040.0929.300712
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
26 հուլիսի 2012 թվականի N 929-Ա
«ԱՎՏՈՏՐԱՆՍՊՈՐՏԻ» ՊԵՏԱԿԱՆ ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆԸ ԵՎ «ԷԿՈՍԵՐՎԻՍ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆԸ ԼՈՒԾԱՐԵԼՈՒ ՄԱՍԻՆ
«Բաժնետիրական ընկերությունների մասին» Հայաստանի Հանրապետության օրենքի 27-րդ հոդվածի 2-րդ կետին համապատասխան` Հայաստանի Հանրապետության կառավարությունը որոշում է.
1. Հայաստանի Հանրապետության օրենսդրությամբ սահմանված կարգով լուծարել «Ավտոտրանսպորտի» պետական փակ բաժնետիրական ընկերությունը (գտնվելու վայրը` քաղ. Երևան, Խանջյան 13Ա, գրանցման համարը` 286.140.02106) և «Էկոսերվիս» փակ բաժնետիրական ընկերությունը (գտնվելու վայրը` քաղ. Երևան, Չարենցի 46, գրանցման համարը` 273.140.01254):
2. Հայաստանի Հանրապետության կառավարությանն առընթեր պետական գույքի կառավարման վարչության պետին`
1) սույն որոշման 1-ին կետում նշված բաժնետիրական ընկերությունների լուծարման աշխատանքներն իրականացնելու նպատակով ստեղծել լուծարման հանձնաժողովներ` դրանց կազմում ընդգրկելով Հայաստանի Հանրապետության ֆինանսների նախարարության, Հայաստանի Հանրապետության կառավարությանն առընթեր պետական գույքի կառավարման վարչության (երկու անդամ), Հայաստանի Հանրապետության կառավարությանն առընթեր պետական եկամուտների կոմիտեի, ինչպես նաև սույն որոշման 1-ին կետում նշված ընկերությունների բաժնետոմսերի կառավարման լիազորություններն իրականացնող նախկին պետական կառավարման մարմինների (համապատասխանաբար Հայաստանի Հանրապետության մշակույթի և Հայաստանի Հանրապետության էներգետիկայի և բնական պաշարների նախարարությունների) ներկայացուցիչներին.
2) ապահովել «Էկոսերվիս» փակ բաժնետիրական ընկերության «Միներալ» դուստր փակ բաժնետիրական ընկերության (գտնվելու վայրը` քաղ. Երևան, Չարենցի 46, գրանցման համարը` 273.070.01822) և «Գեոմատակարար» դուստր փակ բաժնետիրական ընկերության (գտնվելու վայրը` Հայաստանի Հանրապետության Կոտայքի մարզ, քաղ. Բյուրեղավան, գրանցման համարը` 42.070.00899) լուծարման աշխատանքները:
3. Սահմանել, որ սույն որոշման 1-ին կետում նշված ընկերությունների`
1) պարտատերերի հետ հաշվարկներն ավարտելուց հետո դեբիտորական պարտքերի և այլ պահանջների իրավունքները վերապահվում են Հայաստանի Հանրապետության ֆինանսների նախարարությանը.
2) պարտատերերի պահանջների բավարարումից հետո գույքի առկայության դեպքում այն հանձնվում է Հայաստանի Հանրապետության կառավարությանն առընթեր պետական գույքի կառավարման վարչության տնօրինությանը:
4. Հայաստանի Հանրապետության կառավարությանն առընթեր պետական գույքի կառավարման վարչության պետին` սույն որոշման 1-ին կետում նշված ընկերությունների լուծարման գործընթացի ավարտից հետո Հայաստանի Հանրապետության կառավարություն ներկայացնել առաջարկություններ ընկերությունների լուծարումից հետո մնացած գույքի տնօրինման վերաբերյալ:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2012 ԹՎԱԿԱՆԻ ՀՈՒԼԻՍԻ 30-ԻՆ