040.1722.181204
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«18» դեկտեմբերի 2004 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
4 նոյեմբերի 2004 թվականի N 1722-Ա
ԳՈՒՅՔ ՕՏԱՐԵԼՈՒ ՄԱՍԻՆ
i
«Պետական ոչ առևտրային կազմակերպությունների մասին» Հայաստանի Հանրապետության օրենքի 5-րդ հոդվածին և Հայաստանի Հանրապետության կառավարության 2003 թվականի հունիսի 13-ի N 882-Ն որոշմանը համապատասխան` Հայաստանի Հանրապետության կառավարությունը որոշում է.
1. «Թենիսի օլիմպիական հերթափոխի մանկապատանեկան մարզադպրոց» պետական ոչ առևտրային կազմակերպությունից հետ վերցնել նրան անհատույց օգտագործման իրավունքով ամրացված գույքը, այդ թվում` 1705 քառ. մետր մակերես ունեցող վարչական շենքն իր ավտոտնակներով, 19 կառուցվածք և փոխանցող հարմարանք (մեկ կենտրոնական խաղահրապարակ` իր տրիբունաներով, մեկ շվաքարան, 14 խաղահրապարակ, 3 տրիբունա), 30 մեքենա և սարքավորում, 22 արտադրական-տնտեսական գույք, գործիք և այլն (այսուհետ` գույք):
2. Թույլատրել Հայաստանի Հանրապետության կառավարությանն առընթեր պետական գույքի կառավարման վարչությանը սույն որոշման 1-ին կետում նշված գույքն ուղղակի վաճառքի ձևով օտարել հավանական գնորդ «Կինետիկ» սահմանափակ պատասխանատվությամբ ընկերությանը (այսուհետ` գնորդ):
3. Գույքի վաճառքի գինը սահմանել Հայաստանի Հանրապետության կառավարության 1998 թվականի մարտի 27-ի N 209 որոշմամբ հաստատված կարգով գնահատված արժեքի չափով` 12,267 մլն դրամ:
4. Սահմանել, որ գնորդը պարտավոր է`
ա) սույն որոշումն ուժի մեջ մտնելու օրվանից մեկամսյա ժամկետում «Պետական սեփականություն համարվող հիմնական միջոցների (ֆոնդերի) օտարումից մուտքեր» գանձապետական հաշվին վճարել սույն որոշման 3-րդ կետով սահմանված գումարը.
բ) իր միջոցների հաշվին վճարել անշարժ գույքի վաճառքից ծագող գույքային իրավունքների պետական գրանցման և գույքի արժեքի որոշման հետ կապված վճարներն ու տուրքերը.
գ) միջազգային չափանիշներին համապատասխան մարզակառույցներ ստեղծելու նպատակով մարզադպրոցի շենքերի, շինությունների վերանորոգման և վերակառուցման, ինչպես նաև մարզագույքի ձեռքբերման համար 3 տարվա ընթացքում կատարել 800000 ԱՄՆ-ի դոլարին համարժեք դրամի չափով ներդրում` հետևյալ համամասնություններով`
1-ին տարում` 200000 ԱՄՆ-ի դոլարին համարժեք դրամ,
2-րդ տարում` 300000 ԱՄՆ-ի դոլարին համարժեք դրամ,
3-րդ տարում` 300000 ԱՄՆ-ի դոլարին համարժեք դրամ.
դ) պահպանել մարզադպրոցի գործունեության պրոֆիլը, իսկ Համահայկական խաղերի անցկացման ժամանակ մարզակառույցները տրամադրել անվճար:
5. Հայաստանի Հանրապետության կառավարությանն առընթեր պետական գույքի կառավարման վարչության պետին` երկամսյա ժամկետում գնորդի հետ կնքել առուվաճառքի պայմանագիր:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2004 ԹՎԱԿԱՆԻ ՆՈՅԵՄԲԵՐԻ 23-ԻՆ