(ուժը կորցրել է 03.12.09 թիվ 1417-Ն որոշում)
i
040.0695.201199
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«20» նոյեմբերի 1999 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
20 նոյեմբերի 1999 թվականի թիվ 695
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՓԱԽՍՏԱԿԱՆԻ ՎԿԱՅԱԿԱՆ ՈՒ ՃԱՄՓՈՐԴԱԿԱՆ ՓԱՍՏԱԹՈՒՂԹ ՏԱԼՈՒ ԿԱՐԳԵՐԸ ԵՎ ԴՐԱՆՑ ՆԿԱՐԱԳՐԵՐԸ ՀԱՍՏԱՏԵԼՈՒ ՄԱՍԻՆ
Ժնևի 1951 թվականի «Փախստականի կարգավիճակի մասին» կոնվենցիայի և «Փախստականների մասին» Հայաստանի Հանրապետության օրենքի 4 հոդվածին համապատասխան` Հայաստանի Հանրապետության կառավարությունը որոշում է.
1. Հաստատել`
ա) Հայաստանի Հանրապետությունում փախստականի կարգավիճակ ստացած անձանց փախստականի վկայական տալու կարգը և վկայականի նկարագիրը (կցվում են).
բ) Հայաստանի Հանրապետությունում փախստականի կարգավիճակ ստացած անձանց ճամփորդական փաստաթուղթ տալու կարգը և փաստաթղթի նկարագիրը (կցվում են):
2. Հայաստանի Հանրապետության ներքին գործերի նախարարությանը`
ա) եռամսյա ժամկետում կազմակերպել սույն որոշման 1-ին կետում նշված փախստականի վկայականի և ճամփորդական փաստաթղթի պատրաստման աշխատանքները.
բ) մինչև 2000 թվականի հուլիսի 1-ը ապահովել փախստականի կարգավիճակ ստացած անձանց նախկին ԽՍՀՄ քաղաքացու համաքաղաքացիական անձնագրերի փոխարինումը փախստականի վկայականներով:
3. Հայաստանի Հանրապետության ֆինանսների նախարարությանը` 10-օրյա ժամկետում Հայաստանի Հանրապետության կառավարություն ներկայացնել առաջարկություն սույն որոշման 1-ին կետում նշված փախստականի վկայականի և ճամփորդական փաստաթղթի պատրաստման աշխատանքները ֆինանսավորելու վերաբերյալ:
i
4. Ուժը կորցրած ճանաչել Հայաստանի Հանրապետության կառավարության 1993 թվականի հոկտեմբերի 17-ի «Հայաստանի Հանրապետության տարածքում ապաստանած փախստականներին «Փախստականի ընտանիքի վկայական» տալու մասին» N 524 որոշումը:
Հաստատված է
ՀՀ կառավարության 1999 թվականի
նոյեմբերի 20-ի N 695 որոշմամբ
ԿԱՐԳ
Հայաստանի Հանրապետությունում փախստականի
կարգավիճակ ստացած անձանց փախստականի
վկայական տալու
I. Ընդհանուր դրույթներ
1. Փախստականների վկայականը (այսուհետև` վկայական) Հայաստանի Հանրապետությունում փախստականի անձը հաստատող փաստաթուղթ է:
2. Վկայականը տրվում է Հայաստանի Հանրապետության օրենսդրությամբ սահմանված կարգով փախստականի կարգավիճակ ստացած` 16 տարին լրացած Հայաստանի Հանրապետությունում գտնվող օտարերկրյա քաղաքացիներին և քաղաքացիություն չունեցող անձանց:
3. Վկայականը տրվում է 3 տարի ժամկետով: Գործածության համար պիտանի վկայականի ժամկետը կարող է երկարաձգվել ևս 2 տարի:
4. Ժամկետանց վկայականներն անվավեր են և ենթակա փոխանակման` սահմանված կարգով:
5. Վկայականը պատրաստվում է միասնական նմուշով` հայերեն:
6. Վկայականում փախստականի անձի մասին նշվում են հետևյալ տեղեկությունները`
ա) ազգանուն, անուն, հայրանուն,
բ) սեռը,
գ) ծննդյան վայրը, ամսաթիվը, ամիսը, տարեթիվը,
դ) քաղաքացիությունը (կամ դրա բացակայությունը):
7. Վկայականում կարող են կատարվել հետևյալ նշումները`
ա) վկայականի վավերականության ժամկետը երկարաձգելու մասին` Հայաստանի Հանրապետության ներքին գործերի մարմինների կողմից.
բ) Հայաստանի Հանրապետության բնակության վայրի մասին` Հայաստանի Հանրապետության ներքին գործերի մարմինների կողմից.
գ) անչափահաս երեխաների մասին` քաղաքացիական ակտերի գրանցման տարածքային մարմինների կողմից.
դ) արյան խմբի և ռեզուսի մասին` փախստականի ցանկությամբ` առողջապահության մարմինների կողմից.
ե) ընտանեկան դրության մասին` քաղաքացիական ակտերի գրանցման տարածքային մարմինների կողմից:
II. Վկայական տալու, փոխանակելու և դրանից օգտվելու կարգը
8. Փախստականներին վկայական տալիս կամ փոխանակում են Հայաստանի Հանրապետության ներքին գործերի մարմինները` ըստ նրանց մշտական, ժամանակավոր կամ փաստացի բնակության վայրի:
9. Վկայական ստանալու համար փախստականը ներկայացնում է`
i
ա) Հայաստանի Հանրապետության տարածքային կառավարման նախարարության որոշումն անձին փախստականի կարգավիճակ տալու վերաբերյալ, իսկ 1988 թվականից մինչև 1992 թվականը Հայաստանի Հանրապետություն բռնագաղթված անձը` փախստականի ընտանիքի վկայականը.
բ) անձնագիրը.
գ) ծննդյան վկայականը (16 տարին նոր լրացած անձի համար).
դ) 35x45 մմ չափսի 2 լուսանկար (գունավոր).
ե) անձը հաստատող այլ փաստաթուղթ, եթե փախստականը չի կարող ներկայացնել սույն կետի «բ» և «գ» ենթակետերում նշված փաստաթղթերը:
(9-րդ կետը փոփ. 03.05.07 թիվ 573-Ն որոշում)
i
10. Վկայական տալիս 1988-1992 թվականների ընթացքում հանրապետություն բռնագաղթված անձանցից հետ են վերցվում նախկին ԽՍՀՄ քաղաքացու համաքաղաքացիական անձնագրերը և փախստականի ընտանիքի վկայականները: Դրանք Հայաստանի Հանրապետության ներքին գործերի մարմինների կողմից հանձնվում են ի պահ Հայաստանի Հանրապետության տարածքային կառավարման նախարարությանը:
(10-րդ կետը փոփ. 03.05.07 թիվ 573-Ն որոշում)
11. Վկայականը կարող է փոխանակվել դրանում պարունակվող տեղեկությունները փոխելու, գրառումներում անճշտություններ հայտնաբերելու և օգտագործվելու համար ոչ պիտանի լինելու դեպքերում:
12. Փախստականը վկայականի փոխանակման համար ներկայացնում է փոխանակման ենթակա վկայականը, սահմանված ձևի դիմում և երկու գունավոր լուսանկար:
Փախստականը վկայականում որևէ տեղեկություն փոխելու կամ գրառումներում անճշտություններ հայտնաբերելու պատճառով այն փոխանակելիս ներկայացնում է նաև փոփոխությունները կամ անճշտությունները հաստատող փաստաթուղթ:
13. Փախստականը վկայականը կորցնելու դեպքում 10-օրյա ժամկետում պարտավոր է հայտնել Հայաստանի Հանրապետության ներքին գործերի մարմնին:
i
14. Հայաստանի Հանրապետության քաղաքացիություն ձեռք բերելու կամ այլ պատճառով փախստականի կարգավիճակը կորցնելու կամ դրանից զրկվելու դեպքում անձը պարտավոր է վկայականը հանձնել Հայաստանի Հանրապետության ներքին գործերի մարմնին:
Հայաստանի Հանրապետության տարածքային կառավարման նախարարությունը փախստականի կարգավիճակը դադարեցնելու կամ դրանից զրկելու որոշում ընդունելիս տեղեկացնում է Հայաստանի Հանրապետության ներքին գործերի համապատասխան մարմնին:
(14-րդ կետը փոփ. 03.05.07 թիվ 573-Ն որոշում)
15. Մահացած փախստականի վկայականը հանձնվում է մահվան գրանցումը կատարող մարմնին: Մահվան գրանցումը կատարելուց հետո վկայականն ուղարկվում է Հայաստանի Հանրապետության ներքին գործերի մարմնին, որն այնուհետև ի պահ է տրվում Հայաստանի Հանրապետության տարածքային կառավարման նախարարությանը:
(15-րդ կետը փոփ. 03.05.07 թիվ 573-Ն որոշում)
16. Գտնված վկայականները հանձնվում են Հայաստանի Հանրապետության ներքին գործերի մարմնին:
17. Կասկածյալների, մեղադրյալների, որոնց նկատմամբ որպես խափանման միջոց է ընտրվել կալանքը, ինչպես նաև ազատազրկման դատապարտված փախստականների վկայականները ժամանակավորապես վերցվում են հետաքննության` նախաքննության մարմինների կամ դատարանի կողմից:
Խափանման միջոցի վերացման դեպքում կամ պատիժը կրելուց հետո կասկածյալների և մեղադրյալների վկայականները վերադարձվում են տերերին:
Փախստականի վկայականը վերացնելը (բացառությամբ սույն կետում նշված դեպքերի), այլ անձանց հանձնելը և գրավ դնելն արգելվում է:
18. Հայաստանի Հանրապետության ներքին գործերի մարմինները կատարում են վկայականների հաշվառում և վարում են տրված, անվավեր ճանաչված, փոխանակված վկայականների գրանցման մատյանները:
i
19. Հայաստանի Հանրապետության ներքին գործերի մարմինները փախստականին վկայական տալու մասին տեղեկությունները հայտնում են Հայաստանի Հանրապետության տարածքային կառավարման նախարարությանը:
(19-րդ կետը փոփ. 03.05.07 թիվ 573-Ն որոշում)
Հաստատված է
ՀՀ կառավարության 1999 թվականի
նոյեմբերի 20-ի N 695 որոշմամբ
ՆԿԱՐԱԳԻՐ
i
Հայաստանի Հանրապետությունում փախստականի կարգավիճակ
ստացած անձանց փախստականի վկայականի
Հայաստանի Հանրապետությունում փախստականի վկայականը (այսուհետև` վկայական) 88x125 մմ չափսի, 12 էջից բաղկացած փաստաթուղթ է:
Վկայականի շապիկը մուգ կարմիր գույնի է: Շապիկի երեսի վերևի մասում հայերեն գլխատառերով տպագրվում են «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» բառերը: Կենտրոնում պատկերվում է Հայաստանի Հանրապետության զինանշանը: Զինանշանից ներքև տպագրվում են «ՓԱԽՍՏԱԿԱՆԻ ՎԿԱՅԱԿԱՆ» բառերը:
Վկայականի շապիկի հակառակ երեսի կենտրոնում գունավոր պատկերվում է Հայաստանի Հանրապետության զինանշանը, վերևի մասում տպագրվում են «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ», ներքևի մասում` «ՓԱԽՍՏԱԿԱՆԻ ՎԿԱՅԱԿԱՆ» բառերը, իսկ ներքևում` «ՎԿԱՅԱԿԱՆԸ ՎԱՎԵՐԱԿԱՆ Է ՄԻԱՅՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ» նախադասությունը:
Վկայականի 1-ին էջի վերևի մասում տպագրվում են «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» բառերը, էջի ձախ մասից` մինչև լուսանկարի համար հատկացված տեղը, տպագրվում են «ՓԱԽՍՏԱԿԱՆԻ ՎԿԱՅԱԿԱՆ» բառերը, իսկ այնուհետև, լուսանկարի աջ կողմից հաջորդականությամբ` «ԱԶԳԱՆՈՒՆԸ», «ԱՆՈՒՆԸ», «ՀԱՅՐԱՆՈՒՆԸ», «ԾՆՆԴԱՎԱՅՐԸ», «ԾՆՎԵԼ Է», «ՍԵՌԸ», «ԱԶԳՈՒԹՅՈՒՆԸ», «ԵՐԿԻՐԸ», «ՏՐՎԵԼ Է», «ՎԱՎԵՐԱԿԱՆ Է ՄԻՆՉԵՎ», «ՈՒՄ ԿՈՂՄԻՑ», «ՎԿԱՅԱԿԱՆԻ ՏԻՐՈՋ ՍՏՈՐԱԳՐՈՒԹՅՈՒՆԸ» բառերը:
Վկայականի 1-ին էջի ձախ մասում «ՓԱԽՍՏԱԿԱՆԻ ՎԿԱՅԱԿԱՆ» բառերից ներքև տեղ է հատկացվում վկայականի տիրոջ 35x45 մմ չափսի լուսանկարի համար:
Վկայականի 1-ին էջի վերևի աջ մասում տպագրվում են վկայականի սերիան և համարը:
Վկայականի 2-րդ և 3-րդ էջերի վերևի մասում տպագրվում են «ԸՆՏԱՆԵԿԱՆ ԴՐՈՒԹՅՈՒՆԸ» բառերը, 4-րդ և 5-րդ էջերում` «ԵՐԵԽԱՆԵՐԸ» բառը, որից ներքև` «ԱԶԳԱՆՈՒՆԸ, ԱՆՈՒՆԸ, ՀԱՅՐԱՆՈՒՆԸ, ԾՆՆԴՅԱՆ ՕՐԸ, ԱՄԻՍԸ, ԹԻՎԸ», 6-րդ և 7-րդ էջերում` «ԲՆԱԿՈՒԹՅԱՆ ՎԱՅՐԸ», 8-12-րդ էջերում` «ՀԱՏՈՒԿ ՆՇՈՒՄՆԵՐ» բառերը:
Վկայականի 3, 5, 7, 9 և 11-րդ էջերի ներքևի մասում տպագրվում են վկայականի սերիան և համարը:
Վկայականի շապիկի վերջին էջի ներսի վերևի մասում տպագրվում են «ՎԿԱՅԱԿԱՆԸ ՏՐՎՈՒՄ Է ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՓԱԽՍՏԱԿԱՆԻ ԿԱՐԳԱՎԻՃԱԿ ՍՏԱՑԱԾ 16 ՏԱՐԻՆ ԼՐԱՑԱԾ ԱՆՁԱՆՑ», «ՎԿԱՅԱԿԱՆԸ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԵՓԱԿԱՆՈՒԹՅՈՒՆՆ Է», իսկ ներքևի մասում` «ՎԿԱՅԱԿԱՆԸ 12 ԷՋԻՑ Է» բառերը:
Լուսանկարը փակցվելուց հետո վկայականը կնքվում է Հայաստանի Հանրապետության ներքին գործերի մարմնի կնիքով:
Վկայականի բոլոր էջերը համարակալվում են:
(նկարագիրը խմբ. 28.08.00 թիվ 518 որոշում)
Հաստատված է
ՀՀ կառավարության 1999 թվականի
նոյեմբերի 20-ի N 695 որոշմամբ
ԿԱՐԳ
Հայաստանի Հանրապետությունում փախստականի կարգավիճակ
ստացած անձանց ճամփորդական փաստաթուղթ տալու
I. Ընդհանուր դրույթներ
1. Ճամփորդական փաստաթուղթը (այսուհետև` փաստաթուղթ) օտարերկրյա պետությունում փախստականի անձը հաստատող փաստաթուղթ է:
2. Ճամփորդական փաստաթուղթը տրվում է Հայաստանի Հանրապետությունում փախստականի կարգավիճակ ստացած 16 տարին լրացած անձանց:
3. Հայաստանի Հանրապետության ներքին գործերի մարմինները փախստականներին փաստաթուղթը տալիս են ըստ նրանց մշտական, ժամանակավոր կամ փաստացի բնակության վայրի` 1 տարի ժամկետով: Ժամկետը կարող է երկարաձգվել ևս 1 տարով` Հայաստանի Հանրապետությունում ներքին գործերի մարմինների, իսկ օտարերկրյա պետություններում` Հայաստանի Հանրապետության դիվանագիտական ներկայացուցչությունների կամ հյուպատոսական հիմնարկների կողմից, եթե անձը չի կորցրել փախստականի կարգավիճակը:
4. ժամկետանց փաստաթուղթն անվավեր է և ենթակա փոխանակման` սահմանված կարգով:
5. Փաստաթուղթը պատրաստվում է միասնական նմուշով` հայերեն, ռուսերեն և անգլերեն:
6. Փաստաթղթում փախստականի անձի մասին նշվում են հետևյալ տեղեկությունները`
ա) ազգանունը, անունը, հայրանունը,
բ) սեռը,
գ) ծննդյան վայրը, ամսաթիվը, ամիսը, տարեթիվը,
դ) քաղաքացիությունը (կամ դրա բացակայությունը):
7. Փաստաթղթում կարող են կատարել հետևյալ նշումները`
ա) փաստաթղթի վավերականության ժամկետը երկարաձգելու մասին` Հայաստանի Հանրապետության ներքին գործերի մարմինների կողմից:
բ) օտարերկրյա պետություններ ժամանակավորապես մեկնելու և վերադառնալու մասին` սահմանային ծառայությունների կողմից:
Փախստականի փաստաթղթերում այլ նշումներ կատարելն արգելվում է:
8. Փախստականը փաստաթուղթ ստանալու համար վճարում է պետական տուրք` «Պետական տուրքի մասին» Հայաստանի Հանրապետության օրենքով սահմանված կարգով և չափով:
II. Փաստաթուղթ տալու, փոխանակելու և դրանից օգտվելու կարգը
9. Փախստականը փաստաթուղթ ստանալու համար ներքին գործերի մարմին է ներկայացնում`
ա) դիմում` Հայաստանի Հանրապետությունից ժամանակավոր մեկնելու համար.
բ) փախստականի վկայականը.
գ) 35x54 մմ չափսի 2 լուսանկար (գունավոր).
դ) անդորրագիր` պետական տուրքը վճարելու մասին:
Փախստականի հետ ճամփորդող յուրաքանչյուր երեխայի համար անհրաժեշտ է ներկայացնել`
ա) ծննդյան վկայականը.
բ) 35x45 մմ չափսի 2 լուսանկար (գունավոր):
10. Փաստաթուղթը տրվում է դիմումն ստանալուց հետո մեկամսյա ժամկետում:
11. «Հայաստանի Հանրապետությունում օտարերկրյա քաղաքացիների իրավական վիճակի մասին» Հայաստանի Հանրապետության օրենքի 15 հոդվածով սահմանված դեպքերում փաստաթուղթ տալը կարող է մերժվել:
12. Փաստաթուղթը փոխանակվում է Հայաստանի Հանրապետության ներքին գործերի մարմինների կողմից:
13. Փաստաթուղթը կարող է փոխանակվել դրանում պարունակվող տեղեկությունները փոխվելու, գրառումներում անճշտություններ հայտնաբերվելու, օգտագործվելու համար ոչ պիտանի լինելու դեպքում:
14. Փախստականը փաստաթղթի փոխանակման համար ներկայացնում է փոխանակման ենթակա փաստաթուղթը, սահմանված ձևի դիմում, փախստականի վկայականը և երկու 35x45 մմ չափսի լուսանկար (գունավոր):
Փախստականը փաստաթղթում որևէ տեղեկություն փոխելու կամ գրառումներում անճշտություններ հայտնաբերելու պատճառով այն փոխանակելիս ներկայացնում է նաև փոփոխությունները կամ անճշտությունները հաստատող փաստաթուղթ:
15. Փախստականը պարտավոր է փաստաթուղթը կորցնելու դեպքում 10-օրյա ժամկետում հայտնել ներքին գործերի մարմնին, իսկ օտարերկրյա պետություններում` Հայաստանի Հանրապետության դիվանագիտական ներկայացուցչությանը կամ հյուպատոսական հիմնարկին:
16. Հայաստանի Հանրապետության քաղաքացիություն ձեռք բերելու կամ այլ պատճառով փախստականի կարգավիճակը կորցնելու դեպքում անձը փաստաթուղթը հանձնում է ներքին գործերի մարմնին, իսկ օտարերկրյա պետություններում` Հայաստանի Հանրապետության դիվանագիտական ներկայացուցչությանը կամ հյուպատոսական հիմնարկին:
17. Օտարերկրյա պետությունում մշտական բնակություն հաստատելու դեպքում անձը փաստաթուղթը հանձնում է Հայաստանի Հանրապետության դիվանագիտական ներկայացուցչությանը կամ հյուպատոսական հիմնարկին:
18. Մահացած փախստականի փաստաթուղթը փախստականի վկայականի հետ հանձնվում է մահվան գրանցումը կատարող մարմնին: Մահվան գրանցումը կատարելուց հետո փաստաթուղթն ուղարկվում է ներքին գործերի համապատասխան մարմնին:
i
19. Օտարերկրյա պետություններում մահացած փախստականի փաստաթուղթը հանձնվում է Հայաստանի Հանրապետության դիվանագիտական ներկայացուցչությանը կամ հյուպատոսական հիմնարկին, որն այն հանձնում է Հայաստանի Հանրապետության ներքին գործերի նախարարությանը: Վերջինս դրա մասին հայտնում է Հայաստանի Հանրապետության տարածքային կառավարման նախարարությանը:
(19-րդ կետը փոփ. 03.05.07 թիվ 573-Ն որոշում)
20. Գտնված փաստաթղթերը հանձնվում են ներքին գործերի մարմնին:
21. Կասկածյալների, մեղադրյալների, որոնց նկատմամբ որպես խափանման միջոց է ընտրվել չհեռանալու մասին ստորագրությունը կամ կալանքը, ինչպես նաև ազատազրկման դատապարտված փախստականների փաստաթղթերը վերցվում են հետաքննության` նախաքննության մարմինների կամ դատարանի կողմից:
Խափանման միջոցի վերացման դեպքում կասկածյալների և մեղադրյալների փաստաթղթերը վերադարձվում են տերերին:
Պատիժը կրելուց հետո փախստականին կարող է տրվել նոր փաստաթուղթ` սույն կարգով սահմանված ընդհանուր հիմունքներով:
Փաստաթուղթը վերցնելը (բացառությամբ սույն կետում նշված դեպքերի), այլ անձանց հանձնելը և գրավ դնելն արգելվում է:
i
22. Հայաստանի Հանրապետության ներքին գործերի մարմինները փախստականին փաստաթուղթ տալու մասին տեղեկությունները հայտնում են Հայաստանի Հանրապետության տարածքային կառավարման նախարարությանը:
(22-րդ կետը փոփ. 03.05.07 թիվ 573-Ն որոշում)
Հաստատված է
ՀՀ կառավարության 1999 թվական ի
նոյեմբերի 20-ի N 695 որոշմամբ
ՆԿԱՐԱԳԻՐ
i
Հայաստանի Հանրապետությունում փախստականի կարգավիճակ
ստացած անձանց ճամփորդական փաստաթղթի
Հայաստանի Հանրապետությունում փախստականի ճամփորդական փաստաթուղթը (այսուհետև` փաստաթուղթ) 88x125 մմ չափսի, 32 էջից բաղկացած` փախստականի անձը հաստատող փաստաթուղթ է:
Փաստաթղթի բովանդակությունը կազմող բոլոր կետերը տպագրվում են հայերեն, անգլերեն և ռուսերեն:
Փաստաթղթի շապիկը կապույտ գույնի է: Շապիկի երեսի վերևի ձախ անկյունը 45 աստիճան թեքությամբ երիզվում է միմյանցից 10 մմ հեռավորությամբ և 3 մմ հաստությամբ երկու գծով: Շապիկի երեսի վերևի մասում տպագրվում են «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» բառերը: Շապիկի կենտրոնում պատկերվում է Հայաստանի Հանրապետության զինանշանը: Շապիկի ներքևի մասում տպագրվում է «ՃԱՄՓՈՐԴԱԿԱՆ ՓԱՍՏԱԹՈՒՂԹ (1951 Թ. ՀՈՒԼԻՍԻ 28-Ի ԿՈՆՎԵՆՑԻԱ)» բառերը:
Փաստաթղթի շապիկի հաջորդ էջում գրվում է`
«ՍՈՒՅՆ ՓԱՍՏԱԹՈՒՂԹԸ ՏՐՎԱԾ Է ՆՐԱ ՏԻՐՈՋԸ ՃԱՄՓՈՐԴԱԿԱՆ ՓԱՍՏԱԹՈՒՂԹ ՇՆՈՐՀԵԼՈՒ ՆՊԱՏԱԿՈՎ, ՈՐԸ ԿԱՐՈՂ Է ԾԱՌԱՅԵԼ ԱԶԳԱՅԻՆ ԱՆՁՆԱԳՐԻ ՓՈԽԱՐԵՆ», «ՍՈՒՅՆ ՃԱՄՓՈՐԴԱԿԱՆ ՓԱՍՏԱԹՈՒՂԹԸ ԿՐՈՂԻՆ ԹՈՒՅԼԱՏՐՎՈՒՄ Է ՎԵՐԱԴԱՌՆԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ ՄԻՆՉԵՎ ՓԱՍՏԱԹՂԹԻ ՎԱՎԵՐԱԿԱՆՈՒԹՅԱՆ ԺԱՄԿԵՏԻ ԱՎԱՐՏԸ», «ԵԹԵ ՍՈՒՅՆ ՃԱՄՓՈՐԴԱԿԱՆ ՓԱՍՏԱԹՂԹԻ ՏԵՐԸ ՕՐԻՆԱԿԱՆ ԿԱՐԳՈՎ ԲՆԱԿՈՒԹՅՈՒՆ ՀԱՍՏԱՏԻ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆԻՑ ԴՈՒՐՍ` ԱՅԼ ԵՐԿՐՈՒՄ, ԵՎ ՑԱՆԿԱՆԱ ԱՅԴ ԵՐԿՐԻՑ ԿՐԿԻՆ ՃԱՄՓՈՐԴԵԼ, ԱՊԱ ՆԱ ՆՈՐ ՃԱՄՓՈՐԴԱԿԱՆ ՓԱՍՏԱԹՈՒՂԹ ՍՏԱՆԱԼՈՒ ՀԱՄԱՐ ՊԵՏՔ Է ԴԻՄԻ ՆՈՐ ԲՆԱԿՈՒԹՅԱՆ ԵՐԿՐԻ ԻՇԽԱՆՈՒԹՅՈՒՆՆԵՐԻՆ: ՆՈՐԸ ՇՆՈՐՀՈՂ ԵՐԿՐԻ ԻՇԽԱՆՈՒԹՅՈՒՆՆԵՐԸ ՊԵՏՔ Է ԵՏ ՎԵՐՑՆԵՆ ՍՈՒՅՆ ՓԱՍՏԱԹՈՒՂԹԸ ԵՎ ՎԵՐԱԴԱՐՁՆԵՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԻՇԽԱՆՈՒԹՅՈՒՆՆԵՐԻՆ»:
Փաստաթղթի 1-ին էջի վերևի մասում տպագրվում են «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» բառերը: Կենտրոնում պատկերվում է Հայաստանի Հանրապետության զինանշանը, իսկ ներքևում տպագրվում են «ՃԱՄՓՈՐԴԱԿԱՆ ՓԱՍՏԱԹՈՒՂԹ (1951 Թ. ՀՈՒԼԻՍԻ 28-Ի ԿՈՆՎԵՆՑԻԱ») բառերը:
Փաստաթղթի 2-րդ էջի ներքևի մասում տպագրվում են «ՓԱՍՏԱԹՂԹԻ ՏԻՐՈՋ ՍՏՈՐԱԳՐՈՒԹՅՈՒՆԸ» բառերը:
Փաստաթղթի 3-րդ էջի վերևի մասում տպագրվում են «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» բառերը, իսկ էջի ձախ մասից, ըստ հերթականության` «ՃԱՄՓՈՐԴԱԿԱՆ ՓԱՍՏԱԹՈՒՂԹ», «ՏԻՊ» , «ԿՈԴ», «ՓԱՍՏԱԹՈՒՂԹ N», «ԱԶԳԱՆՈՒՆԸ», «ԱՆՈՒՆԸ», «ԵՐԿԻՐԸ», «ԾՆՎԵԼ Է», «ՍԵՌԸ», «ԾՆՆԴԱՎԱՅՐԸ», «ՏՐՎԵԼ Է», «ՎԱՎԵՐԱԿԱՆ Է ՄԻՆՉԵՎ» և «ՈՒՄ ԿՈՂՄԻՑ» բառերը: Էջի ներքևի ձախ մասում տեղ է հատկացվում փաստաթուղթ ստացող փախստականի 35x45 մմ չափսի գունավոր լուսանկարի համար:
Փաստաթղթի 4-րդ էջում տպագրվում են «ՓԱՍՏԱԹՂԹԻ ՎԱՎԵՐԱԿԱՆՈՒԹՅԱՆ ԺԱՄԿԵՏԸ ԵՐԿԱՐԱՑՎԱԾ Է» բառերը:
Փաստաթղթի 5-րդ էջում տպագրվում են «ՍՈՒՅՆ ՓԱՍՏԱԹՈՒՂԹԸ ՎԱՎԵՐԱԿԱՆ Է ԲՈԼՈՐ ՕՏԱՐԵՐԿՐՅԱ ՊԵՏՈՒԹՅՈՒՆՆԵՐՈՒՄ» բառերը, և դրվում է Հայաստանի Հանրապետության զինանշանի պատկերով կլոր կնիք:
Փաստաթղթի 6-րդ և 7-րդ էջերի վերևի մասում տպագրվում է «ԵՐԵԽԱՆԵՐԸ», բառը: Նշված էջերից յուրաքանչյուրի վրա տեղ է հատկացվում երկու երեխայի 35x45 մմ չափսի գունավոր լուսանկարները փակցնելու և նրանց տվյալները լրացնելու համար, իսկ յուրաքանչյուր լուսանկարի համար հատկացված տեղից ներքև տպագրվում են «ԱԶԳԱՆՈՒՆԸ», «ԱՆՈՒՆԸ», «ԾՆՎԵԼ Է» և «ՍԵՌԸ» բառերը:
Փաստաթղթի 8-րդ և 9-րդ էջերի վերևի մասում տպագրվում է «ՆՇՈՒՄՆԵՐ» բառը:
Փաստաթղթի 10-32-րդ էջերի վերևի մասում տպագրվում է «ՎԻԶԱ» բառը:
Փաստաթղթի 8-32-րդ էջերի ներքևի մասում տպագրվում են «1951 Թ. ՀՈՒԼԻՍԻ 28-Ի ԿՈՆՎԵՆՑԻԱ» բառերը:
Փաստաթղթի 1-ին և 5-32-րդ էջերի ներքևի մասում տպագրվում են փաստաթղթի սերիան և համարը:
Փաստաթղթի շապիկի վերջին էջի ներսի կողմում տպագրվում են «ՍՈՒՅՆ ՃԱՄՓՈՐԴԱԿԱՆ ՓԱՍՏԱԹՂԹԻ ՏԵՐԸ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՍՏԱՑԵԼ Է ՓԱԽՍՏԱԿԱՆԻ ԿԱՐԳԱՎԻՃԱԿ ԵՎ ԱՊԱՍՏԱՆ», «ՍՈՒՅՆ ՃԱՄՓՈՐԴԱԿԱՆ ՓԱՍՏԱԹՈՒՂԹԸ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԵՓԱԿԱՆՈՒԹՅՈՒՆՆ Է» և «ՍՈՒՅՆ ՓԱՍՏԱԹՈՒՂԹԸ ԿԱԶՄՎԱԾ Է 32 ԷՋԻՑ, ՉՀԱՇՎԱԾ ՇԱՊԻԿԸ» բառերը:
Փաստաթղթի բոլոր էջերը համարակալված են:
(նկարագիրը խմբ. 28.08.00 թիվ 518 որոշում)