ԵՐԵՎԱՆ ՔԱՂԱՔՈՒՄ ՏՈՆԱՎԱՃԱՌՆԵՐ ԿԱԶՄԱԿԵՐՊԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՐԵՎԱՆ ՔԱՂԱՔԻ ԱՎԱԳԱՆԻ

ՈՐՈՇՈՒՄ

11 սեպտեմբերի 2012 թվականի N 504-Ն

ԵՐԵՎԱՆ ՔԱՂԱՔՈՒՄ ՏՈՆԱՎԱՃԱՌՆԵՐ ԿԱԶՄԱԿԵՐՊԵԼՈՒ ՄԱՍԻՆ

Ղեկավարվելով «Երևան քաղաքում տեղական ինքնակառավարման մասին» Հայաստանի Հանրապետության օրենքի 12-րդ հոդվածի 1-ին մասի 27-րդ կետով, «Առևտրի և ծառայությունների մասին» Հայաստանի Հանրապետության օրենքի 9-րդ հոդվածի 9-րդ մասով`

Երևան քաղաքի ավագանին որոշում է.

1. Հաստատել Երևան քաղաքում տոնավաճառ կազմակերպելու կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հավելված

Երևան քաղաքի ավագանու

2012 թվականի սեպտեմբերի 11-ի

N 504-Ն որոշման

ԵՐԵՎԱՆ ՔԱՂԱՔՈՒՄ ՏՈՆԱՎԱՃԱՌ (ՎԵՐՆԻՍԱԺ) ԿԱԶՄԱԿԵՐՊԵԼՈՒ ԿԱՐԳ

I. ԸՆԴՀԱՆՈՒՐ ԴՐՈՒՅԹՆԵՐ

1. Երևան քաղաքում տոնավաճառ (վերնիսաժ) կազմակերպում է Երևանի քաղաքապետարանը` քաղաքապետի որոշմամբ` շաբաթ, կիրակի և օրենքով սահմանված տոնական օրերին:

2. Երևանում կազմակերպվում են սեզոնային, տոնական, մասնագիտացված, գյուղատնտեսական, ունիվերսալ և այլ տեսակի տոնավաճառներ:

II. ՏՈՆԱՎԱՃԱՌԻ ԿԱԶՄԱԿԵՐՊՈՒՄ

3. Տոնավաճառ կազմակերպելու մասին որոշմամբ սահմանվում են.

ա) տոնավաճառի տեսակը, գտնվելու հասցեն,

բ) սկսելու և ավարտելու օրերը, աշխատանքի ժամերը,

գ) տոնավաճառին մասնակցելու համար դիմելու ժամկետները,

դ) տոնավաճառին մասնակցելու թույլտվության ձևը.

ե) տոնավաճառի կազմակերպման համար անհրաժեշտ միջոցառումներն ու դրանց իրականացման պատասխանատուները:

(3-րդ կետը փոփ. 30.04.14 թիվ 155-Ն որոշում)

4. Տոնավաճառ անցկացնելու մասին Երևանի քաղաքապետի որոշման վերաբերյալ հայտարարությունը տեղադրվում է Երևանի քաղաքապետարանի կայքում տոնավաճառ կազմակերպելու օրվանից առնվազն 15 օր առաջ, ինչպես նաև փակցվում վարչական շրջաններում և ուղարկվում ՀՀ մարզպետարաններ:

5. Տոնավաճառ կազմակերպելու մասին Երևանի քաղաքապետի որոշման վերաբերյալ դրա անցկացումից առնվազն մեկ շաբաթ առաջ գրավոր տեղեկացվում են ՀՀ ոստիկանությունը, ՀՀ պետեկամուտների կոմիտեն, ՀՀ պետական հիգիենիկ և հակահամաճարակային ծառայությունը, ՀՀ արտակարգ իրավիճակների նախարարությունը, իսկ կախված տոնավաճառի բնույթից, նաև այլ պետական կառավարման մարմինները:

6. Երևանի քաղաքապետարանի (այսուհետ` կազմակերպիչ) կողմից տոնավաճառի մուտքի (մուտքերի) մոտ (բացօթյա տոնավաճառի դեպքում` այն մասերում, որտեղից որպես կանոն սպասվում է այցելուների առավելագույն հոսք) փակցվում է ցուցանակ` տոնավաճառի անվանման և անցկացման օրերի, ժամերի, կազմակերպչի հեռախոսահամարների վերաբերյալ:

7. Կազմակերպիչը ապահովում է տարածքում աղբամանների առկայությունը, իսկ օրվա ավարտին` աղբահանության կազմակերպումը, ինչպես նաև ժամանակավոր զուգարանների տեղադրումն ու աշխատանքը, եթե հարակից տարածքում հանրային զուգարաններ չկան:

8. Կազմակերպիչն ապահովում է իր ներկայացուցչի մասնակցությունը տոնավաճառի գործունեության ամբողջ ընթացքում: Կազմակերպչի ներկայացուցիչը`

ա) ըստ կազմակերպչի կողմից տրված թույլտվությունների կամ ներկայացված հայտերի հիման վրա կազմված ցուցակների գրանցում է տոնավաճառի մասնակիցներին,

բ) կատարում է մեքենաների, վաճառակետերի բաշխումը մասնակիցների միջև, նրանց կողմից,

գ) հետևում է տարածքի մաքրման աշխատանքներին,

դ) կատարում է օրենքով, սույն կարգով և տոնավաճառ կազմակերպելու մասին Երևանի քաղաքապետի որոշմամբ նախատեսված այլ գործողություններ,

ե) համագործակցում է տարածքի անվտանգությունը և հասարակական կարգը պահպանող մարմինների հետ:

III. ԹՈՒՅԼՏՎՈՒԹՅՈՒՆ ՍՏԱՆԱԼՈՒ ԵՎ ՏՈՆԱՎԱՃԱՌԻՆ ՄԱՍՆԱԿՑԵԼՈՒ ԿԱՐԳԸ

9. Երևան քաղաքում կազմակերպված տոնավաճառում մասնակցելու համար անհրաժեշտ է առնվազն 3 օր առաջ դիմում ներկայացնել Երևանի քաղաքապետարան:

10. Դիմումին կից ներկայացվում են տվյալներ վաճառվող ապրանքի տեսակի մասին, ինչպես նաև`

ա) ֆիզիկական անձանց համար` անձնագրի պատճենը,

բ) անհատ ձեռնարկատերերի և կազմակերպությունների համար` պետական գրանցման վկայականի պատճենը:

(10-րդ կետը փոփ. 30.04.14 թիվ 155-Ն որոշում)

11. Դիմումատուին անվճար տրամադրվում է տոնավաճառի մասնակցի թույլտվություն, որի ձևը սահմանվում է քաղաքապետի որոշմամբ:

(11-րդ կետը փոփ. 30.04.14 թիվ 155-Ն որոշում)

12. Տոնավաճառին մասնակցելու համար անհատ ձեռնարկատերերը, կազմակերպությունները և ֆիզիկական անձինք Երևանի քաղաքապետարան կարող են դիմել նաև էլ. փոստի միջոցով և հեռախոսակապով: Հեռախոսով տոնավաճառին մասնակցելու հայտ ներկայացրած սույն կետում նշված անձինք, ընդգրկվում են համապատասխան ցուցակներում, որոնք տրամադրվում են կազմակերպչի ներկայացուցչին:

(12-րդ կետը փոփ. 30.04.14 թիվ 155-Ն որոշում)

13. Անհրաժեշտ փաստաթղթերը չներկայացնելու կամ թերի ներկայացնելու դեպքում, ինչպես նաև, եթե դիմումին կից նշված ապրանքի տեսակի մասին տվյալները չեն համապատասխանում նախատեսված տոնավաճառի տեսակի հետ թույլտվություն չի տրամադրվում:

(13-րդ կետը փոփ. 30.04.14 թիվ 155-Ն որոշում)

14. Թույլտվություն ստացած անձինք տոնավաճառին մասնակցելու համար ներկայանում են տոնավաճառը սկսելուց առնվազն 2 ժամ առաջ, գրանցվում և ստանում իրենց վաճառատեղերը:

15. Գրանցվելուց մասնակիցը պետք է իր մոտ ունենա քաղաքապետարանի տրված թույլտվությունը անձնագրի/պետական գրանցման վկայականի պատճենները, իսկ կազմակերպությունների ապրանքը վաճառողները` նաև լիազորագիր:

16. ՀՀ իրավական ակտերի և սույն կարգի խախտման դեպքում մասնակցին կարող է արգելվել մասնակցել տոնավաճառին:

IV. ՄԱՍՆԱԿՑԻ ԻՐԱՎՈՒՆՔՆԵՐԸ ԵՎ ՊԱՐՏԱԿԱՆՈՒԹՅՈՒՆՆԵՐԸ

17. Տոնավաճառի մասնակիցը մասնակցության իրավունքը չի կարող փոխանցել այլ անձի:

18. Տոնավաճառի մասնակիցը` վաճառքի վայրում` չի կարող փոփոխություն կատարել (փոխել սեղանների դասավորվածությունը և այլն) առանց կազմակերպչի թույլտվության:

19. Մասնակիցը պարտավոր է տոնավաճառը ավարտվելուց հետո մաքրել իրեն հատկացված վաճառատեղը, աղբը և մնացած ապրանքը հանել ու տարածքը բերել նախկին տեսքի:

20. (20-րդ կետն ուժը կորցրել է 30.04.14 թիվ 155-Ն որոշում)

21. Վաճառողը առևտուրն իրականացնում է ՀՀ իրավական ակտերի և սույն կարգի հիման վրա: