ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒԹՅԱՆ ԵՎ ԲՈՒԼՂԱՐԻԱՅԻ ՀԱՆՐԱ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԲՈՒԼՂԱՐԻԱՅԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ԱՇԽԱՏԱՆՔԻ ԵՎ ՍՈՑԻԱԼԱԿԱՆ ՊԱՇՏՊԱՆՈՒԹՅԱՆ ՈԼՈՐՏՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության Կառավարությունը և Բուլղարիայի Հանրապետության Կառավարությունը, այսուհետ` Կողմեր,

գիտակցելով Հայաստանի և Բուլղարիայի միջև ավանդական լավ հարաբերությունները և երկու երկրների համար ընդհանուր եվրոպական հեռանկարների զարգացման հարցը,

հաշվի առնելով, որ աշխատանքի և սոցիալական պաշտպանության ոլորտում համագործակցությունը կնպաստի հաստատված լավ գործելակերպի և դրական փորձի փոխանակմանը երկու երկրների զարգացման համար այս շատ կարևոր փուլում,

ցանկանալով զարգացնել երկկողմ համագործակցությունը և հիմնվելով միջազգային իրավունքի և փոխադարձ հարգանքի ու հավասարության համընդհանուր սկզբունքների և նորմերի վրա,

համաձայնեցին հետևյալի մասին.

ՀՈԴՎԱԾ 1

Կողմերը համաձայնում են համագործակցել աշխատանքի և սոցիալական պաշտպանության ոլորտում` սույն Համաձայնագրին և իրենց երկրների ազգային օրենսդրությանը համապատասխան:

ՀՈԴՎԱԾ 2

Կողմերի միջև սույն Համաձայնագրով նախատեսվող համագործակցությունը ընդգրկում է մասնավորապես հետևյալ ուղղությունները.

Սոցիալական ապահովության և կենսաթոշակային ոլորտները կարգավորող օրենսդրություն:

Սոցիալական համագործակցություն ոչ պետական կազմակերպությունների հետ:

Աշխատանքային հարաբերություններ և դրանց օրենսդրական հիմքերը, աշխատանքային վեճերի կարգավորման ուղիներ:

Աղքատության հաղթահարում, սոցիալական պաշտպանության մեխանիզմներ` աղքատության և սոցիալական մեկուսացման դեմ:

Զբաղվածության ազգային ռազմավարություն, աշխատաշուկայի ակտիվ քաղաքականության իրականացման մեխանիզմներ, ազգային աշխատաշուկայի պաշտպանություն:

Աշխատուժի մասնագիտական որակավորում աշխատաշուկայի պահանջներին համապատասխան, ինչպես նաև տարեցների մասնագիտական որակավորում:

Պաշտպանություն գործազրկության դեպքերից և զբաղվածության խթանում, երիտասարդների զբաղվածություն և խոցելի խմբերի ինտեգրում աշխատաշուկա:

Աշխատանքի առողջ և անվտանգ պայմանների ապահովում:

Պետական և ոչ պետական կազմակերպությունների կողմից սոցիալական ծառայությունների տրամադրում մասնագիտացված հաստատություններում և համայնքներում:

Երեխաների պաշտպանություն և սոցիալական աջակցության տրամադրում երեխաներին ու նրանց ընտանիքների անդամներին:

Հաշմանդամների համար հավասար իրավունքների և հնարավորությունների ապահովում:

Կանանց և տղամարդկանց հավասար հնարավորություններ:

Պետական բյուջեով նախատեսված ծախսային ծրագրերի իրականացման և ծախսված միջոցների նկատմամբ ներքին աուդիտի անցկացման ապահովում:

Փորձագիտական աջակցություն` մարդկանց ազատ տեղաշարժի, սոցիալական քաղաքականության և զբաղվածության բնագավառների օրենսդրական ակտերի ԵՄ օրենսդրությանը համապատասխանեցման և պրակտիկ իրականացման գործընթացին:

Այլ ուղղություններով, որոնց շուրջ Կողմերը համաձայնության կգան:

ՀՈԴՎԱԾ 3

Կողմերի միջև սույն Համաձայնագրով նախատեսվող համագործակցությունը կիրականացվի հետևյալ ձևերով.

1. Օրենսդրության, գիտական հրապարակումների, հետազոտական և այլ փաստաթղթերի փոխանակում աշխատանքի և սոցիալական պաշտպանության ոլորտում:

2. Ճանաչողական այցեր:

3. Համատեղ սեմինարներ` երկկողմ հետաքրքրություն ներկայացնող հարցերի շուրջ:

4. Փորձագետների մասնակցությունը խորհրդաժողովներին և Կողմերից յուրաքանչյուրի տարածքում տեղի ունեցող այլ միջազգային միջոցառումներին:

5. Հայ փորձագետների վերապատրաստման իրականացում Սոֆիայում` Մարդկային ռեսուրսների զարգացման և տարածաշրջանային նախաձեռնությունների կենտրոնում` նախապես համաձայնեցված թեմաներով: Անհրաժեշտության դեպքում, հայաստանյան կողմը նախատեսում է ֆինանսական աջակցություն` ԱՄԿ տեխնիկական աջակցության ներքո:

ՀՈԴՎԱԾ 4

Սույն Համաձայնագրի կատարման համար իրավասու մարմիններն են`

ա) Հայաստանի Հանրապետության Կառավարության կողմից` Աշխատանքի և սոցիալական հարցերի նախարարությունը,

բ) Բուլղարիայի Հանրապետության Կառավարության կողմից` Աշխատանքի և սոցիալական քաղաքականության նախարարությունը:

ՀՈԴՎԱԾ 5

Կողմերն անհրաժեշտության դեպքում նախապես խորհրդատվություն են փոխանակում տարբեր հարցերի շուրջ, քննարկում են ընդհանուր դիրքորոշումներ և աջակցություն են ցուցաբերում` քվեարկելով միջազգային իրավական ընդունելի փաստաթղթերի և դրանց հետ կապված բանաձևերի օգտին, նմանապես, Կողմերը ցուցաբերում են երկկողմ աջակցություն համապատասխան միջազգային կազմակերպությունների աշխատանքային ծրագրերին մասնակցելու համար իրենց երկրների ներկայացրած հայտերին` նախապես համաձայնեցնելով այդ գործընթացը:

ՀՈԴՎԱԾ 6

Կողմերն անցկացնում են խորհրդակցություններ Բուլղարիայի Հանրապետությունում Հայաստանի Հանրապետության քաղաքացիների և Հայաստանի Հանրապետությունում Բուլղարիայի Հանրապետության քաղաքացիների սոցիալական ապահովության, ինչպես նաև զբաղվածության կարգավորման վերաբերյալ երկկողմ համաձայնագրի նախագծի շուրջ:

ՀՈԴՎԱԾ 7

Սույն Համաձայնագրի ներքո համագործակցության գործնական իրականացման նպատակով Կողմերը հաստատում են երկամյա գործողությունների կամ միջոցառումների ծրագրեր, որոնցում կսահմանվեն համագործակցության կոնկրետ ուղղությունները և ձևերը, կազմակերպչական և ֆինանսական պայմանները, միջոցառումների իրականացման ժամանակացույցը: Անհրաժեշտության դեպքում, Կողմերը կազմակերպում են երկկողմ հանդիպումներ` քննարկելու և վերլուծելու ընդհանուր աշխատանքների և երկամյա ժամանակահատվածի համար ստորագրված Գործողությունների ծրագրերի իրականացման արդյունքները:

ՀՈԴՎԱԾ 8

Կողմերի ներկայացուցիչները պարբերաբար նախարարական մակարդակի հանդիպումներ են կազմակերպում իրենց երկրներում: Այդ հանդիպումների ընթացքում կքննարկվեն փոխադարձ համագործակցության, աշխատանքի և սոցիալական պաշտպանության ոլորտում երկկողմ հարաբերությունների հետագա զարգացման համար անհրաժեշտ միջոցների վերաբերյալ հարցեր, ինչպես նաև կիրականացվի կարծիքների փոխանակում երկկողմ հետաքրքրություն ներկայացնող բոլոր հարցերի շուրջ:

ՀՈԴՎԱԾ 9

Կողմերը կառուցում են իրենց փոխադարձ հարաբերությունները Եվրոպայում բարեկամական համագործակցության և գործընկերության հետագա զարգացման ոգով:

ՀՈԴՎԱԾ 10

Կողմերը նպաստում են իրենց երկրների աշխատանքի և սոցիալական պաշտպանության հարցերով զբաղվող կառավարական և ոչ կառավարական մարմինների և կազմակերպությունների միջև համագործակցության զարգացմանը:

ՀՈԴՎԱԾ 11

Սույն Համաձայնագրի իրականացման համար անհրաժեշտ ֆինանսական միջոցները տրամադրվում են Կողմերի ազգային օրենսդրության համաձայն:

Սույն Համաձայնագրի շրջանակներում Կողմերից յուրաքանչյուրը հոգում է իր պատվիրակությունների և փորձագետների` մյուս Կողմի երկիր ուղևորության հետ կապված ծախսերը, իսկ պատվիրակություններին և փորձագետներին ընդունող Կողմը` իր երկրում նրանց օրապահիկի, կեցության և կազմակերպական ծախսերը:

ՀՈԴՎԱԾ 12

Կողմերից յուրաքանչյուրի նախաձեռնությամբ և փոխադարձ համաձայնությամբ սույն Համաձայնագրում կարող են կատարվել փոփոխություններ և լրացումներ, որոնք ձևակերպվում են առանձին արձանագրությամբ: Նշված արձանագրությունն ուժի մեջ է մտնում սույն Համաձայնագիրն ուժի մեջ մտնելու համար սահմանված կարգով և հանդիսանում է դրա անբաժանելի մասը:

ՀՈԴՎԱԾ 13

Սույն Համաձայնագիրն ուժի մեջ է մտնում Կողմերի ազգային օրենսդրությամբ նախատեսված ներպետական ընթացակարգերի կատարման մասին դիվանագիտական ուղիներով վերջին ծանուցումը ստանալու օրվանից:

Սույն Համաձայնագիրը կնքվում է անորոշ ժամկետով:

Կողմերից յուրաքանչյուրը կարող է ցանկացած պահի դադարեցնել սույն Համաձայնագրի գործողությունը` իր մտադրության մասին մյուս Կողմին դիվանագիտական ուղիներով ծանուցելու միջոցով: Այդ դեպքում, սույն Համաձայնագրի գործողությունը դադարում է ծանուցումը մյուս Կողմի կողմից ստանալու օրվանից վեց ամիս հետո:

Սույն Համաձայնագրի գործողության վավերականության դադարեցումը չի խոչընդոտում արդեն իսկ համաձայնեցված կոնկրետ նախաձեռնությունների իրականացումը, քանի դեռ Կողմերը չեն բանակցել դրանց կասեցման վերաբերյալ:

Ստորագրված է ք. Երևանում 2012 թվականի ապրիլի 3-ին, երկու բնօրինակով` յուրաքանչյուրը` հայերենով, բուլղարերենով և անգլերենով, ընդ որում` երեք տեքստերն էլ հավասարազոր են: Սույն Համաձայնագրի կիրարկման ժամանակ դրա դրույթների մեկնաբանման մասով Կողմերի միջև հակասությունների դեպքում, գերակայում է անգլերեն տեքստը:

Համաձայնագիրն ուժի մեջ է մտել 2012թ. հուլիսի 17-ին