040.0054.020299
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀ
Ռ. ՔՈՉԱՐՅԱՆ
«2» փետրվարի 1999 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
2 փետրվարի 1999 թվականի թիվ 54
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԵՓԱԿԱՆԱՇՆՈՐՀՄԱՆ ՆԱԽԱՐԱՐՈՒԹՅԱՆԸ ԼԻԱԶՈՐՈՒԹՅՈՒՆՆԵՐ ՏԱԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 1995 ԹՎԱԿԱՆԻ ՆՈՅԵՄԲԵՐԻ 24-Ի ԹԻՎ 82 ՈՒ 1998 ԹՎԱԿԱՆԻ ՄԱՅԻՍԻ 21-Ի ԹԻՎ 311 ՈՐՈՇՈՒՄՆԵՐՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄ ԿԱՏԱՐԵԼՈՒ ՄԱՍԻՆ
Հայաստանի Հանրապետության կառավարությունը որոշում է.
1. Սահմանել, որ`
i
ա) Հայաստանի Հանրապետության նախարարությունների, գերատեսչությունների, մարզպետարանների, Երևանի քաղաքապետարանի և դրանց ենթակայության պետական մարմինների (բյուջետային հիմնարկների) տնօրինության տակ գտնվող շենքերի և շինությունների վարձակալության տրամադրման լիազորություններն իրականացնում է Հայաստանի Հանրապետության սեփականաշնորհման նախարարությունը` տեղեկացնելով պետական կառավարման համապատասխան մարմնին.
բ) բարձրագույն և միջին մասնագիտական ուսումնական հաստատությունների շենքերի ու շինությունների վարձակալության տրամադրման լիազորություններն իրականացնում է Հայաստանի Հանրապետության սեփականաշնորհման նախարարությունը` համաձայնեցնելով Հայաստանի Հանրապետության կրթության և գիտության նախարարության հետ, իսկ տարաձայնությունների դեպքում Հայաստանի Հանրապետության վարչապետն ընդունում է որոշում.
գ) հանրակրթական դպրոցների շենքերը և շինությունները վարձակալության են տրամադրվում, իրենց կողմից` համաձայնեցվելով պետական կառավարման համապատասխան մարմնի հետ:
(1-ին կետն ուժը կորցրել է 05.10.99 թիվ 624 որոշում)
i
2. Հայաստանի Հանրապետության սեփականաշնորհման նախարարության տնօրինությանը հանձնված շենքերում և շինություններում`
ա) նախագծային, գիտահետազոտական ինստիտուտներին և այլ կազմակերպություններին տարածքներ տրամադրվում են Հայաստանի Հանրապետության քաղաքաշինության նախարարության հաստատած նորմատիվների սահմաններում.
բ) մինչև 1999 թվականի հունվարի 1-ը հասարակական-քաղաքական կազմակերպություններին վարձակալության հանձնված տարածքների վարձավճարները մինչև 2000 թվականի հունվարի 1-ը գանձվում են վարձակալական պայմանագրով սահմանված չափով.
գ) մինչև 2000 թվականի հունվարի 1-ը այն նախագծային, գիտահետազոտական ինստիտուտները, որոնք հանդիսանում են պետական փակ բաժնետիրական ընկերություններ, և բյուջետային հիմնարկներն ազատել վարձավճարներից.
դ) 2000 թվականի հունվարի 1-ից մինչև 2001 թվականի հունվարի 1-ը նախագծային և գիտահետազոտական ինստիտուտների համար սահմանված կարգով հաշվարկված վարձավճարների նկատմամբ կիրառել զեղչ 0,5 գործակցի չափով:
(2-րդ կետը լրաց. գ և դ ենթակետերով 25.05.99 թիվ 348 որոշում)
3. Հայաստանի Հանրապետության քաղաքաշինության նախարարությանը` մեկամսյա ժամկետում գիտահետազոտական և նախագծային ինստիտուտներին և այլ կազմակերպություններին տրամադրվող տարածքների համար մշակել նորմատիվներ:
i
4. Հայաստանի Հանրապետության կառավարության 1995 թվականի նոյեմբերի 24-ի «Պետական ձեռնարկությունների, հիմնարկների և կազմակերպությունների գույքն առանց գնման իրավունքի վարձակալության տրամադրելիս վարձակալական վճարի որոշման կարգի մասին» թիվ 82 որոշման մեջ կատարել հետևյալ փոփոխությունը և լրացումը`
որոշմամբ հաստատված`
i
ա) կարգի 1-ին կետի հինգերորդ պարբերությունը շարադրել հետևյալ խմբագրությամբ.
«Գ - վարձակալության տրամադրված հիմնական միջոցների (բացի շենքերից) հաշվեկշռային արժեքը, իսկ շենքերի համար` «Գույքահարկի մասին» Հայաստանի Հանրապետության օրենքի հավելվածի 1.2-րդ կետով սահմանված 1 քառ. մետրի գնահատված արժեքը` կիրառելով գոտիականության գործակիցները».
բ) կարգը լրացնել հետևյալ բովանդակությամբ նոր` 5-րդ կետով.
i
«5. Որպես գոտիականության գործակիցներ կիրառվում են Հայաստանի Հանրապետության կառավարության 1998 թվականի մայիսի 29-ի «Բազմաբնակարան բնակելի տների, բնակարանների, անհատական բնակելի տների, այգետնակների, ավտոտնակների, տնտեսական և դրանց կից օժանդակ շինությունների գնահատման նպատակով դրանց տեղադրության (տարածագնահատման գոտիականության) գործակիցները հաստատելու մասին» թիվ 323 որոշմամբ հաստատված տարածագնահատման գոտիականության գործակիցները»:
(4-րդ կետն ուժը կորցրել է 22.02.01 թիվ 125 որոշում)
i
5. Ուժը կորցրած ճանաչել Հայաստանի Հանրապետության կառավարության 1998 թվականի մայիսի 21-ի «Պետական սեփականություն հանդիսացող շենքերի, շինությունների և տարածքների հաշվառումն ու օգտագործումը կանոնակարգելու մասին» թիվ 311 որոշման 2-րդ կետը:
6. Սույն որոշումն ուժի մեջ է մտնում 1999 թվականի փետրվարի 2-ից: