ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒԹՅԱՆ ԵՎ ՔՈՒՎԵՅԹԻ ՊԵՏՈՒԹՅԱ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՔՈՒՎԵՅԹԻ ՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ԴԻՎԱՆԱԳԻՏԱԿԱՆ ԵՎ ՀԱՏՈՒԿ ԱՆՁՆԱԳՐԵՐ ՈՒՆԵՑՈՂ ԱՆՁԱՆՑ ՀԱՄԱՐ ՄՈՒՏՔԻ ԱՐՏՈՆԱԳՐԻ ՎԵՐԱՑՄԱՆ ՄԱՍԻՆ

Հայաստանի Հանրապետության Կառավարությունը և Քուվեյթի Պետության Կառավարությունը, այսուհետ` Կողմեր,

նպատակ ունենալով ամրապնդելու երկկողմ հարաբերությունները երկու երկրների միջև,

ցանկանալով դյուրացնել դիվանագիտական և հատուկ անձնագրեր ունեցող երկու երկրների քաղաքացիների մուտքը և ելքը,

համաձայնեցին հետևյալի մասին.

ՀՈԴՎԱԾ 1

Սույն Համաձայնագրի դրույթները կիրառվում են.

1. դիվանագիտական անձնագրեր ունեցող` Հայաստանի Հանրապետության քաղաքացիների նկատմամբ.

2. դիվանագիտական և հատուկ անձնագրեր ունեցող` Քուվեյթի Պետության քաղաքացիների նկատմամբ:

ՀՈԴՎԱԾ 2

1. Սույն Համաձայնագրի 1-ին հոդվածում նշված անձինք կարող են առանց մուտքի արտոնագրի մուտք գործել, տարանցել և դուրս գալ մյուս Կողմի տարածքից տվյալ երկրում իննսուն (90) օրը չգերազանցող` անընդմեջ կամ մի քանի անգամ գտնվելու ժամկետով` առաջին մուտքի ամսաթվից հետո վեց ամսվա ընթացքում:

2. Սույն Համաձայնագրի 1-ին հոդվածում նշված, մյուս Կողմի պետությունում դիվանագիտական ներկայացուցչություններում ու հյուպատոսություններում և միջազգային կազմակերպություններում հավատարմագրված անձինք, ինչպես նաև նրանց ամուսինները և անչափահաս երեխաները, ովքեր ուղեկցում և ապրում են նրանց հետ, կարող են առանց մուտքի արտոնագրի մուտք գործել, մնալ և դուրս գալ մյուս Կողմի պետության տարածքից իրենց աշխատելու ընթացքում: Մեկ կողմի արտաքին գործերի նախարարությունը պետք է տեղեկացնի մյուս կողմի արտաքին գործերի նախարարությանը նրանց ժամանման մասին: Սույն պարբերությունում նշված անձինք պետք է ստանան հավատարմագրման քարտ ընդունող Կողմից:

ՀՈԴՎԱԾ 3

Սույն Համաձայնագրի 1-ին հոդվածում նշված անձինք կարող են երկարաձգել մյուս Կողմի պետության տարածքում իրենց գտնվելու տևողությունը այդ Կողմի իրավասու մարմինների կողմից հաստատում ստանալուց հետո` մյուս Կողմի գործող իրավական դրույթներին համապատասխան:

ՀՈԴՎԱԾ 4

Սույն Համաձայնագրի 1-ին հոդվածում նշված անձինք պահպանում են մյուս Կողմի պետության տարածքում գործող` մուտք գործելու կանոնակարգերը և ազգային օրենսդրությունը տվյալ պետությունում գտնվելու ամբողջ ժամանակահատվածում:

ՀՈԴՎԱԾ 5

Յուրաքանչյուր Կողմ իրեն իրավունք է վերապահում մերժելու անցանկալի անձ համարվող անձանց մուտքը իր տարածք կամ դադարեցնելու տվյալ անձանց` այնտեղ գտնվելու թույլտվությունը:

ՀՈԴՎԱԾ 6

1. Կողմերը դիվանագիտական ուղիներով փոխանակում են սույն Համաձայնագրում նշված անձնագրերի նմուշները դրանք ուժի մեջ մտնելուց հետո` երեսուն (30) օրվա ընթացքում:

2. Սույն Համաձայնագրում նշված անձնագրերում որևէ փոփոխություն կատարելու դեպքում Կողմերը դիվանագիտական ուղիներով փոխանակում են դրանց նոր նմուշները և տեղեկատվություն այդ անձնագրերի մասին դրանք ուժի մեջ մտնելուց հետո` երեսուն (30) օրվա ընթացքում:

ՀՈԴՎԱԾ 7

Յուրաքանչյուր Կողմ իրեն իրավունք է վերապահում ամբողջությամբ կամ մասնակիորեն կասեցնելու սույն Համաձայնագրի գործողությունը` ելնելով ազգային անվտանգության, հասարակական կարգի կամ հանրային առողջության պաշտպանության նկատառումներից: Այդպիսի կասեցման կամ կասեցումը վերացնելու մասին մյուս Կողմը ծանուցվում է դիվանագիտական ուղիներով, և այն ուժի մեջ է մտնում կամ դադարում է գործելուց մյուս Կողմի կողմից ծանուցումն ստանալու օրվանից:

ՀՈԴՎԱԾ 8

Կողմերի միջև սույն Համաձայնագրի մեկնաբանման կամ իրականացման շուրջ ծագած ցանկացած վեճ կարգավորվում է խորհրդակցությունների և բանակցությունների միջոցով:

ՀՈԴՎԱԾ 9

Կողմերի փոխադարձ համաձայնությամբ սույն Համաձայնագրում կարող են կատարվել փոփոխություններ: Փոփոխությունները կկազմեն սույն Համաձայնագրի անբաժանելի մասը և ուժի մեջ կմտնեն սույն Համաձայնագրի 10-րդ հոդվածի համաձայն:

ՀՈԴՎԱԾ 10

Սույն Համաձայնագիրն ուժի մեջ կմտնի այն ուժի մեջ մտնելու համար անհրաժեշտ ներպետական ընթացակարգերի կատարման մասին վերջին գրավոր ծանուցումը դիվանագիտական ուղիներով մյուս Կողմի կողմից ստանալուց երեսուն (30) օր հետո:

ՀՈԴՎԱԾ 11

Սույն Համաձայնագիրը վավերական է ուժի մեջ մտնելուց հետո անորոշ ժամկետով: Յուրաքանչյուր Կողմ կարող է դադարեցնել սույն Համաձայնագրի գործողությունը` այդ մասին դիվանագիտական ուղիներով գրավոր ծանուցելով մյուս Կողմին: Դադարեցումը գործողության մեջ է մտնում ծանուցման ամսաթվից իննսուն (90) օր հետո:

Կատարված է Էլ-Քուվեյթ քաղաքում, 2012 թվականի նոյեմբերի 19-ին, երկու բնօրինակով, յուրաքանչյուրը` հայերեն, արաբերեն և անգլերեն, ընդ որում` բոլոր տեքստերն էլ հավասարազոր են: Սույն Համաձայնագրի մեկնաբանման ժամանակ տարաձայնությունների դեպքում գերակայում է անգլերեն տեքստը:

Համաձայնագիրն ուժի մեջ է մտել 2013թ. մայիսի 9-ին