| ԻՐՏԵԿ |
Սույն ակտի ուժի մեջ մտնելու ամսաթիվը անհնար է որոշել, քանի որ ակտն ընդունող մարմնի կողմից չի կատարվել «Նորմատիվ իրավական ակտերի մասին» ՀՀ օրենքի 23-րդ հոդվածի 7-րդ մասի` ընդունող մարմնի պաշտոնական կայքէջում իրավական ակտի հրապարակման օրը նշելու պահանջը: |
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
4 հունիսի 2026 թվականի N 800-Լ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԻՑ ՋԵՐՄԱՏՆԱՅԻՆ ԱՐՏԱԴՐՈՒԹՅԱՆ ԹԱՐՄ ՊՏՈՒՂԲԱՆՋԱՐԵՂԵՆԻ ԵՎ ԾԱՂԻԿՆԵՐԻ ԱՐՏԱՀԱՆՄԱՆ ԱՋԱԿՑՈՒԹՅԱՆ ՄԻՋՈՑԱՌՈՒՄԸ ՀԱՍՏԱՏԵԼՈՒ ՄԱՍԻՆ
i
Ղեկավարվելով Հայաստանի Հանրապետության Սահմանադրության 146-րդ հոդվածի 2-րդ և 4-րդ մասերով, «Արդյունաբերական քաղաքականության մասին» օրենքի 4-րդ հոդվածի 1-ին մասի 3-րդ և 8-րդ կետերով, «Հայաստանի Հանրապետության 2026 թվականի պետական բյուջեի մասին» օրենքի 9-րդ հոդվածի 21-րդ մասով և հիմք ընդունելով Հայաստանի Հանրապետության կառավարության 2021 թվականի նոյեմբերի 18-ի N 1902-Ա որոշման N 1 հավելվածի «Էկոնոմիկայի նախարարություն» բաժնի 5.3-րդ կետը` Հայաստանի Հանրապետության կառավարությունը որոշում է.
1. Հաստատել Հայաստանի Հանրապետության տարածքից ջերմատնային արտադրության թարմ պտուղբանջարեղենի և ծաղիկների արտահանման աջակցության միջոցառումը` համաձայն հավելվածի:
2. Հայաստանի Հանրապետության էկոնոմիկայի նախարարին` սույն որոշումն ուժի մեջ մտնելուց հետո մեկամսյա ժամկետում Հայաստանի Հանրապետության վարչապետի աշխատակազմ ներկայացնել «Հայաստանի Հանրապետության 2026 թվականի պետական բյուջեի մասին» օրենքում վերաբաշխում և լրացում, Հայաստանի Հանրապետության կառավարության 2025 թվականի դեկտեմբերի 25-ի N 1910-Ն որոշման մեջ փոփոխություններ ու լրացումներ կատարելու և Հայաստանի Հանրապետության էկոնոմիկայի նախարարությանը գումար հատկացնելու մասին» Հայաստանի Հանրապետության կառավարության որոշման նախագիծ:
3. Սույն որոշումն ուժի մեջ է մտնում հրապարակմանը հաջորդող օրվանից և տարածվում է 2026 թվականի հունիսի 1-ից մինչև հուլիսի 1-ը ծագած հարաբերությունների վրա:
Հայաստանի Հանրապետության
փոխվարչապետ Մ. Գրիգորյան
2026 թ. հունիսի
Երևան
Հավելված
ՀՀ կառավարության
2026 թվականի հունիսի 4-ի
N 800-Լ որոշման
ՄԻՋՈՑԱՌՈՒՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԻՑ ՋԵՐՄԱՏՆԱՅԻՆ ԱՐՏԱԴՐՈՒԹՅԱՆ ԹԱՐՄ ՊՏՈՒՂԲԱՆՋԱՐԵՂԵՆԻ ԵՎ ԾԱՂԻԿՆԵՐԻ ԱՐՏԱՀԱՆՄԱՆ ԱՋԱԿՑՈՒԹՅԱՆ
1. Միջոցառման նպատակը Հայաստանի Հանրապետության տարածքից արտահանվող ջերմատնային արտադրության թարմ պտուղբանջարեղենի և ծաղիկների (այսուհետ` արտադրանք) մրցունակության բարձրացումն է` արտահանված արտադրանքի համար փոխհատուցում տրամադրելու միջոցով:
2. Սույն միջոցառման իմաստով տնտեսավարող սուբյեկտ են համարվում ՀՀ ռեզիդենտ համարվող իրավաբանական անձինք կամ անհատ ձեռնարկատերերը կամ ֆիզիկական անձինք, որոնք Հայաստանի Հանրապետության տարածքից 2026 թվականի հունիսի 1-ից մինչև հուլիսի 1-ը իրականացրել են արտադրանքի արտահանում:
3. Տնտեսավարող սուբյեկտների կողմից արտահանված արտադրանքի համար փոխհատուցումը տրամադրվում է հետևյալ չափերով`
1) ելակի յուրաքանչյուր 1 կիլոգրամի համար 770 ՀՀ դրամ.
2) լոլիկի յուրաքանչյուր 1 կիլոգրամի համար 275 ՀՀ դրամ.
3) պղպեղի յուրաքանչյուր 1 կիլոգրամի համար 400 ՀՀ դրամ.
4) ծաղիկի յուրաքանչյուր 1 հատի համար 37 ՀՀ դրամ:
4. Փոխհատուցման տրամադրման գործընթացը նախաձեռնում է տնտեսավարող սուբյեկտը, որը փոխհատուցում ստանալու նպատակով էլեկտրոնային կամ թղթային եղանակով, սույն միջոցառման N 1 ձևին համապատասխան դիմում (այսուհետ` դիմում) է ներկայացնում Էկոնոմիկայի նախարարություն (այսուհետ` նախարարություն), որին կցում է`
1) ապրանքի տարանցման հայտարարագիր կամ ապրանքների հայտարարագրի (հայտարարագրերի) պատճենը (պատճենները).
2) հաշվարկային փաստաթուղթ (հաշիվ ապրանքագիր):
5. Տնտեսավարող սուբյեկտը փոխհատուցման ստացման դիմումը ներկայացնում է 2026 թվականի հուլիսի 1-ից հետո:
6. Փոխհատուցման տրամադրման դիմումը ստանալուց հետո 7 աշխատանքային օրվա ընթացքում դիմումատուի և նախարարության միջև կնքվում է Հայաստանի Հանրապետության տարածքից ջերմատնային արտադրության թարմ պտուղբանջարեղենի և ծաղիկների արտահանման աջակցության միջոցառման շրջանակներում փոխհատուցում տրամադրելու մասին պայմանագիր:
7. Նախարարության համապատասխան ստորաբաժանումը դիմումը մուտքագրվելու օրվան հաջորդող 12 աշխատանքային օրվա ընթացքում իրականացնում է դիմումի ուսումնասիրություն և անհամապատասխանությունների բացակայության դեպքում կազմում է սույն միջոցառման N 2 ձևին համապատասխան եզրակացություն, որի հիման վրա նախարարության համապատասխան ստորաբաժանումը, համապատասխան ֆինանսական միջոցների առկայության դեպքում, 5 աշխատանքային օրվա ընթացքում փոխհատուցման գումարը փոխանցում է տնտեսավարող սուբյեկտին:
8. Նախարարության կողմից դիմումը մերժվում է, եթե`
1) դիմումին կից չեն ներկայացվել սույն միջոցառման 4-րդ կետում նշված փաստաթղթերը կամ դրանցում ներառված տեղեկատվությունը թերի է.
2) դիմումին կից ներկայացվել է 3-րդ կետում նշված ապրանքներից բացի նաև այլ ապրանք կամ դիմումով պահանջվում է միջոցառման գործողության ժամկետից դուրս արտահանված արտադրանքի համար աջակցություն.
3) նոր դիմումը ներկայացվել է սույն միջոցառման 10-րդ կետում նշված ժամկետի խախտմամբ:
9. Նախարարության կողմից դիմումի մերժման դեպքում արձանագրվում է (արձանագրվում են) մերժման հիմքը (հիմքերը) և դիմումատուին պատշաճ կարգով 5 աշխատանքային օրվա ընթացքում տեղեկացվում է այդ մասին:
10. Մերժումը ստանալու օրվանից 7 աշխատանքային օրվա ընթացքում տնտեսավարող սուբյեկտը կարող է վերացնել մերժման հիմքերը և ներկայացնել նոր դիմում:
Ձև N 1
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷԿՈՆՈՄԻԿԱՅԻ ՆԱԽԱՐԱՐՈՒԹՅՈՒՆ
__________________________________________________________________-ԻՑ
(նշել տնտեսավարող սուբյեկտի անվանումը, ՀՎՀՀ-ն, հեռախոսահամարը և
էլեկտրոնային փոստի հասցեն)
ԴԻՄՈՒՄ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԻՑ ԱՐՏԱՀԱՆՎԱԾ ՋԵՐՄԱՏՆԱՅԻՆ ԱՐՏԱԴՐՈՒԹՅԱՆ _________________________________ՀԱՄԱՐ
(նշել արտադրանքի անվանումը)
ՓՈԽՀԱՏՈՒՑՈՒՄ ՏՐԱՄԱԴՐԵԼՈՒ ՄԱՍԻՆ
Խնդրում եմ __________________________________________________-ի կողմից
(նշել տնտեսավարող սուբյեկտի անվանումը)
2026 թվականի հունիս ամսին Հայաստանի Հանրապետության տարածքից արտահանված արտադրանքի համար
փոխհատուցման ենթակա (__________________________________________) դրամը
(նշել գումարի չափը տառերով)
փոխանցել_________________________-ի________________________-ում գործող
(նշել տնտեսավարող (նշել բանկի անվանումը)
սուբյեկտի անվանումը)
N __________________________________ հաշվեհամարին:
Ստորագրող
__________________________ ___________________________
(պաշտոնը) (անունը, ազգանունը)
______________________
(ստորագրությունը)
____ _____________________ 20___թ.
Կ.Տ.
Ձև N 2
ԵԶՐԱԿԱՑՈՒԹՅՈՒՆ N __
_______________________________________________-Ի ԿՈՂՄԻՑ 2026 ԹՎԱԿԱՆԻ
(նշել տնտեսավարող սուբյեկտի անվանումը)
ՀՈՒՆԻՍ ԱՄՍԻՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԻՑ ԱՐՏԱՀԱՆՎԱԾ
ՋԵՐՄԱՏՆԱՅԻՆ ԱՐՏԱԴՐՈՒԹՅԱՆ _______________________________________ ՀԱՄԱՐ
(նշել արտադրանքի անվանումը)
ՓՈԽՀԱՏՈՒՑՈՒՄ ՏՐԱՄԱԴՐԵԼՈՒ ՄԱՍԻՆ
Էկոնոմիկայի նախարարություն ներկայացված 20__ թվականի
______________________________________________-ի
(նշել ամիսը և օրը)
N _____________________ դիմումի համաձայն___________________________-ի
(նշել մուտքի համարը) (նշել տնտեսավարող սուբյեկտի անվանումը)
(ՀՎՀՀ`______________) կողմից 2026 թվականի հունիս ամսին Հայաստանի Հանրապետության տարածքից արտահանված արտադրանքի համար փոխհատուցման չափը կազմում է _____________________ (___________________________________) դրամ
(նշել գումարի չափը թվերով) (նշել գումարի չափը տառերով)
և այդ չափով փոխհատուցումը ենթակա է վճարման_____________________________-ի
(նշել տնտեսավարող սուբյեկտի անվանումը) _______________________-ում գործող N_____________________հաշվեհամարին:
(նշել բանկի անվանումը) (նշել հաշվեհամարը)
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԷԿՈՆՈՄԻԿԱՅԻ ՆԱԽԱՐԱՐՈՒԹՅԱՆ
______________________ __________________ _________________________
(նշել ստորաբաժանման (ստորագրությունը) (ստորաբաժանման ղեկավարի
անվանումը) անունը, ազգանունը)
____ _______________ 20__ թ.