27.07.2023 -
102.0031.120312
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«12» 03 2012 Թ.
ՊԵՏԱԿԱՆ ԳՐԱՆՑՄԱՆ ԹԻՎ 10212146
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐ ՀՐԱՄԱՆ
7 մարտի 2012 թվականի N 31-Ն
ՀԱՐԿԱԴԻՐ ԿԱՏԱՐՈՂԻ ՀԱՄԱԶԳԵՍՏԻ, ՏԱՐԲԵՐԱՆՇԱՆՆԵՐԻ, ԽՈՐՀՐԴԱՆՇԱՆԻ ՆԿԱՐԱԳՐԵՐԸ, ԴՐԱՆՔ ԿՐԵԼՈՒ ԵՎ ՀԱՏԿԱՑՆԵԼՈՒ ԿԱՐԳԸ ՀԱՍՏԱՏԵԼՈՒ, ԻՆՉՊԵՍ ՆԱԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ 2005 ԹՎԱԿԱՆԻ ՄԱՐՏԻ 1-Ի N 26-Ն ՀՐԱՄԱՆՆ ՈՒԺԸ ԿՈՐՑՆԵԼՈՒ ՄԱՍԻՆ
Ղեկավարվելով «Հարկադիր կատարումն ապահովող ծառայության մասին» Հայաստանի Հանրապետության օրենքի 29-րդ հոդվածով.
ՀՐԱՄԱՅՈՒՄ ԵՄ`
1. Հաստատել հարկադիր կատարողի համազգեստի, տարբերանշանների, խորհրդանշանի նկարագրերը` համաձայն N 1 հավելվածի:
(1-ին կետը փոփ. 16.03.2021 թիվ 88-Ն հրաման)
1.1. Հաստատել հարկադիր կատարողի համազգեստը կրելու և հատկացնելու կարգը` համաձայն N 2 հավելվածի:
(1.1-ին կետը լրաց. 16.03.2021 թիվ 88-Ն հրաման)
2. ՈՒժը կորցրած ճանաչել Հայաստանի Հանրապետության արդարադատության նախարարի 2005 թվականի մարտի 1-ի «Հարկադիր կատարողի համազգեստի, ուսանշանների, տարբերանշանների, խորհրդանշանի նկարագրերը, դրանք կրելու և հատկացնելու կարգը հաստատելու մասին» N 26-Ն հրամանը:
3. Սույն հրամանն ուժի մեջ է մտնում պաշտոնական հրապարակմանը հաջորդող տասներորդ օրը:
(նախաբանը փոփ. 23.10.2018 թիվ 552-Ն հրաման)
Հավելված 1
ՀՀ արդարադատության նախարարի
2012 թվականի մարտի 7-ի
N 31-Ն հրամանի
ՆԿԱՐԱԳԻՐԸ ՀԱՐԿԱԴԻՐ ԿԱՏԱՐՈՂԻ ՀԱՄԱԶԳԵՍՏԻ, ՏԱՐԲԵՐԱՆՇԱՆՆԵՐԻ, ԽՈՐՀՐԴԱՆՇԱՆԻ
(վերնագիրը փոփ. 16.03.2021 թիվ 88-Ն հրաման)
1. ԾԱՌԱՅՈՂԱԿԱՆ ՀԱՄԱԶԳԵՍՏ
1.1 Գլխարկը սև կտորից է, սև թավշյա գլխարկաբոլորքով, գլխարկագագաթի և գլխարկաբոլորքի եզրով ոսկեգույն (դեղնավուն), 2,5 մմ եզրաշերտով: Գլխարկաբոլորքի վրա երկու ոսկեգույն կոճակներով ամրացվում է ցանցահյուսազարդով երկշերտ հյուսված կապը (քուղը) և ոսկեգույն գլխարկանշանը: Գլխարկանշանը` ոսկեգույն, կաղնու տերևներով երիզված Հարկադիր կատարումն ապահովող ծառայության խորհրդանշանի պատկերով, ամրացվում է գլխարկի կենտրոնում: Գլխարկահովհարը սև է, լաքապատ:
Գեներալ-մայորի գլխարկահովհարի արտաքին մակերեսի վրա, առջևի մասում, երկու կողմից ոսկեզօծ թելերով ասեղնագործվում են կաղնու ճյուղեր: Գլխարկահովհարից վերև` գլխարկաբոլորքի վրա, բացի ոսկեզօծ լարահյուսից և Հարկադիր կատարումն ապահովող ծառայության ձուլածո ոսկեզօծ խորհրդանշանից, ամրացվում (ասեղնագործվում) է կաղնու ճյուղերի տեսքով երկու համաչափ ոսկեկար զարդ: Գլխարկագագաթին ամրացվում է ՀՀ զինանշանը ոսկեզօծ գործվածքով:
Գեներալ-մայոր կոչում ունեցող աշխատակիցների համար տոնական գլխարկը պողպատագույն է, սև գլխարկաբոլորքով:
Պիլոտկա սև կտորից, բաղկացած է երկարացված հատակի 2 մասից, 2 պատից և կենտրոնական մասում իրար վրա ծալվող 2 փեշիկից: Վերծալված եզրակարերը դեղին, ձախ կողմում 3 օդանցք: Առջևի կենտրոնական մասում ամրացվում է Հարկադիր կատարումն ապահովող ծառայության խորհրդանշանը:
Կեպի բամբակյա սև կտորից, բաղկացած է թասակից և երկարացված գլխարկահովհարից: Երկու կողմից ունի օդանցքեր: Առջևի կենտրոնական մասում ամրացվում է Հարկադիր կատարումն ապահովող ծառայության խորհրդանշանը ոսկեգույն կաղնու տերևներով երիզված:
1.2 Տարազաբաճկոն (Ձև 1 կցվում է): Արդարադատության լեյտենանտից-կապիտան կոչում ունեցող աշխատակիցների համար միակոճկուն է` Հայաստանի Հանրապետության զինանշանի պատկերով 4 ոսկեգույն կոճակներով, մարմինը կիսագրկող, հարթ մակերեսներով, հետծալված օձիքով և սովորական երկկարանի թևքերով, թիկնամասի ներքևում` կտրվածքով: Տարազաբաճկոնը աջ և ձախ կողմերից ունենում է կափույրով ծածկվող կտրվածքով գրպաններ, իսկ կրծքի ձախ մասում` կտրվածքով գրպան: Արդարադատության մայորից-գնդապետ կոչում ունեցող աշխատակիցների համար` երկփեղկանի, երեք կոճականի տարազաբաճկոն, թիկնամասի ներքևում` առանց կտրվածքի: Արդարադատության լեյտենանտից-գնդապետ տարազաբաճկոնի օձիքի վրա ամրացվում է Արդարադատության նախարարության խորհրդանշանը: Գեներալ-մայոր կոչում ունեցող աշխատակիցների ամենօրյա տարազաբաճկոնը կարվում է սև գույնի գաբարդինից:
Արդարադատության լեյտենանտից-գնդապետ կոչում ունեցող աշխատակիցներինը` սև կտորից է: Տարազաբաճկոնի օձիքը և թևածալքերը` ոսկեգույն (դեղնավուն) եզրաշերտով է` 2,5 մմ լայնությամբ թևածալքերի վրա երեք կոճակով:
Գեներալ-մայոր կոչում ունեցող աշխատակիցների համար կարվում է նաև տոնական տարազաբաճկոն` պողպատագույն գաբարդինից (Ձև 3 կցվում է): Գեներալ-մայորի տարազաբաճկոնի օձիքը և թևածալքերը ոսկեգույն եզրաշերտով է 2,5 մմ լայնությամբ: Օձիքին և թևածալքերին ոսկեզօծ թելով ասեղնագործված են կաղնու ճյուղեր:
Հանովի ուսադիրներով բաճկոնը (Ձև 1 կցվում է) սև գույնի կտորից է, մետաքսյա աստառով: Առջևի մասում կոճկվում է կայծակաճարմանդով (շղթա) 4 կոճակով կոճկվող գաղտնակար հանգույցով: Թիկնամասը և լանջափեշերը կրծքամասում և թևքերը թեզանիքներով կտրվածքով, միացման տեղերով անցնում է 2,5 մմ լայնքով դեղին երիզ (կանտ), 2 ներկարված կողային գրպան: Բաճկոնի ուսերին տեղադրված են ուսադիրների ամրակներ, ուսադիրները հանովի: Գեներալ-մայորի բաճկոնի օձիքը դեղին 2.5 մմ եզրաշերտով է: Օձիքի վրա ասեղնագործվում է ոսկեզօծ թելերով կաղնու ճյուղեր (Ձև 3 կցվում է):
1.3 Ազատթող փողքերով տաբատը սև կտորից է, ուղիղ, առանց ծալքերի, ոսկեգույն (դեղնավուն) եզրաշերտով: Գեներալ-մայոր կոչում ունեցող աշխատակիցների համար տաբատի վրա եզրաշերտից 5 մմ հեռավորությամբ կարվում է նաև մուգ կարմրավուն վրակարվածք` 22 մմ լայնությամբ շերտով, տաբատի ողջ երկայնքով (Ձև 3 կցվում է):
1.4 Կոշիկները (կիսակոշիկները) սև են, քրոմակաշվե, իսկ գեներալ-մայոր կոչում ունեցող աշխատակիցներինը` այծակաշվե (շևրոյե):
1.5. Վերնաշապիկը սպիտակ է, կոշտ օձիքով: Որպես ամառային համազգեստ տարազաբաճկոնի և բաճկոնի փոխարեն տրվում է վերնաշապիկ` երկար ու կարճ թևքերով, և կարճ թևքերով շապիկ: Փողկապը սև գույնի է, դեղին ամրակով, երկարությունը` 55-57 սմ, պատրաստի տեսքը ավարտվում է ներքևում սուր անկյունով, վերևում` մշտական հանգույցով: Հանգույցից 70 մմ ներքև ոսկեգույն է: Կանացին` երկթև բանտ է, թևերը 10 սմ երկարությամբ, 4.5 սմ լայնությամբ, 450 բացվածքով:
1.5.1. Շապիկ սպիտակ կարճաթև. տրիկոտաժից (60-70 % բամբակյա), հանովի կոշտ ուսադիրների ամրակով, առաձգական օձիքով: Առջևի մասում ունի բացվածք, որը կոճկվում է 3 սպիտակ կոճակներով: Շապիկի փեշերը երկտակ առաձգական գործվածքով է: Ձախ կրծքավանդակին 14.5 սմ x 12 սմ չափսերով, ներսից կոճկվող (կոճակը չերևացող) ներկարված գրպանով: ՈՒսադիրների մասը պատված սպիտակ կտորով: Կանանց շապիկը կոճկվում է ձախ: Կարճաթևք վերնաշապիկի և շապիկի բացվածքի վերին մասը` 5-7 սմ, չի կոճկվում:
1.5.2. Շապիկ կիսաբրդյա. ձմեռային` սև գույնի, ուսերը և թևքերի արմունկի մասը պատված են սև կտորով: Օձիքը շրջանաձև բացվածքով, հավաքովի գործվածքով: Ձախ կրծքավանդակին շերտակարով վրադիր կափույրով գրպան` 14.5 սմ x 12 սմ չափսերով: Հանովի, կտորից ուսադիրները` մեկ կոճակով կոճկվող ուսադիրների համար լեզվակով: Գրպանի և ուսադիրների լեզվակի կոճակները սև մետաղական են:
1.5.3. Շապիկ բամբակյա (60-70 %) - գարնանային - աշնանային, օձիքը շրջանաձև բացվածքով:
Ձմեռային, աշնանային և ամառային շապիկների փեշերը և թևքերի փեղկը երկտակ է և առաձգական-ձգվող: Գարնանային-աշնանային շապիկը կրում են միայն բաճկոնի հետ:
1.6 Կիսավերարկու աշնանային-ձմեռային (Ձև 2 կցվում է) սև անջրանցիկ (անջրաթափանց) կտորից, ուղիղ ուրվագծով, ձախ լանջափեշը 5 կոճակով կոճկվող գաղտնակար հանգույցով, հանվող տաք ներդիրով, որն ամրացվում է կայծակաճարմանդով, արհեստական մորթուց հանովի օձիքով և գլխանոցով: Թիկնամասը և լանջափեշերը կրծքամասում կտրվածքով: Միացման տեղով անցնում է 2.5 մմ լայնքով դեղին երիզ: Թևքերը երկկարանի: Երկու լանջափեշի վրա թեք ներկարված գրպաններ: Աստառը մետաքսյա, ձախ կողմում ծոցագրպան: Գոտկատեղում և ներքևում թաքնված գոտկապարան: Հանվող ուսադիրներով:
Կանանց համար տարազաբաճկոնի և կիսավերարկուի ձևը նույնն է, կոճկվում է դեպի ձախ, տրվում են կիսաշրջազգեստ տաբատ և կոշիկներ:
Համազգեստի ձախ թևքին կարվում է ծառայության խորհրդանշանը, աջ թևքին` Հանրապետության դրոշը:
Գեներալ-մայոր կոչում ունեցող աշխատակիցները կրում են նաև երկփեղկանի վերարկու 3 զույգ ոսկեգույն կոճակներով, բնական կարակուլե օձիքով, թիկնամասի ներքևում կտրվածքով, սև գույնի դրապից, իսկ տոնականը` կարվում է պողպատագույն կտորից: ՈՒսադիրները` կարվող: Վերարկուի օձիքը և լանջափեշերը 2.5 մմ դեղնավուն եզրաշերտով է (Ձև 3 կցվում է):
1.7 ՈՒսադիրները կրում են վերնաշապիկի, տարազաբաճկոնի, բաճկոնի, կիսավերարկուի և վերարկուի վրա: Օձիքների անկյունում (բացի վերնաշապիկից և բաճկոնից) տեղադրվում է Արդարադատության նախարարության խորհրդանշանը 30 մմ երկարությամբ, 20 մմ լայնությամբ:
1.8. Կարճաթև կիսաբամբակյա գործվածքով շապիկ (Ձև 7-ը կցվում է): Գույնը` մոխրագույնի և սևի համադրություն, սևը կազմում է շապիկի բարձրության 3/5-րդ մասը, մոխրագույնը` 2/5-րդ մասը: Բաղադրությունը` նվազագույնը 50% բամբակյա թելից, առավելագույնը 50% ակրիլ թելից: Քաշը 1 մ2 համար ոչ պակաս, քան 180 գրամ+-2%: Ձախ թևին եզրագծից 3 սմ-ից հետ կարվում է ասեղնագործված Հարկադիր կատարումն ապահովող ծառայության թևքանշանը, աջ թևին կարվում է ասեղնագործված Հայաստանի Հանրապետության քարտեզը` համապատասխան մարզի սահմաններով ընդգծված, թևերը ավարտվում են ծալվածքով, թևերի եզրից գործված է 3 սմ հաստության սև գույնի գիծ, որի ստորին հատվածի գործվածքից 10 մմ հաստությամբ անցնում է մոխրագույն 10 մմ գործվածքով գիծ` հանովի ուսանշաններով: Աջ կրծքավանդակին կարվում է ասեղնագործված «ՀԿԱԾ» գրվածքով կրծքանշան: Ձախ կրծքավանդակին կարվում է ասեղնագործված համապատասխան ծառայողի անուն ազգանունը: Օձիքը` ծալովի. կրծքամասում` 3 կոճակ, օձիքի բարձրությունը ծալված վիճակում 3.5 սմ, որից 15 մմ-ը մոխրագույն եզրագիծ:
Փաթեթավորումը` պոլիէթիլենային թափանցիկ մեծ պարկով, որի մեջ տեսականին 5 հատ` պոլիէթիլենային թափանցիկ պարկերով, մեկ պարկի մեջ` 1 հատ: Պարկերը պիտակավորված, պիտակների վրա պետք է նշված լինի տեսականու անվանումը, քանակը, չափսը, արտադրող կազմակերպության անվանումը, արտադրման տարեթիվը: Չափսերը համաձայնեցնել պատվիրատուի հետ:
Անհրաժեշտության դեպքում պատվիրատուի պահանջով տրամադրվում է լաբորատոր ստուգման եզրակացությունը:
1.8.1 Տաբատը սև գույնի ռեպ-ստոպ կտորից, նվազագույնը 50% բամբակ, առավելագույնը 50% պոլիեսթեր, 210գ+-2%: Ուղիղ կարվածքով, մշակված գոտիով, գուլֆիկը գաղտնի կոճկվածքով, պլաստմասե շղթայով: Առաջնամասում կողքից թեք ներկարված գրպաններ: Գոտին մշակված է 7 գոտեմակ օղակով և գոտու չափը կարգավորող ձգված էլաստիկ ժապավենով: Կողքերից մշակված են պլաստմասե շղթայով փոքր կափույրով ներսից գրպաններ: Հետևից մշակված են պլաստմասե շղթայով փոքր կափույրով ներսից գրպաններ: Կանանց համար նախատեսված տաբատը կոճկվում է աջից ձախ: Փաթեթավորումը` ստվարաթղթե արկղերով կամ պոլիէթիլենային թափանցիկ պարկերով, արկղերի (պարկերի) մեջ մինչև 20 հատ, տեսականին պոլիէթիլենային թափանցիկ պարկերով, մեկ պարկի մեջ` 1 հատ: Արկղերը` պիտակավորված, պիտակների վրա պետք է նշված լինի տեսականու անվանումը, քանակը, չափսը, արտադրող կազմակերպության անվանումը, արտադրման տարեթիվը:
Անհրաժեշտության դեպքում Պատվիրատուի պահանջով տրամադրվում է լաբորատոր ստուգման եզրակացություն:
1.8.2 Կեպի ամառային (Ձև 8-ը կցվում է): Կեպին սև գույնի կտորից է: Կտորը` բամբակյա 100%, 1 քառ. մետր խտությունը 240-260 գրամ բաղադրությամբ: Բաղկացած է թասակից և երկարացված` կոշտ պլաստմասե հովհարից: Թասակը կարերով բաժանված է վեց հավասար մասերի, որոնց մեջտեղում ասեղնագործված են շրջանաձև անցքեր` օդափոխության համար: Թասակի առաջնամասը ներսից կոշտացած սոսնձապատ ժապավենով է կպցված, որը ապահովում է ուղիղ և կլոր տեսք, թասակի ներսում յուրաքանչյուր կարի վրա փակված է նեղ տեքստիլային ժապավեն (ամուր և մաքուր տեսքի համար): Թասակը միացված է գլխահովհարին լայն տիսմայով: Ետևի աջ մասում` մետաղական կարգավորիչ արծաթափայլ գույնով: Թասակի կենտրոնում ամրացված է կլոր կոճակ, որը միացնում է թասակը և ապահովում արտաքին տեսքը: Առջևի կենտրոնական մասում կարվում է 6.5 սմ տրամագծով կլոր ասեղնագործված Հարկադիր կատարումն ապահովող ծառայության նշանը: Գլխարկը պետք է ունենա կլոր թասակ: Նախօրոք նմուշը պետք է ներկայացնել պատվիրատուի հանձնաժողովին, հանձնաժողովի կողմից պետք է հաստատվի և ընդունվի նորմերին համապատասխան կնիքով և չափսերով: Ապրանքների խմբաքանակը հանձնել ներկայացված նմուշների համապատասխան: Փաթեթավորումը` պոլիէթիլենային թափանցիկ 25 հատ պարկերով: Պոլիէթիլային թափանցիկ պարկերը տեղադրել արկղի մեջ: Արկղի վրա նշված լինի տեսականու անվանումը, քանակը, չափսերը, արտադրող կազմակերպության անվանումը, արտադրման տարեթիվը:
Ձև 7
(նկար)
Ձև 8
(նկար)
(1.8-րդ կետը լրաց. 26.07.2023 թիվ 434-Ն հրաման)
1.1. ԳԼԽԱՎՈՐ ՀԱՐԿԱԴԻՐ ԿԱՏԱՐՈՂԻ ԵՎ ԳԼԽԱՎՈՐ ՀԱՐԿԱԴԻՐ ԿԱՏԱՐՈՂԻ ՏԵՂԱԿԱԼԻ ՀԱՄԱԶԳԵՍՏԸ
(1.1-ին գլուխը լրաց. 16.03.2021 թիվ 88-Ն հրաման)
1) Ամենօրյա համազգեստ` բաճկոն, տաբատ, շապիկ, սվիտեր
Բաճկոն` խտությամբ կտորից, կոճկվում է կենտրոնական շղթայով, հետևամասը և առաջամասը վերին կտրվածքով, լանջափեշերի վրա վերևից ուղղահայաց վրադիր գրպաններ են` ուղղանկյուն կափույրներով: Բաճկոնի կողային գրպանները շեղակի կտրվածքով, շղթայով կոճկվող: Օձիքը ծալովի, թևքերը թեզանիքներով, որոնք կոճկվում են երկու կոճակ օղակներով: Բաճկոնը գոտիով է, կողքերից էլաստիկ ժապավենով ձգված: Պատվիրատուի պահանջով բաճկոնը կարող է ունենալ ուսադիրների ամրակցման համար երկու փակօղակներ և երկու կամրջակներ: Գեներալ-մայորի և առավել բարձր կոչում ունեցող վարչական պաշտոն զբաղեցնող անձանց համար` օձիքը ծալովի, որի ծայրին ոսկեգույն ասեղնագործություն է: Ձախ թևի ուսակարից 90 մմ ներքև ջակարդե Հարկադիր կատարումն ապահովող ծառայության տարբերանշանն է, իսկ աջ թևի ուսակարից 90 մմ ներքև ջակարդե Հայաստանի Հանրապետության զինանշանն է:
Ձմեռային բաճկոն` սև գույնի է 65% Պ/Է, 35% բամբակ բաղադրությամբ, 200 գր/մ2 խտությամբ կտորից, տաք ներդիրով: Բաճկոնը կոճկվում է կենտրոնական պլաստմասե շղթայով: Բաճկոնին ամրացված է կարգավորվող գլխանոց: Բաճկոնի ձախ լանջափեշի վերին հատվածում կենտրոնական շղթային զուգահեռ 1.5 սմ հեռավորության վրա` 16 սմ երկարությամբ շղթայով փակվող գրպան է, լանջափեշերի երկու կողային հատվածում կենտրոնական կոճկվող շղթային զուգահեռ պլաստմասե շղթայով փակվող գրպաններ են (22 սմ):
Բաճկոնի թևքերը նեղ թեզանիքներով, էլաստիկ ժապավենով են: Երկու թևքերին` դեպի ներս, ուղղահայաց շղթայով փակվող գրպաններ են, ձախ թևի ուսագլխից 90 մմ ներքև ջակարդե Հարկադիր կատարումն ապահովող ծառայության տարբերանշանն է, իսկ աջ թևի ուսագլխից 90 մմ ներքև ջակարդե Հայաստանի Հանրապետության զինանշանն է:
Բաճկոնը առջևից և հետնամասից վերին կտրվածքով, կենտրոնական կոճկվածքը` շղթայով, ներքևի փեշը` կոճգամով: Բաճկոնի առաջամասի և հետնամասի ներդիրը մշակվում է անջրաթափանց կտորով երկկողմանի մգդակված 200 գր/մ2 խտությամբ սինտիպոնով, իսկ թևքերը և գլխանոցը 120 գր/մ2 խտությամբ սինտիպոնով: Աստառացուն 70 գր/մ2 խտությամբ սև կտորից: Գլխանոցը բաճկոնին ամրանում է շղթայով, գլխանոցի ստորին հատվածում լայնացող վերջավորություններին մշակված են կպչուն ժապավեններ, որոնք կպչում են իրար բաճկոնի կոճկվածքի ուղղությամբ: Բաճկոնի ներքևի փեշի ստորին եզրաշերտի կողային մասերով անցնում են ռետինե էլաստիկ ժապավեններ 3 մմ հաստությամբ էլաստիկ ժապավենները կարգավորվում են պլաստմասե գոտու կարգավորիչներով:
Գլխանոցի առջևի եզրաշերտով անցնում է էլաստիկ քուղ` ծայրերին պլաստմասե բռնակներ, քուղը յուրաքանչյուր կողմից պետք է ունենա 5-6 սմ գլխանոցից դուրս գտնվող հատվածներ: Բաճկոնի կենտրոնական կոճկվող շղթային զուգահեռ լանջափեշերի երկու կողմերում տեղադրվում է 22 սմ պլաստմասե շղթայով փակվող գրպաններ, որոնք ներսի ֆլիսե գործվածքով են կարված, շղթայի գլխիկները էլաստիկ քուղով, ծայրերին պլաստմասե բռնակներ: Բաճկոնի թևքերը նեղ թեզանիքներով, էլաստիկ ժապավենով, թևքի լայնությունը կարգավորող 2,5x10 սմ չափսի կպչունակով: Երկու թևքերի վրա դեպի ներս ուղղահայաց շղթայով փակվող գրպաններ:
Տաբատը` գ/մ2 խտությամբ կտորից, ուրվագիծը` ուղիղ, երկու կողային գրպաններով, հետնամասի վրա կափույրով և կպչունակով փակվող երկու վրադիր գրպան է: Տաբատի կողային գրպաններից 6-7 սմ ներքև տեղադրվում են շղթայով կոճկվող 18-20 սմ լայնությամբ ներկարված գրպաններ: Գոտին երկու կողքերից էլաստիկ ժապավենով ձգվող: Տաբատը շղթայով փակվող, գոտին կոճկվում է կոճակ-օղակով, գոտու վրա 8 հատ գոտեմակ օղակներ են (N 8 ձև, նկար 1, 2): Պատրաստվում է սև 44% բուրդ, 54% պ/ե, 2% լաիկրա բաղադրության, 240 գր/մ2 խտությամբ RIBSTOP կտորից:
Շապիկ ամենօրյա բամբակյա` սև գույնի բամբակյա կտորից, ուղիղ ձևվածքով, կարճաթև (N 8 ձև, նկար 1, 2): Պատրաստվում է սև գույնի 100% բամբակ, 150 գր/մ2 խտությամբ կտորից: Շապիկը արտադրվում է ուղիղ ձևվածքով, կարճաթև, վզամասը մշակված է 2 սմ լայնության տրիկոտաժե մանժետով` եզրագծված 4-5 մմ լայնության կրկնակի զարդակարով:
Շապիկի մեջքամասի վերին եզրի կարի տակից կարվում է չափս-հասակի ստուգիչ պիտակ: Թևքերի և փեշի եզրերը ներծալված և 2 սմ լայնքով և եզրագծված 4-5 մմ լայնության կրկնակի զարդակարով
Սվիտերները սև գործվածքից 50% բամբակ, 50% ակրիլ, 300 գր/մ2 խտությամբ: Օձիքը` շրջանաձև բացվածքով, հավաքովի գործվածքով: Ձախ կրծքավանդակին առկա է շերտակարով, վրադիր կափույրով, կոճկվող գրպան: Ունի ուսադիրների համար նախատեսված լեզվակ: Ուսադիրները կտորից են` հանովի, մեկ կոճակով կոճկվող: Գրպանի և ուսադիրների լեզվակի կոճակները մետաղական են` մուգ մոխրագույն:
Սվիտերի ձախ թևի ուսակարից 90 մմ ներքև ջակարդե Հարկադիր կատարումն ապահովող ծառայության տարբերանշանն է, իսկ աջ թևի ուսակարից 90 մմ ներքև ջակարդե Հայաստանի Հանրապետության զինանշանն է:
2. ԿՈՉՈՒՄՆԵՐԻ ՏԱՐԲԵՐԱՆՇԱՆՆԵՐԸ
Կոչումների տարբերանշաններ են ծառայում կիսափափուկ ուսադիրները (Ձև 4 կցվում է):
ՈՒսադիրն իրենից ներկայացնում է ձգված վեցանկյուն, երկարավուն զուգահեռ կողմերով, որի ներքևի վերջնամասում ուղղանկյուն է, իսկ վերևինը վերջանում է ստորին եզրին զուգահեռ բութանկյուն կտրվածքով: ՈՒսադրի երկարությունը 110-120 մմ է, լայնությունը` 40 մմ, իսկ գեներալ-մայորինը` 45 մմ է: ՈՒսադիրների եզրերը, բացի ստորինից, երիզվում են 2,5 մմ լայնությամբ, ոսկեգույն (դեղնավուն) մահուդե գործվածքով: ՈՒսադիրները պատրաստվում են սև գույնի գործվածքից, մահուդի աստառի վրա: Արդարադատության գնդապետի, փոխգնդապետի, մայորի ուսադիրները 2 ոսկեգույն (դեղնավուն) լուսաշերտով է, իսկ կապիտանի, ավագ լեյտենանտի և լեյտենանտի ուսադիրները 1 ոսկեգույն (դեղնավուն) լուսաշերտով:
2.1 ԳԵՆԵՐԱԼ-ՄԱՅՈՐԻ ՈՒՍԱԴԻՐՆԵՐԸ
ՈՒսադիրները պատրաստվում են սև թելից հատուկ միահյուսվածքով, մահուդի աստառի վրա` առանց լուսաշերտի (Ձև 5 կցվում է): Տոնական բաճկոնի համար` ուսադիրները ոսկեզօծ թելից են, եզրերը (բացի ստորինից) և աստղերը մուգ կարմրավուն եզրաշերտով: Վերնաշապիկի համար ուսադիրները պատրաստվում են ոսկեգույն թելերից:
Արդարադատության գեներալ-մայորի ուսադիրների վրա` 1 ուռուցիկ, ոսկեզօծ հնգաթև աստղ` 22 մմ տրամագծով, ներքևի եզրագծից մինչև աստղի կենտրոնը` 45 մմ հեռավորությամբ: ՈՒսադիրների վերին հատվածում ոսկեզօծ թելերով գործվում է Արդարադատության նախարարության խորհրդանշանը:
ՈՒսադիրներն ամրացվում են մեկական ոսկեզօծ կոճակով:
2.2 ԱՐԴԱՐԱԴԱՏՈՒԹՅԱՆ ԳՆԴԱՊԵՏԻ, ՓՈԽԳՆԴԱՊԵՏԻ, ՄԱՅՈՐԻ, ԿԱՊԻՏԱՆԻ, ԱՎԱԳ
ԼԵՅՏԵՆԱՆՏԻ ԵՎ ԼԵՅՏԵՆԱՆՏԻ ՈՒՍԱԴԻՐՆԵՐԸ (Ձև 4 և 6 կցվում են)
2.2.1 Արդարադատության գնդապետի ուսադիրներին ամրացվում է 3 ոսկեգույն հնգաթև աստղ` 20 մմ տրամագծով (որոնցից 2-ը` լուսաշերտերի վրա, 1-ը` լուսաշերտերի մեջտեղում): Հեռավորությունը ներքևի եզրագծից մինչև 2 աստղերի կենտրոնները` 30 մմ, 2 աստղերի կենտրոնները միացնող գծից մինչև 3-րդ աստղի կենտրոնը` 25 մմ:
2.2.2 Արդարադատության փոխգնդապետի ուսադիրներին ամրացվում է լուսաշերտերի վրա 2 ոսկեգույն հնգաթև աստղ` 20 մմ տրամագծով, հեռավորությունը ներքևի եզրագծից մինչև աստղերի կենտրոնները 30 մմ:
2.2.3 Արդարադատության մայորի ուսադիրներին ամրացվում է 1 ոսկեգույն հնգաթև աստղ 20 մմ տրամագծով լուսաշերտերի մեջտեղում, ներքևի եզրագծից մինչև աստղի կենտրոնը 45 մմ հեռավորությամբ:
2.2.4 Արդարադատության կապիտանի ուսադիրներին ամրացվում են 4 ոսկեգույն աստղ` 13 մմ տրամագծով (որոնցից 2-ը ներքևի եզրագծից 30 մմ, լուսաշերտի երկու կողմերում` աստղերի կենտրոնների միջև 25 մմ հեռավորությամբ, 2-ը` լուսաշերտի վրա, աստղերի կենտրոնները միացնող գծից 25-ական մմ հեռավորության վրա):
2.2.5 Արդարադատության ավագ լեյտենանտի ուսադիրներին` 3 ոսկեգույն աստղ` 13 մմ տրամագծով (որոնցից 2-ը ներքևի եզրագծից` 30 մմ, աստղերի կենտրոնների միջև 25 մմ հեռավորությամբ, 3-րդը` լուսաշերտի վրա, աստղերի կենտրոնները միացնող գծից 25 մմ հեռավորության վրա):
2.2.6 Արդարադատության լեյտենանտի ուսադիրներին` 2 ոսկեգույն աստղ` 13 մմ տրամագծով, ներքևի եզրագծից` 30 մմ, աստղերի կենտրոնների միջև 25 մմ հեռավորությամբ:
ՈՒսադիրները կրում են վերնաշապիկի, տարազաբաճկոնի, բաճկոնի, կիսավերարկուի և վերարկուի վրա: Օձիքների անկյունում (բացի վերնաշապիկից) տեղադրվում է Արդարադատության նախարարության խորհրդանշանը 30 մմ երկարությամբ, 20 մմ լայնությամբ:
ՈՒսադիրներն ամրացվում են մեկական ոսկեգույն կոճակով:
Հանովի ուսադիրների վրա տեղադրվում է նաև Արդարադատության նախարարության խորհրդանշանը:
3. ՀԱՐԿԱԴԻՐ ԿԱՏԱՐՈՒՄՆ ԱՊԱՀՈՎՈՂ ԾԱՌԱՅՈՒԹՅԱՆ ԽՈՐՀՐԴԱՆՇԱՆԸ
3.1. Ծառայության խորհրդանշանը կլոր է, տրամագիծը` 92 մմ. կարվում է վերնաշապիկի, շապիկի, տարազաբաճկոնի, բաճկոնի, կիսավերարկուի և վերարկուի ձախ թևքերին, ուսակարից 70 մմ ներքև:
3.2. Խորհրդանշանի հիմնական տարրը թևերը պարզած ոսկեգույն արծիվն է, որն իր մագիլների մեջ բռնել է սպիտակ սուր: Արծվի առջև գտնվում է բաց երկնագույն գիրք` բացված վիճակում, և սպիտակ նժարներով կշեռք: Արծվի գլխավերևում պատկերված է Արարատ (Մասիս) լեռը: Պատկերը եզրազարդված է ստորին մասի ժապավենից մինչև արծվի թևերը հասնող ոսկեգույն դափնու տերևներով: Ժապավենի վրա գրված է 1998:
3.3. Արտաքին շրջագծում սպիտակ տառերով գրված են. «ՀԱՐԿԱԴԻՐ ԿԱՏԱՐՄԱՆ ԾԱՌԱՅՈՒԹՅՈՒՆ - ՀԱՅԱՍՏԱՆ» բառերը: «ՀԱՅԱՍՏԱՆ» բառն առանձնացված է կետերով:
(1-ին հավելվածը փոփ. 13.02.15 թիվ 53-Ն, 11.09.15 թիվ 465-Ն, 23.10.2018 թիվ 552-Ն հրամաններ)
Հավելված 2
ՀՀ արդարադատության նախարարի
2012 թվականի մարտի 7-ի
N 31-Ն հրամանի
ՀԱՐԿԱԴԻՐ ԿԱՏԱՐՈՂԻ ՀԱՄԱԶԳԵՍՏԸ ԿՐԵԼՈՒ ԵՎ ՀԱՏԿԱՑՆԵԼՈՒ ԿԱՐԳԸ
(վերնագիրը փոփ. 16.03.2021 թիվ 88-Ն հրաման)
._____________________________________________________________________.
| Անվանումը |Քանակը |Կրելու |
| | |ժամկետը|
|_____________________________________________________|_______|_______|
| 1 | 2 | 3 |
|_____________________________________________________________________|
| 1. Գեներալ-մայոր կոչում ունեցողների համար |
|_____________________________________________________________________|
|1. - գլխարկ` կարակուլե բնական մորթուց | 1 հատ| 5 տարի|
|_____________________________________________________|_______|_______|
|2. - գլխարկ` սև | 1 հատ| 3 տարի|
|_____________________________________________________|_______|_______|
|3. - գլխարկ` տոնական պողպատագույն | 1 հատ| 5 տարի|
|_____________________________________________________|_______|_______|
|4. - վերարկու` ձմեռային կարակուլե օձիքով, սև | 1 հատ| 5 տարի|
|_____________________________________________________|_______|_______|
|5. - վերարկու` տոնական պողպատագույն | 1 հատ| 5 տարի|
|_____________________________________________________|_______|_______|
|6. - վերարկու` բրդյա, գարնանային-աշնանային | 1 հատ| 5 տարի|
|_____________________________________________________|_______|_______|
|7. - տարազաբաճկոն` երկփեղկանի, սև գույնի գաբարդինից | 1 հատ| 3 տարի|
|_____________________________________________________|_______|_______|
|8. - տարազաբաճկոն` երկփեղկանի, պողպատագույն տոնական | 1 հատ| 5 տարի|
|_____________________________________________________|_______|_______|
|9. - բաճկոն` սև գույնի | 1 հատ| 3 տարի|
|_____________________________________________________|_______|_______|
|10. - բաճկոն` աշնանային-ձմեռային, սև, անջրանցիկ | 1 հատ| 3 տարի|
|կտորից | | |
|_____________________________________________________|_______|_______|
|11. - տաբատ` սև կտորից | 2 հատ| 2 տարի|
|_____________________________________________________|_______|_______|
|12. - վերնաշապիկ` սպիտակ երկարաթև | 1 հատ| 1 տարի|
|_____________________________________________________|_______|_______|
|12.1. - շապիկ` սպիտակ, կարճաթև, տրիկոտաժից (60-70% | 2 հատ| 2 տարի|
|բամբակյա) | | |
|_____________________________________________________|_______|_______|
|13. - վերնաշապիկ վրադիր` սպիտակ, երկար թևերով | 1 հատ| 1 տարի|
|_____________________________________________________|_______|_______|
|14. - վերնաշապիկ վրադիր` սպիտակ, կարճ թևերով | 2 հատ| 2 տարի|
|_____________________________________________________|_______|_______|
|14.1. - կանանց համար բանտ | 1 հատ| 1 տարի|
|_____________________________________________________|_______|_______|
|15. - փողկապ` սև գույնի | 1 հատ| 2 տարի|
|_____________________________________________________|_______|_______|
|16. - վզպատ թաշկինակ` սև գույնի | 1 հատ| 2 տարի|
|_____________________________________________________|_______|_______|
|17. - վզպատ թաշկինակ` սպիտակ | 1 հատ| 2 տարի|
|_____________________________________________________|_______|_______|
|18. - կոշիկ` սև, այծակաշվե (շևրոյե) |1 զույգ| 2 տարի|
|_____________________________________________________|_______|_______|
|19. - կսիաճտկավոր կոշիկ (ձմեռային) |1 զույգ| 2 տարի|
|_____________________________________________________________________|
| 2. Լեյտենանտից-գնդապետ կոչում ունեցողների համար |
|_____________________________________________________________________|
|1. - գլխարկ` բնական մորթուց սև գույնի (գնդապետինը` | 1 հատ| 5 տարի|
| կարակուլե) | | |
|_____________________________________________________|_______|_______|
|2. - գլխարկ` սև գույնի | 1 հատ| 3 տարի|
|_____________________________________________________|_______|_______|
|3. - կեպի` բամբակյա, ամառային սև կտորից | 1 հատ| 2 տարի|
| ոսկեգույն կաղնու տերևներով | | |
|_____________________________________________________|_______|_______|
|3.1 - կեպի` բամբակյա, ամառային սև կտորից | 1 հատ| 2 տարի|
|_____________________________________________________|_______|_______|
|4. - պիլոտկա` սև կտորից (կանանց համար) | 1 հատ| 2 տարի|
|_____________________________________________________|_______|_______|
|5. - տարազաբաճկոն` երկփեղկանի, սև կտորից (գլխավոր | 1 հատ| 3 տարի|
|խմբի համար) | | |
|_____________________________________________________|_______|_______|
|6. - տարազաբաճկոն` միակոճկուն, սև կտորից (առաջատար | 1 հատ| 3 տարի|
|խմբի համար) | | |
|_____________________________________________________|_______|_______|
|7. - բաճկոն` սև կտորից (հանովի ուսադիրներով) | 1 հատ| 2 տարի|
|_____________________________________________________|_______|_______|
|8. - կիսավերարկու (աշնանային, ձմեռային) սև, | 1 հատ| 3 տարի|
|անջրանցիկ կտորից, արհեստական մորթուց օձիքով | | |
|_____________________________________________________|_______|_______|
|9. - շապիկ` սև գույնի, կիսաբրդյա, հարթ գործվածքով, | 1 հատ| 1 տարի|
|օձիքը կլոր կտրվածքով, երկարաթև, ուսադիրների | | |
|ամրակներով | | |
|_____________________________________________________|_______|_______|
|9.1. - շապիկ` սև գույնի, բամբակյա (60 %-70% բամբակի | 1 հատ| 2 տարի|
|պարունակությամբ), հարթ գործվածքով, օձիքը կլոր | | |
|կտրվածքով, երկարաթև | | |
|_____________________________________________________|_______|_______|
|9.2. - Կարճաթև կիսաբամբակյա գործվածքով շապիկ | 2 հատ| 2 տարի|
|_____________________________________________________|_______|_______|
|10. - տաբատ` սև կտորից` ոսկեգույն (դեղնագույն) | 2 հատ| 2 տարի|
| եզրաշերտով | | |
|_____________________________________________________|_______|_______|
|10.1.- Տաբատ սև գույնի ռեպ-ստոպ կտորից | 2 հատ| 2 տարի|
|_____________________________________________________|_______|_______|
|11. - կիսաշրջազգեստ (կանանց համար) | 1 հատ| 1 տարի|
|_____________________________________________________|_______|_______|
|12. - վերնաշապիկ վրադիր, սպիտակ, երկար թևերով | 2 հատ| 2 տարի|
|_____________________________________________________|_______|_______|
|13. - վերնաշապիկ վրադիր, սպիտակ, կարճ թևերով | 2 հատ| 1 տարի|
|_____________________________________________________|_______|_______|
|14. - փողկապ` սև գույնի | 1 հատ| 1 տարի|
|_____________________________________________________|_______|_______|
|15. - վզպատ թաշկինակ` սև գույնի | 1 հատ| 2 տարի|
|_____________________________________________________|_______|_______|
|16. - կոշիկ` սև (քրոմակաշվե) |1 զույգ| 2 տարի|
|_____________________________________________________|_______|_______|
|17. - կիսաճտքավոր կաշիկ (ձմեռային) |1 զույգ| 2 տարի|
._____________________________________________________________________.
Խորհրդանշանը, գլխարկանշանը, ուսադիրները, աստղերը մեծ և փոքր, կոճակները մեծ և փոքր, երկշերտ հյուսված կապը (քուղը) տրվում են ծառայողական համազգեստի առարկաների քանակությանը համապատասխան, հաշվի առնելով կրելու ժամկետները:
(2-րդ հավելվածը փոփ. 13.02.15 թիվ 53-Ն, 11.09.15 թիվ 465-Ն, 23.10.2018 թիվ 552-Ն, 16.03.2021 թիվ 88-Ն, 26.07.2023 թիվ 434-Ն հրամաններ)
_____________________________________
ԻՐՏԵԿ - համազգեստների և ուսադիրների
Ձև 1 - Ձև 6 ձևերը չեն բերվում
(ձևերը փոփ. 11.09.15 թիվ 465-Ն հրաման)