ԱՂՔԱՏՈՒԹՅԱՆ ՀԱՂԹԱՀԱՐՄԱՆ ՌԱԶՄԱՎԱՐԱԿԱՆ ԾՐԱԳՐԻ ԻՐԱԿԱՆ ...

(ուժը կորցրել է 04.08.09 թիվ 657-Ն որոշում)

041.0043.250105

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

ՈՐՈՇՈՒՄ

25 հունվարի 2005 թվականի N 43-Ն

ԱՂՔԱՏՈՒԹՅԱՆ ՀԱՂԹԱՀԱՐՄԱՆ ՌԱԶՄԱՎԱՐԱԿԱՆ ԾՐԱԳՐԻ ԻՐԱԿԱՆԱՑՄԱՆ ԱՇԽԱՏԱՆՔՆԵՐԻ ՀԱՄԱԿԱՐԳՄԱՆ ԽՈՐՀՈՒՐԴ ՍՏԵՂԾԵԼՈՒ, ԴՐԱ ԿԱԶՄԸ ԵՎ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարության 2003 թվականի օգոստոսի 8-ի N 994-Ն որոշմամբ հաստատված` Աղքատության հաղթահարման ռազմավարական ծրագրի և 2004 թվականի հոկտեմբերի 30-ին ստորագրված Աղքատության հաղթահարման ռազմավարական ծրագրի գործընկերային համաձայնագրի իրականացման աշխատանքներն արդյունավետ կազմակերպելու նպատակով`

1. Ստեղծել Աղքատության հաղթահարման ռազմավարական ծրագրի իրականացման աշխատանքների համակարգման խորհուրդ և հաստատել դրա կազմը` համաձայն N 1 հավելվածի:

(1-ին կետը փոփ. 28.12.07 թիվ 915-Ն որոշում)

2. Հաստատել Աղքատության հաղթահարման ռազմավարական ծրագրի իրականացման աշխատանքների համակարգման խորհրդի կանոնակարգը` համաձայն N 2 հավելվածի:

(վերնագիրը փոփ. 28.12.07 թիվ 915-Ն որոշում)

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2005 ԹՎԱԿԱՆԻ ՀՈՒՆՎԱՐԻ 25-ԻՆ

Հավելված N 1

ՀՀ վարչապետի

2005 թվականի հունվարի 25-ի

N 43-Ն որոշման

ԿԱԶՄ

ԱՂՔԱՏՈՒԹՅԱՆ ՀԱՂԹԱՀԱՐՄԱՆ ՌԱԶՄԱՎԱՐԱԿԱՆ ԾՐԱԳՐԻ ԻՐԱԿԱՆԱՑՄԱՆ ԱՇԽԱՏԱՆՔՆԵՐԻ ՀԱՄԱԿԱՐԳՄԱՆ ԽՈՐՀՐԴԻ

Խորհրդի նախագահ  - ՀՀ վարչապետ

Խորհրդի նախագահի - ՀՀ ֆինանսների և էկոնոմիկայի նախարար

տեղակալ

Խորհրդի անդամներ - ՀՀ աշխատանքի և սոցիալական հարցերի նախարար

- ՀՀ կենտրոնական բանկի նախագահ (համաձայնությամբ)

- ՀՀ Ազգային ժողովի երկու ներկայացուցիչ

(համաձայնությամբ)

- ՀՀ գիտությունների ազգային ակադեմիայի նախագահի

տեղակալ (համաձայնությամբ)

- Հայաստանի արդյունաբերողների և գործարարների

(գործատուների) միության նախագահ (համաձայնությամբ)

- Հայաստանի արհեստակցական միությունների

կոնֆեդերացիայի նախագահ (համաձայնությամբ)

- Վանաձորի քաղաքապետ, Հայաստանի համայնքների

հանրապետական ասոցիացիայի վարչության անդամ

(համաձայնությամբ)

- Գյուղի հարցերի հասարակական կազմակերպությունների

խմբի ներկայացուցիչ, Ֆերմերների ազգային միության

նախագահ (համաձայնությամբ)

- Հատուկ կարիքներով խմբերի պաշտպանության հարցերի

հասարակական կազմակերպությունների խմբի

ներկայացուցիչ, «Աստղիկ» հաշմանդամ երեխաների

ծնողների միություն» հասարակական կազմակերպության

նախագահ (համաձայնությամբ)

- Մարդու իրավունքների հարցերի հասարակական

կազմակերպությունների խմբի ներկայացուցիչ, Հայաստանի

երիտասարդական ազգային խորհրդի փոխնախագահ

(համաձայնությամբ)

- Փոքր և միջին գործարարության հարցերի հասարակական

կազմակերպությունների խմբի ներկայացուցիչ, Կիրառական

հետազոտությունների և ագրոբիզնեսի հիմնադրամի

տնօրեն (համաձայնությամբ)

- Բնապահպանական հարցերի հասարակական

կազմակերպությունների խմբի ներկայացուցիչ, «Հանուն

կայուն մարդկային զարգացման ասոցիացիա» հասարակական

կազմակերպության նախագահ (համաձայնությամբ)

- Հայ Առաքելական եկեղեցու ներկայացուցիչ

(համաձայնությամբ)

(կազմը փոփ. 11.06.05 թիվ 426-Ն, 03.05.06 թիվ 295-Ն, 28.12.07 թիվ 915-Ն, 14.01.08 թիվ 5-Ա որոշումներ)

Հավելված N 2

ՀՀ վարչապետի

2005 թվականի հունվարի 25-ի

N 43-Ն որոշման

ԿԱՆՈՆԱԿԱՐԳ ԱՂՔԱՏՈՒԹՅԱՆ ՀԱՂԹԱՀԱՐՄԱՆ ՌԱԶՄԱՎԱՐԱԿԱՆ ԾՐԱԳՐԻ ԻՐԱԿԱՆԱՑՄԱՆ ԱՇԽԱՏԱՆՔՆԵՐԻ ՀԱՄԱԿԱՐԳՄԱՆ ԽՈՐՀՐԴԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կանոնակարգով սահմանվում է Աղքատության հաղթահարման ռազմավարական ծրագրի իրականացման աշխատանքների համակարգման խորհրդի (այսուհետ` խորհուրդ) գործունեության կարգը:

2. Խորհրդի հիմնական նպատակը Հայաստանի Հանրապետության կառավարության 2003 թվականի օգոստոսի 8-ի N 994-Ն որոշմամբ հաստատված` Աղքատության հաղթահարման ռազմավարական ծրագրի (այսուհետ` ծրագիր) և 2004 թվականի հոկտեմբերի 30-ին գործընկերների միջև կնքված ծրագրի իրականացման գործընկերության համաձայնագրի (այսուհետ` համաձայնագիր) իրականացման աշխատանքների արդյունավետ կազմակերպումն ու համակարգումն է:

II. ԽՈՐՀՐԴԻ ԳՈՐԾՈՒՆԵՈՒԹՅԱՆ ՈԼՈՐՏԸ

3. Խորհրդի խնդիրներն են`

ա) ծրագրի և համաձայնագրի դրույթների իրականացումը, ինչպես նաև դրանց մոնիտորինգի և գնահատման աշխատանքների համակարգումը.

բ) ծրագրի իրականացման տարեկան հաշվետվությունների մշակման աշխատանքների համակարգումը.

գ) ծրագրի ճշգրտման և վերանայման աշխատանքների համակարգումը և Հայաստանի Հանրապետության կառավարություն համապատասխան առաջարկություններ ներկայացնելը.

դ) համաձայնագրով սահմանված միջնաժամկետ գերակայություններից բխող քաղաքականության ուղղությունների մշակման աշխատանքների համակարգումը.

ե) ծրագրի իրականացման տարեկան և միջնաժամկետ միջոցառումների ծրագրերի մշակման համակարգումը.

զ) ծրագրի աշխատանքային խմբի և ծրագրի բաց ֆորումի գործունեության ղեկավարումը,

է) ծրագրի իրականացման գործընթացում միջազգային համագործակցության համակարգումը:

III. ԽՈՐՀՐԴԻ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ

4. Խորհուրդն իր աշխատանքները կազմակերպում է նիստերի միջոցով, որոնք գումարվում են առնվազն 3 ամիսը մեկ անգամ, ինչպես նաև արտահերթ նիստերի միջոցով` սույն կանոնակարգի 5-րդ կետին համապատասխան:

5. Խորհուրդն իր արտահերթ նիստերը գումարում է ծրագրի և համաձայնագրի իրականացման աշխատանքների ընթացքում առաջացած հարցերն ու խնդիրները լուծելու համար` խորհրդի նախագահի նախաձեռնությամբ կամ խորհրդի անդամների առնվազն 1/3-ի առաջարկությամբ:

6. Խորհրդի նիստն իրավազոր է, եթե դրան մասնակցում է խորհրդի անդամների կեսից ավելին:

7. Խորհրդի նիստը վարում է խորհրդի նախագահը, իսկ նախագահի բացակայության դեպքում` խորհրդի նախագահի տեղակալը: Խորհրդի որոշումներն ընդունվում են ձայների պարզ մեծամասնությամբ: Ձայների հավասարության դեպքում նիստը վարողի ձայնը վճռորոշ է:

8. Խորհրդի նիստի օրակարգը կազմվում և տրամադրվում է խորհրդի անդամներին` նիստից առնվազն 2 օր առաջ:

9. Հարցի քննարկման ընթացքում լրացուցիչ նյութեր կամ տեղեկատվություն պահանջվելու դեպքում հարցի քննարկումը կարող է տեղափոխվել խորհրդի հաջորդ նիստ:

10. Խորհրդի նիստերն անցկացվում են խորհրդի նախագահի մոտ, եթե խորհրդի նախագահը նիստի կայացման տեղի վերաբերյալ այլ որոշում չի ընդունում:

11. Յուրաքանչյուր նիստ սկսվում է նիստի օրակարգի հաստատմամբ և նախորդ նիստում ընդունված որոշումների կատարման ընթացքի մասին տեղեկատվությամբ:

12. Խորհրդի որոշումներն ստորագրում է խորհրդի նախագահը կամ նրա հանձնարարությամբ` խորհրդի նախագահի տեղակալը:

13. Խորհրդի աշխատանքներին խորհրդակցական ձայնի իրավունքով կարող են մասնակցել ծրագրի աշխատանքային խմբի ղեկավարը, ծրագրի բաց ֆորումի պատասխանատուն և դոնոր կազմակերպությունների ներկայացուցիչները:

14. Խորհրդի նիստերին խորհրդակցական ձայնի իրավունքով կարող են մասնակցել հրավիրված պետական պաշտոնյաներ, փորձագետներ և զանգվածային լրատվության միջոցների ներկայացուցիչներ:

15. Անհրաժեշտության դեպքում խորհրդի նիստերին կարող են հրավիրվել օրակարգի հարցերին առնչվող համապատասխան կազմակերպությունների ներկայացուցիչներ:

IV. ԽՈՐՀՐԴԻ ՆԱԽԱԳԱՀԸ

16. Խորհրդի նախագահն ապահովում է խորհրդի աշխատանքների կազմակերպումը և ներկայացնում է խորհուրդը Հայաստանի Հանրապետության կառավարությունում կամ այլ կազմակերպություններում:

V. ԽՈՐՀՐԴԻ ԱՆԴԱՄՆԵՐԸ

17. Խորհրդի այն անդամը, որը համաձայն չէ խորհրդի ընդունած որոշմանը, ներկայացնում է իր գրավոր կարծիքը, որը կցվում է որոշմանը:

18. Խորհրդի անդամը պաշտոնից ազատվելու պահից կորցնում է խորհրդին անդամակցությունը և նրա փոխարեն խորհրդին անդամակցում է նույն պաշտոնն ստանձնած անձը` բացառությամբ հասարակական կազմակերպությունների խմբերի ներկայացուցիչների:

Խորհրդի անդամ հանդիսացող հասարակական կազմակերպությունների խմբի ներկայացուցիչը փոփոխվում է համապատասխան հասարակական կազմակերպությունների խմբի առաջարկությամբ:

(18-րդ կետը փոփ. 11.06.05 թիվ 426-Ն որոշում)

VI. ԽՈՐՀՐԴԻ ՔԱՐՏՈՒՂԱՐՈՒԹՅՈՒՆԸ

19. Խորհրդի քարտուղարություն է համարվում Հայաստանի Հանրապետության ֆինանսների և էկոնոմիկայի նախարարության աշխատակազմի համապատասխան ստորաբաժանումը:

20. Խորհրդի քարտուղարությունը`

ա) նախապատրաստում է նիստի օրակարգին վերաբերող համապատասխան նյութերն ու կազմակերպում նյութերի տրամադրումը խորհրդի անդամներին.

բ) ապահովում է խորհրդի նիստի որոշման նախագծերի կազմումը.

գ) հետևում է խորհրդի որոշումների կատարմանը և խորհրդի նիստում զեկուցում դրանց կատարման ընթացքի մասին.

դ) վարում է խորհրդի աշխատանքների հետ կապված գործավարությունը.

ե) գրանցում է խորհրդի անդամների ներկայացրած գրավոր հատուկ կարծիքները.

զ) կազմակերպում է խորհրդի որոշումների համարակալումը և որոշումների պատճենները տրամադրում խորհրդի անդամներին.

է) խորհրդի որոշումներն ուղարկում է համապատասխան կազմակերպություններ: