(ուժը կորցրել է 30.12.04 թիվ 1881-Ն որոշում)
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
25 մայիսի 1995 թ. թիվ 284
i
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՐԽԻՎԱՅԻՆ ԳՈՐԾԻ ԵՎ ԳՈՐԾԱՎԱՐՈՒԹՅԱՆ ԿԱԶՄԱԿԵՐՊՄԱՆ ՊԵՏԱԿԱՆ ՀՍԿՈՂՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Ի կատարումն Հայաստանի Հանրապետության Գերագույն խորհրդի 1992 թվականի դեկտեմբերի 14-ի «Հայաստանի ազգային արխիվային ֆոնդի մասին» Հայաստանի Հանրապետության օրենքի կիրարկման կարգի մասին» որոշման, Հայաստանի Հանրապետության կառավարությունը որոշում է.
Հաստատել Հայաստանի Հանրապետությունում արխիվային գործի և գործավարության կազմակերպման պետական հսկողության կարգը (կցվում է):
ՀԱՍՏԱՏՎԱԾ Է
ՀՀ կառավարության 1995 թ.
մայիսի 25-ի թիվ 284 որոշմամբ
Կ Ա Ր Գ
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՐԽԻՎԱՅԻՆ ԳՈՐԾԻ ԵՎ ԳՈՐԾԱՎԱՐՈՒԹՅԱՆ ԿԱԶՄԱԿԵՐՊՄԱՆ ՊԵՏԱԿԱՆ ՀՍԿՈՂՈՒԹՅԱՆ
1. Հայաստանի Հանրապետությունում արխիվային գործի և գործավարության կազմակերպման պետական հսկողությունն իրականացնում է Հայաստանի Հանրապետության կառավարությանն առընթեր արխիվային գործի վարչությունը (այսուհետև` վարչություն)` «Հայաստանի ազգային արխիվային ֆոնդի մասին» Հայաստանի Հանրապետության օրենքին, վարչության կանոնադրությանը, օրենսդրական այլ ակտերի և սույն կարգին համապատասխան:
2. Հայաստանի Հանրապետությունում արխիվային գործի և գործավարության կազմակերպման պետական հսկողության ենթակա են պետական արխիվների համալրման աղբյուր հանդիսացող նախարարությունները, պետական վարչությունները, գերատեսչությունները, ձեռնարկությունները, հիմնարկները և կազմակերպությունները (այսուհետև` համալրման աղբյուր-հիմնարկներ):
3. Հայաստանի Հանրապետությունում արխիվային գործի և գործավարության կազմակերպման պետական հսկողության նպատակն է`
ա) համալրման աղբյուր-հիմնարկների հետ համատեղ գերատեսչական արխիվների, փորձագիտական հանձնաժողովների աշխատանքների և գործավարությունում փաստաթղթերի կազմակերպման կատարելագործումը.
բ) Հայաստանի ազգային արխիվային ֆոնդի փաստաթղթերի` ըստ ֆոնդերի վիճակագրական հաշվառումը (այդ թվում առանձնապես արժեքավոր փաստաթղթերի ապահովագրական ֆոնդի պատճենների) և գերատեսչական արխիվների վիճակագրական հաշվետվության ապահովումը.
գ) կազմակերպական-կարգադրական փաստաթղթերի միասնական համակարգի. դրանց պետական ստանդարտների, գործավարության պետական միասնական համակարգի ներդրումը, զարգացումը և կատարելագործումը.
դ) համալրման աղբյուր-հիմնարկների գերատեսչական արխիվների, փորձագիտական հանձնաժողովների և գործավարությունում փաստաթղթերի կազմակերպման աշխատանքների առաջավոր փորձի ուսումնասիրումը, ամփոփումն ու տարածումը.
ե) գերատեսչական արխիվների և գործավարական ծառայությունների աշխատողների, փորձագիտական հանձնաժողովների նախագահների և անդամների որակավորման բարձրացման ուղղությամբ միջոցառումների կազմակերպումը.
զ) գերատեսչական արխիվներում փաստաթղթերի պահպանման ապահովման, կարգավորման, օգտագործման, չափորոշիչ-մեթոդական ձեռնարկների մշակման և առանձնապես արժեքավոր փաստաթղթերի պատճենների ապահովագրական ֆոնդի ստեղծման գործում պայմանագրային հիմունքներով օգնության կազմակերպումը:
4. Հայաստանի Հանրապետությունում արխիվային գործի և գործավարության կազմակերպման պետական հսկողությունն իրականացնում է վարչությունը` համալիր, թեմատիկ և վերահսկողական ուսումնասիրությունների միջոցով:
5. Համալիր ուսումնասիրությունն անցկացվում է համալրման աղբյուր-հիմնարկներում` ոչ պակաս, քան հինգ տարին մեկ անգամ:
6. Թեմատիկ ուսումնասիրությունն անցկացվում է համալրման աղբյուր-հիմնարկներում` ընտրովի կարգով, տարին մեկ անգամ:
7. Համալիր և թեմատիկ ուսումնասիրությունների արդյունքներով համալրման համապատասխան աղբյուր-հիմնարկում անցկացվում է վերահսկողական ուսումնասիրություն:
8. Վարչությունն իրավասու է համալրման աղբյուր-հիմնարկներում ուսումնասիրության նպատակով ծանոթանալու արխիվային գործ, գործավարության կազմակերպման, գերատեսչական արխիվների պահպանության դրվածքին, փաստաթղթերի օգտագործման կարգին և ձևավորման որակին, գործերի կազմավորման ճշտությանն ու նշված խնդիրներին առնչվող բոլոր անհրաժեշտ փաստաթղթերին:
9. Համալրման աղբյուր-հիմնարկներն ստեղծում են անհրաժեշտ աշխատանքային պայմաններ իրենց մոտ ուսումնասիրություն կատարող վարչության հանձնաժողովների համար:
10. Բոլոր տեսակի ուսումնասիրություններն իրականացվում են վարչության ղեկավարության կամ համապատասխան պետարխիվի տնօրենի կողմից հաստատված ծրագրով, որտեղ նշվում են ուսումնասիրությունների խնդիրները և հիմնական հարցերը, ուսումնասիրությունների անցկացման հաջորդայնությունն ու ժամկետները:
11. Վարչության կողմից համալրման աղբյուր-հիմնարկի ղեկավարությանը նախապես տեղյակ է պահվում ուսումնասիրությունների անցկացման նպատակների, ժամկետների, ինչպես նաև այդ նպատակով սահմանված կարգով ստեղծված հանձնաժողովի կազմի (որի մեջ ընդգրկվում են նաև ուսումնասիրության ենթակա համալրման աղբյուր-հիմնարկի ներկայացուցիչները) մասին:
12. Ուսումնասիրությունների արդյունքներն ամփոփվում են տեղեկանքներում, որոնք քննարկվում են համալրման աղբյուր-հիմնարկներում, վարչության կոլեգիայի, ինչպես նաև համապատասխան պետական կառավարման մարմնի հետ համատեղ կոլեգիաների նիստերում:
13. Ըստ ուսումնասիրությունների արդյունքների վարչության կողմից համալրման աղբյուր-հիմնարկին ցուցաբերվում է անհրաժեշտ մեթոդական ու գործնական օգնություն:
14. Սույն կարգի կիրարկման ընթացքում ծագած վեճերը լուծվում են համապատասխան վերադաս պետական կառավարման մարմինների կողմից կամ գործող օրենսդրությանը համապատասխան այլ կարգով: