(ուժը կորցրել է 13.07.2023 թիվ 724-Ն հրաման)
i
329.0095.150403
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«15» 04 2003 Թ.
ՊԵՏԱԿԱՆ ԳՐԱՆՑՄԱՆ ԹԻՎ 32903121
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ՄԱՔՍԱՅԻՆ ՊԵՏԱԿԱՆ ԿՈՄԻՏԵ ՀՐԱՄԱՆ
23 դեկտեմբերի 2002 թվականի N 02/95
i
ՎԵՐԱԴԱՍ ՄԱՔՍԱՅԻՆ ՄԱՐՄՆԻ ԾԱՌԱՅՈՂԱԿԱՆ ՔՆՆՈՒԹՅՈՒՆՆԵՐ ԱՆՑԿԱՑՆՈՂ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ
«Մաքսային ծառայության մասին» Հայաստանի Հանրապետության օրենքի 46-րդ հոդվածի առաջին մասին համապատասխան
ՀՐԱՄԱՅՈՒՄ ԵՄ`
Հաստատել «Վերադաս մաքսային մարմնի ծառայողական քննություններ անցկացնող հանձնաժողովի կանոնադրությունը» համաձայն հավելվածի:
Հավելված
Հայաստանի Հանրապետության
կառավարությանն առընթեր
մաքսային պետական կոմիտեի
նախագահի 2002 թվականի
դեկտեմբերի 23-ի N 02/95 հրամանի
ԿԱՆՈՆԱԴՐՈՒԹՅՈՒՆ ՎԵՐԱԴԱՍ ՄԱՔՍԱՅԻՆ ՄԱՐՄՆԻ ԾԱՌԱՅՈՂԱԿԱՆ ՔՆՆՈՒԹՅՈՒՆՆԵՐ ԱՆՑԿԱՑՆՈՂ ՀԱՆՁՆԱԺՈՂՈՎԻ
1. Վերադաս մաքսային մարմնի ծառայողական քննություններ անցկացնող հանձնաժողովը (այսուհետ` Հանձնաժողով) «Մաքսային ծառայության մասին» Հայաստանի Հանրապետության օրենքով սահմանված ծառայողական քննություն իրականացնող մարմին է:
2. Հանձնաժողովը ղեկավարվում է «Մաքսային ծառայության մասին» Հայաստանի Հանրապետության օրենքով, այլ իրավական ակտերով, ինչպես նաև սույն կանոնադրությամբ:
3. Հանձնաժողովի խնդիրներն են`
ա) իր իրավասության սահմաններում մաքսային ծառայողի պաշտոնի նկարագրով սահմանված մաքսային ծառայողի կողմից պարտականությունների և լիազորությունների խախտման, թերացման, չկատարման կամ գերազանցման դեպքերի ուսումնասիրությունը և բացահայտումը,
բ) ծառայողական քննության անցկացման ընթացքում անաչառության ապահովումը,
գ) ապահովել Հայաստանի Հանրապետության օրենսդրության անշեղ կատարումը:
4. Հանձնաժողովը պարտավոր է`
ա) ապահովել անձանց իրավունքների և օրինական շահերի պահպանումը,
բ) օգտագործել անձանց մասին տեղեկությունները բացառապես ծառայողական նպատակներով,
գ) օրենքով նախատեսված դեպքերում համապատասխան նյութերը ներկայացնել ըստ պատկանելիության` դրանց հետագա ընթացքը լուծելու համար:
5. Հանձնաժողովն իրավունք ունի`
ա) սահմանված կարգով և դեպքերում մաքսային ծառայողից պահանջելու բացատրություններ և այլ նյութեր կապված ծառայողական քննության հետ,
բ) իրականացնելու ուսումնասիրություններ և պահանջելու ծառայողական քննության հետ կապված անհրաժեշտ տեղեկություններ, տեղեկանքներ, փաստաթղթեր կամ դրանց պատճենները,
գ) ուսումնասիրության ընթացքում, անհրաժեշտության դեպքում, սահմանված կարգով ներգրավելու մասնագետների և փորձագետների:
6. Հանձնաժողովն իր աշխատանքները կազմակերպում է նիստերի միջոցով: Հանձնաժողովի նիստերն իրավազոր են Հանձնաժողովի անդամների առնվազն կեսից ավելիի մասնակցության դեպքում:
7. Հանձնաժողովի որոշումներն ընդունվում են քվեարկությանը մասնակցած անդամների կեսից ավելի կողմ ձայներով: Ձայների հավասարության դեպքում հանձնաժողովի նախագահի ձայնը համարվում է որոշիչ:
8. Հանձնաժողովը սահմանված կարգով անցկացված ծառայողական քննության արդյունքների հիման վրա վերադաս մաքսային մարմնի ղեկավարին է ներկայացնում եզրակացություն:
9. Հանձնաժողովի նախագահը`
ա) ղեկավարում է Հանձնաժողովի աշխատանքը,
բ) վարում է Հանձնաժողովի նիստերը,
գ) կազմակերպում է ծառայողական քննության անցկացումը,
դ) իրականացնում է ծառայողական քննության աշխատանքների հսկողությունը,
ե) իրականացնում է սույն կանոնադրությամբ և այլ իրավական ակտերով իր իրավասությանը վերապահված այլ լիազորություններ:
10. Հանձնաժողովի անդամը`
ա) վարում է նիստերը` Հանձնաժողովի նախագահի հանձնարարությամբ,
բ) իրականացնում է ծառայողական քննություններ,
գ) մասնակցում է Հանձնաժողովի նիստերին,
դ) իրականացնում է սույն կանոնադրությամբ և այլ իրավական ակտերով իր իրավասությանը վերապահված այլ լիազորություններ:
11. Հանձնաժողովի կողմից ընդունված որոշումները կարող են բողոքարկվել Հայաստանի Հանրապետության օրենսդրությամբ սահմանված կարգով: