(ուժը կորցրել է 29.05.00 թիվ 293 որոշում)
i
041.0103.100300
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ
ՈՐՈՇՈՒՄ
10 մարտի 2000 թվականի N 103
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻՆ ԿԻՑ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏՆՏԵՍԱԿԱՆ ԵՎ ՍՈՑԻԱԼԱԿԱՆ ԶԱՐԳԱՑՄԱՆ ՀԱՄԱԿԱՐԳՄԱՆ ԽՈՐՀՈՒՐԴ ՍՏԵՂԾԵԼՈՒ ՄԱՍԻՆ
Հայաստանի Հանրապետության կառավարության և պետական կառավարման մարմինների գործունեության արդյունավետության բարձրացման, հանրապետության տնտեսական և սոցիալական զարգացման պետական ծրագրերի ձևավորման ընթացակարգերի և կառավարման մեխանիզմների կատարելագործման, համակարգման, հսկողության ապահովման, ինչպես նաև իրացման ընթացքում այդ ծրագրերում ժամանակին ճշգրտումներ կատարելու նպատակով`
1. Ստեղծել Հայաստանի Հանրապետության վարչապետին կից Հայաստանի Հանրապետության տնտեսական և սոցիալական զարգացման համակարգման խորհուրդ (այսուհետև` խորհուրդ) խորհրդակցական մարմնի կարգավիճակով, և հաստատել խորհրդի մշտական անդամների անհատական կազմը (կցվում է):
2. Խորհրդի աշխատանքային մարմինը նրա քարտուղարությունն է, որն ստեղծվում է Հայաստանի Հանրապետության կառավարության աշխատակազմում` որպես ինքնուրույն ստորաբաժանում:
Խորհրդի քարտուղարության ղեկավարումը դնել խորհրդի անդամ` Հայաստանի Հանրապետության կառավարությանն առընթեր պետական ռեզերվների վարչության պետ Է. Սիմոնյանցի վրա:
3. Սահմանել, որ`
ա) խորհուրդն իր գործունեությանն առնչվող հարցերի նախապատրաստման և համապատասխան առաջարկություններ ներկայացնելու նպատակով` ըստ Հայաստանի Հանրապետության տնտեսական և սոցիալական զարգացման ուղղությունների կարող է ստեղծել հանձնաժողովներ, որոնց անհատական կազմը հաստատում է Հայաստանի Հանրապետության վարչապետը.
բ) խորհրդի հիմնական խնդիրներն են`
հանձնաժողովների գործունեության հիմնական ուղղությունների որոշումը և աշխատանքային ծրագրերի հաստատումը.
հանձնաժողովների գործունեության արդյունքների ամփոփումը և դրանց ծրագրերի կատարման համալիր քննարկումը.
Հայաստանի Հանրապետության տնտեսական և սոցիալական զարգացման երկարաժամկետ, միջնաժամկետ ու կարճաժամկետ գերակայությունների որոշումը.
Հայաստանի Հանրապետության տնտեսական և սոցիալական զարգացման ծրագրերի (հայեցակարգերի, դոկտրինաների և այլն) մշակման ապահովումը.
Հայաստանի Հանրապետության տնտեսական և սոցիալական զարգացման իրավական ապահովման վերաբերյալ առաջարկությունների մշակումը.
խորհրդի որոշումների և ծրագրերի կատարման գործընթացի կազմակերպումը, հետադարձ կապի ապահովումը, դրանց ճշգրտումը, վերահսկողությունն ու համակարգումը.
գ) խորհրդի աշխատանքներին` խորհրդի նախագահի հրավերով կարող են մասնակցել գործադիր իշխանության մարմինների պաշտոնատար անձինք, Հայաստանի Հանրապետության Ազգային ժողովի պատգամավորներ, հասարակական, հասարակական-քաղաքական կազմակերպությունների ներկայացուցիչներ վերջիններիս համաձայնությամբ.
դ) խորհուրդն իրավունք ունի իր առջև դրված խնդիրների լուծման համար պետական կառավարման և տեղական ինքնակառավարման մարմիններից, ինչպես նաև այլ կազմակերպություններից ու պաշտոնատար անձանցից ստանալու անհրաժեշտ փաստաթղթեր, տեղեկատվություն և այլ նյութեր.
ե) խորհրդի որոշումները, ըստ անհրաժեշտության, կարող են ձևակերպվել Հայաստանի Հանրապետության կառավարության կամ Հայաստանի Հանրապետության վարչապետի որոշումներով:
4. Հայաստանի Հանրապետության վարչապետի գլխավոր խորհրդական-Հայաստանի Հանրապետության կառավարության աշխատակազմի ղեկավարին ու Հայաստանի Հանրապետության ֆինանսների և էկոնոմիկայի նախարարությանը` 10-օրյա ժամկետում Հայաստանի Հանրապետության կառավարություն ներկայացնել առաջարկություններ խորհրդի քարտուղարության աշխատողների թվի, պաշտոնային դրույքաչափերի և պատշաճ աշխատանքային պայմանների ապահովման վերաբերյալ:
Հաստատված է
ՀՀ վարչապետի 2000 թ.
մարտի 10-ի N 103 որոշմամբ
ԿԱԶՄ
Հայաստանի Հանրապետության վարչապետին կից Հայաստանի
Հանրապետության տնտեսական և սոցիալական զարգացման
համակարգման խորհրդի
Ա. Սարգսյան - ՀՀ վարչապետ (խորհրդի նախագահ)
Վ. Շիրխանյան - ՀՀ արտադրական ենթակառուցվածքների գործունեությունը
համակարգող նախարար
Շ. Կարամանուկյան - ՀՀ վարչապետի գլխավոր խորհրդական-ՀՀ կառավարության
աշխատակազմի ղեկավար
Լ. Բարխուդարյան - ՀՀ ֆինանսների և էկոնոմիկայի նախարար
Բ. Նազարյան - ՀՀ գլխավոր դատախազ
Է. Սիմոնյանց - ՀՀ կառավարությանն առընթեր պետական ռեզերվների
վարչության պետ (խորհրդի քարտուղարության ղեկավար)