(ուժը կորցրել է 07.06.04 թիվ 80-Ն հրաման)
i
102.0692.290499
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ
ՀՐԱՄԱՆ
27 ապրիլի 1999 թվականի թիվ 692
i
ԴԱՏԱԿԱՆ ԱԿՏԵՐԻ ՀԱՐԿԱԴԻՐ ԿԱՏԱՐՈՒՄՆ ԱՊԱՀՈՎՈՂ ԾԱՌԱՅՈՒԹՅԱՆ ԱՇԽԱՏԱԿԻՑՆԵՐԻ ԾԱՌԱՅՈՂԱԿԱՆ ՀԱՄԱԶԳԵՍՏԻ, ԴԱՍԱՅԻՆ ԿՈՉՈՒՄՆԵՐԻ ՏԱՐԲԵՐԱՆՇԱՆՆԵՐԻ ԵՎ ԽՈՐՀՐԴԱՆՇԱՆԻ ՆՄՈՒՇՆԵՐԸ ՀԱՍՏԱՏԵԼՈՒ ՄԱՍԻՆ
Ի կատարումն ՀՀ «Դատական ակտերի հարկադիր կատարումն ապահովող ծառայության մասին» օրենքի 8-րդ հոդվածի 2-րդ կետի
ՀՐԱՄԱՅՈՒՄ ԵՄ`
ՀԱՍՏԱՏԵԼ`
________________
Հայաստանի Հանրապետության Արդարադատության նախարարության դատական ակտերի հարկադիր կատարումն ապահովող ծառայության աշխատակիցների ծառայողական համազգեստի, դասային կոչումների տարբերանշանների, խորհրդանշանի նկարագրությունը և ձևերը:
ՀԱՍՏԱՏՎԱԾ Է
ՀՀ ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ
27.04.1999 Թ. ԹԻՎ 692 ՀՐԱՄԱՆՈՎ
ՆԿԱՐԱԳՐՈՒԹՅՈՒՆ
ՀՀ Արդարադատության նախարարության դատական ակտերի հարկադիր կատարումն ապահովող ծառայության աշխատակիցների ծառայողական համազգեստի, դասային կոչումների տարբերանշանների և խորհրդանշանի:
I. ԾԱՌԱՅՈՂԱԿԱՆ ՀԱՄԱԶԳԵՍՏԸ
Գլխարկը սև կտորից է, և թավշյա գլխարկաբոլորքով, գլխարկագագաթի եզրով ոսկեգույն (դեղնավուն) եզրաշերտով: Գլխարկաբոլորքի վրա երկու կոճակներով ամրացվում է ցանցահյուսազարդով երկշերտ հյուսվածք կապը (քուղը)` և ոսկեզօծված գլխարկանշանը: Գլխարկահովհարը սև է` լաքապատ: Բարձրագույն կազմի դասային կոչում ունեցող աշխատակիցների գլխարկահովհարից վերև` գլխարկաբոլորքի վրա բացի ոսկեզօծ լարահյուսից և գլխարկանշանից ամրացվում է կաղնու ճյուղերի տեսքով երկու համաչափ ոսկեկար զարդ:
Բաճկոնը, 3-րդ դասի իրավաբանից մինչև 1-ին դասի իրավաբանի դասային կոչում ունեցող աշխատակիցների համար միակոճկուն է` Հայաստանի Հանրապետության զինանշանի պատկերով 2 ոսկեզօծ կոճակներով, մարմինը կիսագրկող, հարթ մակերեսներով, ետծալված օձիքով և սովորական երկկարանի թևքերով: Բարձրագույն կազմի և արդարադատության 3-րդ դասի խորհրդականից մինչև 1-ին դասի խորհրդականի դասային կոչում ունեցող աշխատակիցների համար` երկփեղկանի, երկկոճականի, մեջքի ներքևի մասում, առանց կտրվածքի: Բաճկոնը կողքերից ունենում է կափույրով ծածկվող կտրվածքով գրպաններ, իսկ կրծքի մասում` կտրվածքով գրպան: Բարձրագույն կազմի և արդարադատության 1-ին դասի խորհրդականի դասային կոչում ունեցող աշխատակիցների համազգեստը կարվում է սև գույնի գաբարդինից, ավագ և միջին կազմի դասային կոչում ունեցող մնացած աշխատակիցներինը` սև կոստյումի կտորից: Բարձրագույն կազմի դասային կոչում ունեցող աշխատակիցների համար կարվում է նաև շքահանդեսային բաճկոն` սպիտակադեղնավուն գաբարդինից: 3-րդ դասի իրավաբանից մինչև արդարադատության 1-ին դասի պետական խորհրդականի դասային կոչում ունեցող աշխատակիցների համազգեստի կրծքի աջ կողում ամրացվում է կրծքանշան` ծառայության խորհրդանշանը, բարձրությունը 55 մմ է, լայնությունը` 47 մմ:
Տաբատը սև կտորից է, ուղիղ, առանց ծալքերի, բարձրագույն, ավագ և միջին կազմի դասային կոչում ունեցող աշխատողների համար` 2,5 մմ լայնությամբ ոսկեգույն (դեղնավուն) եզրակարով: Բարձրագույն կազմի դասային կոչում ունեցող աշխատակիցների համար տաբատի վրա եզրակարից 50 մմ հեռավորությամբ կարվում է մուգ կարմրավուն վրակարվածք` 22 մմ լայնությամբ շերտով, տաբատի ողջ երկայնքով:
Կոշիկները (կիսակոշիկները) սև են, բարձրագույն և ավագ կազմի դասային կոչում ունեցող աշխատակիցներինը` այծակաշվե (շևրոյե), իսկ միջին կազմի դասային կոչում ունեցող աշխատակիցների համար քրոմակաշվե:
Կանանց համար բաճկոնի ձևը նույնն է, կոճկվում է դեպի ձախ, տաբատի և կոշիկների փոխարեն տրվում են համապատասխան շրջազգեստ և կոշիկներ:
Վերնաշապիկը բաց դեղնավուն է, փափուկ կամ կոշտ օձիքով: Որպես ամառային համազգեստ բաճկոնի փոխարեն տրվում է (բաց դեղնավուն) վրադիր վերնաշապիկ: Ձախ թևքի վրա կարվում է ծառայության խորհրդանշանը` բարձրությունը 85 մմ է, լայնությունը 70 մմ: Փողկապը սև է:
Կիսավերարկուն ունենում է 5 ոսկեզօծ կոճակ: Կոճակների միջև տարածությունը 160-170 մմ է: Բարձրագույն, ավագ և միջին կազմի դասային կոչում ունեցող աշխատակիցների համար կիսավերարկուն սև գույնի դրապից է:
Բաճկոնի և կիսավերարկուի օձիքը և թևքածալերը ոսկեգույն (դեղնավուն) եզրաշերտերով են` 2,5 մմ լայնությամբ, թևքածալերի վրա երկու փոքր կոճակներով:
Ուսադիրները կրում են բաճկոնի, կիսավերարկուի և վերնաշապիկի վրա:
Օձիքների անկյունում, բացի վերնաշապիկից, տեղադրվում է գերատեսչության խորհրդանշանը` 30 մմ բարձրությամբ, 20 մմ լայնությամբ, կաղնու տերևներով երիզված, իսկ ՀՀ Արդարադատության 1-ին դասի պետական խորհրդականի դասային կոչում ունեցող աշխատակիցներից մինչև 3-րդ դասի պետական խորհրդականը ներառյալ ոսկեզօծ ասեղնագործված խորհրդանշան` 29 մմ բարձրությամբ և 18 մմ լայնությամբ, որը եզրազարդվում է ոսկեզօծ դափնու տերևների տեսքով:
Գլխարկանշանը` ոսկեգույն, կաղնու տերևներով եզրազարդված Հայաստանի Հանրապետության զինանշանի պատկերով ամրացվում է գլխարկի կենտրոնում:
II. ԴԱՍԱՅԻՆ ԿՈՉՈՒՄՆԵՐԻ ՏԱՐԲԵՐԱՆՇԱՆՆԵՐԸ
1. Դասային կոչումների տարբերանշաններ են ծառայում ուսադիրները: Կիսափափուկ ուսադիրն իրենից ներկայացնում է ձգված վեցանկյուն, երկարավուն զուգահեռ կողմերով, որոնց ներքևի վերջնամասն ուղղանկյուն է, իսկ վերևինը վերջանում է ստորին եզրին զուգահեռ բութանկյուն կտրվածքով: Ուսադրի երկարությունը 110-120 մմ է, լայնությունը` դասային կոչումներ ունեցող անձանց համար` սկսած արդարադատության 1-ին դասի պետական խորհրդականից մինչև արդարադատության 3-րդ դասի պետական խորհրդականը ներառյալ` 45 մմ, իսկ արդարադատության 1-ին դասի եզրերը, բացի ստորինից, երիզվում են 2,5 մմ լայնությամբ, ոսկեգույն (դեղնավուն) մահուդե գործվածքով:
Արդարադատության 1-ին, 2-րդ, 3-րդ դասերի
պետական խորհրդականների ուսադիրները
2. Ուսադիրները պատրաստվում են սև թելից հատուկ միահյուսվածքով, մահուդի աստառի վրա` առանց լուսաշերտի, իսկ շքահանդեսային բաճկոնի համար` ոսկեգույն թելից: Արդարադատության 1-ին դասի պետական խորհրդականի ուսադիրների վրա, մեջտեղում ասեղնագործվում է 3 ուռուցիկ, ոսկեզօծ հնգաթև աստղ, յուրաքանչյուրը 25 մմ տրամագծով: Արդարադատության 2-րդ դասի պետական խորհրդականի ուսադիրների վրա` 2 ուռուցիկ ոսկեզօծ հնգաթև աստղ, յուրաքանչյուրը 25 մմ տրամագծով, հեռավորությունը ներքևի եզրագծից մինչև առաջին աստղի կենտրոնը 40 մմ, աստղերի միջև 35 մմ: Արդարադատության 3-րդ դասի պետական խորհրդականի ուսադիրների վրա` 1 ուռուցիկ ոսկեզօծ հնգաթև աստղ, 25 մմ տրամագծով, ներքևի եզրագծից մինչև աստղի կենտրոնը 45 մմ հեռավորությամբ:
Արդարադատության 1-ին, 2-րդ, 3-րդ դասերի
խորհրդականների ուսադիրները
3. Ուսադիրները պատրաստվում են սև գույնի գործվածքից` մահուդե աստառի վրա: Ուսադիրների վրա լինում է 2 ոսկեգույն (դեղնավուն) լուսաշերտ: Արդարադատության 1-ին դասի խորհրդականի ուսադիրներին ամրացվում է 3 ոսկեզօծ հնգաթև աստղ 20 մմ տրամագծով, (որից 2-ը լուսաշերտերի, 1-ը լուսաշերտերի մեջտեղում): Արդարադատության 2-րդ դասի խորհրդականի ուսադիրներին` լուսաշերտերի վրա 2 ոսկեզօծ հնգաթև աստղ 20 մմ տրամագծով, հեռավորությունը ներքևի եզրագծից մինչև աստղերի կենտրոնը 30 մմ, աստղերի միջև 25 մմ: Արդարադատության 3-րդ դասի խորհրդականի ուսադիրներին` 1 ոսկեզօծ հնգաթև աստղ 20 մմ տրամագծով լուսաշերտերի մեջտեղում, ներքևի եզրագծից մինչև աստղի կենտրոնը 45 մմ հեռավորությամբ:
1-ին, 2-րդ, 3-րդ դասերի իրավաբանների ուսադիրները
4. Ուսադիրները պատրաստվում են սև գույնի գործվածքից` մահուդե աստառի վրա: Ուսադիրների վրա լինում է 1 ոսկեգույն (դեղնավուն) լուսաշերտ: 1-ին դասի իրավաբանի ուսադիրներին ամրացվում է 4 ոսկեզօծ աստղ` 13 մմ տրամագծով, (որից 2-ը ներքևի եզրագծից 30 մմ վերև, աստղերի կենտրոնների միջև 25 մմ հեռավորությամբ, 2-ը լուսաշերտի վրա, աստղերի կենտրոնները միացնող գծից 25-ական մմ հեռավորության վրա): 2-րդ դասի իրավաբանի ուսադիրներին` 3 ոսկեզօծ աստղ` 13 մմ տրամագծով, (որից 2-ը ներքևի եզրագծից 30 մմ, աստղերի կենտրոնների միջև 25 մմ հեռավորությամբ, 3-րդը լուսաշերտի վրա, աստղերի կենտրոնները միացնող գծից 25 մմ հեռավորության վրա): 3-րդ դասի իրավաբանի ուսադիրներին` 2 ոսկեզօծ աստղ` 13 մմ տրամագծով, ներքևի եզրագծից 30 մմ, աստղերի կենտրոնների միջև 25 մմ հեռավորությամբ:
ԳՐԱՆՑՎԱԾ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅՈՒՆ ԿՈՂՄԻՑ
29.04.1999թ.
ՊԵՏԱԿԱՆ ԳՐԱՆՑՄԱՆ ԹԻՎ 10299065