Սեղմել Esc փակելու համար:
{20.05.2017 - } ՔՎՈՏԱՅԻ ՊԱՀԱՆՋԻ ՉԿԱՏԱ...
Քարտային տվյալներ

Տեսակ
Չի գործում
Ընդունող մարմին
Ընդունման ամսաթիվ
Համար

Ստորագրման ամսաթիվ
ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo
 

{20.05.2017 - } ՔՎՈՏԱՅԻ ՊԱՀԱՆՋԻ ՉԿԱՏԱՐՄԱՆ ԴԵՊՔՈՒՄ ԿԱԶՄԱԿԵՐՊՈՒԹՅԱՆ ...

25.08.2018 -ին ուժը կորցրած ակտի տվյալ խմբագրությունը գործել է   20.05.2017  -ից մինչեւ     -ը:     անցնել վերջին խմբագրությանը
 

 

i

040.1308.241114

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

 

19 նոյեմբերի 2014 թվականի N 1308-Ն

 

i

ՔՎՈՏԱՅԻ ՊԱՀԱՆՋԻ ՉԿԱՏԱՐՄԱՆ ԴԵՊՔՈՒՄ ԿԱԶՄԱԿԵՐՊՈՒԹՅԱՆ ԿՈՂՄԻՑ ՄԱՍՀԱՆՄԱՆ ԿԱՏԱՐՄԱՆ ԵՎ ԴՐԱ ՕԳՏԱԳՈՐԾՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

 

Հիմք ընդունելով «Զբաղվածության մասին» Հայաստանի Հանրապետության օրենքի 20-րդ հոդվածի 7-րդ, 10-րդ ու 11-րդ մասերը և ղեկավարվելով «Հայաստանի Հանրապետության բյուջետային համակարգի մասին» Հայաստանի Հանրապետության օրենքի 15-րդ հոդվածի 9-րդ մասով` Հայաստանի Հանրապետության կառավարությունը որոշում է.

1. Հաստատել քվոտայի պահանջի չկատարման դեպքում կազմակերպության կողմից մասհանման կատարման և դրա օգտագործման կարգը` համաձայն հավելվածի:

2. Թույլատրել Հայաստանի Հանրապետության աշխատանքի և սոցիալական հարցերի նախարարությանը Հայաստանի Հանրապետության ֆինանսների նախարարության աշխատակազմի գանձապետական ստորաբաժանումում մինչև 2020 թվականի դեկտեմբերի 30-ը օգտագործման ժամկետով բացել արտաբյուջետային միջոցների հաշիվ` «Զբաղվածության մասին» Հայաստանի Հանրապետության օրենքով (այսուհետ` օրենք) սահմանված աշխատատեղերի պարտադիր ապահովման նորմատիվի (այսուհետ` քվոտա) պահանջի չկատարման դեպքում կազմակերպության կողմից մասհանվող գումարների փոխանցումներն ապահովելու նպատակով:

3. Հայաստանի Հանրապետության աշխատանքի և սոցիալական հարցերի նախարարին`

i

1) 2017 թվականին` մասհանումների կատարման` օրենքով սահմանված ժամկետը լրանալուց հետո մեկամսյա ժամկետում` տվյալ տարվա և հաջորդող տարվա մասհանումներից հավաքագրվող արտաբյուջետային միջոցների եկամուտների և ծախսերի նախահաշիվները ներկայացնել Հայաստանի Հանրապետության կառավարություն.

2) սկսած 2018 թվականից` յուրաքանչյուր տարի մասհանումների կատարման` օրենքով սահմանված ժամկետը լրանալուց հետո մեկամսյա ժամկետում` հաջորդող տարվա մասհանումներից հավաքագրվող արտաբյուջետային միջոցների եկամուտների և ծախսերի նախահաշիվը ներկայացնել Հայաստանի Հանրապետության կառավարություն.

3) սույն որոշման 2-րդ կետով նախատեսված արտաբյուջետային միջոցների հաշիվը բացվելուց հետո եռօրյա ժամկետում ապահովել Հայաստանի Հանրապետության աշխատանքի և սոցիալական հարցերի նախարարության անվամբ բացված արտաբյուջետային միջոցների հաշվի համարի տեղադրումը Հայաստանի Հանրապետության աշխատանքի և սոցիալական հարցերի նախարարության պաշտոնական կայքէջում:

(3-րդ կետը փոփ. 24.12.15 թիվ 1530-Ն որոշում)

4. Սույն որոշումն ուժի մեջ է մտնում 2015 թվականի հունվարի 1-ից:

 

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2014 ԹՎԱԿԱՆԻ ՆՈՅԵՄԲԵՐԻ 24-ԻՆ

 

Հավելված

ՀՀ կառավարության

2014 թվականի նոյեմբերի 19-ի

N 1308-Ն որոշման

 

ԿԱՐԳ

ՔՎՈՏԱՅԻ ՊԱՀԱՆՋԻ ՉԿԱՏԱՐՄԱՆ ԴԵՊՔՈՒՄ ԿԱԶՄԱԿԵՐՊՈՒԹՅԱՆ ԿՈՂՄԻՑ ՄԱՍՀԱՆՄԱՆ ԿԱՏԱՐՄԱՆ ԵՎ ԴՐԱ ՕԳՏԱԳՈՐԾՄԱՆ

 

I. ԸՆԴՀԱՆՈՒՐ ԴՐՈՒՅԹՆԵՐ

 

1. Սույն կարգով կարգավորվում են հաշմանդամություն ունեցող և տարիքային կենսաթոշակի իրավունք տվող` տարիքը չլրացած անձանց (այսուհետ` հաշմանդամություն ունեցող անձ) աշխատանքի տեղավորման համար քվոտայի պահանջի չկատարման դեպքում կազմակերպության կողմից մասհանման կատարման և դրա` որպես նպատակային միջոցի օգտագործման հետ կապված հարաբերությունները:

 

II. ԿԱԶՄԱԿԵՐՊՈՒԹՅԱՆ ԿՈՂՄԻՑ ՄԱՍՀԱՆՄԱՆ ԿԱՏԱՐՈՒՄԸ

 

i

2. Տվյալ հարկային տարվան հաջորդող հարկային տարում (հունվարի 1-ից դեկտեմբերի 31-ը ներառյալ) պետական կառավարչական հիմնարկների և համայնքային կառավարչական հիմնարկների, Հայաստանի Հանրապետության կենտրոնական բանկի, պետական ոչ առևտրային և համայնքային ոչ առևտրային կազմակերպությունների համար քվոտայի պահանջն առաջանում է կազմակերպության աշխատողների միջին տարեկան քանակի երեք տոկոսի չափով, եթե տվյալ հարկային տարում կազմակերպության աշխատողների միջին տարեկան քանակը 100 և ավելի է:

(2-րդ կետը փոփ. 24.12.15 թիվ 1530-Ն որոշում)

i

2.1. Տվյալ հարկային տարվան հաջորդող հարկային տարում (հունվարի 1-ից դեկտեմբերի 31-ը ներառյալ) ոչ պետական կազմակերպությունների համար, բացառությամբ համայնքային կառավարչական հիմնարկների և համայնքային ոչ առևտրային կազմակերպությունների, քվոտայի պահանջն առաջանում է կազմակերպության աշխատողների միջին տարեկան քանակի մեկ տոկոսի չափով, եթե տվյալ հարկային տարում կազմակերպության աշխատողների միջին տարեկան քանակը 100 և ավելի է:

(2.1-ին կետը լրաց. 24.12.15 թիվ 1530-Ն որոշում)

3. Կազմակերպությունների աշխատողների միջին տարեկան թվաքանակը որոշվում է, տվյալ հարկային տարում յուրաքանչյուր ամսվա վերջին օրվա դրությամբ, կազմակերպության աշխատողների թվաքանակների հանրագումարը հարաբերելով 12-ի, իսկ տվյալ տարում նոր ստեղծված կազմակերպությունների աշխատողների միջին տարեկան թվաքանակը` ստեղծման օրվանից մինչև դեկտեմբերի 31-ը ընկած ժամանակահատվածում, յուրաքանչյուր ամսվա վերջին օրվա դրությամբ, կազմակերպության աշխատողների թվաքանակների հանրագումարը հարաբերելով կազմակերպության ստեղծման օրվանից մինչև դեկտեմբերի 31-ը ընկած ժամանակահատվածի ամիսների թվի վրա:

i

4. Եթե կազմակերպությունն ստեղծվել է տվյալ տարվա դեկտեմբեր ամսին, ապա աշխատողների միջին տարեկան թվաքանակ է համարվում տվյալ հարկային տարվա դեկտեմբերի 31-ի դրությամբ կազմակերպությունում առկա աշխատողների թվաքանակը:

(4-րդ կետը փոփ. 24.12.15 թիվ 1530-Ն որոշում)

i

4.1. Կազմակերպությունների աշխատողների միջին տարեկան քանակի նկատմամբ սույն կարգի 2-րդ և 2.1-ին մասերով սահմանված տոկոսների կիրառման արդյունքում տասնորդական կոտորակային թիվ ստացվելու դեպքում այն կլորացվում է մինչև միավորները, ընդ որում, տասնորդական կոտորակի ստորակետից հետո հինգից ցածր թվանշանի դեպքում հավասարեցվում է իրենից ցածր բնական թվին, իսկ տասնորդական կոտորակի ստորակետից հետո հինգ և բարձր թվանշանի դեպքում` իրենից վերև ընկած բնական թվին:

(4.1-ին կետը լրաց. 24.12.15 թիվ 1530-Ն որոշում)

5. Համաձայն սույն կարգի` աշխատող է համարվում Հայաստանի Հանրապետության աշխատանքային օրենսգրքի 17-րդ հոդվածով սահմանված անձը:

i

5.1. Հայաստանի Հանրապետության աշխատանքի և սոցիալական հարցերի նախարարությունը սույն կարգի 2-րդ և 2.1-ին կետերում նշված կազմակերպությունների կողմից հարկային մարմին ներկայացված աշխատողների անձնավորված հաշվառման վերաբերյալ տեղեկատվության ուսումնասիրության արդյունքներով, սույն կետում նշված ժամկետներում նախարարության www.mlsa.am կայքէջում տեղակայում է և դրանից հետո ամսական պարբերականությամբ (մինչև տվյալ ամսվան հաջորդող ամսվա 25-ը) վերանայում ու ըստ անհրաժեշտության թարմացնում է հետևյալ տեղեկատվությունը`

1) մինչև 2016 թվականի փետրվարի 25-ը սույն կարգի 2-րդ կետում նշված կազմակերպությունների համար տվյալ հարկային տարում քվոտավորման ենթակա աշխատատեղերի, ինչպես նաև տվյալ պահի դրությամբ քվոտայի պահանջը չկատարած աշխատատեղերի քանակներն` ըստ կազմակերպությունների.

2) մինչև 2017 թվականի փետրվարի 25-ը սույն կարգի 2.1-ին կետում նշված կազմակերպությունների համար տվյալ հարկային տարում քվոտավորման ենթակա աշխատատեղերի, ինչպես նաև տվյալ պահի դրությամբ քվոտայի պահանջը չկատարած աշխատատեղերի քանակներն` ըստ կազմակերպությունների:

(5.1-ին կետը լրաց. 24.12.15 թիվ 1530-Ն որոշում)

5.2. Սույն կարգի 2-րդ և 2.1-ին կետերում նշված կազմակերպությունների կողմից գրավոր դիմում ներկայացվելու դեպքում Հայաստանի Հանրապետության աշխատանքի և սոցիալական հարցերի նախարարությունը հինգ աշխատանքային օրվա ընթացքում տալիս է լրացուցիչ տեղեկատվություն և խորհրդատվություն տվյալ կազմակերպությունում քվոտավորման պահանջի և (կամ) մասհանման կատարման ապահովման վերաբերյալ:

(5.2-րդ կետը լրաց. 24.12.15 թիվ 1530-Ն որոշում)

5.3. Հարկային մարմինը մասհանումներ չկատարելու դեպքում սույն կարգի 2-րդ և 2.1-ին կետերում նշված կազմակերպություններին օրենքով սահմանված վարչական պատասխանատվության ենթարկելիս հիմք է ընդունում սույն կարգի 5.1-ին կետում նշված և Հայաստանի Հանրապետության աշխատանքի և սոցիալական հարցերի նախարարության www.mlsa.am կայքէջում տեղակայված համապատասխան տեղեկատվությունը:

(5.3-րդ կետը լրաց. 24.12.15 թիվ 1530-Ն որոշում)

6. Քվոտայի պահանջի չկատարման դեպքում կազմակերպությունը կատարում է մասհանում` մինչև քվոտայի պահանջն առաջանալու տարվան հաջորդող տարվա հունվարի 30-ը:

i

7. Մասհանումը կատարվում է քվոտավորման ենթակա և քվոտայի պահանջը չկատարած յուրաքանչյուր աշխատատեղի համար` «Նվազագույն ամսական աշխատավարձի մասին» Հայաստանի Հանրապետության օրենքի 3-րդ հոդվածով սահմանված նվազագույն աշխատավարձի երեքհարյուրապատիկի չափով:

(7-րդ կետը փոփ. 24.12.15 թիվ 1530-Ն որոշում)

8. Մասհանվող գումարները փոխանցվում են Հայաստանի Հանրապետության կառավարության որոշմամբ Հայաստանի Հանրապետության աշխատանքի և սոցիալական հարցերի նախարարության անվամբ բացված արտաբյուջետային միջոցների հաշվին (հաշվի համարը տեղակայվում է Հայաստանի Հանրապետության աշխատանքի և սոցիալական հարցերի նախարարության www.mlsa.am կայքէջում):

 

III. ՄԱՍՀԱՆՎՈՂ ԳՈՒՄԱՐՆԵՐԻ ՕԳՏԱԳՈՐԾՈՒՄԸ

 

9. Մասհանումները նպատակային միջոցներ են և օգտագործվում են հետևյալ ուղղություններով ու համամասնություններով`

1) հաշմանդամություն ունեցող անձանց աշխատանքի տեղավորում, աշխատանքային և մասնագիտական վերականգնում, որոնց հատկացվում է մասհանումներով ձևավորված նպատակային միջոցների 60 տոկոսը.

2) հաշմանդամություն ունեցող անձանց առողջական (բժշկական), սոցիալական վերականգնում, որին հատկացվում է մասհանումներով ձևավորված նպատակային միջոցների 40 տոկոսը:

10. Սույն կարգի 9-րդ կետի 1-ին ենթակետով նախատեսված ուղղության համար մասհանումներից առանձնացված միջոցները ներառվում են զբաղվածության կարգավորման ամենամյա պետական ծրագրում և Հայաստանի Հանրապետության կառավարության 2014 թվականի ապրիլի 17-ի N 534-Ն որոշման 1-ին կետի 8-րդ, 11-րդ և 15-րդ ենթակետերով հաստատված կարգերին համապատասխան` ուղղվում են զբաղվածության պետական կարգավորման ստորև նշված ծրագրերին`

1) աշխատատեղի հարմարեցմանն աջակցություն.

2) անհրաժեշտ աշխատանքային ունակություններ և կարողություններ ձեռք բերելու համար միանվագ փոխհատուցում.

3) մասնագիտական ուսուցում.

4) աշխատավարձի մասնակի փոխհատուցում:

11. Սույն կարգի 9-րդ կետի 2-րդ ենթակետով նախատեսված ուղղության համար մասհանումներից ձևավորված նպատակային միջոցների 40 տոկոսը ծախսվում է «Հայաստանի Հանրապետությունում հաշմանդամների սոցիալական պաշտպանության մասին» Հայաստանի Հանրապետության օրենքի 7.1-ին հոդվածով նախատեսված վերականգնողական օգնության տրամադրման շրջանակներում` հաշմանդամություն ունեցող անձանց վերականգնողական անհատական ծրագրերի իրականացման նպատակով:

12. Հաշմանդամություն ունեցող անձը սույն կարգի 9-րդ կետի 2-րդ ենթակետով նախատեսված ուղղություններով աջակցություն կարող է ստանալ մեկ անգամ, որի չափը չի կարող գերազանցել 150000 դրամը:

13. Հայաստանի Հանրապետության աշխատանքի և սոցիալական հարցերի նախարարության աշխատակազմի Հայաստանի Հանրապետության բժշկասոցիալական փորձաքննության գործակալությունը, հաշվի առնելով սույն կարգի 15-րդ կետով սահմանված առաջնահերթությունները և սույն կարգի 8-րդ կետով նախատեսված արտաբյուջետային միջոցների հաշվում առկա ֆինանսական միջոցների չափը, սույն կարգի 12-րդ կետով նախատեսված աջակցության առավելագույն չափը, ինչպես նաև հիմք ընդունելով հաշմանդամություն ունեցող անձանց վերականգնողական անհատական ծրագիրը` առողջական (բժշկական) և (կամ) սոցիալական վերականգնման նպատակով այդ անձանց ուղեգրում է «Հայաստանի Հանրապետությունում հաշմանդամների սոցիալական պաշտպանության մասին» Հայաստանի Հանրապետության օրենքի 11.1-ին հոդվածով սահմանված` վերականգնողական օգնություն տրամադրող կազմակերպություններ:

14. Սույն կարգի 9-րդ կետի 2-րդ ենթակետով նախատեսված ուղղություններով աջակցության տրամադրման շրջանակներում` յուրաքանչյուր տարվա համար հաշմանդամություն ունեցող անձանց առողջական (բժշկական) և (կամ) սոցիալական վերականգնման տեսակը սահմանում է Հայաստանի Հանրապետության աշխատանքի և սոցիալական հարցերի նախարարը:

15. Սույն կարգի 9-րդ կետի 2-րդ ենթակետով նախատեսված ուղղություններով միջոցների օգտագործման շրջանակներում առաջնահերթությունը տրվում է 1-ին կամ 2-րդ խմբի հաշմանդամություն ունեցող անձին, նշված պայմանի հավասարության դեպքում` 16-30 տարիքային խմբում գտնվող` հաշմանդամություն ունեցող անձին, այդ պայմանի հավասարության դեպքում` հաշմանդամություն ունեցող այն անձին, որի ընտանիքն ստանում է ընտանեկան նպաստ, իսկ այդ պայմանի հավասարության դեպքում` ավելի վաղ հաշմանդամության 1-ին կամ 2-րդ խումբ ստացած անձին:

16. Մասհանումների գումարների օգտագործման մոնիթորինգն ու գնահատումն իրականացվում են Հայաստանի Հանրապետության կառավարության սահմանած կարգով:

 

 

pin
ՀՀ կառավարություն
19.11.2014
N 1308-Ն
Որոշում