ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
29 հոկտեմբերի 2026 թվականի N 1570-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2023 ԹՎԱԿԱՆԻ ԱՊՐԻԼԻ 21-Ի N 595-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԵՎ ԼՐԱՑՈՒՄ ԿԱՏԱՐԵԼՈՒ ՄԱՍԻՆ
Հիմք ընդունելով «Նորմատիվ իրավական ակտերի մասին» օրենքի 33-րդ և 34-րդ հոդվածները` Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2023 թվականի ապրիլի 21-ի «Պետական գույքի անհատույց օգտագործման տրամադրման կարգը և պայմանները սահմանելու մասին» N 595-Ն որոշման (այսուհետ` որոշում) մեջ կատարել հետևյալ փոփոխությունն ու լրացումը`
1) որոշման N 1 հավելվածի 17-րդ կետը շարադրել հետևյալ խմբագրությամբ`
«17. Գույքն անհատույց օգտագործման տրամադրման գործընթացի մեկնարկի համար անհրաժեշտ ելակետային տվյալներն են.
1) անհատույց օգտագործողի վերաբերյալ տեղեկատվությունը, այդ թվում` իրավաբանական անձի դեպքում` իրավաբանական անձի անվանումը, պետական գրանցման համարը, հարկ վճարողի հաշվառման համարը (ՀՎՀՀ) և գտնվելու վայրի հասցեն, ֆիզիկական անձի դեպքում` անունը, ազգանունը, անձնագրի կամ նույնականացման քարտի համարը կամ հանրային ծառայությունների համարանիշը, ինչպես նաև հաշվառման վայրի հասցեն, անհատ ձեռնարկատիրոջ դեպքում` անունը, ազգանունը, պետական հաշվառման համարը և հաշվառման վայրի հասցեն.
2) անհատույց օգտագործման տրամադրվող գույքի վերաբերյալ տեղեկատվությունը (հասցեն, մակերեսը).
3) անհատույց օգտագործման տրամադրման ժամկետի վերաբերյալ տեղեկատվությունը.
4) սույն կարգի 3-րդ կետի 1-5-րդ ենթակետերով նշված սուբյեկտների դեպքում` անհատույց օգտագործման իրավունքով տրամադրվող գույքի շուկայական արժեքին մոտարկված կադաստրային արժեքի կամ գնահատված շուկայական արժեքի վերաբերյալ տեղեկատվությունը, իսկ նշված արժեքների բացակայության դեպքում` սկզբնական արժեքի վերաբերյալ տեղեկատվությունը.
5) սույն կարգի 3-րդ կետի 6-րդ ենթակետով նշված սուբյեկտների դեպքում` (բացառությամբ 50 տոկոս և ավելի պետական մասնակցությամբ առևտրային կազմակերպությունների) անհատույց օգտագործման իրավունքով տրամադրվող գույքի գնահատված շուկայական արժեքի վերաբերյալ տեղեկատվությունը` ըստ գնահատման վերաբերյալ հաշվետվության.
6) անհրաժեշտության դեպքում` օրենսդրությամբ կամ սույն կարգով նախատեսված այլ տեղեկատվություն:».
2) որոշման N 1 հավելվածը լրացնել հետևյալ բովանդակությամբ նոր` 17.1-ին կետով`
«17.1. Գույքն անհատույց օգտագործման տրամադրման մասին Հայաստանի Հանրապետության կառավարության որոշման նախագիծը պետք է պարունակի առնվազն հետևյալ տեղեկատվությունը`
1) անհատույց օգտագործման տրամադրվող գույքի գտնվելու վայրը (հասցեն).
2) անհատույց օգտագործման տրամադրման ժամկետը.
3) անհատույց օգտագործման տրամադրման ձևը.
4) անհատույց օգտագործողի անունը կամ անվանումը:»:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
Հայաստանի Հանրապետության
վարչապետ Ն. Փաշինյան
2026 թ. հոկտեմբերի 29
Երևան
Պաշտոնական հրապարակման օրը` 30 հոկտեմբերի 2026 թվական: