ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
18 հունիսի 2026 թվականի N 879-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2015 ԹՎԱԿԱՆԻ ՄԱՐՏԻ 10-Ի N 228-Ն ՈՐՈՇՄԱՆ ՄԵՋ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ
Հիմք ընդունելով «Առևտրի և ծառայությունների մասին» օրենքի 2.1-ին հոդվածը և «Նորմատիվ իրավական ակտերի մասին» օրենքի 33-րդ և 34-րդ հոդվածները` Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2015 թվականի մարտի 10-ի «Հայաստանի Հանրապետության տարածք ներմուծվող առանձին ապրանքների նպատակային նշանակությունը հաստատող և որոշ ապրանքների նկատմամբ մաքսատուրքի վճարման արտոնություններ տրամադրող Հայաստանի Հանրապետության լիազոր պետական կառավարման մարմիններ սահմանելու և Հայաստանի Հանրապետության տարածք ներմուծվող առանձին ապրանքների նպատակային նշանակությունը հաստատող եզրակացության տրամադրման կարգը հաստատելու մասին» N 228-Ն որոշման (այսուհետ` որոշում) մեջ կատարել հետևյալ լրացումները և փոփոխությունները.
1) որոշումը լրացնել հետևյալ բովանդակությամբ նոր` 4.1-ին կետով.
«4.1. Մաքսային ոլորտի լիազոր մարմինը մինչև հաջորդող ամսվա 15-ը նպատակային նշանակությունը հաստատող եզրակացությունը տրամադրած լիազոր մարմին է ներկայացնում հաշվետու տարվա ընթացքում ամսական պարբերականությամբ` յուրաքանչյուր ամսվա համար նպատակային նշանակությունը հաստատող եզրակացության կիրառմամբ Հայաստանի Հանրապետության տարածք «Բացթողում` ներքին սպառման համար» մաքսային ընթացակարգով ձևակերպված ապրանքների բնաիրային ծավալների մասին տեղեկություն` նշելով կազմակերպության անվանումը, ՀՎՀՀ-ն, եզրակացության համարը, տալու ամսաթիվը, ապրանքների հայտարարագրի գրանցման համարը, ամսաթիվը, փաստացի հայտարարագրված ծավալը, ապրանքի ԵԱՏՄ ԱՏԳ ԱԱ-ի ծածկագիրը և նկարագիրը:».
2) որոշման N 2 հավելվածը լրացնել հետևյալ բովանդակությամբ նոր` 1.1-ին կետով.
«1.1. Եվրասիական տնտեսական հանձնաժողովի որոշումներից բխող Հայաստանի Հանրապետության կառավարության որոշումներով և իրավական այլ ակտերով սահմանված քանակական սահմանափակումների (քվոտա) դեպքում, եթե Հայաստանի Հանրապետության կառավարության որոշումներով սահմանված քանակական սահմանափակումների (քվոտա) կիրառման նպատակով այլ ընթացակարգեր նախատեսված չեն.
1) նպատակային նշանակության եզրակացություն տրամադրվում է ներմուծվող կոնկրետ խմբաքանակի համար և տվյալ տարվա համար տվյալ ապրանքի մասով սահմանված քվոտայի շրջանակներում.
2) քվոտայի բաշխումն իրականացվում է ըստ հայտերի ներկայացման ժամանակագրական սկզբունքի հերթականության` մինչև քվոտայի սահմանված ծավալի սպառումը.
3) միաժամանակյա ներկայացված հայտերի պարագայում` սույն կետի 1-ին և 2-րդ ենթակետով բաշխումն իրականացնելուց հետո համապատասխան ժամանակահատվածում առկա քվոտայի մնացորդը հայտատուների միջև բաշխվում է համամասնորեն` ներկայացված հայտերով պահանջվող ծավալներին համապատասխան:».
3) որոշման N 2 հավելվածի 3-րդ կետի 2-րդ ենթակետը շարադրել նոր խմբագրությամբ`
«2) ներմուծվող ապրանքի հաշիվ-ապրանքագրի պատճենը և առկայության պարագայում` օտարերկրյա գործընկերոջ հետ կնքված ներմուծման պայմանագրի պատճենը.».
4) որոշման N 2 հավելվածի 5-րդ կետում «, ինչպես նաև անհաղթահարելի ուժի առկայության դեպքում» բառերը փոխարինել «և անհաղթահարելի ուժի առկայության դեպքում, ինչպես նաև` մինչև սույն կարգի 4-րդ կետով սահմանված էլեկտրոնային համակարգի գործարկումը» բառերով.
5) որոշման N 2 հավելվածի 8-րդ կետը շարադրել նոր խմբագրությամբ`
«8. Եզրակացություն ստանալու մասին հայտը մերժվում է հայտը լիազոր մարմնում պաշտոնական մուտքագրելուց հետո 2 աշխատանքային օրվա ընթացքում,
1) եթե հայտը և կից ներկայացվող փաստաթղթերի կազմն ամբողջական չեն կամ թերի են լրացված, և հայտը ու դրան կից ներկայացվող փաստաթղթերը թերի լինելու մասին տեղեկացում ստանալու պահից, մինչև 1 աշխատանքային օրվա ընթացքում հայտատուն չի վերացնում կից փաստաթղթերում առկա թերությունները կամ չի ներկայացնում համալրված փաստաթղթերը.
2) սույն որոշման 1.1-ին կետով սահմանված դեպքերում, նաև տվյալ տարվա համար սահմանված քվոտայի սպառված լինելու պարագայում:».
6) որոշման N 2 հավելվածի N 1 ձևում «Խնդրում եմ տալ եզրակացություն Հայաստանի Հանրապետության տարածք ներմուծվող մի շարք ապրանքների նպատակային նշանակությունը հաստատելու վերաբերյալ:» բառերից առաջ լրացնել հետևյալ բովանդակությամբ նոր տողով.
«Վերամշակող կամ ապրանքն օգտագործող կազմակերպության անվանումը, գտնվելու վայրը, պետական գրանցման համարը (որոշման 2-րդ հավելվածի 1.1-ին կետով սահմանված նպատակային նշանակության փաստաթղթի դեպքում)
______________________________________________________________________
«.
7) որոշման N 2 հավելվածի N 2 ձևում «Օտարերկրյա գործընկերոջ հետ կնքված պայմանագրի կամ հաշիվ-ապրանքագրի համարը և ամսաթիվը» բառերից առաջ լրացնել հետևյալ բովանդակությամբ նոր տողով.
«Վերամշակող կամ ապրանքն օգտագործող կազմակերպության անվանումը, գտնվելու վայրը, պետական գրանցման համարը (որոշման 2-րդ հավելվածի 1.1-ին կետով սահմանված նպատակային նշանակության փաստաթղթի դեպքում)
______________________________________________________________________
«.
8) Հայաստանի Հանրապետության կառավարության 2015 թվականի մարտի 10-ի N 228-Ն որոշման N 2 հավելվածի N 1 ձևում «Դիմումին կից ներկայացնում եմ օտարերկրյա գործընկերոջ հետ կնքված պայմանագիրը կամ ապրանքի ներմուծման հաշիվ-ապրանքագիր» բառերը փոխարինել «Հայտին կից ներկայացնում եմ որոշման N 2 հավելվածի 3-րդ կետի 2-4-րդ ենթակետերով պահանջվող փաստաթղթերը:»:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
Հայաստանի Հանրապետության
վարչապետ Ն. Փաշինյան
2026 թ. հունիսի 18
Երևան
Պաշտոնական հրապարակման օրը` 19 հունիսի 2026 թվական: