115.0031.250313
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«25» 03 2013 Թ.
ՊԵՏԱԿԱՆ ԳՐԱՆՑՄԱՆ ԹԻՎ 11513111
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՇԽԱՏԱՆՔԻ ԵՎ ՍՈՑԻԱԼԱԿԱՆ ՀԱՐՑԵՐԻ ՆԱԽԱՐԱՐ ՀՐԱՄԱՆ
4 մարտի 2013 թվականի N 31-Ն
i
ԲԺՇԿԱՍՈՑԻԱԼԱԿԱՆ ՓՈՐՁԱՔՆՆԱԿԱՆ ՀԱՆՁՆԱԺՈՂՈՎՆԵՐԻ ԿՈՂՄԻՑ ԻՐԱԿԱՆԱՑՎՈՂ ՓՈՐՁԱՔՆՆՈՒԹՅՈՒՆՆԵՐԻՆ ՀԱՇՄԱՆԴԱՄՈՒԹՅՈՒՆ ՈՒՆԵՑՈՂ ԱՆՁԱՆՑ ՀԱՐՑԵՐՈՎ ԶԲԱՂՎՈՂ ՀԱՍԱՐԱԿԱԿԱՆ ԿԱԶՄԱԿԵՐՊՈՒԹՅՈՒՆՆԵՐԻ ՆԵՐԿԱՅԱՑՈՒՑԻՉՆԵՐԻ ՄԱՍՆԱԿՑՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Ղեկավարվելով Հայաստանի Հանրապետության կառավարության 2002 թվականի նոյեմբերի 14-ի թիվ 1821-Ն որոշմամբ հաստատված Հայաստանի Հանրապետության աշխատանքի և սոցիալական հարցերի նախարարության կանոնադրության 12-րդ կետի «դ» ենթակետով, ինչպես նաև Հայաստանի Հանրապետության կառավարության 2006 թվականի մարտի 2-ի թիվ 276-Ն որոշման 5.3 կետի դրույթների համաձայն`
ՀՐԱՄԱՅՈՒՄ ԵՄ`
1. Հաստատել բժշկասոցիալական փորձաքննական հանձնաժողովների կողմից իրականացվող փորձաքննություններին հաշմանդամություն ունեցող անձանց հարցերով զբաղվող հասարակական կազմակերպությունների ներկայացուցիչների մասնակցության կարգը` համաձայն հավելվածի:
2. Սույն հրամանի կատարման հսկողությունը վերապահել Հայաստանի Հանրապետության աշխատանքի և սոցիալական հարցերի նախարարի տեղակալ Ջ. Բաղդասարյանին:
Հավելված
ՀՀ աշխատանքի և սոցիալական
հարցերի նախարարի
2013 թ. մարտի 4-ի
թիվ 31-Ն հրամանի
ԿԱՐԳ
ԲԺՇԿԱՍՈՑԻԱԼԱԿԱՆ ՓՈՐՁԱՔՆՆԱԿԱՆ ՀԱՆՁՆԱԺՈՂՈՎՆԵՐԻ ԿՈՂՄԻՑ ԻՐԱԿԱՆԱՑՎՈՂ ՓՈՐՁԱՔՆՆՈՒԹՅՈՒՆՆԵՐԻՆ ՀԱՇՄԱՆԴԱՄՈՒԹՅՈՒՆ ՈՒՆԵՑՈՂ ԱՆՁԱՆՑ ՀԱՐՑԵՐՈՎ ԶԲԱՂՎՈՂ ՀԱՍԱՐԱԿԱԿԱՆ ԿԱԶՄԱԿԵՐՊՈՒԹՅՈՒՆՆԵՐԻ ՆԵՐԿԱՅԱՑՈՒՑԻՉՆԵՐԻ ՄԱՍՆԱԿՑՈՒԹՅԱՆ
1. Սույն կարգով կարգավորվում են բժշկասոցիալական փորձաքննության հանձնաժողովների կողմից իրականացվող փորձաքննություններին (այսուհետ` փորձաքննություն) հաշմանդամություն ունեցող անձանց հարցերով զբաղվող հասարակական կազմակերպությունների (այսուհետ` կազմակերպություններ) մասնակցության հետ կապված հարաբերությունները:
2. Կազմակերպությունների ներկայացուցիչները, փորձաքննվող անձի համաձայնության կամ ցանկության դեպքում, կարող են մասնակցել փորձաքննություններին: Փորձաքննվող անձն իր համաձայնությունը հայտնում է գրավոր կամ բանավոր` Հանձնաժողովի անդամների առջև հաստատելով իր համաձայնությունը:
3. Կազմակերպությունների ներկայացուցիչները փորձաքննություններին մասնակցում են դիտորդի կարգավիճակով:
4. Կազմակերպությունները Հայաստանի Հանրապետության աշխատանքի և սոցիալական հարցերի նախարարություն (այսուհետ` նախարարություն) են ներկայացնում փորձաքննություններին մասնակցելու համար իրենց կողմից լիազորված ներկայացուցիչների ցուցակները, որոնցում ներառվում են ներկայացուցչի անունը, ազգանունը, հասարակական կազմակերպության անվանումը, հեռախոսահամարները:
5. Նախարարությունը կազմակերպությունների կողմից ներկայացված ցուցակները տրամադրում է հանձնաժողովներին:
6. Կազմակերպությունները Հանձնաժողովների կողմից իրականացվող փորձաքննությունների ժամանակացույցի վերաբերյալ տեղեկանում են Հայաստանի Հանրապետության աշխատանքի և սոցիալական հարցերի նախարարության պաշտոնական կայքէջից (www:mss.am):
7. Նախարարությունը փորձաքննություններին մասնակցելու իրավունք ունեցող հասարակական կազմակերպությունների ցանկը տեղադրում է նախարարության պաշտոնական կայքէջում (www:mss.am):
8. Կազմակերպությունների ցանկում կարող են ընդգրկվել հաշմանդամների հիմնահարցերով զբաղվող այլ հասարակական կազմակերպություններ, որոնք այդ նպատակով նախարարություն են ներկայացնում հայտ, կցելով կազմակերպության կանոնադրությունը, տվյալները և իրենց լիազոր ներկայացուցիչների ցուցակը:
9. Կազմակերպության ընդգրկման դեպքում կազմակերպության տվյալները տեղադրվում են նախարարության կայքէջում:
10. Կազմակերպության ներկայացուցիչը փորձաքննություններին մասնակցելու համար ներկայանում է անձը հաստատող փաստաթղթով: