i
ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԲԵԼԱՌՈՒՍԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ԱՊՐԱՆՔՆԵՐԻ (ԱՇԽԱՏԱՆՔՆԵՐԻ) ԱՐՏԱՀԱՆՄԱՆ ԵՎ ՆԵՐՄՈՒԾՄԱՆ ԺԱՄԱՆԱԿ ԱՆՈՒՂՂԱԿԻ ՀԱՐԿԵՐԻ ԳԱՆՁՄԱՆ ՍԿԶԲՈՒՆՔՆԵՐԻ ՄԱՍԻՆ
Հայաստանի Հանրապետության կառավարությունը և Բելառուսի Հանրապետության կառավարությունը, այսուհետ` Կողմեր,
ձգտելով փոխշահավետ տնտեսական հարաբերությունների զարգացման և տնտեսական ինտեգրացման խորացման, տնտեսավարող սուբյեկտների համար հավասար հնարավորությունների հաստատման և բարեխիղճ մրցակցության համար պայմանների ստեղծման,
կողմնորոշվելով միջազգային առևտրի համընդհանուր ընդունված կանոններով,
համաձայնեցին ներքոհիշյալի մասին.
ՀՈԴՎԱԾ 1
Ընդհանուր սահմանումներ
Սույն Համաձայնագրի նպատակների համար օգտագործվում են հետևյալ սահմանումները`
«անուղղակի հարկեր» - ավելացված արժեքի հարկ և ակցիզներ (ակցիզային հարկ կամ ակցիզային գանձույթ),
«զրոյական դրույքաչափ» - ապրանքների (աշխատանքների) զրո տոկոս դրույքաչափով հարկում, ինչը հարկատուի համար նշանակում է նախկինում վճարված ավելացված արժեքի հարկի գումարների համար հաշվանցման կամ բյուջեից փոխհատուցման իրավունք,
«ապրանքներ» - ցանկացած գույք (ներառյալ էներգիայի բոլոր տեսակները), ոչ նյութական ակտիվներ, ինչպես նաև փոխադրամիջոցներ, բացառությամբ այն բոլոր փոխադրամիջոցների, որոնք օգտագործվում են ուղևորների և ապրանքների միջազգային փոխադրումների համար, ներառյալ բեռնարկղերը (կոնտեյներները) և այլ տրանսպորտային սարքավորումները,
«աշխատանք» - գործունեություն, որի արդյունքներն ունեն նյութական արտահայտություն և կարող են իրացվել կազմակերպության և (կամ) ֆիզիկական անձանց պահանջմունքների բավարարման համար,
«արտահանում» - Կողմերի մաքսային տարածքներից ապրանքների դուրս բերում առանց հետագայում հետ բերելու պարտավորության, մյուս Կողմի պետության մաքսային տարածքում աշխատանքների իրականացում,
«ներմուծում» - Կողմերի մաքսային տարածքներ ապրանքների ներկրում առանց հետագայում դուրս բերման պարտավորության, Կողմերի պետության մաքսային տարածքներում աշխատանքների իրականացում,
«կեղծ արտահանում» - ապրանքների (աշխատանքների) ձևական փաստաթղթային ձևակերպում, որպես մի Կողմի մաքսային տարածքից արտահանվող, որի ժամանակ այդ Կողմի մաքսային տարածքից ապրանքների (աշխատանքների) փաստացի դուրս բերում տեղի չի ունենում,
«նշանակման երկրի սկզբունք» - մի Կողմի պետության մաքսային տարածքից արտահանման ժամանակ ակցիզային հարկով չհարկում և ավելացված արժեքի հարկով հարկելիս զրոյական դրույքաչափի կիրառում (ինչը հավասարազոր է ավելացված արժեքի հարկից ամբողջությամբ ազատման) և ներմուծման ժամանակ մյուս Կողմի պետության ազգային օրենսդրությամբ սահմանված դրույքաչափով անուղղակի հարկերով հարկում,
«իրավասու մարմիններ» - հայկական կողմից` Հայաստանի Հանրապետության ֆինանսների և էկոնոմիկայի նախարարություն, Հայաստանի Հանրապետության պետական եկամուտների նախարարություն, բելառուսական կողմից` Բելառուսի Հանրապետության ֆինանսների նախարարություն, Բելառուսի Հանրապետության պետական մաքսային կոմիտե, Բելառուսի Հանրապետության պետական հարկային կոմիտե:
ՀՈԴՎԱԾ 2
Գանձման սկզբունքն արտահանման ժամանակ
Կողմերից ոչ մեկը անուղղակի հարկերով չի հարկի մյուս Կողմի պետության տարածք արտահանվող ապրանքները (աշխատանքները):
Սույն կանոնը նշանակում է ավելացված արժեքի հարկի զրոյական դրույքաչափով հարկում (ինչը հավասարազոր է ամբողջությամբ ազատման), ինչպես նաև արտահանվող ապրանքների ակցիզային հարկից ազատում:
ՀՈԴՎԱԾ 3
Գանձման սկզբունքը ներմուծման ժամանակ
Մի Կողմի պետության մաքսային տարածք ներմուծված ապրանքները (աշխատանքները), որոնք արտահանված են մյուս Կողմի պետության մաքսային տարածքից, հարկվում են անուղղակի հարկերով, ներմուծողի երկրում` ըստ նշանակման վայրի սկզբունքի, նրա օրենսդրության համապատասխան: Անուղղակի հարկերով գանձումը իրականացվում է մաքսային մարմինների կողմից այդ Կողմի պետության մաքսային տարածք ապրանքների ներկրման ժամանակ:
ՀՈԴՎԱԾ 4
Ապրանքների (աշխատանքների) տեղաշարժի և անուղղակի հարկերի
վճարման նկատմամբ վերահսկողությունը
Ապրանքների (աշխատանքների) ներմուծման ժամանակ անուղղակի հարկերի հավաքումը ամբողջությամբ ապահովելու նպատակով, ինչպես նաև կեղծ արտահանումից խուսափելու համար Կողմերի պետության մաքսային և հարկային մարմինները մշակում և գործողության մեջ են դնում Կողմերի պետության մաքսային սահմաններով ապրանքների (աշխատանքների) տեղաշարժի նկատմամբ վերահսկողության մեխանիզմներ:
ՀՈԴՎԱԾ 5
Վիճահարույց հարցերի լուծումը
Սույն Համաձայնագրի դրույթների մեկնաբանման կամ կիրառման ժամանակ բոլոր վեճերն ու տարաձայնությունները Կողմերի միջև կլուծվեն իրավասու մարմինների միջև բանակցությունների և խորհրդակցությունների ճանապարհով:
ՀՈԴՎԱԾ 6
Փոփոխություններ և լրացումներ կատարելը
Կողմերի համաձայնությամբ սույն Համաձայնագրում կարող են կատարվել փոփոխություններ և լրացումներ, որոնք կձևակերպվեն սույն Համաձայնագրի անբաժանելի մասը հանդիսացող արձանագրություններով և ուժի մեջ կմտնեն սույն Համաձայնագրի 9-րդ հոդվածով նախատեսված կարգով:
ՀՈԴՎԱԾ 7
Տեղեկության փոխանակումը
Կողմերը կփոխանակեն սույն Համաձայնագրում նշված հարկերի վերաբերյալ Կողմերի պետությունների ազգային օրենսդրություններում փոփոխությունների և լրացումների մասին տեղեկությունը:
ՀՈԴՎԱԾ 8
Սույն Համաձայնագրի առնչությունը միջազգային պայմանագրերին
Սույն Համաձայնագիրը չի ազդում Կողմերի` այլ միջազգային պայմանագրերով ստանձնած իրավունքների ու պարտավորությունների վրա:
ՀՈԴՎԱԾ 9
Եզրափակիչ դրույթներ
Սույն Համաձայնագիրը կնքվում է անորոշ ժամանակով և ուժի մեջ է մտնում Կողմերի` սույն Համաձայնագրի ուժի մեջ մտնելու համար անհրաժեշտ բոլոր ներպետական ընթացակարգերի կատարման մասին վերջին գրավոր ծանուցումը ստանալու օրվանից հետո տասնհինգերորդ օրը:
Համաձայնագիրը կդադարեցնի իր գործողությունը Կողմերից որևէ մեկի` սույն Համաձայնագրի գործողությունը դադարեցնելու մտադրության մասին մյուս Կողմի ծանուցումը ստանալուց վեց ամիս անց, եթե միայն այդ ծանուցումը մինչ այդ ժամկետի լրանալը Կողմերի միջև համաձայնությամբ հետ չվերցվի:
Սույն Համաձայնագիրը կկիրառվի ուժի մեջ մտնելուց հետո առաքված ապրանքների (աշխատանքների) նկատմամբ:
Կատարված է Երևան քաղաքում 2000 թվականի հոկտեմբերի 31-ին, երկու բնօրինակով, յուրաքանչյուրը` հայերեն, բելառուսերեն և ռուսերեն, ընդ որում բոլոր տեքստերը հավասարազոր են: Սույն Համաձայնագրի մեկնաբանման ժամանակ նախապատվությունը տրվում է ռուսերեն տեքստին:
Համաձայնագիրն ուժի մեջ է մտել 2001 թվականի մարտի 20-ից: