ՀԱՄԱՁԱՅՆԱԳԻՐ ՀՀ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐՈՒԹՅԱ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐՈՒԹՅԱՆ ԵՎ ԲԵԼԱՌՈՒՍԻ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐՈՒԹՅԱՆ ՄԻՋԵՎ ԱՐՏԱԿԱՐԳ ԻՐԱՎԻՃԱԿՆԵՐԻ ԿԱՆԽԱՐԳԵԼՄԱՆ ԵՎ ՎԵՐԱՑՄԱՆ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության արտակարգ իրավիճակների նախարարությունը և Բելառուսի Հանրապետության արտակարգ իրավիճակների նախարարությունը, այսուհետ` Կողմեր,

առաջնորդվելով երկու երկրների միջև բարեկամական հարաբերությունների հետագա ամրապնդման և զարգացման ձգտումներով,

ցանկանալով ամրապնդել երկկողմ համագործակցությունը բնական և տեխնածին արտակարգ իրավիճակների կանխարգելման և վերացման բնագավառում,

համաձայնեցին ներքոնշյալի մասին.

ՀՈԴՎԱԾ 1

Կողմերը, իրենց պետությունների ազգային օրենսդրությանը համապատասխան և իրենց իրավասությունների շրջանակներում, կհամագործակցեն հետևյալ ուղղություններով.

1. տեղեկատվության, պարբերական հրատարակությունների, մեթոդական և գիտատեխնիկական գրականության, գիտահետազոտական աշխատանքների արդյունքների, տեսա- և լուսանկարչական նյութերի փոխանակում,

2. համատեղ աշխատանքային խորհրդակցությունների, սեմինարների, խորհրդաժողովների, ուսումնական դասընթացների, մարզումների, վարժանքների, գիտահետազոտական նախագծերի և այլ միջոցառումների պլանավորում, մշակում և անցկացում,

3. մասնագետների պատրաստման կազմակերպում Կողմերի կրթական հաստատություններում, փորձնակների, դասախոսների, գիտնականների, մասնագետների և այլ ներկայացուցիչների փոխանակում,

4. տեխնիկական, սոցիալական և մարդասիրական համագործակցության համատեղ նախագծերի մշակում և իրականացում,

5. անհրաժեշտության դեպքում երրորդ կողմ հանդիսացող երկրներին բնական և տեխնածին արտակարգ իրավիճակների հետևանքների վերացմանն ուղղված համատեղ օգնության ցուցաբերում,

6. համագործակցություն Չեռնոբիլի ԱԷԿ-ի վթարի և Սպիտակի երկրաշարժի հետևանքների հաղթահարման ուղղությամբ,

7. Կողմերի իրավասությունների շրջանակներում այլ գործունեության իրականացում:

ՀՈԴՎԱԾ 2

Սույն Համաձայնագրի իրականացման նպատակով Կողմերը կստեղծեն փոխգործակցության միջգերատեսչական հայ-բելառուսական համատեղ հանձնաժողով արտակարգ իրավիճակների կանխարգելման և վերացման բնագավառում: Համատեղ հանձնաժողովի նիստերը կանցկացվեն հաջորդաբար Բելառուսի Հանրապետությունում և Հայաստանի Հանրապետությունում` Կողմերի հետ համաձայնեցմամբ: Համատեղ հանձնաժողովի կառուցվածքը և գործունեության կարգը սահմանվում են Կողմերի ներկայացուցիչների առաջին հանդիպման ժամանակ:

ՀՈԴՎԱԾ 3

Սույն Համաձայնագրի 1-ին և 2-րդ հոդվածներով նախատեսված դրույթների իրագործման պայմանները յուրաքանչյուր կոնկրետ դեպքում առանձին համաձայնեցվում են Կողմերի միջև:

ՀՈԴՎԱԾ 4

Սույն Համաձայնագրի դրույթները չեն շոշափում Կողմերի մասնակցությամբ այլ միջազգային պայմանագրերից բխող նրանց իրավունքները և պարտականությունները:

ՀՈԴՎԱԾ 5

Սույն Համաձայնագրի իրականացման ընթացքում Կողմերի միջև ծագող տարաձայնությունները կարգավորվում են խորհրդակցությունների և բանակցությունների միջոցով:

ՀՈԴՎԱԾ 6

Կողմերի փոխադարձ համաձայնությամբ սույն Համաձայնագրում կարող են կատարվել փոփոխություններ և լրացումներ, որոնք ձևակերպվում են սույն Համաձայնագրի անբաժանելի մասը հանդիսացող առանձին արձանագրություններով և ուժի մեջ են մտնում սույն Համաձայնագրի 7-րդ հոդվածի նախատեսած կարգով:

ՀՈԴՎԱԾ 7

Սույն Համաձայնագիրն ուժի մեջ է մտնում Կողմերի ազգային օրենսդրությամբ նախատեսված և սույն Համաձայնագիրն ուժի մեջ մտնելու համար անհրաժեշտ ներպետական ընթացակարգերի ավարտի մասին դիվանագիտական ուղիներով վերջին գրավոր ծանուցումը ստանալու օրվանից, կնքվում է հինգ տարի ժամկետով և ինքնաբերաբար կերկարաձգվի հաջորդ հնգամյա ժամկետներով, եթե Կողմերից որևէ մեկը հերթական հնգամյա ժամկետի ավարտից առնվազն երեք ամիս առաջ մյուս Կողմին գրավոր չծանուցի դրա գործողությունը դադարեցնելու իր մտադրության մասին:

Կատարված է Մինսկ քաղաքում 2011 թվականի մայիսի 18-ին, երկու բնօրինակով, յուրաքանչյուրը` հայերեն և ռուսերեն, ընդ որում` բոլոր տեքստերն էլ հավասարազոր են: Սույն Համաձայնագրի դրույթների մեկնաբանության շուրջ ծագած տարաձայնությունների դեպքում նախապատվությունը տրվում է ռուսերեն տեքստին:

Համաձայնագիրն ուժի մեջ է մտել 2011թ. սեպտեմբերի 2-ին