ՀԱՄԱՁԱՅՆԱԳԻՐ ՀՀ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅԱՆ ԵՎ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅԱՆ ԵՎ ՉՈՐԱՅԻՆ ԳՈՏԻՆԵՐՈՒՄ ԳՅՈՒՂԱՏՆՏԵՍԱԿԱՆ ՀԵՏԱԶՈՏՈՒԹՅՈՒՆՆԵՐԻ ՄԻՋԱԶԳԱՅԻՆ ԿԵՆՏՐՈՆԻ

(ICARDA) ՄԻՋԵՎ ԳՅՈՒՂԱՏՆՏԵՍԱԿԱՆ ԳԻՏՈՒԹՅՈՒՆՆԵՐԻ ՈԼՈՐՏՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Չորային գոտիներում գյուղատնտեսական հետազոտությունների միջազգային կենտրոնը (այսուհետ` ICARDA) և Հայաստանի Հանրապետության գյուղատնտեսության նախարարությունը, /այսուհետ` Գյուղատնտեսության նախարարություն/, այսուհետ` Կողմեր,

առաջնորդվելով գյուղատնտեսական գիտությունների ոլորտում փոխադարձ համագործակցության զարգացման անհրաժեշտությամբ,

համոզված լինելով, որ գյուղատնտեսական գիտությունների ոլորտում համագործակցությունը կնպաստի գյուղատնտեսության առաջընթացին, հողերի բերրիությանը և մշակաբույսերի ու կենդանիների արդյունավետության բարձրացմանը,

Հայաստանում գյուղատնտեսության արդյունավետության բարձրացման, բույսերի և կենդանիների գենետիկական ռեսուրսների պահպանության և շրջակա միջավայրի պաշտպանության, գյուղատնտեսական գիտության ոլորտում արտասահմանյան ներդրումների ներգրավման, միջազգային ժամանակակից միջոցների օգտագործման, գիտական կադրերի պատրաստման ուղղություններով ICARDA-ի և Հայաստանի Հանրապետության գյուղատնտեսության նախարարության համագործակցությունը կազմակերպելու նպատակով,

պայմանավորվեցին ներքոհիշյալի մասին.

ՀՈԴՎԱԾ 1

Արդյունավետ համագործակցություն հաստատելու նպատակով Կողմերը կիրագործեն`

ա) գիտնականների, մասնագետների և առաջավոր տեխնոլոգիաների փոխանակում,

բ) Հայաստանի Հանրապետությունում գործող օրենսդրության և Կենսաբանական բազմազանության մասին միջազգային կոնվենցիայի համապատասխան սերմերի և սելեկցիոն նյութերի փոխանակում,

գ) գիտական գրականության, տեղեկատվության և մեթոդաբանության փոխանակում,

դ) համատեղ գիտահետազոտական ծրագրերի ապահովման նպատակով սարքավորումների ներկրում և արտահանում:

ՀՈԴՎԱԾ 2

Կողմերի միջև հատուկ պայմանավորվածությունների համաձայն` կադրային և բյուջետային հնարավորությունների սահմաններում ICARDA-ն կտրամադրի`

ա) ICARDA-ի հաստիքային և միջազգային այլ գիտահետազոտական կենտրոնների աշխատողների խորհրդատվություն Հայաստանի ազգային գիտական հետազոտությունների մակարդակը բարձրացնելու և օգնություն ցուցաբերելու համար,

բ) արտասահմանյան գիտնականների երկարաժամկետ գործուղումներ Հայաստան, եթե դա անհրաժեշտ և իրագործելի է համատեղ ծրագրերի համար,

գ) գիտնականների կարճաժամկետ այցելություններ,

դ) ֆինանսական աջակցություն` Հայաստանի տարբեր ազգային հաստատությունների գիտնականների ուսուցման, ինչպես նաև համաժողովներին, սեմինարներին և գիտաժողովներին նրանց մասնակցության համար,

ե) անհրաժեշտ քանակի սերմանյութ` փորձեր, լայնածավալ արտադրական փորձարկումներ և ցուցադրումներ կազմակերպելու համար,

զ) գիտահետազոտական գրականություն և հրապարակումներ:

ՀՈԴՎԱԾ 3

Հայաստանի Հանրապետության գյուղատնտեսության նախարարությունը կադրային և բյուջետային հնարավորությունների սահմաններում կտրամադրի`

ա) հետազոտական գործունեության նպատակով փոխադարձ համաձայնությամբ իրականացվող ծրագրերի կատարման համար անհրաժեշտ հարմարություններ և հողեր,

բ) գիտական և անհրաժեշտ տեխնիկական աշխատակազմ` փոխադարձ համաձայնությամբ իրագործվող ծրագրերի համար,

գ) ICARDA ծրագրերի իրագործման հետ կապված անձնակազմի, վերապատրաստվողների և սովորողների մուտքը Հայաստան ապահովող ընթացակարգեր և հարմարություններ,

դ) միջազգային կանոնակարգերի և Հայաստանի Հանրապետության գործող օրենսդրության պահանջների պահպանմամբ` ICARDA-ի հետ համատեղ ծրագրերի իրագործման նպատակով Հայաստանի Հանրապետություն սաղմնային պլազմայի անսահմանափակ ներկրման և արտահանման թույլտվություն:

Հայաստանի Հանրապետության կառավարությունը ապահովում է նյութերի արագ և անհապաղ ստուգումը:

ՀՈԴՎԱԾ 4

Երկու Կողմերը կարող են զարգացնել փոխադարձ հետաքրքրություն ներկայացնող հետազոտությունների ոլորտում համատեղ ծրագրերին հնարավոր դոնորների աջակցությունը:

ՀՈԴՎԱԾ 5

Կողմերը համաձայնում են, որ`

ա) համատեղ ջանքերով ստեղծված օգտակար արդյունքները, ինչպիսիք են բարելավված սելեկցիոն նյութը, տեխնիկական մշակումները և մեթոդները, Կողմերը իրավասու են օգտագործել հավասարապես,

բ) հասարակական հետաքրքրություն ներկայացնող հետազոտական արդյունքները տպագրվում են համատեղ համաձայնությամբ:

ՀՈԴՎԱԾ 6

Սույն Համաձայնագրում երկու Կողմերի համաձայնությամբ, կարող են փոփոխություններ և լրացումներ կատարվել: Փոփոխությունները ձևակերպվում են առանձին արձանագրություններով, հանդիսանում են սույն Համաձայնագրի անբաժանելի մասը և ուժի մեջ են մտնում սույն Համաձայնագրի ուժի մեջ մտնելու համար նախատեսված կարգով:

ՀՈԴՎԱԾ 7

Սույն Համաձայնագիրն ուժի մեջ կմտնի այն օրվանից, երբ հայկական Կողմը կծանուցի ICARDA-ին դրա ուժի մեջ մտնելու համար անհրաժեշտ ներպետական ընթացակարգերի կատարման մասին:

Սույն Համաձայնագիրը կնքվում է հինգ տարի ժամկետով և ինքնաբերաբար կերկարաձգվի նույն ժամկետով, եթե Համաձայնագրի գործողության ժամկետի ավարտից 6 ամիս առաջ Կողմերից որևէ մեկը գրավոր չծանուցի մյուս Կողմին դրա գործողությունը դադարեցնելու իր մտադրության մասին:

Կատարված է Հալեպ քաղաքում 1999 թվականի սեպտեմբերի 16-ին, երկու բնօրինակով, յուրաքանչյուրը` հայերեն և անգլերեն, ընդ որում երկու տեքստերն էլ հավասարազոր են:

Համաձայնագիրն ուժի մեջ է մտել 2000 թվականի ապրիլի 10-ից: