040.0004.130114
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
9 հունվարի 2014 թվականի N 4-Ն
ԻՐԱՎԱԿԱՆ ՕԺԱՆԴԱԿՈՒԹՅԱՆ ՏՐԱՄԱԴՐՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
i
Հիմք ընդունելով «Հոգեբուժական օգնության մասին» Հայաստանի Հանրապետության օրենքի 7-րդ հոդվածի 5-րդ մասը` Հայաստանի Հանրապետության կառավարությունը որոշում է.
1. Սահմանել իրավական օժանդակության տրամադրման կարգը` համաձայն հավելվածի:
2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2014 ԹՎԱԿԱՆԻ ՀՈՒՆՎԱՐԻ 13-ԻՆ
Հավելված
ՀՀ կառավարության
2014 թվականի հունվարի 9-ի
N 4-Ն որոշման
ԿԱՐԳ
ԻՐԱՎԱԿԱՆ ՕԺԱՆԴԱԿՈՒԹՅԱՆ ՏՐԱՄԱԴՐՄԱՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով սահմանվում է հոգեբուժական կազմակերպությունում բուժվող` հոգեկան խանգարումներ ունեցող անձին իրավական օժանդակություն (այսուհետ` իրավական օժանդակություն) տրամադրելու ընթացակարգը:
i
2. Իրավական օժանդակությունը ներառում է «Փաստաբանության մասին» Հայաստանի Հանրապետության օրենքի 41-րդ հոդվածի 2-րդ մասով նախատեսված անվճար իրավաբանական օգնությունը, այդ թվում` նաև հոգեբուժական կազմակերպությունում գտնվելու և բուժման հետ կապված հարցերի, հոգեկան խանգարումներ ունեցող անձի (այսուհետ` անձ) իրավունքների և պարտականությունների վերաբերյալ խորհրդատվությունը:
II. ԻՐԱՎԱԿԱՆ ՕԺԱՆԴԱԿՈՒԹՅԱՆ ՏՐԱՄԱԴՐՄԱՆ ՀԱՄԱՐ ԴԻՄԵԼԸ
3. Իրավական օժանդակությունը տրամադրվում է անձի կամ նրա օրինական ներկայացուցչի դիմումի հիման վրա` Հայաստանի Հանրապետության փաստաբանների պալատի հանրային պաշտպանի գրասենյակի (այսուհետ` հանրային պաշտպանի գրասենյակ) նշանակած փաստաբանի կողմից:
4. Անձը կամ նրա օրինական ներկայացուցիչը հանրային պաշտպանի գրասենյակի ղեկավարին հասցեագրված` իրավական օժանդակության տրամադրման մասին դիմումն անձամբ, փոստով կամ հոգեբուժական կազմակերպության վարչակազմի միջոցով ներկայացնում է հանրային պաշտպանի գրասենյակ:
5. Դիմումին կցվում է անձի` հոգեբուժական կազմակերպությունում բուժում անցնելու մասին տեղեկանք: Հոգեբուժական կազմակերպությունը նշված տեղեկանքը, անձի կամ նրա օրինական ներկայացուցչի պահանջով, անմիջապես տրամադրում է նրանց, իսկ եթե սույն կետով նախատեսված դիմումն ուղարկվելու է հոգեբուժական կազմակերպության միջոցով, տեղեկանքը կցում է դիմումին:
6. Հոգեբուժական կազմակերպությունը սույն կարգի 4-րդ կետով նախատեսված դիմումն ստանալուն պես, բայց ոչ ուշ, քան հաջորդ օրը, պատվիրված նամակով ուղարկում է հանրային պաշտպանի գրասենյակ:
7. Սույն կարգի 4-րդ կետով նախատեսված դիմումը հոգեբուժական կազմակերպության միջոցով հասցեատիրոջն ուղարկելու ծախսերը հոգում է հոգեբուժական կազմակերպությունը:
III. ԻՐԱՎԱԿԱՆ ՕԺԱՆԴԱԿՈՒԹՅԱՆ ՏՐԱՄԱԴՐՈՒՄԸ
8. Հանրային պաշտպանի գրասենյակի ղեկավարը սույն կարգի 4-րդ կետով նախատեսված դիմումն ստանալուն պես, բայց ոչ ուշ, քան հաջորդ օրը, ընդունում է որոշում դիմումը բավարարելու և գործը հանրային պաշտպանին հանձնելու մասին` բացառությամբ սույն կարգի 9-րդ կետով նախատեսված դեպքերի:
i
9. Հանրային պաշտպանի գրասենյակի ղեկավարը սույն կարգի 4-րդ կետով նախատեսված դիմումը մերժում է միայն «Փաստաբանության մասին» Հայաստանի Հանրապետության օրենքի 41-րդ հոդվածի 6-րդ մասով նախատեսված հիմքով:
10. Հանրային պաշտպանը գործն ստանալուն պես, բայց ոչ ուշ, քան հաջորդ օրը, պարտավոր է տեսակցել անձին կամ նրա օրինական ներկայացուցչին:
11. Հիվանդանոցի վարչակազմն ապահովում է հանրային պաշտպանի անարգել մուտքն ու ելքը հիվանդանոցի` տեսակցության համար նախատեսված տարածք, ինչպես նաև` անձի և հանրային պաշտպանի մեկուսի տեսակցությունը` հաշվի առնելով տվյալ հոգեբուժական կազմակերպության տնօրենի հաստատած ներհիվանդանոցային ռեժիմը:
IV. ԻՐԱՎԱԿԱՆ ՕԺԱՆԴԱԿՈՒԹՅԱՆ ՏՐԱՄԱԴՐՈՒՄԸ ԴԱԴԱՐԵՑՆԵԼՈՒ ՀԻՄՔԵՐԸ
12. Իրավական օժանդակության տրամադրումը դադարեցվում է հանրային պաշտպանի գրասենյակի ղեկավարի որոշմամբ`
1) անձի կամ նրա օրինական ներկայացուցչի դիմումի հիման վրա.
2) եթե անձը դուրս է գրվել հոգեբուժական կազմակերպությունից: