110.0280.060899
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅՈՒՆ
ՀՐԱՄԱՆ
19 հուլիսի 1999 թվականի թիվ 280-Մ
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԱՐԶՊԵՏԱՐԱՆՆԵՐԻ ԵՎ ԵՐԵՎԱՆԻ ՔԱՂԱՔԱՊԵՏԱՐԱՆԻ ԿՐԹՈՒԹՅԱՆ ՏԵՍՉՈՒԹՅԱՆ ՕՐԻՆԱԿԵԼԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ
Ի կատարումն ՀՀ վարչապետի 1999թ. ապրիլի 6-ի «Հայաստանի Հանրապետության վարչապետի մի շարք որոշումներում լրացումներ կատարելու մասին» թիվ 200 որոշման 3-րդ կետի
ՀՐԱՄԱՅՈՒՄ ԵՄ`
1. Հաստատել «Հայաստանի Հանրապետության մարզպետարանների և Երևանի քաղաքապետարանի կրթության տեսչության օրինակելի կանոնադրությունը»` նոր խմբագրությամբ:
2. Նախարարության իրավաբանական բաժնին (Վ. Սարգսյան)` սահմանված կարգով օրինակելի կանոնադրությունը ներկայացնել ՀՀ արդարադատության նախարարություն` պետական գրանցման:
3. Սույն հրամանի կատարման վերահսկողությունը հանձնարարել նախարարի տեղակալ Ա. Թոփուզյանին:
Հաստատում եմ`
ՀՀ կրթության և գիտության
նախարար` Է. Ղազարյան
«19» 07 1999թ.
Կոդ 110
ՕՐԻՆԱԿԵԼԻ ԿԱՆՈՆԱԴՐՈՒԹՅՈՒՆ
Հայաստանի Հանրապետության մարզպետարանների և Երևանի
քաղաքապետարանի կրթության տեսչության
I. Ընդհանուր դրույթներ
1. Հայաստանի Հանրապետության մարզպետարանների և Երևանի քաղաքապետարանի կրթության տեսչությունները ստեղծվել են Հայաստանի Հանրապետության վարչապետի 1999թ. ապրիլի 6-ի «Հայաստանի Հանրապետության վարչապետի մի շարք որոշումներում լրացումներ կատարելու մասին» թիվ 200 որոշման համաձայն:
2. Կրթության տեսչությունը (այսուհետև` տեսչություն) մարզպետարանի (Երևանի քաղաքապետարանի) առանձին կառուցվածքային ստորաբաժանում է: Այն ստեղծվել է մարզի (Երևան քաղաքի) տարածքում պետական կրթական քաղաքականության իրականացման նկատմամբ պետական վերահսկողություն իրականացնելու նպատակով:
3. Տեսչությունը ղեկավարվում է ՀՀ օրենսդրությամբ, ՀՀ կրթության և գիտության նախարարության հրամաններով, մարզպետի (Երևանի քաղաքապետի) որոշումներով և կարգադրություններով:
4. Տեսչությունը պատասխանատվություն է կրում մարզի (Երևան քաղաքի) տարածքում ուսումնական հաստատությունների գործունեության վերահսկողության իրականացման գործընթացի համար:
5. Տեսչության ֆինանսավորումն իրականացվում է պետական բյուջեով մարզպետարանների (Երևանի քաղաքապետարանի) պահպանման համար նախատեսված միջոցների հաշվին:
II. Տեսչության հիմնական խնդիրները և գործառույթները
6. Տեսչության հիմնական խնդիրներն են.
ա) մարզի (Երևան քաղաքի) տարածքի ուսումնական հաստատություններում կրթության մասին ՀՀ օրենսդրության, ՀՀ կրթության և գիտության նախարարության նորմատիվ իրավական ակտերի, մարզպետի (Երևանի քաղաքապետի) որոշումների և կարգադրությունների կատարման վերահսկողության իրականացումը.
բ) Տեսչական ստուգումների միջոցով մարզի (Երևան քաղաքի) նախադպրոցական և հանրակրթական ուսումնական հաստատությունների ուսումնադաստիարակչական աշխատանքների թերությունների հայտնաբերումն ու վերացումը.
գ) Մարզի (Երևան քաղաքի) ուսումնական հաստատությունների գործունեության վերաբերյալ մարզպետին (Երևանի քաղաքապետին) և կրթության ու գիտության նախարարությանը անհրաժեշտ տեղեկատվությամբ ապահովումը:
7. Իր հիմնական խնդիրներին համապատասխան տեսչությունը`
ա) վերահսկում է կրթական և դաստիարակչական ծրագրերի իրականացումը` պետական կրթական չափորոշիչներին համապատասխան, ուսումնական պլանների և ծրագրերի կատարումը, սովորողների գիտելիքների ստուգման և գնահատման աշխատանքը.
բ) անկախ ուսումնական հաստատության կազմակերպա-իրավական ձևից և ենթակայությունից ստուգում է ուսումնադաստիարակչական աշխատանքների կազմակերպման համար անհրաժեշտ պայմանների ապահովումը.
գ) վերահսկում է մարզի (Երևան քաղաքի) դպրոցական տարիքի երեխաների հաշվառումը և նրանց ընդգրկումն ուսումնական հաստատություններում: Սովորողների ընդունելության, փոխադրման, տեղափոխման, քննությունների և վերաքննությունների, որակավորման ստուգումների կազմակերպման ու անցկացման համապատասխանությունը գործող կարգերին.
դ) ուսումնասիրում է.
- անհրաժեշտ ուսումնագիտական, մեթոդական նյութերով, կրթության գործընթացը կարգավորող փաստաթղթերով, ձեռնարկելով ուսումնական հաստատության ապահովվածությունը.
- մանկավարժական կադրերի համապատասխանությունը տարիֆաորակավորման բնութագրերին, մասնագետների պահանջարկը, կադրերի հետ տարվող աշխատանքը.
- մեթոդմիավորումների, մանկավարժական և ծնողական խորհուրդների աշխատանքը.
- ուսումնական հաստատություններում սովորողների կենցաղի, սննդի, առողջության պահպանման, հանգստի, ֆիզիկական և հոգևոր զարգացման անհրաժեշտ պայմանների ստեղծումը.
- նախադպրոցական և հանրակրթական հաստատությունների տնօրենների թեկնածուների համապատասխանությունը տարիֆաորակավորման բնութագրին և համապատասխան առաջարկություն է ներկայացնում համայնքի ղեկավարին կամ մարզպետին.
- ուսումնական հաստատությունների կողմից կանոնադրական պահանջների կատարումը և գործավարությունը:
8. Տեսչությունը իր աշխատանքի ընթացքում համագործակցում է մարզպետարանի (Երևանի քաղաքապետարանի) ու ՀՀ կրթության և գիտության նախարարության կառուցվածքային ստորաբաժանումների հետ:
9. Տեսչությունը մարզպետի (Երևանի քաղաքապետի) հանձնարարությամբ, ՀՀ օրենսդրությամբ սահմանված կարգով, քննարկում է քաղաքացիների առաջարկությունները, դիմումներն ու գանգատները, կատարում քաղաքացիների ընդունելություն:
III. Տեսչության աշխատանքի կազմակերպումը
10. Տեսչության աշխատանքը կազմակերպվում է տեսչության կանոնադրության համաձայն: Տեսչության կանոնադրությունը կազմվում է սույն օրինակելի կանոնադրության հիման վրա:
11. Տեսչության աշխատանքային պլանները կազմվում են ՀՀ կրթության և գիտության նախարարության կողմից հաստատված տեսչավորման միասնական թեմաների և ժամանակացույցի համաձայն:
Տեսչավորման ենթակա ուսումնական հաստատություններն ընտրվում են մարզպետի (Երևանի քաղաքապետի) որոշմամբ:
Տեսչության աշխատանքային պլանները հաստատում է մարզպետը (Երևանի քաղաքապետը):
12. Տեսչության աշխատողների տարիֆաորակավորման բնութագրերը հաստատվում են ՀՀ կրթության և գիտության նախարարության կողմից:
13. Տեսչության անմիջական ղեկավարությունն իրականացնում է տեսչության պետը, որին պաշտոնի է նշանակում և պաշտոնից ազատում մարզպետը (Երևանի քաղաքապետը):
14. Տեսչության աշխատողներին պաշտոնի է նշանակում և պաշտոնից ազատում է մարզպետը (Երևանի քաղաքապետը)` տեսչության պետի ներկայացմամբ:
15. Տեսչության պետը`
ա) կազմում է տեսչության պլան-ծրագրերը.
բ) տեսչության աշխատողների միջև կատարում է պարտականությունների բաշխում.
գ) մարզպետին (Երևանի քաղաքապետին) առաջարկություններ է ներկայացնում ուսումնական հաստատությունների տնօրենների կողմից արձակված, օրենսդրությանը և նորմատիվ իրավական ակտերին հակասող հրամանների վերացման վերաբերյալ.
դ) տեսչավորման արդյունքների համաձայն եզրակացություն է ներկայացնում մարզպետին (Երևանի քաղաքապետին) ոլորտի աշխատողներին խրախուսելու կամ կարգապահական պատասխանատվության ենթարկելու մասին.
ե) պատրաստում է տեսչության գործունեության հաշվետվությունները:
16. Տեսչության աշխատակազմը համալրվում է համապատասխան որակավորում և աշխատանքի փորձ ունեցող կադրերով:
17. Տեսչության աշխատողների ատեստավորումն իրականացվում է ՀՀ օրենսդրությամբ սահմանված կարգով:
18. Տեսչությունն իր աշխատանքում առաջնորդվում է ստուգումների կազմակերպման և անցկացման վերաբերյալ ՀՀ օրենսդրությամբ, ՀՀ կրթության և գիտության նախարարության մեթոդական ցուցումներով:
19. Տեսչության գործունեությունը վերահսկելու նպատակով ՀՀ օրենսդրությամբ սահմանված կարգով և ժամկետներում համապատասխան հանրապետական գործադիր մարմինը իրավասու է կատարել տեսչական ստուգումներ:
ԳՐԱՆՑՎԱԾ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ «06» 08 1999 Թ. ՊԵՏԱԿԱՆ ԳՐԱՆՑՄԱՆ ԹԻՎ 110990127