ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՇԽԱՏԱՆՔԻ ԵՎ ՍՈՑԻԱԼԱԿԱՆ ՀԱՐՑԵՐԻ ՆԱԽԱՐԱՐ
ՀՐԱՄԱՆ
16 փետրվարի 2017 թվականի N 30-Ա/1
i
ՍՈՑԻԱԼԱԿԱՆ ԾԱՌԱՅՈՒԹՅՈՒՆՆԵՐ ՏՐԱՄԱԴՐԵԼՈՒ ԳՈՐԾՈՒՆԵՈՒԹՅԱՆ ՀԱՎԱՍՏԱԳՐՄԱՆ ԳՈՐԾԸՆԹԱՑԸ ԿԱԶՄԱԿԵՐՊԵԼՈՒ, ՀԱՎԱՍՏԱԳՐՄԱՆ ԵՎ ՀԱՎԱՍՏԱԳՐՈՒՄԸ ՄԵՐԺԵԼՈՒ ՄԱՍԻՆ ԵԶՐԱԿԱՑՈՒԹՅՈՒՆՆԵՐ ՏՐԱՄԱԴՐԵԼՈՒ ՆՊԱՏԱԿՈՎ ՀԱՎԱՍՏԱԳՐՄԱՆ ՀԱՆՁՆԱԺՈՂՈՎ ՍՏԵՂԾԵԼՈՒ, ՀԱՆՁՆԱԺՈՂՈՎԻ ԿԱԶՄԸ ԵՎ ԱՇԽԱՏԱԿԱՐԳԸ ՀԱՍՏԱՏԵԼՈՒ ՄԱՍԻՆ
i
Ղեկավարվելով Հայաստանի Հանրապետության կառավարության 2002 թվականի նոյեմբերի 14-ի N 1821-Ն որոշմամբ հաստատված Հայաստանի Հանրապետության աշխատանքի և սոցիալական հարցերի նախարարության կանոնադրության 12-րդ կետի «դ» ենթակետով և հիմք ընդունելով Հայաստանի Հանրապետության կառավարության 2015 թվականի հոկտեմբերի 10-ի N 1078-Ն որոշման 16-րդ կետը`
ՀՐԱՄԱՅՈՒՄ ԵՄ
1. Սոցիալական ծառայություններ տրամադրելու գործունեության հավաստագրման գործընթացը կազմակերպելու, հավաստագրման և հավաստագրումը մերժելու մասին եզրակացություններ տրամադրելու նպատակով ստեղծել հավաստագրման հանձնաժողով (այսուհետ` Հանձնաժողով).
2. Հաստատել Հանձնաժողովի կազմը` համաձայն N 1 հավելվածի.
3. Հաստատել Հանձնաժողովի աշխատակարգը` համաձայն N 2 հավելվածի.
4. Սույն հրամանի կատարման նկատմամբ վերահսկողությունը վերապահել նախարարության աշխատակազմի ղեկավար Ս. Գրիգորյանին:
Հավելված N 1
ՀՀ աշխատանքի և սոցիալական
հարցերի նախարարի
2017 թ. փետրվարի 16-ի
N 30-Ա/1 հրամանի
ԿԱԶՄ
ՍՈՑԻԱԼԱԿԱՆ ԾԱՌԱՅՈՒԹՅՈՒՆՆԵՐ ՏՐԱՄԱԴՐԵԼՈՒ ԳՈՐԾՈՒՆԵՈՒԹՅԱՆ ՀԱՎԱՍՏԱԳՐՄԱՆ ԳՈՐԾԸՆԹԱՑԸ ԿԱԶՄԱԿԵՐՊԵԼՈՒ, ՀԱՎԱՍՏԱԳՐՄԱՆ ԵՎ ՀԱՎԱՍՏԱԳՐՈՒՄԸ ՄԵՐԺԵԼՈՒ ՄԱՍԻՆ ԵԶՐԱԿԱՑՈՒԹՅՈՒՆՆԵՐ ՏՐԱՄԱԴՐԵԼՈՒ ՆՊԱՏԱԿՈՎ ՍՏԵՂԾՎԱԾ ՀԱՎԱՍՏԱԳՐՄԱՆ ՀԱՆՁՆԱԺՈՂՈՎԻ (ԱՅՍՈՒՀԵՏ` ՀԱՆՁՆԱԺՈՂՈՎ)
Ս. Հարությունյան - հանձնաժողովի նախագահ (ՀՀ աշխատանքի և սոցիալական
հարցերի նախարարի տեղակալ)
Հ. Մուրադյան - հանձնաժողովի անդամ (նախարարության աշխատակազմի
վերլուծության և մոնիթորինգի վարչության պետ)
Ա. Մինասյան - հանձնաժողովի անդամ (նախարարության աշխատակազմի
սոցիալական աջակցության վարչության պետ)
Գ. Գյունաշյան - հանձնաժողովի անդամ (նախարարության աշխատակազմի
ընտանիքի, կանանց և երեխաների հիմնահարցերի
վարչության պետ)
Ա. Պետրոսյան - հանձնաժողովի անդամ (նախարարության աշխատակազմի
իրավական ապահովման բաժնի պետ)
Ա. Գևորգյան - հանձնաժողովի անդամ (նախարարության աշխատակազմի
հաշմանդամների և տարեցների հիմնահարցերի վարչության
պետի տեղակալ-տարեցների հիմնահարցերի բաժնի պետ)
Կ. Խաչատրյան - հանձնաժողովի քարտուղար (նախարարության աշխատակազմի
ընտանիքի, կանանց և երեխաների հիմնահարցերի
վարչության երեխաների հիմնահարցերի բաժնի գլխավոր
մասնագետ)
Հավելված N 2
ՀՀ աշխատանքի և սոցիալական
հարցերի նախարարի
2017 թ. փետրվարի 16-ի
N 30-Ա/1 հրամանի
ԱՇԽԱՏԱԿԱՐԳ ՍՈՑԻԱԼԱԿԱՆ ԾԱՌԱՅՈՒԹՅՈՒՆՆԵՐ ՏՐԱՄԱԴՐԵԼՈՒ ԳՈՐԾՈՒՆԵՈՒԹՅԱՆ ՀԱՎԱՍՏԱԳՐՄԱՆ ԳՈՐԾԸՆԹԱՑԸ ԿԱԶՄԱԿԵՐՊԵԼՈՒ, ՀԱՎԱՍՏԱԳՐՄԱՆ ԵՎ ՀԱՎԱՍՏԱԳՐՈՒՄԸ ՄԵՐԺԵԼՈՒ ՄԱՍԻՆ ԵԶՐԱԿԱՑՈՒԹՅՈՒՆՆԵՐ ՏՐԱՄԱԴՐԵԼՈՒ ՆՊԱՏԱԿՈՎ ՍՏԵՂԾՎԱԾ ՀԱՎԱՍՏԱԳՐՄԱՆ ՀԱՆՁՆԱԺՈՂՈՎԻ (ԱՅՍՈՒՀԵՏ` ՀԱՆՁՆԱԺՈՂՈՎ)
I. Ընդհանուր դրույթներ
1. Հանձնաժողովն իր գործունեության ընթացքում ղեկավարվում է Հայաստանի Հանրապետության կառավարության 2015 թվականի հոկտեմբերի 10-ի N 1078-Ն որոշմամբ (այսուհետ` Որոշում) և սույն աշխատակարգով:
II. Հանձնաժողովի խնդիրներն ու գործառույթները
2. Հանձնաժողովի գործունեության խնդիրներն են`
1) սոցիալական ծառայություններ տրամադրելու գործունեության հավաստագրման գործընթացի ապահովումը.
2) հավաստագրման կամ հավաստագրումը մերժելու վերաբերյալ եզրակացությունների տրամադրումը:
3. Հանձնաժողովն իր առջև դրված խնդիրներին համապատասխան, իրականացնում է հետևյալ գործառույթները`
1) քննության է առնում սոցիալական ծառայություններ տրամադրելու գործունեության հավաստագրման նպատակով կազմակերպությունների` Որոշման հավելվածով հաստատված ձևին համապատասխան ներկայացրած հայտերը և դրանց կից ներկայացվող փաստաթղթերը, ինչպես նաև գրանցում ներառված տեղեկությունների փոփոխման վերաբերյալ լրացուցիչ ներկայացված փաստաթղթերը.
2) ընդունում և նախարարին է ներկայացնում սոցիալական ծառայություններ տրամադրելու գործունեության հավաստագրման (այդ թվում` վերապահումով հավաստագրման) կամ հավաստագրումը մերժելու մասին եզրակացություն.
3) անհրաժեշտության դեպքում, պահանջում է լրացուցիչ փաստաթղթեր և տեղեկատվություն,
4) անհրաժեշտության դեպքում, ներկայացված փաստաթղթերի հավաստիությունը ստուգելու նպատակով, հանձնաժողովը հայտը և փաստաթղթերը ստանալուց հետո, ոչ ուշ, քան երեք աշխատանքային օրվա ընթացքում այցելում է հավաստագրման ենթակա սոցիալական ծառայություն տրամադրելու գործունեության համար նախատեսված տարածքներ` տվյալ գործունեության համար Հայաստանի Հանրապետության օրենսդրությամբ սահմանված անհրաժեշտ պայմաններին տեղում ծանոթանալու նպատակով.
5) իրականացնում է որոշմամբ և սույն աշխատակարգով սահմանված այլ գործառույթներ:
III. Հանձնաժողովի գործունեության կազմակերպումը
4. Հանձնաժողովն իր գործունեությունը կազմակերպում է նիստերի միջոցով:
5. Հանձնաժողովի աշխատանքները ղեկավարում է հանձնաժողովի նախագահը:
Նախագահը հրավիրում և վարում է հանձնաժողովի նիստերը, ստորագրում է հանձնաժողովի ընդունած եզրակացությունները, հսկողություն է իրականացնում հանձնաժողովի ընդունած եզրակացությունները` Որոշմամբ սահմանված ժամկետում նախարարին տրամադրելու նկատմամբ, իրականացնում է Որոշմամբ և սույն աշխատակարգով նախատեսված այլ գործառույթներ:
6. Հանձնաժողովի նիստն իրավազոր է, եթե դրա աշխատանքներին (նիստին) մասնակցում է հանձնաժողովի անդամների առնվազն կեսը:
7. Հանձնաժողովի նիստում քվեարկություն իրականացվում և որոշումներն ընդունվում են Որոշմամբ հաստատված հավելվածի 18-րդ կետով սահմանված կարգով:
8. Հանձնաժողովը, սոցիալական ծառայություններ տրամադրելու գործունեության հավաստագրման (այդ թվում` վերապահումով հավաստագրման) կամ հավաստագրումը մերժելու մասին եզրակացությունը ընդունում և նախարարին է ներկայացնում Որոշմամբ հաստատված հավելվածի 21-րդ կետով սահմանված կարգով:
9. Հանձնաժողովը, սոցիալական ծառայություններ տրամադրելու գործունեությունը վերապահումով հավաստագրելու դեպքում, նախարարին գրավոր տեղեկացնում է` հայտատուի կողմից թերությունները վերացնելու պարտավորության մասին Որոշմամբ հաստատված հավելվածի 17-րդ կետի 5-րդ ենթակետով սահմանված կարգով և ժամկետներում:
10. Սույն աշխատակարգի 9-րդ կետում նշված դեպքում, հայտատուի կողմից թերությունները վերացնելու համար սահմանված ժամկետը լրանալուց հետո մեկ աշխատանքային օրվա ընթացքում Հանձնաժողովը պարտադիր այցելում է հավաստագրման ենթակա սոցիալական ծառայություն տրամադրելու գործունեության համար նախատեսված տարածքներ` հայտատուի կողմից թերությունների վերացման գործընթացին ու կատարված աշխատանքներին տեղում ծանոթանալու համար և կազմում է այցելության արձանագրություն:
11. Հանձնաժողովի կողմից, սույն աշխատակարգի 9-րդ կետում նշված` տեղեկատվությունը և 10-րդ կետով նախատեսված այցելության արձանագրությունը պահվում են հավաստագրված կազմակերպության անհատական գործում:
12. Հանձնաժողովը հավաստագրման եզրակացություն տրամադրում է այն կազմակերպությանը, որը
1) ներկայացրել է Որոշմամբ հաստատված ձևին համապատասխան հայտ և Որոշմամբ հաստատված հավելվածի 8-րդ կետով նախատեսված փաստաթղթերը.
2) ունի Որոշմամբ սահմանված հավաստագրման ենթակա յուրաքանչյուր սոցիալական ծառայության համար անհրաժեշտ` Հայաստանի Հանրապետության օրենսդրությամբ սահմանված պահանջները բավարարող.
ա) կոմունալ, սանիտարահիգիենիկ, ինչպես նաև խնամվողների, տարածքի և հակահրդեհային անվտանգության ապահովման անհրաժեշտ պայմաններ (բացառությամբ` տնային պայմաններում խնամքի ծառայության).
բ) տվյալ սոցիալական ծառայություն տրամադրելու համար համապատասխան տարածք (բացառությամբ` տնային պայմաններում խնամքի ծառայության).
գ) անձնակազմ (համապատասխան որակավորում ունեցող մասնագետներ).
3) երեխաներին խնամք տրամադրելու գործունեություն իրականացնելու դեպքում Որոշմամբ սահմանված պահանջներից բացի, տվյալ սոցիալական ծառայությունը տրամադրելու համար նախատեսված տարածքում ունի դասապատրաստման և խմբային աշխատանքների համար նախատեսված սենյակներ, երեխաների տարիքային խմբերի առանձնահատկություններին համապատասխանող անվտանգ և բարեկարգ խաղահրապարակներ և խաղասենյակներ, ինչպես նաև ապահովում է երեխայի խնամքի և դաստիարակության համար անհրաժեշտ նվազագույն չափորոշիչները.
4) որպես ժամանակավոր օթևան, կացարանով ապահովելու գործունեություն իրականացնելիս բացառապես երեխաների համար նախատեսված կացարան ունենալու դեպքում` Որոշմամբ սահմանված պայմաններից բացի, տվյալ կացարանում ապահովում է երեխայի խնամքի և դաստիարակության համար անհրաժեշտ նվազագույն չափորոշիչները:
5) չունի հարկային և օրենքով սահմանված այլ պարտադիր վճարների ժամկետանց պարտավորություններ.
6) հայտը ներկայացնելու օրվա դրությամբ առկա չէ հայտատուին սնանկ ճանաչելու մասին դատարանի օրինական ուժի մեջ մտած վճիռ և հայտատուն չունի չմարված (չներված) պարտավորություններ:
13. Հանձնաժողովի քարտուղարը վարում է հավաստագրերի գրանցամատյան` Որոշմամբ հաստատված հավելվածի 52-րդ կետի պահանջներին համապատասխան (ձևը կցվում է):
14. Հանձնաժողովը սոցիալական ծառայություններ տրամադրելու գործունեության հավաստագրումն իրականացնում կամ հավաստագրումը մերժում է Որոշմամբ սահմանված ձևին համապատասխան հավաստագրման հայտը և դրան կից ներկայացված բոլոր փաստաթղթերն ստանալուց հետո տասն աշխատանքային օրվա ընթացքում:
15. Սոցիալական ծառայություններ տրամադրելու գործունեության հավաստագրումը մերժվում է, եթե`
1) հայտը և (կամ) դրան կից ներկայացված փաստաթղթերը չեն համապատասխանում Հայաստանի Հանրապետության օրենքների և (կամ) իրավական այլ ակտերի պահանջներին.
2) հայտին կից ներկայացվել են կեղծ կամ թերի փաստաթղթեր կամ հայտում և (կամ) դրան կից ներկայացված փաստաթղթերում արտացոլված են կեղծ կամ խեղաթյուրված տեղեկություններ կամ հայտին կից չեն ներկայացվել Որոշմամբ հաստատված կարգով պահանջվող անհրաժեշտ բոլոր փաստաթղթերը.
3) հայտատուն ունի հարկային և օրենքով սահմանված այլ պարտադիր վճարների ժամկետանց պարտավորություն` օրենքով սահմանված նվազագույն ամսական աշխատավարձի հազարապատիկի և ավելի չափով.
4) հայտը ներկայացնելու օրվա դրությամբ առկա է հայտատուին սնանկ ճանաչելու մասին դատարանի օրինական ուժի մեջ մտած վճիռ և հայտատուն ունի չմարված (չներված) պարտավորություններ.
5) հայտատուն չի բավարարում տվյալ սոցիալական ծառայություն տրամադրելու գործունեության համար անհրաժեշտ` Հայաստանի Հանրապետության օրենսդրությամբ սահմանված պահանջները.
6) նախարարության հիմնավորված կարծիքով հայտատուի կողմից տվյալ սոցիալական ծառայությունների տրամադրումը կարող է վտանգել սոցիալական ծառայություններ ստացող անձանց առողջությունը, կյանքը կամ գույքը կամ սոցիալական ծառայություններ ստացող անձանց այլ իրավունքները կամ օրինական շահերը.
7) Հայաստանի Հանրապետության օրենքներով սահմանված այլ դեպքերում:
16. Նախարարը, հանձնաժողովի եզրակացության հիման վրա, այն ստանալուց հետո երեք աշխատանքային օրվա ընթացքում ընդունում է սոցիալական ծառայություններ տրամադրելու գործունեությունը հավաստագրելու, այդ թվում` վերապահումով, կամ հավաստագրումը մերժելու մասին անհատական իրավական ակտ, որը հայտատուին է հանձնվում Որոշմամբ հաստատված հավելվածի 26-րդ կետով սահմանված կարգով և ժամկետում:
17. Հավաստագիրը հայտատուին հանձնվում է սոցիալական ծառայություններ տրամադրելու գործունեությունը հավաստագրելու մասին նախարարի հրամանի ընդունումից հետո հինգ աշխատանքային օրվա ընթացքում` Որոշմամբ հաստատված հավելվածի 30-րդ կետով սահմանված կարգով, իսկ Որոշմամբ հաստատված հավելվածի 23-րդ կետով սահմանված` վերապահումով հավաստագրման դեպքում, հավաստագիրը տրվում է կազմակերպության կողմից առկա թերությունները վերացնելուց հետո հինգ աշխատանքային օրվա ընթացքում:
18. Սոցիալական ծառայություններ տրամադրելու գործունեության հավաստագրի ձևը սահմանված է նախարարի 2015 թվականի դեկտեմբերի 4-ի N 172-Ն հրամանով: Հավաստագիրը նախարարության կողմից տրվող, սահմանված ձևի և վավերապայմաններով փաստաթուղթ է, որը հավաստում է Որոշմամբ սահմանված մեկ կամ մի քանի սոցիալական ծառայություններ տրամադրելու գործունեությունը հավաստագրելու հանգամանքը:
19. Հավաստագիրը վավերացվում է նախարարի ստորագրությամբ և նախարարության` Հայաստանի Հանրապետության զինանշանի պատկերով կնիքով:
20. Հանձնաժողովի գործունեությունը դադարեցվում է օրենսդրությամբ սահմանված կարգով: