040.0456.100800
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«10» օգոստոսի 2000 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
10 օգոստոսի 2000 թվականի N 456
i
ԿԵՆԴԱՆԻՆԵՐԻ ԴԱԲԱՂ ՀԻՎԱՆԴՈՒԹՅԱՆ ՏԱՐԱԾՈՒՄԸ ԿԱՆԽԵԼՈՒ ԱՆՀԵՏԱՁԳԵԼԻ ՄԻՋՈՑԱՌՈՒՄՆԵՐԻ ՄԱՍԻՆ
«Անասնաբուժության մասին» Հայաստանի Հանրապետության օրենքի 14 հոդվածին համապատասխան և ելնելով Հայաստանի Հանրապետության Շիրակի մարզում ստեղծված ծանր իրավիճակից` Հայաստանի Հանրապետության կառավարությունը որոշում է.
1. Կենդանիների դաբաղ հիվանդության տարածումը կանխելու նպատակով Հայաստանի Հանրապետության Շիրակի մարզում սահմանել կարանտին, իսկ սահմանակից մարզերի տարածքներում (30 կմ շառավղով)` կանխարգելիչ կարանտին:
2. Հայաստանի Հանրապետության գյուղատնտեսության նախարարությանը և Հայաստանի Հանրապետության Շիրակի մարզպետին`
ա) միջոցներ ձեռնարկել դաբաղի օջախները վերացնելու և դրա տարածումը կանխելու համար.
բ) կարանտինային բնակավայրեր տանող և դուրս բերող ճանապարհներին, ինչպես նաև մայրուղիներին կազմակերպել շուրջօրյա կարանտինային պահակակետեր` դրանք կահավորելով համապատասխան ցուցանակներով (ճանապարհային նշաններ), արգելափակոցով, ախտահանիչ ավազանով, հերթապահության համար նախատեսված տնակով` այն ապահովելով էլեկտրաէներգիայով, հեռախոսային կապով և անհրաժեշտ պարագաներով.
գ) կտրականապես արգելել գյուղատնտեսական կենդանիների, այդ թվում` թռչունների, կենդանական ծագում ունեցող գյուղատնտեսական մթերքի և հումքի, ինչպես նաև նշված տարածքներից անասնակերերի դուրսբերումը.
դ) միջոցներ ձեռնարկել կարանտինային տարածքներում և բնակավայրերում ստացված ամբողջ կաթը տեղում հալած յուղի վերամշակելու համար.
ե) բնակչության շրջանում կազմակերպել անձնական հիգիենայի պահպանման, դաբաղի վնասի և այդ հիվանդության դեմ պայքարի մասին բացատրական աշխատանք:
3. Հայաստանի Հանրապետության գյուղատնտեսության նախարարությանը` սահմանված կարգով ձեռք բերել համապատասխան հակադաբաղային պատվաստանյութեր և անապահով մարզերում կազմակերպել գյուղատնտեսական կենդանիների պատվաստումները:
4. Հայաստանի Հանրապետության Արագածոտնի և Լոռու մարզպետներին` կանխարգելիչ կարանտինային գոտում գտնվող բնակավայրերում առկա անասունների նկատմամբ ուժեղացնել համակողմանի հսկողությունը և ձեռնարկել անհրաժեշտ միջոցներ` մյուս բնակավայրեր դաբաղի մուտքը կանխելու համար:
5. Առաջարկել Հայաստանի Հանրապետության Արագածոտնի, Շիրակի և Լոռու մարզերի համայնքների ղեկավարներին անցկացնել իրենց բնակավայրերում գտնվող անասունների գլխաքանակի հաշվառում և անասնաբույժներին համակողմանի օգնություն ցույց տալ հակադաբաղային միջոցառումների իրականացման գործում:
6. Հայաստանի Հանրապետության ներքին գործերի նախարարությանը` կարանտինային պահակակետերում շուրջօրյա հերթապահություն ապահովելու համար առանձնացնել ներքին գործերի նախարարության անհրաժեշտ թվով աշխատողների:
7. Հայաստանի Հանրապետության ֆինանսների և էկոնոմիկայի նախարարությանը` 5-օրյա ժամկետում Հայաստանի Հանրապետության գյուղատնտեսության նախարարության հետ համատեղ Հայաստանի Հանրապետության կառավարություն ներկայացնել առաջարկություն դաբաղի դեմ պայքարի հակահամաճարակային միջոցառումների իրականացման հետ կապված լրացուցիչ ծախսերի և դրանց ֆինանսավորման աղբյուրների վերաբերյալ:
8. Հայաստանի Հանրապետության գյուղատնտեսության նախարարությանը և Հայաստանի Հանրապետության մարզպետներին` 2000 թվականի հոկտեմբերի 16-ին Հայաստանի Հանրապետության կառավարություն ներկայացնել տեղեկատվություն կենդանիների դաբաղ հիվանդության վերացման համար իրականացված միջոցառումների և կանխարգելման աշխատանքների արդյունքների մասին:
9. Սույն որոշումն ուժի մեջ է մտնում 2000 թվականի օգոստոսի 10-ից: