«ԴԵՂԱՏՆԵՐԻՆ ԵՎ ԴԵՂԱՏՆԱՅԻՆ ԿՐՊԱԿՆԵՐԻՆ ՆԵՐԿԱՅԱՑՎՈՂ» ...

 

100.0574.071102

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ

                                      «07»         11           2002 Թ.

                                        ՊԵՏԱԿԱՆ ԳՐԱՆՑՄԱՆ ԹԻՎ 10002272

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐ ՀՐԱՄԱՆ

 

4 սեպտեմբերի 2002 թվականի N 574

 

«ԴԵՂԱՏՆԵՐԻՆ ԵՎ ԴԵՂԱՏՆԱՅԻՆ ԿՐՊԱԿՆԵՐԻՆ ՆԵՐԿԱՅԱՑՎՈՂ» N 2-III-2.2.7 ՍԱՆԻՏԱՐԱԿԱՆ ԿԱՆՈՆՆԵՐԸ ՀԱՍՏԱՏԵԼՈՒ ՄԱՍԻՆ

 

Հիմք ընդունելով «Հայաստանի Հանրապետության բնակչության սանիտարահամաճարակային անվտանգության ապահովման մասին» օրենքի 6-րդ հոդվածի 1-ին մասի 3-րդ կետը`

 

ՀՐԱՄԱՅՈՒՄ ԵՄ`

 

1. Հաստատել «Դեղատներին և դեղատնային կրպակներին ներկայացվող» N 2-III-2.2.7 սանիտարական կանոնները (կցվում է):

2. (2-րդ կետն ուժը կորցրել է 18.05.2022 թիվ 31-Ն հրաման)

(նախաբանը փոփ. 18.05.2022 թիվ 31-Ն հրաման)

 

Հաստատված է

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով

 

ԴԵՂԱՏՆԵՐԻՆ ԵՎ ԴԵՂԱՏՆԱՅԻՆ ԿՐՊԱԿՆԵՐԻՆ ՆԵՐԿԱՅԱՑՎՈՂ ՍԱՆԻՏԱՐԱԿԱՆ ԿԱՆՈՆՆԵՐ N2-III-2.2.7

 

1. ԸՆԴՀԱՆՈՒՐ ԴՐՈՒՅԹՆԵՐ

 

1.1. Սույն սանիտարական կանոնների պահանջների կատարումը պարտադիր է Հայաստանի Հանրապետության բոլոր դեղատների և դեղատնային կրպակների համար:

1.2. Սանիտարական կանոնները ներառում են դեղատների կազմակերպման, սենյակների մաքրմանը, սարքավորումների և գույքի սանիտարական պահպանմանը, ինչպես նաև դեղերի պատրաստմանը և աշխատողների անձնական հիգիենային ներկայացվող պահանջները:

1.3. Բնակչությանը սպասարկող դեղատների սենյակների կազմը և մակերեսները սահմանվում են համաձայն «Հասարակական շենքեր և շինություններ» 2.08.02-89 շինարարական նորմերի և կանոնների և դրան կից բուժ. հիմնարկների նախագծման ձեռնարկի (բաժին V):

1.4. Հիվանդանոցային, միջհիվանդանոցային, հոգեբուժական և նարկոլոգիական կազմակերպությունների դեղատների և դեղատնային բաշխիչ կետերի կառուցվածքը պետք է համապատասխանի «Հասարակական շենքեր և շինություններ» 2.08.02-89 շինարարական նորմերին և կանոններին և դրան կից բուժ. հիմնարկների նախագծման ձեռնարկին (բաժին V):

1.5. Դեղատների տարածքում թույլատրվում է վաճառել միայն դեղատնային ապրանքներ` դեղեր, բժշկական նշանակոււթյան, հիվանդի խնամքի, ինչպես նաև սանիտարիայի և հիգիենայի ապրանքներ:

 

2. ՏԵՐՄԻՆՆԵՐ ԵՎ ՍԱՀՄԱՆՈՒՄՆԵՐ

 

2.1. Սանիտարական հագուստ` բժշկական խալաթ և գլխարկ, որոնք նախատեսված են դեղերը, նյութերը ու պատրաստի արտադրանքը անձնակազմից փոխանցվող երկրորդային մանրէային, քիմիական և մեխանիկական աղտոտումներից պաշտպանելու համար:

2.2. Ասեպտիկ կառույցահատվածի (բլոկի) տեխնոլոգիական հագուստի կոմպլեկտ` նախատեսված է դեղերը, օժանդակ նյութերը, պատրաստի արտադրանքը ու օդային միջավայրը անձնակազմից փոխանցվող երկրորդային մանրէային և մեխանիկական աղտոտումից պաշտպանելու համար:

2.3. Վարակում մանրէներով (կոնտամինացիա)`

ա) առաջնային աղտոտվածություն` առաջանում է օդի հոսքից,

բ) երկրորդային աղտոտվածություն` առաջանում է ասեպտիկայի պահանջները չապահովելու դեպքում:

2.4. Ասեպտիկա` համալիր պայմաններ ու միջոցառումներ, ուղղված մանրէային, քիմիական և մեխանիկական աղտոտումների նախականխմանը` մանրէազերծված արտադրանքի ստացման տեխնոլոգիական գործընթացների բոլոր փուլերում:

2.5. Ասեպտիկ կառույցահատված (բլոկ)` դեղատան հատուկ կառուցվածք ու կահավորված տարածք է, որի օգտագործման նպատակն է նվազեցնել մանրէային, քիմիական և մեխանիկական աղտոտվածության թափանցումը, գոյացումը ու պահպանումը:

2.6. Օդային շլյուզ` փակ տարածքում տեղադրված հարմարանք է մանրէների, քիմիական և մեխանիկական այլ աղտոտությունների ներթափանցումը կանխելու համար կամ դռներով առանձնացված փակ տարածք է տարբեր աստիճանի մաքրությամբ սենյակների միջև:

2.7. Ախտահանում` արտադրանքի վրա, արտադրանքում կամ մակերեսների վրա ախտածին մանրէները ոչնչացնելու (սպանելու) գործընթաց (ջերմային, քիմիական, ֆիզիկական եղանակներով և միջոցներով):

2.8. Մանրէազերծում` արտադրանքի վրա կամ արտադրանքում զարգացման ցանկացած փուլում գտնվող բոլոր տեսակի մանրէների, այդ թվում` սպորավոր ձևերի, ոչնչացման, ինչպես նաև օբյեկտների մակերեսներից վերջիններիս հեռացման գործընթաց է, ներառյալ (ջերմային, քիմիական, ֆիզիկական եղանակներով և միջոցներով):

2.9. Նախամանրէազերծումային մշակում` սպիտակուցների, ճարպերի, մեխանիկական աղտոտվածության, դեղանյութերի մնացորդային քանակների հեռացում է: Արտադրանքի լվացումը, ախտահանումն ապահովում է մանրէազերծման արդյունավետությունը, նվազեցնում անսովոր (պիրոգեն) ռեակցիաների ռիսկը հիվանդների մոտ:

 

3. ԴԵՂԱՏՆԵՐԻ ՍԵՆՅԱԿՆԵՐԻՆ ԵՎ ՍԱՐՔԱՎՈՐՈՒՄՆԵՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐ

 

3.1. Դեղատան շենքն անհրաժեշտ է կահավորել, հարդարել ու պահպանել սույն կանոններով սահմանված կարգով: Դեղատան մուտքի մոտ պետք է լինի հարմարանք կոշիկները կեղտից մաքրելու համար: Հարմարանքի մաքրումը կատարվում է ըստ անհրաժեշտության, բայց ոչ պակաս, քան օրը մեկ անգամ:

3.2. Պատերի և առաստաղների երեսպատումը պետք է հնարավոր դարձնի դրանց խոնավ մաքրումը` ախտահանիչ նյութերի օգտագործմամբ:

3.3. Դեղատների սարքավորումների արտաքին և ներքին մակերեսները պետք է լինեն ծածկված դեղանյութերի, քիմիական ռեակտիվների նկատմամբ կայուն նյութերով: Սարքավորումները և դեղատնային կահույքը պետք է տեղադրվի մաքրելու համար հարմար ձևով, այնպես, որ չծածկի բնական լույսի աղբյուրը:

3.4. Արևային կողմի լուսամուտները և ցուցափեղկերը պետք է ունենան արևից պաշտպանման հարմարանքներ, որոնք օգտագործվում են հատկապես ամռան ամիսներին:

3.5. Օդափոխության համար օգտագործվող լուսամուտի վերնափեղկերը և օդանցքները ապահովված պետք է լինեն 2,2 մմ-ից ոչ մեծ անցքեր ունեցող ցանցով:

3.6. Սպասասրահում դեղատան անձնակազմի աշխատատեղերը պետք է ապահովված լինեն օդակաթիլային ճանապարհով փոխանցվող վարակիչ հիվանդություններից պաշտպանող հարմարանքներով: Օդակաթիլային ճանապարհով փոխանցվող վարակիչ հիվանդությունների տվյալ բնակավայրում տարածման ժամանակաշրջանում դեղատների աշխատակիցները պետք է կրեն պաշտպանիչ դիմակ:

3.7. Ասեպտիկ կառույցահատվածի, պատրաստուկների, ասիստենտական սենյակների, զուգարանների մուտքի առաջ, հատակին պետք է փռված լինի ախտահանիչ լուծույթով թրջված ռետինե գորգ:

3.8. Անձնակազմի աշխատողների ձեռքերը լվանալու համար պետք է դրվեն լվացարանային կոնքեր և ախտահանիչ լուծույթով տարողություն:

3.9. Լվացման սենյակում պետք է առանձնացվեն ու պիտակավորվեն լվացման խեցիներ` ներարկման լուծույթների, աչքի կաթիլների, ներքին և արտաքին օգտագործման դեղաձևերի հետ աշխատելու համար, որտեղ պետք է լվացվի նաև վերջիններիս համար օգտագործվող ամանեղենը:

Արգելվում է ձեռքերը լվանալ վերոհիշյալ խեցիներում:

3.10. Արտադրական սենյակում արգելվում է սննդի ընդունումը (ուտելը):

3.11. Դեղատների շինարարության համար օգտագործվող նյութերը պետք է խոչընդոտեն կրծողների, միջատների և այլ կենդանիների սենյակներ թափանցումը:

3.12. Դեղատան սենյակները պետք է ունենան բնական և արհեստական լուսավորություն: Ընդհանուր արհեստական լուսավորությունը նախատեսվում է բոլոր սենյակներում: Առանձին աշխատատեղերը, անհրաժեշտության դեպքում, պետք է ապահովվեն տեղային արհեստական լուսավորությամբ:

3.13. Օդափոխության և ջեռուցման համակարգերի տեղադրումը և շահագործումը պետք է կատարվի համաձայն «Ջեռուցում, օդափոխում և օդի լավորակում» IV-12.01-2000 շինարարական նորմերի: Պահեստային սենյակներում պետք է իրականացվի միկրոկլիմայի հսկողություն:

3.14. Սարքավորումների տեղադրումը կատարվում է պատերից բավարար հեռավորության վրա, որը վերանորոգման, մաքրման և ախտահանման աշխատանքներ իրականացնելու հնարավորություն կտա, չփակելով լույսի բնական աղբյուրներն ու չխանգարելով անց ու դարձին:

 

4. ԱՍԵՊՏԻԿ ՊԱՅՄԱՆՆԵՐՈՒՄ ԴԵՂԵՐԻ ՊԱՏՐԱՍՏՄԱՆԸ ՆԵՐԿԱՅԱՑՎՈՂ ՍԱՆԻՏԱՐԱԿԱՆ ՊԱՀԱՆՋՆԵՐ

 

4.1. Ասեպտիկ պայմաններում դեղերի պատրաստման սենյակների պատերը պետք է ծածկված լինեն հեշտությամբ մաքրվող և ախտահանվող ծածկույթներով:

4.2. Ասեպտիկ կառույցահատվածը պետք է ունենա ներհոս- արտաձիգ օդափոխություն` ներհոսը արտահոսքի նկատմամբ գերակշռումով:

4.3. Ասեպտիկ կառույցահատվածում, պատրաստուկի, ջրի թորման, մանրէազերծման սենյակներում օդի մանրէազերծման համար դրվում են չէկրանավորված մանրէազերծիչ ճառագայթիչներ, որոնք միացվում են աշխատանքը սկսելուց առաջ, 1-2 ժամ տևողությամբ, մարդկանց բացակայության պայմաններում, 2-2.5 վտ հզորությամբ սարքավորումներ` ծավալի յուրաքանչյուր 1մ3-ի հաշվով, օդի մանրէային աղտոտվածության նվազեցման համար: Ճառագայթիչների անջատիչը տեղադրվում է սենյակների մուտքի մոտ «Չմտնել, միացված է մանրէազերծիչ ճառագայթիչը» ցուցանակով: Այդ սենյակները թույլատրվում է մտնել միայն ճառագայթիչները անջատելուց հետո, իսկ դրանցում երկար ժամանակ մնալ և աշխատել թույլատրվում է անջատելուց 15 րոպե հետո: Անձնակազմի ներկայությամբ կարելի է միացնել միայն էկրանավորված 1վտ հզորությամբ մանրէազրկիչ ճառագայթիչներ, որոնք դրվում են հատակից 1,8 - 2,0 մ բարձրության վրա, սենյակի ծավալի 1մ3-ի հաշվով և ճառագայթները ուղղված չպետք է լինեն դեպի սենյակում գտնվող մարդիկ: ՈՒլտրամանուշակագույն ճառագայթիչների աշխատանքի ժամանակ պետք է միացնել օդափոխիչներ` թունավոր նյութերի (օզոն, ազոտի օքսիդներ) կուտակումը կանխելու համար:

4.4. Ասեպտիկ կառույցահատված բերվող բոլոր սարքավորումները, կահույքը նախապես պետք է մշակվեն ախտահանիչ լուծույթով թրջված լաթով` համաձայն ՀՀ առողջապահության նախարարության կողմից 04.09.2002թ. N 574 հրամանով հաստատված «Տարբեր օբյեկտների ախտահանման ռեժիմի» (հավելված 1) համաձայն: Արգելվում է չօգտագործվող սարքավորումների տեղակայումը ասեպտիկ կառույցահատվածում:

4.5. Ասեպտիկ պայմաններում դեղերի պատրաստման սենյակի մուտքի առաջ փռվում է ռետինե գորգ, որը հերթափոխի ընթացքում պետք է մեկ անգամ թրջվի ախտահանող լուծույթով` հավելված 1-ով հաստատված «Տարբեր օբյեկտների ախտահանման ռեժիմի» համաձայն:

4.6. Ասեպտիկ կառույցահատվածը (պատրաստուկի սենյակ) կից սենյակներից բաժանվում է անցախուցերով (շլյուզ): Աշխատակիցները շլյուզ մտնելուց առաջ հագնում են հատուկ կոշիկներ, լվանում և ախտահանում են ձեռքերը, հագնում են մանրէազերծված խալաթ, գլխարկ (մազերը խնամքով հավաքում են), բախիլներ, բերանը և քիթը ծածկում քառատակ մառլյայից պատրաստված դիմակով, որը փոխվում է 4 ժամը մեկ անգամ: Արգելվում է չմանրէազերծված հագուստով, շլյուզով անցնել այն սենյակ, որտեղ ասեպտիկ պայմաններում պատրաստվում են դեղեր, կատարվում են մանրակշռումներ: Արգելվում է նաև ասեպտիկ կառույցահատվածից դուրս գալ մանրէազերծված սանիտարական հագուստով:

4.7. Լուծույթների տարողությունների փակման խցանների և ալյումինե կափարիչների պատրաստումը և լվացումը կատարվում է համաձայն ՀՀ առողջապահության նախարարության կողմից 04.09.2002թ. N 574 հրամանով հաստատված «Ռետինե խցանների մշակման կարգի» և «Ալյումինե կափարիչների մշակման կարգի» (հավելված 6) համապատասխան:

4.8. Փոքր մեխանիզմների օգտագործումը ներարկման լուծույթների սրսկման և աչքի կաթիլների պատրաստման համար թույլատրվում է միայն դրանց հնարավոր վարակազերծումից և մանրէազերծումից հետո:

4.9. Խստիվ արգելվում է ասեպտիկ կառույցահատվածում չաշխատող անձանց մուտքը նշված սենյակները:

4.10. Չի թույլատրվում ասիստենտական-ասեպտիկ բաժանմունքով անցկացնել ջրահեռացման և ջրմուղի խողովակներ:

4.11. Խորհուրդ է տրվում ստեղծել մաքուր օդի հորիզոնական և ուղղահայաց լամինար հոսանքներ` մաքուր խցիկներ ստեղծելու նպատակով: Օդի լամինար հոսանքի արագությունը պետք է լինի 0,8-0,6 մ/վրկ: Պարբերաբար, ոչ պակաս, քան ամիսը մեկ անգամ, պետք է իրականացվի օդի մանրէազրկվածության հսկողություն:

 

5. ԴԵՂԱՏԱՆ ՍԵՆՅԱԿՆԵՐԻ ՄԱՔՐՄԱՆԸ, ՍԱՐՔԱՎՈՐՈՒՄՆԵՐԻ ԵՎ ԳՈՒՅՔԻ ՍԱՆԻՏԱՐԱԿԱՆ ՊԱՀՊԱՆՈՒԹՅԱՆԸ ՆԵՐԿԱՅԱՑՎՈՂ ՊԱՀԱՆՋՆԵՐ

 

5.1. Դեղատների արտադրական սենյակները պետք է մաքրվեն խոնավ եղանակով` լվացող և ախտահանիչ նյութերի օգտագործմամբ համաձայն ՀՀ առողջապահության նախարարության կողմից 04.09.2002թ. N 574 հրամանով հաստատված «Տարբեր օբյեկտների ախտահանման ռեժիմի» (հավելված 1): Արգելվում է մաքրումը չոր եղանակով:

5.2. Հատակը լվացվում է հերթափոխը մեկ անգամից ոչ պակաս, պատերն ու դռները` շաբաթը մեկ անգամից ոչ պակաս: Առաստաղը փոշուց մաքրվում է ոչ պակաս, քան ամիսը մեկ անգամ` խոնավ լաթով:

5.3. Լուսամուտների ապակիների շրջանակները, դրանց միջև ընկած տարածությունները լվացվում են տաք ջրով, օճառով կամ լվացող նյութերով, ոչ պակաս, քան ամիսը մեկ անգամ:

5.4. Դեղատան արտադրական սենյակների և առևտրի սրահների սարքավորումները մաքրվում են ամեն օր, դեղամիջոցների պահպանման սենյակների (նյութական սենյակներ) պահարանները` ոչ պակաս, քան շաբաթը մեկ անգամ:

5.5. Ձեռքերի լվացման խեցիները և սանիտարական հանգույցները մաքրվում և ախտահանվում են ամեն օր:

5.6. Տարբեր սենյակների մաքրման համար (ասեպտիկ պայմաններում դեղերի պատրաստման, այլ արտադրական սենյակներ, առևտրի սրահ, սանիտարական հանգույցներ) առանձնացվում է մաքրման գույք (դույլեր, թասեր, խոզանակներ, լաթեր և այլն), որը մակնշվում և օգտագործվում է ըստ նշանակության: Գույքը պահվում է հատուկ առանձնացված տեղերում (սենյակ, պահարան):

5.7. Արտադրության թափոնները և աղբը անհրաժեշտ է հավաքել կափարիչ ունեցող հատուկ տարողություններում և հեռացնել ոչ պակաս, քան հերթափոխը մեկ անգամ: Ձեռքերի լվացարանակոնքերը, սանհանգույցները և աղբի տարողությունները անհրաժեշտ է լվանալ, մաքրել և ախտահանել ամեն օր:

 

6. ԴԵՂԱՏՆԵՐԻ ԱՇԽԱՏՈՂՆԵՐԻ ԱՆՁՆԱԿԱՆ ՀԻԳԻԵՆԱՅԻՆ ՆԵՐԿԱՅԱՑՎՈՂ ՊԱՀԱՆՋՆԵՐ

 

6.1. Դեղատան աշխատողները պարտավոր են պահպանել անձնական հիգիենայի հետևյալ կանոնները.

- աշխատանքը սկսելուց առաջ հանել արտահագուստը և կոշիկները,

- հագնել սանիտարական հագուստ (խալաթ, գլխարկ) ու սանիտարական կոշիկներ, լվանալ և ախտահանել ձեռքերը (հավելված 1),

- զուգարան մտնելուց առաջ հանել խալաթը, դուրս գալուց հետո ձեռքերը մանրակրկիտ լվանալ և ախտահանել,

- դեղատնից դուրս չգալ սանիտարական հագուստով և կոշիկներով:

6.2. Դեղերի պատրաստումով, հսկողությամբ, մանրակշռումով զբաղվող անձանց եղունգները պետք է լինեն կարճ կտրած, չի թույլատրվում կրել մատանիներ և լաքապատել եղունգները: Աշխատողները պետք է հետևեն ձեռքերի մաքրությանը, սանիտարական հագուստը փոխեն ըստ անհրաժեշտության:

6.3. Դեղատան աշխատողները սանիտարական հագուստը պետք է փոխեն շաբաթը մեկ անգամ, իսկ անհրաժեշտության դեպքում` ավելի հաճախ: Դեղատան յուրաքանչյուր աշխատող պետք է ունենա ոչ պակաս, քան 2 կոմպլեկտ սանիտարական հագուստ:

6.4. Դեղերի պատրաստումով, մանրակշռումով զբաղվող աշխատողներին հերթափոխից առաջ պետք է հատկացվեն անհատական օգտագործման սրբիչներ:

6.5. Հայտնաբերված հիվանդները, ինչպես նաև մանրէակիրներն ուղարկվում են բուժման: Այդ անձանց իրավունք է տրվում զբաղվել դեղերի պատրաստումով, որակի հսկողությամբ, մանրակշռումով, դեղերի բաց թողնումով միայն լրիվ առողջացումից հետո, որի վերաբերյալ ներկայացվում է համապատասխան տեղեկանք բուժող հիմնարկից (կազմակերպությունից):

6.6. Դեղատներում աշխատելու ժամանակ աշխատողները պետք է պահպանեն անվտանգության տեխնիկայի կանոնները:

 

7. ԹՈՐԱԾ ԵՎ ՆԵՐԱՐԿՄԱՆ ՋՐԻ ՊԱՏՐԱՍՏՄԱՆԸ, ՏԵՂԱՓՈԽՄԱՆԸ ԵՎ ՊԱՀՊԱՆՄԱՆԸ ՆԵՐԿԱՅԱՑՎՈՂ ՍԱՆԻՏԱՐԱԿԱՆ ՊԱՀԱՆՋՆԵՐ

 

7.1. Ներարկման համար չնախատեսված մանրէազերծված ու չմանրէազերծված դեղամիջոցների պատրաստման համար օգտագործվում է մաքրված ջուր, որը ստացվում է կրկնակի թորման, հետադարձ օսմոսի, իոնային փոխանակության եղանակներով: Մաքրված ջրի մանրէաբանական կազմը պետք է համապատասխանի խմելու ջրին ներկայացվող պահանջներին, այդ թվում մանրէների ընդհանուր թիվը (1լ ջրում 100-ից ոչ ավելի): Ներարկման լուծույթներ պատրաստելու համար օգտագործվում է ներարկման ջուր, որն իր կազմով և հատկություններով պետք է համապատասխանի մաքրված ջրին և լինի ապիրոգեն:

7.2. Թորած և ներարկման ջրի ստացումը կատարվում է ասեպտիկ պայմաններում:

7.3. Թորած և ներարկման ջուրը ստացվում է թորման սարքի միջոցով: Օգտագործումից առաջ սարքի ներքին մակերեսը պետք է մաքրել էթիլ սպիրտի և եթերի 1:1 հարաբերությամբ խառնուրդով թրջված բամբակով, ապա ջրածին պերօքսիդի 3%-ոց լուծույթով, եթե թույլ է տալիս սարքի կառուցվածքը: Դրանից հետո սարքի միջով անց է կացվում գոլորշի` 20-30 րոպե տևողությամբ, առանց այն սառեցնելու: Թորած ջրի առաջին 40-60 լիտրը օգտագործման համար պիտանի չէ:

7.4. Յուրաքանչյուր թորումից առաջ, ոչ հաճախ, քան օրը մեկ անգամ, անհրաժեշտ է սարքի միջով անցկացնել գոլորշի` 10-15 րոպե տևողությամբ, առանց սառնարանը միացնելու:

7.5. Ստացված թորած և ներարկման ջուրը հավաքվում է մաքուր, մանրէազերծված կամ գոլորշիով մշակված գործարանային արտադրության հավաքման սարքում կամ, բացառության կարգով, ապակե տարողությունում: Հավաքման տարաները պետք է ունենան «Թորած ջուր», «Ներարկման ջուր» պիտակավորումը: Եթե միաժամանակ օգտագործվում են հավաքման մի քանի տարաներ, ապա դրանք համարակալվում են:

7.6. Հավաքման ապակե սարքերը (տարաները) պետք է ամուր փակվեն խցաններով կամ կափարիչներով: Վերջիններս պետք է ունենան 2 անցք, մեկը` ջրի մուտքի խողովակի, իսկ մյուսը` ապակե խողովակի համար, որի մեջ դրվում է մանրէազերծված բամբակե վիրախծուծ (տամպոն), որը փոխվում է ամեն օր:

7.7. Հավաքման տարաները ջրի թորման սարքին միացվում են ապակե խողովակներով:

7.8. Աշխատատեղեր ջուրը տրվում է վերջինիս որակի վրա չազդող, լավ լվացվող և վարակազերծվող նյութից պատրաստված խողովակաշարով կամ բալոններով:

7.9. Պետք է օգտագործել 16-20 մմ-ից ոչ պակաս տրամագիծ ունեցող խողովակներ` ելնելով ապակե կամ պողպատե խողովակաշարի շահագործման և ախտահանման հարմարությունից: Խողովակաշարի շատ երկար լինելու դեպքում յուրաքանչյուր 5-7 մ հեռավորության վրա նախատեսվում է եռաբաշխիչ` արտաքին ելքով և ծորակով, նմուշառման համար` լվացման, մանրէազերծման որակը և թորվածքի մանրէաբանական կազմը որոշելու նպատակով:

7.10. Խողովակաշարի լվացումը և ախտահանումը կատարվում է դրա հավաքումից առաջ, իսկ շահագործման ընթացքում` 14 օրը մեկ անգամ, ինչպես նաև մանրէաբանական հետազոտությունների անբավարար արդյունքների դեպքում:

7.11. Դրանց միջով ավտոկլավից անց է կացվում գոլորշի, 30 րոպե տևողությամբ: Մանրէազերծման տևողության հաշվարկը կատարվում է խողովակաշարի հակառակ ծայրից (ելքից)` գոլորշու դուրս գալու պահից հաշված: Պոլիմերային նյութերից պատրաստված խողովակաշարը մանրէազերծվում է ջրածնի պերօքսիդի 6%-ոց լուծույթով` 6 ժամ տևողությամբ, այնուհետև լվացվում թորած ջրով: Խողովակաշարի մշակման մասին կատարվում է գրանցում, համաձայն ՀՀ առողջապահության նախարարության կողմից 04.09.2002թ. N 574 հրամանով հաստատված «Խողովակաշարերի մշակման գրանցման մատյանում» (հավելված 9):

7.12. Ապակե խողովակները և անոթները պիրոգեն նյութերից մաքրելու համար պետք է մշակել կալիումի պերմանգանատի 1%-անոց լուծույթով, 25-30 րոպե տևողությամբ: Լուծույթի պատրաստման համար կալիումի պերմանգանատի 10 մաս 1%-անոց լուծույթին ավելացվում է 6 մաս ծծմբական թթվի 1,5%-անոց լուծույթ: Մշակումից հետո անոթները և խողովակները պետք է խնամքով լվանալ, ներարկման թարմ թորած ջրով:

7.13. Թորած ջրով մատակարարումը կարգավորվում է այնպես, որ օդ չմտնի խողովակաշարի մեջ և չառաջանան օդային խցաններ: Աշխատանքի ավարտից հետո ջուրը թափվում է խողովակաշարից:

7.14. Աշխատատեղերի մատակարարումը թորած և ներարկման ջրով պետք է կատարվի անմիջապես խողովակաշարից: Աշխատանքի ավարտից հետո չօգտագործված թորած ջուրը պետք է թափվի տարողությունից:

7.15. Թորած ջուրը պետք է պահվի ասեպտիկ պայմաններում, երեք օրից ոչ ավելի:

7.16. Ներարկման համար օգտագործվում է միայն թարմ թորած ջուր: Այն պահվում է ասեպտիկ պայմաններում, օգտագործման համար պիտանի է 24 ժամից ոչ ավելի:

 

8. ԱՍԵՊՏԻԿ ՊԱՅՄԱՆՆԵՐՈՒՄ ՊԱՏՐԱՍՏՎՈՂ ԴԵՂԱՄԻՋՈՑՆԵՐԻՆ ՆԵՐԿԱՅԱՑՎՈՂ ՍԱՆԻՏԱՐԱԿԱՆ ՊԱՀԱՆՋՆԵՐ

 

8.1. Ասեպտիկ պայմաններում աշխատելու համար անձնակազմը պետք է ունենա համապատասխան պատրաստվածություն:

8.2. Ասեպտիկ պայմաններում դեղերի պատրաստման համար անհրաժեշտ դեղամիջոցները պահվում են ամուր փակվող պահարաններում, շտանգլասներում` դրանց աղտոտումը բացառող պայմաններում: Շտանգլասները յուրաքանչյուր օգտագործումից առաջ պետք է լվանալ և մանրէազերծել:

8.3. Օժանդակ նյութերը (բամբակ, մառլյա, մագաղաթյա թուղթ, ֆիլտր և այլն) մանրէազերծվում են բիքսերում կամ հղկված խցանով հարմարեցված անոթներում համաձայն ՀՀ առողջապահության նախարարության կողմից 04.09.2002թ. N 574 հրամանով հաստատված «Առանձին օբյեկտների մանրէազերծման ռեժիմի» (հավելված 2), պահվում են փակ վիճակում` 3 օրից ոչ ավելի: Բացված տարողություններում պահվող նյութը պետք է օգտագործել 24 ժամվա ընթացքում: Յուրաքանչյուր անգամ նյութը վերցնելուց հետո բիքսը (պուլիկը) պետք է ամուր փակվի: Նյութը վերցվում է մանրէազերծված նրբունելիով (պինցետ): Պետք է նկատի ունենալ, որ օժանդակ նյութերը` մագաղաթե թուղթը, ֆիլտրները, մառլյան, բամբակե վիրախծուծները և այլն, կտրատվում և պատրաստվում են անհրաժեշտ չափերով` մանրէազերծման համար:

8.4. Դեղատնային ամանեղենը լվացվում է ՀՀ առողջապահության նախարարության կողմից 04.09.2002թ. N 574 հրամանով հաստատված «Դեղատնային ամանեղենի լվացման կարգի» (հավելված 3): Հիվանդանոցի վարակիչ բաժանմունքներում օգտագործված ամանեղենը օգտագործելուց առաջ ախտահանվում է ՀՀ առողջապահության նախարարության կողմից 04.09.2002թ. N 574 հրամանով հաստատված «Հիվանդանոցների ինֆեկցիոն բաժանմունքներից բերված ամանեղենի ախտահանման կարգի» (հավելված 4): Ամանեղենի մաքրության աստիճանը, դրանց վրա լվացող նյութերի մնացորդների առկայությունը ստուգվում է համաձայն ՀՀ առողջապահության նախարարության կողմից 04.09.2002թ. N 574 հրամանով հաստատված «Ամանեղենի լվացման որակի հսկողության կարգի» (հավելված 5): Լվանալուց հետո ամանեղենը մանրէազերծվում և պահվում է ամուր փակվող պահարաններում: Ասեպտիկ պայմաններում դեղերի պատրաստման և մանրակշռման համար օգտագործվող մանրէազերծված ամանեղենը (բալոն) պահվում է 24 ժամից ոչ ավելի:

8.5. Թույլատրվում է բալոնները լվանալուց հետո մանրէազերծել գոլորշիով, 30 րոպե տևողությամբ: Մանրէազերծումից հետո տարողությունները փակվում են մանրէազերծված թղթով և պահվում դրանց աղտոտումը բացառող պայմաններում, 24 ժամից ոչ ավելի:

8.6. Փակիչները, խցանները, կափարիչները մշակվում և պահվում են դրանց աղտոտումը բացառող պայմաններում:

8.7. Դեղերի լուծույթների պատրաստման համար օգտագործվող տեխնոլոգիական սարքավորումների հանվող մասերը (ռետինե և ապակե խողովակներ, ֆիլտրների բռնիչներ, մեմբրանային ֆիլտրներ, ներդիրներ և այլն) մշակվում, մանրէազերծվում և պահվում են հատուկ առանձնացված տեղում:

8.8. Խիտ լուծույթները, կիսաֆաբրիկատները, ներդեղատնային կիսահումքերը պատրաստվում են ասեպտիկ պայմաններում և պահվում են դրանց ֆիզիկաքիմիական հատկություններին և պիտանիության ժամկետներին համապատասխան, աղտոտումը բացառող պայմաններում:

 

9. ՉՄԱՆՐԷԱԶԵՐԾՎԱԾ ԴԵՂԱՁԵՎԵՐԻ ՊԱՏՐԱՍՏՄԱՆԸ ՆԵՐԿԱՅԱՑՎՈՂ ՍԱՆԻՏԱՐԱԿԱՆ ՊԱՀԱՆՋՆԵՐ

 

9.1. Չմանրէազերծված դեղերի պատրաստման համար օգտագործվող դեղամիջոցները պետք է պահվեն ամուր փակվող շտանգլասներում (կամ այլ տարայում), դրանց աղտոտումը բացառող պայմաններում:

9.2. Դեղամիջոցների պահպանման համար օգտագործվող շտանգլասները լվացվում և մանրէազերծվում են օգտագործելուց առաջ:

9.3. Դեղերի պատրաստման և մանրակշռման համար անհրաժեշտ օժանդակ նյութերը պատրաստվում, մանրէազերծվում և պահվում են սույն հրահանգի կետ 8.3-ին համապատասխան:

9.4. Դեղատնային ամանեղենը լվացվում և մանրէազերծվում է համաձայն սույն հրահանգին կից հավելված 3: Չմանրէազերծված դեղաձևերի պատրաստման համար օգտագործվող մանրէազերծված ամանեղենը պահպանվում է ոչ ավել, քան երեք օր:

9.5. Դեղատներում պատրաստվող և մանրակշռվող դեղերի տարաները փակելու համար օգտագործվող պոլիէթիլենային, ինչպես նաև պլաստմասսայից պտուտակավոր խցանները լվացվում, մանրէազերծվում և պահվում են համաձայն ՀՀ առողջապահության նախարարության կողմից 04.09.2002թ. N 574 հրամանով հաստատված «Պոլիէթիլենային խցանների մշակման կարգի» (հավելված 7) և «Պլաստմասսային պտուտակավոր խցանների մշակման կարգի» (հավելված 8):

9.6. Դեղերի պատրաստման և մշակման համար օգտագործվող փոքր մեխանիզմները լվացվում և ախտահանվում են վերջինների կից հրահանգի համաձայն: Եթե հրահանգում նշում չկա այդ մասին, ապա մեխանիզմները աշխատանքից հետո տարաբաժանվում են մասերի, մաքրվում դեղանյութերի մնացորդներից, լվացվում տաք (50o-60oC) ջրով, ախտահանվում կամ մանրէազերծվում (հավելված 1 և 2), կախված տվյալ նյութի հատկություններից, ինչից դրանք պատրաստված են: Այնուհետև, ախտահանիչ նյութերը հեռացնելու համար վերջիններս լվացվում են տաք ջրով, պարզաջրվում թորած ջրով և պահվում աղտոտումը բացառող պայմաններում:

9.7. Յուրաքանչյուր հերթափոխից հետո կշեռքները, մածկաթիակները (շպատելները), մկրատները և դեղատնային մյուս մանր գործիքները սրբվում են ջրածնի պերօքսիդի 3%-անոց լուծույթով կամ սպիրտ - եթերային խառնուրդով (1:1 հարաբերությամբ):

9.8. Բյուրետային սարքերը և կաթոցիչները դատարկվում են կոնցենտրատներից, լվացվում մանանեխի փոշու և տաք ջրի (50o-60oC) կամ ջրածնի պերօքսիդի և 0,5%-անոց լվացող նյութի խառնուրդով, պարզաջրվում են թորած ջրով, ոչ պակաս, քան 10 օրը 1 անգամ: Պարտադիր է լվացուկների ստուգումը` լվացող նյութերի մնացորդային քանակների առկայությունը որոշելու համար: Բյուրետային սարքերի հեղուկաթափ ծորակները աշխատանքից առաջ մաքրվում են աղային նստվածքներից, մզվածքներից, ոգեթուրմերից և սրբվում են սպիրտ - եթերային խառնուրդով (1:1 հարաբերությամբ):

9.9. Դեղանյութի յուրաքանչյուր կշռումից և չափումից առաջ շտանգլասի բերանը և խցանը, ինչպես նաև ձեռքի կշեռքները սրբվում են մառլյայից անձեռոցիկով, որն օգտագործվում է մեկ անգամ: Արգելվում է շտանգլասը և կշեռքները սրբել անձնական սրբիչով:

9.10. Հեղուկ դեղերը քամելու կամ մզելու համար օգտագործվող ձագարները, ինչպես նաև փոշիով և քսուքային զանգվածով հավանգները ծածկվում են մանրէազերծված պլաստմասսայից կամ մետաղյա թիթեղով, մինչև կշռելը և տարայի մեջ տեղավորելը - տարբեր օբյեկտների ախտահանման ռեժիմը (հավելված 1):

9.11. Քսուքները և փոշիները հավանգից հանելու համար օգտագործվում են պլաստմասսայից կամ էմուլսիայից մաքրված ռենտգենյան թիթեղներ: Արգելվում է ստվարաթղթի օգտագործումը:

9.12. Քսուքների պատրաստումից հետո ճարպի մնացորդները հեռացվում են ստվարաթղթի, լիգնինի միջոցով, հավանգները լվացվում և մանրէազերծվում են - առանձին օբյեկտների մանրէազերծման ռեժիմը (հավելված 2):

Աշխատանքի համար օգտագործվող թղթե և մոմած պարկուճները, մածկաթիակները (շպատելները), թելերը, կապող ռետինները ամեն օր լվացվում են և պահվում ասիստենտական (մանրակշռման) սեղանի արկղներում: Օժանդակ նյութերը պահվում են փակ պահարաններում (տուփերում), դրանց աղտոտումը բացառող պայմաններում:

 

10. ՄԱՆՐԷԱԲԱՆԱԿԱՆ ՀՍԿՈՂՈՒԹՅԱՆ ԵՆԹԱԿԱ ՕԲՅԵԿՏՆԵՐԸ ԴԵՂԱՏՆԵՐՈՒՄ

 

Մանրէաբանական հսկողության ենթակա են` հումքը, միջանկյալ և պատրաստի նյութերը, օժանդակ նյութերը, անձնակազմի աշխատողների ձեռքերը, հագուստը, օդը, սենյակների և սարքավորումների մակերեսները:

 

Հավելված 1

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով հաստատված

«Դեղատներին և դեղատնային

կրպակներին ներկայացվող

սանիտարական կանոններ»

 

ՏԱՐԲԵՐ ՕԲՅԵԿՏՆԵՐԻ ԱԽՏԱՀԱՆՄԱՆ ՌԵԺԻՄԸ

 

1.Դեղատան սենյակների, կահույքի, առարկաների, սարքավորումների ախտահանման համար օգտագործվում են.

- քլորամին Բ-ի 1%-անոց լուծույթ,

- քլորամին Բ-ի 0,75 %-անոց լուծույթ (լվացող նյութի 0,5%-ի հետ),

- ջրածնի պերօքսիդի 3%-անոց լուծույթ (լվացող նյութի 0,5%-ի հետ):

Մշակման ձևը` կրկնակի մաքրում:

2. Ռետինից և պլաստմասսայից պատրաստված առարկաների ախտահանման համար օգտագործվում են.

- քլորամին Բ-ի 1 %-անոց լուծույթ, 60 րոպե տևողությամբ,

- քլորամին Բ-ի 0,75 %-անոց լուծույթ (լվացող նյութի 0,5%-ի հետ), 15 րոպե տևողությամբ,

- ջրածնի պերօքսիդի 3%-անոց լուծույթ, 30 րոպե տևողությամբ,

- ջրածնի պերօքսիդի 3%-անոց լուծույթ (լվացող նյութի 0,5%-ի հետ), 30 րոպե տևողությամբ:

Մշակման ձևը` ընկղմում են լուծույթի մեջ, հետո լվանում ջրով:

3. Մածկաթիակները, մկրատները, նրբունելիները (պինցետները) և այլ փոքր մետաղական, ինչպես նաև ապակյա առարկաները ախտահանվում են եռացնելով թորած ջրում, 30 րոպե տևողությամբ: Նույն ձևով ախտահանվում են ձեռքերի լվացման խոզանակները, սպունգերը, ռետինից և պորոլոնից պատրաստված իրերը, 15 րոպե տևողությամբ:

4. Ծակոտկեն ռետինից պատրաստված գորգերը ախտահանվում են.

- քլորամին Բ-ի 0,75 %-անոց լուծույթով (լվացող նյութի 0,5%-ի հետ),

- ջրածնի պերօքսիդի 3%-անոց լուծույթով (լվացող նյութի 0,5%-ի հետ):

5. Պորոլոնից պատրաստված գորգերը ախտահանվում են.

ջրածնի պերօքսիդի 3%-անոց լուծույթով (լվացող նյութի 0,5%-ի հետ):

Մշակման ձևը` երեք լուծույթների օգտագործման դեպքում էլ գորգերը ընկղմում են լուծույթի մեջ, 30 րոպե տևողությամբ:

6.Մաքրման պարագաները ախտահանվում են.

- քլորամինի 1%-անոց լուծույթով,

- դիքլոր -1-ի 2%-անոց լուծույթով,

- քլորդեզինի 1%-անոց լուծույթով, ընկղմելով 60 րոպե տևողությամբ, որից հետո լվացվում և չորացվում են:

Մաքրելու լաթերը լվացվում են, ապա ախտահանվում` եռացնելով 30 րոպե տևողությամբ:

7. Սանիտարատեխնիկական սարքավորումները (կոնքեր) ախտահանվում են.

- լվացող, ախտահանող միջոցներով, թույլատրված որևէ լվացող-ախտահանիչ նյութով թրջված լաթով, հինգ րոպե տևողությամբ: Սրբում են առարկայի մակերեսը 0,5 գրամ նյութով կամ պատրաստուկով, 100 սմ2 հաշվարկով,

- թույլատրված մաքրող - ախտահանող պատրաստուկներով,

- քլորամին Բ -ի 1%-անոց լուծույթով,

- քլորամին Բ -ի 0,75%-անոց լուծույթով (լվացող նյութի 0,5%-ի հետ): Այս նյութերը օգտագործվում են մակերեսների կրկնակի մաքրման համար:

8. Անձնակազմը ձեռքերը օճառով լվանալուց հետո սրբում է հետևյալ լուծույթներում թրջված անձեռոցիկներով.

- էթիլ սպիրտի 30%-անոց լուծույթ,

- քլորհեքսիդի բիգլյուկոնատի 70%-անոց լուծույթ էթիլ սպիրտում,

- քլորամին Բ -ի 0,5%-անոց լուծույթ (օգտագործվում է այլ լուծույթների բացակայության դեպքում):

9. Անձնակազմի կոշիկների կրկնակի մշակման համար օգտագործվում են հետևյալ լուծույթները.

- քլորամին Բ -ի 1%-անոց լուծույթ,

- քլորամին Բ -ի 0,75%-անոց լուծույթ (լվացող նյութի 0,5%-ի հետ):

10. Որպես լվացող միջոց քլորամին Բ-ին և ջրածնի պերօքսիդին ավելացվում է առողջապահության ոլորտում գործնականում թույլատրված լվացող-ախտահանող միջոցների 0,5%-անոց լուծույթը:

 

Հավելված 2

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով հաստատված

«Դեղատներին և դեղատնային

կրպակներին ներկայացվող

սանիտարական կանոններ»

 

ԱՌԱՆՁԻՆ ՕԲՅԵԿՏՆԵՐԻ ՄԱՆՐԷԱԶԵՐԾՄԱՆ ՌԵԺԻՄԸ

._________________________________________________________________________.

|ՕԲՅԵԿՏԻ     |   ՄԱՆՐԷԱԶԵՐԾՄԱՆ ՌԵԺԻՄԸ       |ՕԳՏԱԳՈՐԾՎՈՂ |ՄԱՆՐԷԱԶԵՐԾՄԱՆ   |

|ԱՆՎԱՆՈՒՄԸ   |______________________________|ՍԱՐՔԱՎՈՐՈՒՄ-|ՊԱՅՄԱՆՆԵՐԸ      |

|            |գոլորշու ճնշումը |տևողությու- |ՆԵՐԸ        |                |

|            |       կգ/սմ2    |նը վրկ.     |            |                |

|            |_________________|____________|            |                |

|            |անվա-   |թույլատ-|անվա- |թույ-|            |                |

|            |նական   |րելի    |նական |լատ- |            |                |

|            |նշանակու|շեղումը |նշանա-|րելի |            |                |

|            |թյունը  |        |կու-  |շե-  |            |                |

|            |        |        |թյունը|ղումը|            |                |

|_________________________________________________________________________|

|                 ա) ԳՈԼՈՐՇԱՅԻՆ ՄԵԹՈԴ                                     |

|_________________________________________________________________________|

|Ապակյա      |2,0     |+/-0,1  |20    |+2   |Գոլորշային  |Մանրէազերծումը  |

|ամանեղեն,   |    օ   |        |      |     |մանրէազերծիչ|կատարվում է     |

|հավանգներ,  |(130 C) |        |      |     |            |փաթեթավորված կամ|

|ապակե       |        |        |      |     |            |չփաթեթավորված 2 |

|գործվածքային|1,1+0,1 |+/-0,1  |45    |+3   |            |տակ քաթանում կամ|

|արտադրանք   |    օ   |        |      |     |            |Ա կամ Բ մարկայի |

|(խալաթներ,  |(120 C) |        |      |     |            |մագաղաթե թղթում,|

|մառլյա,     |        |        |      |     |            |բիքսում, ապակյա |

|բամբակ)     |        |        |      |     |            |բանկայում       |

|չքայքայվող  |        |        |      |     |            |                |

|մետաղից     |        |        |      |     |            |                |

|պատրաստված  |        |        |      |     |            |                |

|իրեր        |        |        |      |     |            |                |

|____________|________|________|______|_____|____________|________________|

|Ռետինե      |1,1 օ   |+/-1    |45    |+3   |  ---»---   |   ----»----    |

|արտադրանք   |(120 C) |        |      |     |            |                |

|_________________________________________________________________________|

|                            բ) ՕԴԱՅԻՆ ՄԵԹՈԴ                              |

|_________________________________________________________________________|

|Ապակե       |        |        |      |     |Օդային      |Կատարվում է չոր |

|ամանեղեն,   |        |        |      |     |մանրէազերծիչ|արտադրանքի      |

|հավանգ,     |        |        |      |     |-խցիկի      |մանրէազերծում,  |

|ապակուց ու  |180     |+/-11   |60    |+5   |ծավալի      |փաթեթավորված և  |

|            |        |        |      |     |մինչև  25դմ3|չփաթեթավորված   |

|չքայքայվող  |180     |+/-12   |60    |+5   |-խցիկի      |                |

|մետաղից և   |        |        |      |     |ծավալի      |                |

|համաձուլվածք|        |        |      |     |մինչև       |                |

|ներից       |        |        |      |     |25դմ3-ից մեծ|                |

|            |        |        |      |     |մինչև       |                |

|            |        |        |      |     |500 դմ3     |                |

|պատրաստված  |180     |+/-14   |60    |+5   |-խցիկի      |                |

|արտադրանք   |        |        |      |     |ծավալի      |                |

|            |        |        |      |     |500 դմ3-ից  |                |

|            |        |        |      |     |մեծ         |                |

|_________________________________________________________________________|

|                           գ) ՔԻՄԻԱԿԱՆ ՄԵԹՈԴ                             |

|_________________________________________________________________________|

|ՕԲՅԵԿՏԻ     |ՄԱՆՐԷԱ- |ՄԱՆՐԷԱԶԵՐԾՄԱՆ ՌԵԺԻՄԸ      |ՕԳՏԱԳՈՐԾՎՈՂ |ՄԱՆՐԷԱ-    |

|ԱՆՎԱՆՈՒՄԸ   |ԶԵՐԾՈՂ  |__________________________|ՍԱՐՔԱՎՈՐՈՒՄ-|ԶԵՐԾՄԱՆ    |

|            |ԳՈՐԾՈՆ  |գոլորշու     |տևողությու- |ՆԵՐԸ        |ՊԱՅՄԱՆՆԵՐԸ |

|            |        |ճնշումը      |նը վրկ.     |            |           |

|            |        |կգ/սմ2       |            |            |           |

|            |        |_____________|____________|            |           |

|            |        |անվա- |թույ- |անվա- |թույ-|            |           |

|            |        |նական |լատրե-|նական |լատ- |            |           |

|            |        |նշանա-|լի    |նշանա-|րելի |            |           |

|            |        |կու-  |շեղու-|կու-  |շե-  |            |           |

|            |        |թյունը|մը    |թյունը|ղումը|            |           |

|____________|________|______|______|______|_____|____________|___________|

|Ապակուց,    |* Ջրածին|      |      |      |     |Ապակուց,    |Մանրէազեր- |

|չքայքայվող  |պերօքսիդ|      |      |      |     |պլաստմաս-   |ծումը      |

|մետաղներից  |Պետստան-|18    |  -   |360   |+/-5 |սայից       |կատարվում է|

|և  համա-    |դարտ    |      |      |      |     |պատրաստված  |լրիվ       |

|ձուլվածք-   |177-71  |50    |+/-2  |180   |+/-5 |կամ         |ընկղմելով  |

|ներից,      |6%-անոց |      |      |      |     |էմալապատված |լուծույթի  |

|պոլիմերային |լուծույթ|      |      |      |     |(չվնասված   |մեջ, որից  |

|նյութերից   |        |      |      |      |     |էմալով) փակ |հետո       |

|պատրաստված  |        |      |      |      |     |տարողու-    |արտադրանքը |

|արտադրանք   |        |      |      |      |     |թյուններ    |լվացվում է |

|            |        |      |      |      |     |            |մանրէազերծ-|

|            |        |      |      |      |     |            |ված ջրով   |

._________________________________________________________________________.

 

1. Դեղատնային ամանեղենը հանվում է մանրէազերծիչ, երբ վերջինում ջերմաստիճանը

հասնում է 60-70օ C և անմիջապես ծածկվում մանրէազերծված խցաններով: 2. Օժանդակ նյութերը, մանր գույքը և այլն պահպանվում են այն փաթեթներում,

որոնց մեջ մանրէազերծվել են, աղտոտումը բացառող պայմանները ապահովելու

համար: * Ջրածին պերօքսիդի լուծույթը կարելի է օգտագործել 7 օրվա ընթացքում`

պատրաստման պահից հաշվված, եթե այն պահվել է փակ տարողությունում:

Լուծույթը պիտանի է միանվագ օգտագործման համար:

 

Հավելված 3

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով հաստատված

«Դեղատներին և դեղատնային

կրպակներին ներկայացվող

սանիտարական կանոններ»

 

ԿԱՐԳ

ԴԵՂԱՏՆԱՅԻՆ ԱՄԱՆԵՂԵՆԻ ԼՎԱՑՄԱՆ

 

Փաթեթավորումից ազատված նոր կամ օգտագործված ամանեղենը (հիվանդանոցների վարակիչ բաժանմունքներից) ողողվում է ջրմուղի հոսող ջրով` արտաքինից և ներսից, աղտոտվածությունը և դեղանյութերի մնացորդները հեռացնելու համար, հետո թրջվում է մինչև 50o-60oC տաքացրած լվացող նյութի մեջ, 20-25 րոպե տևողությամբ: Շատ աղտոտված ամանեղենը թրջվում է ավելի երկար (2-3 ժամ):

Որպես լվացող միջոց թույլ է տրվում օգտագործել մանանեխի փոշու ջրային խառնուրդը` 1:20 հարաբերությամբ, «Դեզմոլի» 0,25%-անոց ջրային լուծույթը, սուլֆանոլի 1%-անոց լուծույթի խառնուրդը տրիպոլիֆոսֆատի լուծույթի հետ 1:9-ի հարաբերությամբ և այլ թույլատրված լվացող-ախտահանող միջոցներ:

 

Հավելված 4

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով հաստատված

«Դեղատներին և դեղատնային

կրպակներին ներկայացվող

սանիտարական կանոններ»

 

ԿԱՐԳ

ՀԻՎԱՆԴԱՆՈՑՆԵՐԻ ԻՆՖԵԿՑԻՈՆ ԲԱԺԱՆՄՈՒՆՔՆԵՐԻՑ ԲԵՐՎԱԾ ԱՄԱՆԵՂԵՆԻ ԱԽՏԱՀԱՆՄԱՆ

 

1. Հիվանդանոցների ինֆեկցիոն բաժանմունքներում օգտագործված և դեղատուն մուտք գործած ամանեղենը պետք է ախտահանվի.

- քլորամինի 1%-անոց ակտիվացված լուծույթով,

- ջրածնի պերօքսիդի 3%-անոց թարմ պատրաստված և լվացող նյութի 0,5%-անոց լուծույթների խառնուրդով,

- «Դեզմոլի» 0,5%-անոց լուծույթով:

2. Քլորամինի ակտիվացված լուծույթները պատրաստվում են հետևյալ կերպ. քլորամինը լուծվում է ջրմուղի ջրում, ավելացվում հավասար քանակով ակտիվատոր` քլորային, ծծմբաթթվային կամ էլ ազոտաթթվային ամոնիում: Ամանեղենը պահվում է քլորամինի ակտիվացված լուծույթում, 30 րոպե տևողությամբ: 2 օր պահված քլորամինի լուծույթի օգտագործման դեպքում ամանեղենի ախտահանման տևողությունն ավելացվում է մինչև 2 ժամ:

3. Ջրածնի պերօքսիդի լուծույթները լվացող նյութերի հետ և «Դեզմոլի» լուծույթը պատրաստվում են ջրմուղի ջրով: Այդ լուծույթում ամանեղենը պահվում է 80 րոպե տևողությամբ:

4. Ջրածնի պերօքսիդի 3%-անոց (33%-անոց պերհիդրոլ) 1 լիտր լուծույթ պատրաստելու համար վերցվում է 120 մլ ջրածին պերօքսիդ, ավելացվում է համապատասխան քանակի ջուր: Հետո ստացված լուծույթին ավելացվում է 5 գ լվացող նյութ:

5. Պերօքսիդի և քլորամինի հետ պետք է աշխատել ռետինե ձեռնոցներով, պահպանիչ ակնոցով և քառատակ մառլյայից պատրաստված դիմակով: Մաշկի վրա թափված պերօքսիդի և քլորամինի կաթիլները պետք է անմիջապես լվանալ ջրով:

6. Ջրածնի պերօքսիդը պահվում է փաթեթավորված շշերում, մութ, հով տեղ, փակի տակ: Այն պետք է տեղափոխել փակ տարա, խուսափելով թափվելուց: Լվացող նյութերը պահվում են գործարանային փաթեթներում կամ պոլիէթիլենային տոպրակներում, չոր տեղում:

 

Հավելված 5

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով հաստատված

«Դեղատներին և դեղատնային

կրպակներին ներկայացվող

սանիտարական կանոններ»

 

ԿԱՐԳ

ԱՄԱՆԵՂԵՆԻ ԼՎԱՑՄԱՆ ՈՐԱԿԻ ՀՍԿՈՂՈՒԹՅԱՆ

 

1. Լվացված ամանեղենի մաքրության աստիճանի ստուգումը.

լվացված և չորացված ամանեղենի ներքին մակերեսը թրջել 3-5 մլ ներկող նյութով: Հետազոտվող մակերեսի վրա այն տարածել` թափահարելով 10 վրկ, որից հետո ներկն արագ լվանալ ջրի շիթով: Լվացված ամանեղենը ունի առաջին աստիճանի մաքրություն, եթե դրա ներքին մակերեսի վրա բացակայում են դեղին բծերը և ճարպի հետքերը:

2. Ներկող նյութի պատրաստումը. 70 մլ մինչև 60 oC տաքացրած 90%-անոց էթիլ սպիրտում լուծել 0,2 գ սուդան 3, մանրեցրած ներկ և նույնքան էլ մեթիլեն կապույտ: Այնուհետև ավելացնել 10 մլ թորած ջուր և թափահարել: Լուծույթը պիտանի է վեց ամիս:

3. Լվացող նյութերի մնացորդների առկայության որոշումը.

ստուգվող լվացված սրվակը ողողել թորած ջրով (սրվակը լցվում է ջրով): Լվացուկով թրջված բամբակե վիրախծուծի վրա կաթեցնել 1-2 կաթիլ ֆենոլֆտալեինի սպիրտային լուծույթ: Լվացող նյութի մնացորդի առկայության դեպքում առաջանում է վարդագույն գունավորում:

 

Հավելված 6

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով հաստատված

«Դեղատներին և դեղատնային

կրպակներին ներկայացվող

սանիտարական կանոններ»

 

ԿԱՐԳ

ՌԵՏԻՆԵ ԽՑԱՆՆԵՐԻ ՄՇԱԿՄԱՆ

 

1. Ռետինե նոր խցանները մշակվում են ձեռքով կամ մեքենայով, որևէ թույլատրված լվացող նյութի 0,5%-անոց տաքացրած (50o-60oC), խցանների կշռի և լվացող նյութի 1:5 հարաբերությամբ լուծույթում, 3 րոպե տևողությամբ: Այնուհետև 5 անգամ ողողվում ջրմուղի տաք ջրով, ամեն անգամ թարմացնելով այն, և 1 անգամ` թորած ջրով: 30 րոպե եռացնել նատրիում հիդրոկարբոնատի 1%-անոց լուծույթում, ապա ողողել մեկ անգամ ջրմուղի ջրով և 2 անգամ թորած ջրով: Տեղավորել ապակե անոթներում, վրան լցնել թորած ջուր, փակել և պահել գոլորշային մանրէազերծիչում, 121 oC ջերմաստիճանում, 1 ժամ տևողությամբ` խցանների մակերեսից ծծմբի, թիուրամի, ցինկի և այլ նյութերի հետքերի հեռացման համար: Ջուրը թափել և խցանները 1 անգամ լվանալ թորած ջրով:

2. Մշակումից հետո խցանները մանրէազերծվում են բիքսերում, գոլորշային մանրէազերծիչում` 120 oC, 45 րոպե տևողությամբ: Ռետինե խցանների մեծ քանակների դեպքում մշակումից հետո, առանց մանրէազերծման, դրանք չորացվում են չորացնող պահարանում` 50 oC-ից ոչ բարձր ջերմաստիճանում, 2 ժամ տևողությամբ և պահվում փակ տարողություններում, մութ, հով տեղ, 1 տարուց ոչ ավել: Խցանները մանրէազերծվում են օգտագործումից առաջ:

3. Մանրէազերծված խցանները պահում են փակ բիքսերում 3 օրից ոչ ավելի: Բիքսերը բացելուց հետո խցանները կարելի է օգտագործել 24 ժամվա ընթացքում:

 

ԿԱՐԳ

ԱԼՅՈՒՄԻՆԵ ԿԱՓԱՐԻՉՆԵՐԻ ՄՇԱԿՄԱՆ

 

Սրսկման լուծույթների և աչքի կաթիլների տարողությունները փակելու համար նախատեսված ալյումինե կափարիչները պահել լվացող նյութերի 1-2%-անոց, մինչև 70o-80oC տաքացրած լուծույթներում, 15 րոպե տևողությամբ: Այնուհետև լուծույթը թափել, կափարիչները լվանալ հոսող ջրով, չորացնել օդային մանրէազերծիչներում (բիքսերում) 50o-60oC ջերմաստիճանում և պահել փակ տարողություններում (բիքսերում, պուլիկներում, տուփերում), դրանց աղտոտումը բացառող պայմաններում:

 

Հավելված 7

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով հաստատված

«Դեղատներին և դեղատնային

կրպակներին ներկայացվող

սանիտարական կանոններ»

 

ԿԱՐԳ

ՊՈԼԻԷԹԻԼԵՆԱՅԻՆ ԽՑԱՆՆԵՐԻ ՄՇԱԿՄԱՆ

Պոլիէթիլենային նոր խցանները մի քանի անգամ լվանալ 50o-60oC ջրմուղի ջրում: Եթե պահելու ընթացքում դրանք շատ են աղտոտվել, ապա կիրառել լվացվող միջոցներ, ողողել թորած ջրով և մանրէազերծել` ընկղմելով ջրածնի պերօքսիդի 6%-անոց թարմ լուծույթի մեջ, որից հետո լվանալ թորած ջրով, չորացնել չորացնող պահարանում 50o-60oC ջերմաստիճանում: Չորացրած խցանները պահվում են երեք օր մանրէազերծված, լավ փակվող պուլիկներում, բիքսերում, դրանց աղտոտումը բացառող պայմաններում:

 

Հավելված 8

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով հաստատված

«Դեղատներին և դեղատնային

կրպակներին ներկայացվող

սանիտարական կանոններ»

 

ԿԱՐԳ

ՊԼԱՍՏՄԱՍՍԱՅԻՑ ՊՏՈՒՏԱԿԱՎՈՐ ԽՑԱՆՆԵՐԻ ՄՇԱԿՄԱՆ

 

Պլաստմասսայից պատրաստված նոր խցանները մի քանի անգամ լվանալ 50o-60oC ջրմուղի ջրով, չորացնել չորացնող պահարանում 50o-60oC ջերմաստիճանում: Չորացրած խցանները պահվում են փակ տուփերում կամ այլ տարողություններում, դրանց աղտոտումը բացառող պայմաններում:

 

Հավելված 9

Հայաստանի Հանրապետության

առողջապահության նախարարության

2002 թվականի սեպտեմբերի 4-ի

N 574 հրամանով հաստատված

«Դեղատներին և դեղատնային

կրպակներին ներկայացվող

սանիտարական կանոններ»

 

ՄԱՏՅԱՆ

ԽՈՂՈՎԱԿԱՇԱՐԵՐԻ ՄՇԱԿՄԱՆ ԳՐԱՆՑՄԱՆ

 

._________________________________________________________________.

|  |Ժամանակացույց|Մանրէազերծող|Մշակման|Պատասխանատու  |Ծանոթություն|

|  |             |(ախտահանող  |ժամանակ|անձի          |            |

|  |             |գործոն)     |       |ստորագրություն|            |

|__|_____________|____________|_______|______________|____________|

|1 |     2       |     3      |   4   |      5       |      6     |

|__|_____________|____________|_______|______________|____________|

|  |             |            |       |              |            |

|  |             |            |       |              |            |

|  |             |            |       |              |            |

._________________________________________________________________.

 

ՑԱՆԿ

ՄԱՆՐԷԱԶԵՐԾԻՉՆԵՐԻ ԱՇԽԱՏԱՆՔԻ ՌԵԺԻՄԻ ՍՏՈՒԳՄԱՆ ՀԱՄԱՐ ՕԳՏԱԳՈՐԾՎՈՂ ՔԻՄԻԱԿԱՆ ՆՅՈՒԹԵՐԻ

 

1. Գոլորշային մանրէազերծիչների աշխատանքի հսկողության համար անհրաժեշտ է`

- բենզոյական թթու, հալման ջերմաստիճանը` 121o-122o C,

- անտիպիրին և ռեզորցին, հալման ջերմաստիճանը` 110o C:

2. Չոր ջերմային մանրէազերծիչների աշխատանքի հսկողության համար օգտագործվում են`

- տիոմիզանյութ, հալման ջերմաստիճանը` 180o C,

- սադաթթու, հալման ջերմաստիճանը` 180o-184oC,

- ասկորբինաթթու, հալման ջերմաստիճանը` 187o-192oC,

- բարբիտալ, հալման ջերմաստիճանը` 190o-191oC: