատվության միջոցների, լրատվական ծառայությունների ու գործակալությունների հետ.
- կազմակերպում է տեղեկատվության փոխանակում.
- կազմակերպում և ապահովում է Վարչությանն առընթեր մամուլի և զանգվածային լրատվության այլ միջոցների ներկայացուցիչների հավատարմագրումը:
III. ՎԱՐՉՈՒԹՅԱՆ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ ԵՎ ՂԵԿԱՎԱՐՈՒՄԸ
1. Վարչության պետն անմիջականորեն ենթարկվում է Աշխատակազմի ղեկավարին:
2. Վարչության պետը պաշտոնի է նշանակվում և պաշտոնից ազատվում Հայաստանի Հանրապետության Նախագահի կարգադրությամբ` Աշխատակազմի ղեկավարի ներկայացմամբ:
3. Վարչության պետը`
- իրականացնում է Վարչության անմիջական ղեկավարումը և պատասխանատվություն է կրում ստորաբաժանման առջև դրված խնդիրների լուծման համար.
- ծրագրում է Վարչության ընթացիկ աշխատանքները` ելնելով Վարչության խնդիրներից.
- Աշխատակազմի ղեկավարին առաջարկություններ է ներկայացնում Վարչության աշխատողներին պաշտոնի նշանակելու և պաշտոնից ազատելու, նրանց խրախուսելու վերաբերյալ.
- ապահովում է աշխատանքների պատշաճ կազմակերպումը, կատարում Վարչության ներքին կառուցվածքային ստորաբաժանումների, ինչպես նաև աշխատողների միջև գործառույթների և պարտականությունների բաշխումը.
- կատարում է Աշխատակազմի ղեկավարի հանձնարարականները: