020.0126.061098
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ՈՐՈՇՈՒՄԸ
i
ԳԻՏԵԼԻՔՆԵՐԻ ՏԱՐԱԾՄԱՆ ԵՎ ՄԵԾԱՀԱՍԱԿՆԵՐԻ ԿՐԹՈՒԹՅԱՆ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
6 հոկտեմբերի 1998թ. |
Հայաստանի Հանրապետության սահմանադրական դատարանը, նախագահությամբ` սահմանադրական դատարանի նախագահ Գ. Հարությունյանի, կազմով` սահմանադրական դատարանի անդամներ Ա. Գյուլումյանի, Ֆ. Թոխյանի, Հ. Նազարյանի, Ռ. Պապայանի, Վ. Պողոսյանի, Վ. Սահակյանի, Մ. Սևյանի,
մասնակցությամբ` Հայաստանի Հանրապետության Նախագահի պաշտոնական ներկայացուցիչ` Հայաստանի Հանրապետության կրթության և գիտության նախարար Լ. Մկրտչյանի,
ղեկավարելով Հայաստանի Հանրապետության Սահմանադրության 100 հոդվածի 2 կետով և 101 հոդվածի 1 կետով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 25 հոդվածի 1 կետով, 56 և 21 (1) հոդվածներով, դռնբաց նիստում գրավոր ընթացակարգով քննեց «Գիտելիքների տարածման և մեծահասակների կրթության բնագավառում համագործակցության մասին համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթը Հայաստանի Հանրապետության Նախագահի դիմումն է Հայաստանի Հանրապետության սահմանադրական դատարան:
Ուսումնասիրելով սույն գործով զեկուցող` Հայաստանի Հանրապետության սահմանադրական դատարանի անդամ Ռ. Պապայանի հաղորդումը, Հայաստանի Հանրապետության նախագահի ներկայացուցիչ Լ. Մկրտչյանի բացատրությունները, համաձայնագիրը և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
Գիտելիքների տարածման և մեծահասակների կրթության բնագավառում համագործակցության մասին համաձայնագիրն ստորագրվել է 1997 թվականի հունվարի 17-ին` Մոսկվայում:
Համաձայնագրի նպատակն է նպաստել ԱՊՀ երկրների ինտեգրացման գործընթացների զարգացմանը, ազգային մշակույթի և լուսավորության, ընդհանուր մշակութատեղեկատվական տարածքի պահպանմանը, մեծահասակ բնակչության անընդհատ կրթության և գիտելիքների տարածման բնագավառում համագործակցության իրականացման մեխանիզմների ստեղծմանը:
Համաձայնագիրն ունի հավելված` Գիտելիքների տարածման և մեծահասակների կրթության ուղղությամբ միջպետական կոմիտեի կանոնակարգը, որում սահմանվում են Կոմիտեի գործունեության հիմնական ուղղություններն ու գործառույթները, նրա կառավարման մարմինների կազմավորման և աշխատանքի կազմակերպման, ինչպես նաև ֆինանսավորման սկզբունքները:
Ըստ համաձայնագրի, Կողմերը պարտավորվում են իրենց տարածքներում ստեղծել բարենպաստ պայմաններ` գիտության, տեխնիկայի, մշակույթի և կրթության բնագավառում արդի նվաճումների տարածմանը, անհատի մտավոր ներուժի զարգացմանը նվիրված ծրագրերի մշակման համար:
Համաձայնագիրն ստորագրման պահից ուժի մեջ մտնելու դրույթի առումով Հայաստանի Հանրապետությունը հայտնում է հատուկ կարծիք, ըստ որի Հայաստանի Հանրապետության համար այն իրավական ուժ է ստանալու անհրաժեշտ ներպետական ընթացակարգերի կատարման մասին ավանդապահին երրորդ ծանուցումը հանձնելու օրվանից:
Ելնելով գործի քննության արդյունքներից և ղեկավարելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. Գիտելիքների տարածման և մեծահասակների կրթության բնագավառում համագործակցության մասին համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
6 հոկտեմբերի 1998 թվականի
ՍԴՈ-126