ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ
26 նոյեմբերի 2021 թվականի N 300
ՀԱՄԱԽԱՌՆ ԵԿԱՄՏԻՑ ՆՎԱԶԵՑՎՈՂ ԾԱԽՍԵՐԻ ՎԵՐԱԲԵՐՅԱԼ
Հարց
i
ՀՀ զինվորական ծառայության և զինծառայողի կարգավիճակի մասին օրենքի 59-րդ հոդվածի 9-րդ մասի համաձայն` վարժական հավաքին մասնակցելու ընթացքում քաղաքացու հիմնական աշխատանքի վայրում (անկախ կազմակերպական-իրավական ձևից) պահպանվում է քաղաքացու աշխատատեղը (պաշտոնը):
Բացի աշխատատեղը պահպանելու օրենսդրական պահանջից` ՀՀ ռեզիդենտ համարվող կազմակերպությունը` աշխատակիցների հետ կնքված պայմանագրով, ինչպես նաև իր ներքին կարգապահական կանոններով/կոլեկտիվ պայմանագրով աշխատակիցների` վարժական հավաքների մասնակցելու դեպքում պարտավորվում է նաև վերջիններիս վճարել միջին ամսական աշխատավարձ:
Վարժական հավաքների մասնակցելու ժամանակահատվածում աշխատակիցներին վճարված միջին ամսական աշխատավարձը շահութահարկի հաշվարկման նպատակով կարո՞ղ է համարվել նվազեցվող ծախս:
Պատասխան
ՀՀ հարկային օրենսգրքի`
i
- 4-րդ հոդվածի 1-ին մասի 28-րդ կետի համաձայն` ձեռնարկատիրական ծախս է համարվում կազմակերպության, անհատ ձեռնարկատիրոջ կամ նոտարի կողմից իրականացվող գործունեությանը վերագրվող ակտիվի նվազումը կամ պարտավորության աճը, որը, առանձին վերցրած, հանգեցնում է կազմակերպության սեփական կապիտալի կամ անհատ ձեռնարկատիրոջ կամ նոտարի զուտ ակտիվների նվազեցմանը, բացառությամբ օրենսգրքի 112-րդ հոդվածով սահմանված ծախս չհամարվող տարրերի,
i
- 121-րդ հոդվածի 7-րդ մասով սահմանված են ծախսերի նվազեցման դրույթները:
i
Հաշվի առնելով վերը նշվածը, հայտնում ենք, որ ՀՀ աշխատանքային օրենսգրքով վարժական հավաքի ընթացքում գործատուի կողմից աշխատավարձի պահպանման ուղիղ պահանջ սահմանված չէ: Միաժամանակ, եթե գործատուի կողմից ընդունված անհատական իրավական ակտով նշվում է, որ վարժական հավաքի ընթացքում աշխատավարձը պահպանվում է, ապա վերջինս ՀՀ աշխատանքային օրենսդրության համաձայն` կհամարվի աշխատավարձ: Ինչ վերաբերում է աշխատավարձը որպես ծախս համախառն եկամտից նվազեցնելուն, ապա այն, որպես ձեռնարկատիրական ծախս, ենթակա է նվազեցման համախառն եկամտից` ՀՀ հարկային օրենսգրքի 121-րդ հոդվածի 7-րդ մասով սահմանված կարգով:
ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ